ನಟಿ ಮಹಿರಾ ಶರ್ಮಾ ಜೊತೆ ಕ್ರಿಕೆಟಿಗ ಸಿರಾಜ್ ಡೇಟಿಂಗ್? ವಿಡಿಯೋ ವೈರಲ್

ಮೊಹಮ್ಮದ್ ಸಿರಾಜ್ ಅವರು ಐಪಿಎಲ್ 2025ರ ಮೆಗಾ ಹರಾಜಿನ ಮೂಲಕ ಗುಜರಾತ್ ಟೈಟಾನ್ಸ್ ತಂಡ ಸೇರಿಕೊಂಡು, ತಮ್ಮ ವೇಗದ ಬೌಲಿಂಗ್‌ನಿಂದ ಮಿಂಚಲು ಸಜ್ಜಾಗಿದ್ದಾರೆ. ಆರ್‌ಸಿಬಿಯಿಂದ ಗುಜರಾತ್‌ಗೆ ಸ್ಥಳಾಂತರಗೊಂಡಿರುವ ಈ ಕ್ರಿಕೆಟಿಗ, ಭಾರತದ ಟಿ20 ತಂಡದಲ್ಲಿ ಮತ್ತೆ ಸ್ಥಾನ ಪಡೆಯುವ ಗುರಿ ಹೊಂದಿದ್ದಾರೆ. ಆದರೆ ಕ್ರೀಡಾ ಸಾಧನೆಯ ಜೊತೆಗೆ, ಇದೀಗ ಸಿರಾಜ್ ಅವರ ವೈಯಕ್ತಿಕ ಬದುಕಿನ ಸುದ್ದಿಯೇ ಸೋಶಿಯಲ್ ಮೀಡಿಯಾದಲ್ಲಿ ಟ್ರೆಂಡಿಂಗ್ ಆಗಿದೆ.

“ಬಿಗ್ ಬಾಸ್ ಬ್ಯೂಟಿ” ಎಂದೇ ಖ್ಯಾತರಾದ ನಟಿ ಮಹಿರಾ ಶರ್ಮಾ ಜೊತೆ ಸಿರಾಜ್ ಪ್ರೇಮ ಪ್ರಣಯದಲ್ಲಿದ್ದಾರೆ ಎಂಬ ವದಂತಿ ಹರಡುತ್ತಿದೆ. ಇತ್ತೀಚೆಗೆ ಮುಂಬೈನ ಒಂದು ಪ್ರತಿಷ್ಠಿತ ರೆಸ್ಟೋರೆಂಟ್ ಹೊರಗೆ ಸಿರಾಜ್ ಮತ್ತು ಮಹಿರಾ ಕಾಣಿಸಿಕೊಂಡ ವಿಡಿಯೋವೊಂದು ವೈರಲ್ ಆಗಿದೆ. ಆದರೆ ಆ ವಿಡಿಯೋದಲ್ಲಿ ಇಬ್ಬರೂ ಒಟ್ಟಿಗೆ ಇಲ್ಲ. ಸಿರಾಜ್ ಅಭಿಮಾನಿಗಳಿಗೆ ಆಟೋಗ್ರಾಫ್ ಕೊಡುತ್ತಿದ್ದರೆ, ಮಹಿರಾ ತನ್ನ ಕಾರಿನ ಕಡೆಗೆ ಹೋಗುತ್ತಿರುವ ದೃಶ್ಯಗಳಿವೆ. ಆದರೂ, ಒಂದೇ ರೆಸ್ಟೋರೆಂಟ್ ನಲ್ಲಿ ಒಂದೇ ಸಮಯದಲ್ಲಿ ಇಬ್ಬರೂ ಇದ್ದುದ್ದೇ ನೆಟ್ಟಿಗರಿಗೆ ಈ ವದಂತಿಗೆ ಸಾಕ್ಷಿಯಾಗಿದೆ.

“ಇಬ್ಬರ ನಡುವೆ ಏನೋ ಇದೆ”, “ಲವ್ ಸ್ಟೋರಿ ಸ್ಟಾರ್ಟ್ ಆಗಿದೆ” ಎಂಬ ಕಮೆಂಟ್‌ಗಳು ಸೋಶಿಯಲ್ ಮೀಡಿಯಾದಲ್ಲಿ ಸುರಿಯುತ್ತಿವೆ. ಈ ಮೊದಲೂ, ಸಿರಾಜ್ ಮತ್ತು ಮಹಿರಾ ಪರಸ್ಪರರ ಇನ್‌ಸ್ಟಾಗ್ರಾಮ್ ಪೋಸ್ಟ್‌ಗಳಿಗೆ ಲೈಕ್ ಮಾಡಿದ್ದು, ಅಭಿಮಾನಿಗಳ ಅನುಮಾನಕ್ಕೆ ಕಾರಣವಾಗಿತ್ತು. ಕಳೆದ ವರ್ಷವೂ ಇದೇ ರೀತಿಯ ವದಂತಿ ಹಬ್ಬಿದಾಗ, ಮಹಿರಾ ಸ್ಪಷ್ಟನೆ ನೀಡಿದ್ದರು. “ನಾನು ಯಾರೊಂದಿಗೂ ಡೇಟಿಂಗ್ ಮಾಡುತ್ತಿಲ್ಲ, ಸುಳ್ಳು ಸುದ್ದಿ ಹಬ್ಬಿಸಬೇಡಿ” ಎಂದು ಹೇಳಿದ್ದರು.

ಆದರೆ ಈ ಬಾರಿಯ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ಸಿರಾಜ್ ಅವರು ಇನ್‌ಸ್ಟಾಗ್ರಾಮ್‌ನಲ್ಲಿ “ಈ ವದಂತಿಗಳಿಗೆ ಯಾವುದೇ ಆಧಾರವಿಲ್ಲ” ಎಂದು ಪೋಸ್ಟ್ ಮಾಡಿದ್ದರು. ಆದರೆ ಕೆಲವೇ ಗಂಟೆಗಳಲ್ಲಿ ಅದೇ ಪೋಸ್ಟ್ ಅನ್ನು ಅವರು ಡಿಲೀಟ್ ಮಾಡಿದ್ದಾರೆ. ಈ ನಿರಾಕರಣೆ ಪೋಸ್ಟ್‌ನ ಡಿಲೀಟ್ ಆಗಿದ್ದು, ನೆಟ್ಟಿಗರ ಅನುಮಾನವನ್ನು ಮತ್ತಷ್ಟು ಹೆಚ್ಚಿಸಿದೆ. “ಸತ್ಯವನ್ನು ಮುಚ್ಚಿಡಲು ಪ್ರಯತ್ನಿಸುತ್ತಿದ್ದಾರೆ”, “ಪ್ರೀತಿ ವಿಚಾರವಾದರೂ ಏನು ತಪ್ಪು?” ಎಂಬ ಮಾತುಗಳು ಕೇಳಿಬರುತ್ತಿವೆ.

🚨 Mohammed Siraj was spotted with Mahira Sharma at the same cafe.

Their dating rumours have already been circulating since 2024. pic.twitter.com/mWpYwmIAOT

— Tejash (@Tejashyyyyy) March 28, 2026

ಇದೇ ವೇಳೆ, ಮಹಿರಾ ಶರ್ಮಾ ಇನ್ನೂ ಈ ಬಗ್ಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಅವರ ಸೋಶಿಯಲ್ ಮೀಡಿಯಾದಲ್ಲಿ ಸಾಮಾನ್ಯವಾಗಿ ತಮ್ಮ ಫೋಟೋಶೂಟ್, ಕಾರ್ಯಕ್ರಮಗಳ ವಿಡಿಯೋಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ಸಿರಾಜ್ ಕೂಡ ಗುಜರಾತ್ ತಂಡದ ತರಬೇತಿಯಲ್ಲಿ ಮಗ್ನರಾಗಿದ್ದಾರೆ.

ಸಿರಾಜ್ ಅವರ ಅಭಿಮಾನಿಗಳು ಇಬ್ಭಾಗವಾಗಿದ್ದಾರೆ. ಕೆಲವರು “ಖಾಸಗಿ ಬದುಕಿನಲ್ಲಿ ತಲೆಹಾಕಬೇಡಿ” ಎಂದರೆ, ಮತ್ತೆ ಕೆಲವರು “ನಿಜ ತಿಳಿದುಕೊಳ್ಳುವ ಹಕ್ಕಿದೆ” ಎನ್ನುತ್ತಿದ್ದಾರೆ.