ಚೆನ್ನೈ: ಐಪಿಎಲ್‌ನಲ್ಲಿ ತಮ್ಮ ಅದ್ಭುತ ಪ್ರದರ್ಶನದಿಂದ ಇಡೀ ಕ್ರಿಕೆಟ್ ಜಗತ್ತಿನ ಗಮನ ಸೆಳೆದಿದ್ದ 15 ವರ್ಷದ ಯುವ ಸೆನ್ಸೇಷನ್ ವೈಭವ್ ಸೂರ್ಯವಂಶಿ. ವೈಭವ್ ಸೂರ್ಯವಂಶಿ ಅವರು ಭಾರತ ‘ಎ’ ತಂಡದ ಪರ ಅದ್ಭುತ ಪ್ರದರ್ಶನ ನೀಡಿದ ಬೆನ್ನಲ್ಲೇ ಭಾರತ ಸೀನಿಯರ್ ಟಿ20 ತಂಡಕ್ಕೆ ಆಯ್ಕೆಯಾಗಿದ್ದಾರೆ. ಈ ಮೂಲಕ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಅವರಿಗಿಂತಲೂ ಒಂದು ವರ್ಷ ಮುಂಚಿತವಾಗಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪಾದಾರ್ಪಣೆ ಮಾಡುವ ಅಪರೂಪದ ಸಾಧನೆ ಮಾಡಿದ್ದಾರೆ.
ಎರಡು ದಿನಗಳ ಹಿಂದಷ್ಟೇ ಶ್ರೀಲಂಕಾ ಪ್ರವಾಸದಲ್ಲಿ ಬ್ಯಾಟಿಂಗ್ ಸುನಾಮಿ ಎಬ್ಬಿಸಿದ್ದ ಈ ಬಿಹಾರದ ಹುಡುಗ ಇತ್ತೀಚೆಗೆ ಚೆನ್ನೈಗೆ ಆಗಮಿಸಿದ್ದರು. ಅಲ್ಲಿ ಐರ್ಲೆಂಡ್ ಪ್ರವಾಸಕ್ಕೆ ಸಜ್ಜಾಗುತ್ತಿರುವ ಭಾರತ ಟಿ20 ತಂಡದ ಆಟಗಾರರು ತಂಗಿದ್ದ ಹೋಟೆಲ್‌ನಲ್ಲಿ ಸೋಮವಾರ ಸಂಜೆ ಒಂದು ಅಪರೂಪದ, ಹೃದಯಸ್ಪರ್ಶಿ ಘಟನೆ ನಡೆಯಿತು. ಈ ಭಾವುಕ ಕ್ಷಣವೀಗ ಸಾಮಾಜಿಕ ಜಾಲತಾಣಗಳಲ್ಲಿ ಕ್ರಿಕೆಟ್ ಪ್ರೇಮಿಗಳ ಮನಗೆದ್ದಿದೆ.
ಸೋಮವಾರ ಸಂಜೆ ಸೂರ್ಯವಂಶಿ ತಂಗಿದ್ದ ತಮ್ಮ ಹೋಟೆಲ್‌ಗೆ ರಾಘವೇಂದ್ರ ದಿವಗಿ ಭೇಟಿ ನೀಡಿದ್ರು. ಸೂರ್ಯವಂಶಿ ಬಾಗಿಲು ತೆರೆದಾಗ ಎದುರಿಗೆ ನಿಂತಿದ್ದು ಭಾರತ ಕ್ರಿಕೆಟ್ ತಂಡದ ಅಪ್ರತಿಮ ಥ್ರೋಡೌನ್ ಸ್ಪೆಷಲಿಸ್ಟ್ ರಾಘವೇಂದ್ರ ದಿವಗಿ. ರಾಘವೇಂದ್ರ ದಿವಗಿ ಅವರನ್ನ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ ಸೇರಿದಂತೆ ಟೀಮ್ ಇಂಡಿಯಾದ ಪ್ರತಿಯೊಬ್ಬ ಆಟಗಾರನೂ ಅತ್ಯಂತ ಗೌರವದಿಂದ ಕಾಣುತ್ತಾರೆ. ತನಗಿಂತ 25 ವರ್ಷ ಕಿರಿಯನಾದ ವೈಭವ್‌ಗೆ ರಾಘವೇಂದ್ರ ಕೈಮುಗಿಯುತ್ತಿದ್ದಂತೆ, ಅಷ್ಟೇ ನಯ-ವಿನಯದಿಂದ ಕೈಮುಗಿದ ಸೂರ್ಯವಂಶಿ ತಕ್ಷಣ ರಾಘವೇಂದ್ರ ಅವರ ಕಾಲು ಮುಟ್ಟಿ ನಮಸ್ಕರಿಸಿದರು. ಈ ಸಣ್ಣ ಘಟನೆಯೇ ಟೀಮ್ ಇಂಡಿಯಾದಲ್ಲಿ ರಾಘವೇಂದ್ರ ಸಂಪಾದಿಸಿರುವ ಅಪಾರ ಗೌರವಕ್ಕೆ ಸಾಕ್ಷಿಯಾಗಿದೆ.
ಜರ್ಸಿ ಕೈಯಲ್ಲಿ ಹಿಡಿದು ಕಣ್ಣೀರಿಟ್ಟ ವೈಭವ್ ಸೂರ್ಯವಂಶಿ
ರಾಘವೇಂದ್ರ ಅವರು ವೈಭವ್ ಸೂರ್ಯವಂಶಿ ಅವರಿಗಾಗಿ ಭಾರತ ತಂಡದ ನಂ.3 (Number 3) ಜರ್ಸಿಯನ್ನು ತಂದಿದ್ದರು. 150 ಕೋಟಿ ಜನಸಂಖ್ಯೆಯ ದೇಶದಲ್ಲಿ ಕೇವಲ 15 ಮಂದಿ ಆಯ್ಕೆಯಾಗುವ ತಂಡದಲ್ಲಿ, ಕೇವಲ 15ನೇ ವಯಸ್ಸಿಗೆ ತಮ್ಮ ದೇಶದ ಜರ್ಸಿ ಕೈಸೇರಿದಾಗ ವೈಭವ್ ಪೂರ್ಣವಾಗಿ ಭಾವುಕರಾಗಿಬಿಟ್ಟರು. “ನನಗಾಗುತ್ತಿರುವ ಖುಷಿಯನ್ನು ಪದಗಳಲ್ಲಿ ವಿವರಿಸಲು ಸಾಧ್ಯವಿಲ್ಲ. ಇದಕ್ಕಾಗಿಯೇ ನಾನು ಬ್ಯಾಟ್ ಹಿಡಿದಿದ್ದೆ, ಮೈದಾನಕ್ಕೆ ಹೋಗುತ್ತಿದ್ದೆ. ನನ್ನ ಜೀವನದ ಅತಿದೊಡ್ಡ ಕನಸು ಇಂದು ನನಸಾಗಿದೆ” ಎಂದು ವೈಭವ್ ಹೇಳಿದ್ದಾರೆ.
15ನೇ ವಯಸ್ಸಿಗೇ ಟೀಂ ಇಂಡಿಯಾ ಎಂಟ್ರಿ!
ಐಪಿಎಲ್‌ನಲ್ಲಿ ಅಬ್ಬರಿಸಿ, ಭಾರತ ಅಂಡರ್-19 ಹಾಗೂ ಭಾರತ ‘ಎ’ ತಂಡಗಳ ಪರ ಅದ್ಭುತ ಶತಕಗಳನ್ನು ಗಳಿಸಿರುವ ವೈಭವ್ ಸೂರ್ಯವಂಶಿ ಈಗ ಭಾರತ ಸೀನಿಯರ್ ತಂಡದ ಅಧಿಕೃತ ಆಟಗಾರ. ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಭಾರತ ಪರ ಮೊದಲ ಪಂದ್ಯವಾಡಿದ್ದು 16ನೇ ವಯಸ್ಸಿಗೆ. ಆದರೆ, ಈ ಬಿಹಾರದ ಹುಡುಗ 15ನೇ ವಯಸ್ಸಿಗೇ ಟಿ20 ಸೀನಿಯರ್ ತಂಡಕ್ಕೆ ಕಾಲಿಟ್ಟು ಅಸಾಮಾನ್ಯ ಸಾಧನೆ ಮಾಡಿದ್ದಾನೆ.
ನೆಟ್ಸ್‌ನಲ್ಲಿ ಸೂರ್ಯವಂಶಿಗೆ ಅಗ್ನಿಪರೀಕ್ಷೆ!
ಭಾರತ ಸೀನಿಯರ್ ತಂಡವನ್ನ ಸೇರಿರೋ ಸೂರ್ಯವಂಶಿ ಅವರಿಗೆ ನೆಟ್ಸ್‌ನಲ್ಲಿ ನಿಜವಾದ ಅಗ್ನಿಪರೀಕ್ಷೆ ಎದುರಾಗಲಿದೆ. ಅಲ್ಲಿ ಅವರು ಇದೇ ರಾಘವೇಂದ್ರ ದಿವಗಿ ಅವರನ್ನು ಎದುರಿಸಿ ನಿಲ್ಲಬೇಕು. ವಿರಾಟ್ ಕೊಹ್ಲಿ ಇಂದು ವಿಶ್ವಶ್ರೇಷ್ಠ ಬ್ಯಾಟ್ಸ್ಮನ್ ಆಗಲು ರಾಘವೇಂದ್ರ ಅವರ ಕೊಡುಗೆ ಅಪಾರ ಎಂದು ಸ್ವತಃ ವಿರಾಟ್ ಅವರೇ ಒಪ್ಪಿಕೊಂಡಿದ್ದಾರೆ.
ಆಸ್ಟ್ರೇಲಿಯಾ, ದಕ್ಷಿಣ ಆಫ್ರಿಕಾದ ಬೌನ್ಸಿ ಟ್ರ್ಯಾಕ್‌ಗಳಲ್ಲಿ ಭಾರತೀಯ ಬ್ಯಾಟರ್‌ಗಳು ಧೂಳೆಬ್ಬಿಸಲು ರಾಘವೇಂದ್ರ ನೆಟ್ಸ್‌ನಲ್ಲಿ ಗಂಟೆಗೆ 150 ಕಿ.ಮೀ.ನಿಂದ 164 ಕಿ.ಮೀ. ವೇಗದಲ್ಲಿ ಎಸೆಯುವ ‘ಬೆಂಕಿ ಚೆಂಡುಗಳೇ’ ಕಾರಣ!. ಇಲ್ಲಿಯವರೆಗೆ ಬುಮ್ರಾ, ರಬಾಡ, ಪ್ಯಾಟ್ ಕಮಿನ್ಸ್ ರಂತಹ ದೈತ್ಯರನ್ನು ಎದುರಿಸಿರುವ ಸೂರ್ಯವಂಶಿ ಅವರಿಗೆ ನೆಟ್ಸ್‌ನಲ್ಲಿ ರಾಘವೇಂದ್ರ ಎಸೆಯುವ ಥ್ರೋಡೌನ್‌ಗಳನ್ನು ಎದುರಿಸುವುದೇ ದೊಡ್ಡ ಪಾಠವಾಗಲಿದೆ. ವೈಭವ್ ಸೂರ್ಯವಂಶಿ ಅವರ ಈ ಸಾಧನೆ ಭಾರತೀಯ ಕ್ರಿಕೆಟ್‌ನ ಹೊಸ ಅಧ್ಯಾಯವನ್ನು ಬರೆಯುತ್ತಿದೆ. 15ನೇ ವಯಸ್ಸಿನಲ್ಲಿ ರಾಷ್ಟ್ರೀಯ ತಂಡದ ಜರ್ಸಿ ಧರಿಸುವ ಅಪರೂಪದ ಗೌರವ ಪಡೆದಿರುವ ಈ ಯುವ ಪ್ರತಿಭೆ, ಮುಂದಿನ ದಿನಗಳಲ್ಲಿ ಭಾರತೀಯ ಕ್ರಿಕೆಟ್‌ನ ಹೊಸ ಭರವಸೆಯಾಗಲಿದ್ದಾರೆ.
