ದೆಹಲಿ (ಜುಲೈ 10) ಸರ್ಕಾರಿ ಸ್ವಾಮ್ಯದ ಟೆಲಿಕಾಂ ಸಂಸ್ಥೆ ಬಿಎಸ್ಎನ್ಎಲ್ (BSNL), ಮೊಬೈಲ್ ನೆಟ್ವರ್ಕ್ ತಲುಪದ ಪ್ರದೇಶಗಳಲ್ಲೂ ಸಂಪರ್ಕ ಒದಗಿಸುವ ಸ್ಯಾಟಲೈಟ್ ಫೋನ್ ಅನ್ನು ಬಿಡುಗಡೆ ಮಾಡಿದೆ ಇದರ ಒಟ್ಟು ಬೆಲೆ ₹1,34,166 (ತೆರಿಗೆ ಸೇರಿ). ಈ ಹ್ಯಾಂಡ್ಸೆಟ್, ಮೊಬೈಲ್ ಟವರ್ಗಳು ಲಭ್ಯವಿಲ್ಲದ ದೂರದ ಹಾಗೂ ಕಠಿಣ ಭೂಪ್ರದೇಶಗಳಲ್ಲಿ ಧ್ವನಿ ಕರೆ ಮತ್ತು SMS ಸಂಪರ್ಕಕ್ಕಾಗಿ ವಿನ್ಯಾಸಗೊಳಿಸಲಾಗಿದೆ.
ಸಾಮಾನ್ಯ ಮೊಬೈಲ್ ಫೋನ್ಗಳಂತೆ ಹತ್ತಿರದ ಸೆಲ್ಯುಲರ್ ಟವರ್ಗಳನ್ನು ಅವಲಂಬಿಸುವ ಬದಲು, ಈ ಸ್ಯಾಟಲೈಟ್ ಫೋನ್ ನೇರವಾಗಿ ಉಪಗ್ರಹ ಜಾಲದೊಂದಿಗೆ ಸಂಪರ್ಕ ಸಾಧಿಸುತ್ತದೆ. ಇದರ ಮೂಲಕ ಪರ್ವತ ಪ್ರದೇಶಗಳು, ಸಮುದ್ರ, ಮರುಭೂಮಿ, ಗಡಿ ಭಾಗಗಳು, ಗಣಿಗಾರಿಕಾ ಪ್ರದೇಶಗಳು ಹಾಗೂ ಪ್ರಕೃತಿ ವಿಕೋಪಗಳಿಂದ ಭೂಮಿಯ ಟೆಲಿಕಾಂ ಜಾಲ ಹಾನಿಗೊಳಗಾಗಿರುವ ಪ್ರದೇಶಗಳಲ್ಲೂ ಇದರ ಮೂಲಕ ಸಂಪರ್ಕ ಸಾಧ್ಯವಾಗುತ್ತದೆ.
BSNL ಸ್ಯಾಟಲೈಟ್ ಫೋನ್ ಹೇಗೆ ಕೆಲಸ ಮಾಡುತ್ತದೆ?
ಸಾಮಾನ್ಯ ಮೊಬೈಲ್ ಫೋನ್ಗಳು ಕರೆ ಮತ್ತು ಡೇಟಾ ಸಂಪರ್ಕಕ್ಕಾಗಿ ಭೂಮಿಯ ಮೇಲಿನ ಮೊಬೈಲ್ ಟವರ್ಗಳಿಗೆ ಸಂಪರ್ಕಿಸುತ್ತವೆ. ಆದರೆ ಸ್ಯಾಟಲೈಟ್ ಫೋನ್ ನೇರವಾಗಿ ಸಂವಹನ ಉಪಗ್ರಹಕ್ಕೆ ಸಂಪರ್ಕ ಹೊಂದುತ್ತದೆ. ಹೀಗಾಗಿ ಟವರ್ ಇಲ್ಲದ ಸ್ಥಳದಲ್ಲಿಯೂ ಈ ಮೊಬೈಲ್ ಮೂಲಕ ಕರೆ ಮಾಡಬಹುದು ಅಥವಾ ಸಂದೇಶ ಕಳುಹಿಸಬಹುದು. ವಿಶೇಷವಾಗಿ ವಿಪತ್ತು ಸಂದರ್ಭಗಳಲ್ಲಿ, ಉದಾಹರಣೆಗೆ ಪ್ರವಾಹ, ಭೂಕಂಪ, ಚಂಡಮಾರುತ ಮುಂತಾದ ಸಂದರ್ಭಗಳಲ್ಲಿ ಭೂಮಿಯ ಜಾಲ ಸಂಪೂರ್ಣ ವಿಫಲವಾದರೂ ಈ ಫೋನ್ ತುರ್ತು ಸಂವಹನ ಸಾಧನವಾಗಿ ಕಾರ್ಯನಿರ್ವಹಿಸಬಲ್ಲದು.
ಬಿಎಸ್ಎನ್ಎಲ್ ಪ್ರಕಾರ, ಈ ಹ್ಯಾಂಡ್ಸೆಟ್ ಅನ್ನು ಇನ್ಮಾರ್ಸಾಟ್ (Inmarsat) ಸೇರಿ ಜಾಗತಿಕ ಉಪಗ್ರಹ ಜಾಲ ಪೂರೈಕೆದಾರರ ಸಹಭಾಗಿತ್ವದಲ್ಲಿ ಅಭಿವೃದ್ಧಿಪಡಿಸಲಾಗಿದೆ. ಈ ಸೇವೆಯನ್ನು ಮುಖ್ಯವಾಗಿ ರಕ್ಷಣಾ ಪಡೆಗಳು, ಸಮುದ್ರ ಕಾರ್ಯಾಚರಣೆ ಸಿಬ್ಬಂದಿ, ವಿಪತ್ತು ಪ್ರತಿಕ್ರಿಯೆ ತಂಡಗಳು, ಗಣಿಗಾರಿಕೆ ಕಂಪನಿಗಳು, ದೂರದ ಪ್ರದೇಶಗಳಲ್ಲಿ ಕೆಲಸ ಮಾಡುವ ಸಿಬ್ಬಂದಿ ಮತ್ತು ಸಾಹಸ ಪ್ರವಾಸಿಗರು ಬಳಸುವಂತೆ ಉದ್ದೇಶಿಸಲಾಗಿದೆ.
ಭಾರತದಲ್ಲಿ ಯಾರು ಖರೀದಿಸಬಹುದು?
ಭಾರತದಲ್ಲಿ ಸ್ಯಾಟಲೈಟ್ ಫೋನ್ ಖರೀದಿಸಲು ಅಥವಾ ಬಳಸಲು ದೂರಸಂಪರ್ಕ ಇಲಾಖೆ (DoT) ಯ ಸ್ಪಷ್ಟ ಅನುಮತಿ ಅಗತ್ಯ. ವಿದೇಶದಿಂದ ಅನಧಿಕೃತವಾಗಿ ಸ್ಯಾಟಲೈಟ್ ಫೋನ್ ಖರೀದಿಸಿ ಭಾರತದಲ್ಲಿ ಬಳಸಲು ಅವಕಾಶ ಇರುವುದಿಲ್ಲ. ಭಾರತದಲ್ಲಿ ಉಪಗ್ರಹ ಸಂವಹನ ಸೇವೆಗಳು ಸರ್ಕಾರ ಅನುಮೋದಿಸಿದ ಜಾಲ ಮತ್ತು ಸಾಧನಗಳ ಮೂಲಕವೇ ಕಾರ್ಯನಿರ್ವಹಿಸಬೇಕು.
ಬಿಎಸ್ಎನ್ಎಲ್ ಈಗಾಗಲೇ ದೇಶದಲ್ಲಿ ಜಾಗತಿಕ ಉಪಗ್ರಹ ದೂರವಾಣಿ ಸೇವೆ (GSPS) ಪೂರೈಕೆದಾರವಾಗಿದೆ. ಧ್ವನಿ ಕರೆ ಹಾಗೂ SMS ಸೇವೆಗಳನ್ನು ಸಾರ್ವಜನಿಕ ಹಾಗೂ ಖಾಸಗಿ ವಲಯಗಳಿಗೆ ಒದಗಿಸುತ್ತದೆ. ಇರಿಡಿಯಮ್ ಮತ್ತು ತುರಾಯಾ ಮೊದಲಾದ ಅಂತರರಾಷ್ಟ್ರೀಯ ಕಂಪನಿಗಳ ಉಪಗ್ರಹ ಸಾಧನಗಳ ಬಳಕೆಗೂ ಸರ್ಕಾರದ ಪೂರ್ವಾನುಮತಿ ಕಡ್ಡಾಯವಾಗಿದೆ.
ಟವರ್ ತಲುಪದ ಪ್ರದೇಶಗಳಲ್ಲಿ ವಿಶ್ವಾಸಾರ್ಹ ಸಂವಹನ ಅಗತ್ಯವಿರುವ ವಿಶೇಷ ವಲಯಗಳಿಗೆ BSNL ಸ್ಯಾಟಲೈಟ್ ಫೋನ್ ಹೊಸ ಆಯ್ಕೆಯಾಗಿ ಕಾಣಿಸಿಕೊಂಡಿದೆ. ಇದು ತುರ್ತು ಸಮಯದಲ್ಲಿ ಸಹಕಾರಿಯಾಗಲಿದೆ.
