ಐಎನ್ಎಸ್ ತ್ರಿಖಂಡ್ ಕಾರ್ಯಚರಣೆ: ಹಡಗಿನ ಹೈಜಾಕ್ ಗೆ ಮುಂದಾಗಿದ್ದವರಿಗೆ ಮಾರ್ಕೋಸ್ ಶಾಕ್

ನವದೆಹಲಿ: ಜಾಗತಿಕ ಮಟ್ಟದಲ್ಲಿ ಅತ್ಯಂತ ಬಲಿಷ್ಠ ದೇಶವಾಗಿ ಹೊರಹೊಮ್ಮುತ್ತಿರುವ ಭಾರತಕ್ಕೆ ಯಾವುದರ ಕೊರತೆಯೂ ಇಲ್ಲ ಎಂಬುದನ್ನು ನಮ್ಮ ಸಶಸ್ತ್ರ ಪಡೆಗಳು ಮತ್ತೊಮ್ಮೆ ಸಾಬೀತುಪಡಿಸಿವೆ. ಭಾರತದ ಭೂಸೇನೆ, ವಾಯುಪಡೆ ಹಾಗೂ ನೌಕಾಪಡೆಗಳು ಜಗತ್ತಿನಲ್ಲೇ ಅತ್ಯಂತ ಬಲಿಷ್ಠ ಬಲವನ್ನು ಹೊಂದಿದ್ದು, ಇದೀಗ ಕಡಲ ಗರ್ಭದಲ್ಲಿ ಭಾರತೀಯ ನೌಕಾಪಡೆಯ ಶೌರ್ಯ ಮತ್ತೊಮ್ಮೆ ಅನಾವರಣಗೊಂಡಿದೆ.

ಏಡನ್ ಗಲ್ಫ್ ನಲ್ಲಿ ಹಡಗಿನ ಮೇಲೆ ಕಡಲ್ಗಳ್ಳರ ದಾಳಿ:

ಮುಖ್ಯವಾದ ಸರಕುಗಳನ್ನು ಹೊತ್ತು ಸಾಗುತ್ತಿದ್ದ ‘ಎಂ.ವಿ. ಗೋಲ್ಡನ್ ಆರ್ಸೆನಲ್’ (MV Golden Arsenal) ಹೆಸರಿನ ಹಡಗಿನ ಮೇಲೆ ಏಡನ್ ಗಲ್ಫ್ ಜಲಪ್ರದೇಶದಲ್ಲಿ ಹಠಾತ್ ದಾಳಿ ನಡೆದಿದೆ. ಅಪರಿಚಿತ ಸಶಸ್ತ್ರ ಕಡಲ್ಗಳ್ಳರು ಹಡಗನ್ನು ಹೈಜಾಕ್ ಮಾಡಲು ಮುಂದಾದಾಗ, ಭಾರತೀಯ ನೌಕಾಪಡೆ ಭರ್ಜರಿ ಕಾರ್ಯಾಚರಣೆ ನಡೆಸುವ ಮೂಲಕ ಕಡಲ್ಗಳ್ಳರನ್ನು ಹಿಮ್ಮೆಟ್ಟಿಸುವಲ್ಲಿ ಯಶಸ್ವಿಯಾಗಿದೆ.

ಮಾರಕಾಸ್ತ್ರಗಳೊಂದಿಗೆ ಬಂದಿದ್ದ ಸೋಮಾಲಿಯಾ ಕಳ್ಳರು:

ಹಡಗಿನ ಮೇಲೆ ದಾಳಿ ಮಾಡಿದ್ದ ಕಡಲ್ಗಳ್ಳರು ರಾಕೆಟ್ ಲಾಂಚರ್ಗಳು (Rocket Launchers) ಮತ್ತು ಸ್ವಯಂಚಾಲಿತ ಗನ್ಗಳು ಸೇರಿದಂತೆ ಅತ್ಯಂತ ಅಪಾಯಕಾರಿ ಆಧುನಿಕ ಆಯುಧಗಳನ್ನು ಹೊಂದಿದ್ದರು ಎಂಬ ಭಯಾನಕ ವಿಚಾರ ಬೆಳಕಿಗೆ ಬಂದಿದೆ. ಕಡಲ್ಗಳ್ಳರು ಹಡಗನ್ನು ವಶಪಡಿಸಿಕೊಳ್ಳಲು ಬರುತ್ತಿರುವುದನ್ನು ಅರಿತ ಸರಕು ಸಾಗಣೆ ನೌಕೆಯ ಸಿಬ್ಬಂದಿಗಳು ತಕ್ಷಣವೇ ಹಡಗಿನ ಒಳಗಿದ್ದ ರಹಸ್ಯ ಸುರಕ್ಷಿತ ಕೊಠಡಿಯಲ್ಲಿ (Safe House/Citadel) ಅಡಗಿ ಕುಳಿತುಕೊಂಡಿದ್ದರು. ಇದೇ ವೇಳೆ ಹಡಗಿನ ನಾವಿಕ (ಕ್ಯಾಪ್ಟನ್) ತಕ್ಷಣವೇ ಭಾರತೀಯ ನೌಕಾಪಡೆಗೆ ತುರ್ತು ಸಂದೇಶ ರವಾನಿಸಿ ಹೈಜಾಕ್ ಯತ್ನದ ಕುರಿತು ಮಾಹಿತಿ ನೀಡಿದ್ದರು.

ಅಲರ್ಟ್ ಆದ ನೌಕಾಪಡೆ, ರಂಗಪ್ರವೇಶ ಮಾಡಿದ ಮಾರ್ಕೋಸ್:

ಸಂದೇಶ ಸಿಗುತ್ತಿದ್ದಂತೆ ತಕ್ಷಣವೇ ಕಾರ್ಯಪ್ರವೃತ್ತರಾದ ಭಾರತೀಯ ನೌಕಾಪಡೆಯ ಅಧಿಕಾರಿಗಳು, ಯುದ್ಧನೌಕೆ ‘ಐಎನ್ಎಸ್ ತ್ರಿಕಾಂಡ್’ (INS Trikand) ಮತ್ತು ಹೆಲಿಕಾಪ್ಟರ್ಗಳ ಮೂಲಕ ಕಾರ್ಯಾಚರಣೆ ಆರಂಭಿಸಿದರು. ಕತ್ತಲೆಯಲ್ಲಿ ಹೈಜಾಕ್ ಆಗಿದ್ದ ಹಡಗಿನ ಸುತ್ತಲೂ ಹೆಲಿಕಾಪ್ಟರ್ ಮೂಲಕ ಶೋಧಕ ದೀಪಗಳನ್ನು (Search Lights) ಬೀರಿ ಸನ್ನಿವೇಶವನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಲಾಯಿತು. ಹಡಗಿನೊಳಗೆ ಭಾರತೀಯ ಸಿಬ್ಬಂದಿ ಸುರಕ್ಷಿತವಾಗಿದ್ದಾರೆ ಎಂಬುದನ್ನು ಖಚಿತಪಡಿಸಿಕೊಂಡ ನೌಕಾಪಡೆಯು, ತನ್ನ ಅತ್ಯಂತ ಘಾತಕ ಕಮಾಂಡೋ ಪಡೆಯಾದ ‘ಮಾರ್ಕೋಸ್’ (MARCOS – Marine Commandos) ಪಡೆಯನ್ನು ಕಣಕ್ಕಿಳಿಸಿತು.

ಮಾರ್ಕೋಸ್ ಆರ್ಭಟಕ್ಕೆ ದಿಕ್ಕಾಪಾಲಾಗಿ ಓಡಿದ ಕಳ್ಳರು:

ಭಾರತದ ಅತ್ಯಂತ ಬಲಿಷ್ಠ ಮತ್ತು ಕ್ರೂರ ಕಮಾಂಡೋ ಪಡೆಯಾದ ‘ಮಾರ್ಕೋಸ್’ ಹಡಗಿನತ್ತ ಧಾವಿಸುತ್ತಿರುವ ವಿಚಾರ ತಿಳಿಯುತ್ತಿದ್ದಂತೆ ಕಡಲ್ಗಳ್ಳರ ತಂಡ ಬೆದರಿ ಹೋಗಿದೆ. “ಜೀವವಿದ್ದರೆ ಎಂದಾದರೂ ಮತ್ತೊಂದು ಹಡಗನ್ನು ದೋಚಬಹುದು” ಎಂದು ಹೆದರಿದ ಸೋಮಾಲಿಯಾದ ಕಡಲ್ಗಳ್ಳರು, ಹಡಗನ್ನು ದೋಚುವ ಸಾಹಸ ಕೈಬಿಟ್ಟು ತಾವು ಬಂದಿದ್ದ ದೋಣಿಗಳ ಮೂಲಕವೇ ಸದ್ದಿಲ್ಲದೆ ಅಲ್ಲಿಂದ ಕಾಲ್ಕಿತ್ತಿದ್ದಾರೆ.

ಅಂತರರಾಷ್ಟ್ರೀಯ ಸಮುದ್ರ ಮಾರ್ಗಗಳಲ್ಲಿ ಈ ರೀತಿಯ ಕಡಲ್ಗಳ್ಳತನದ ಯತ್ನಗಳು ಹಲವು ಬಾರಿ ನಡೆಯುತ್ತಿರುತ್ತವೆಯಾದರೂ, ಭಾರತೀಯ ನೌಕಾಪಡೆ ಇಂತಹ ಸವಾಲುಗಳನ್ನು ಸಮರ್ಥವಾಗಿ ಎದುರಿಸುತ್ತಾ ಬಂದಿದೆ. ಸದ್ಯ ಮಾರ್ಕೋಸ್ ಕಮಾಂಡೋಗಳ ರಕ್ಷಣೆಯೊಂದಿಗೆ, ಸರಕು ಹೊತ್ತ ಆ ಹಡಗು ಭಾರತದ ತೂತುಕುಡಿ (Tuticorin) ಬಂದರಿನತ್ತ ಸುರಕ್ಷಿತವಾಗಿ ಪ್ರಯಾಣ ಬೆಳೆಸಿದೆ ಎಂದು ಮೂಲಗಳು ತಿಳಿಸಿವೆ.