ಬೆಂಗಳೂರು: ಐಪಿಎಲ್ ಸೀಸನ್-19ರ ಮಿನಿ ಹರಾಜು ಪ್ರಕ್ರಿಯೆಯು ನಿರೀಕ್ಷೆಯಂತೆಯೇ ಕ್ರಿಕೆಟ್ ಲೋಕದಲ್ಲಿ ಹೊಸ ಸಂಚಲನ ಸೃಷ್ಟಿಸಿದೆ. ಪ್ರಮುಖ ಸ್ಟಾರ್ ಆಟಗಾರರಿಗಿಂತಲೂ ಹೆಚ್ಚಾಗಿ ಯುವ ಪ್ರತಿಭೆಗಳು ಹಾಗೂ ಕೆಲವೊಬ್ಬ ಅನ್ಕ್ಯಾಪ್ಡ್ ಆಟಗಾರರು ದಾಖಲೆ ಮೊತ್ತಕ್ಕೆ ಮಾರಾಟವಾಗುವ ಮೂಲಕ ಎಲ್ಲರನ್ನು ಅಚ್ಚರಿಗೊಳಿಸಿದ್ದಾರೆ.
ಅತ್ಯಂತ ದುಬಾರಿ ಆಟಗಾರ ಗ್ರಿನ್
ಈ ಹರಾಜಿನ ಅತ್ಯಂತ ದೊಡ್ಡ ಹೈಲೈಟ್ ಎಂದರೆ ಆಸ್ಟ್ರೇಲಿಯಾದ ಆಲ್ರೌಂಡರ್ ಕ್ಯಾಮರೂನ್ ಗ್ರೀನ್. ಇವರನ್ನು ಬರೋಬ್ಬರಿ 25.20 ಕೋಟಿ ರೂಪಾಯಿ ನೀಡಿ ಕೊಲ್ಕತ್ತಾ ನೈಟ್ ರೈಡರ್ಸ್ (KKR) ತಂಡ ತನ್ನದಾಗಿಸಿಕೊಂಡಿದೆ. ಆ್ಯಂಡ್ರೆ ರಸೆಲ್ ಅವರ ನಿರ್ಗಮನದಿಂದ ಖಾಲಿಯಿದ್ದ ಸ್ಥಾನವನ್ನು ತುಂಬಲು ಕೆಕೆಆರ್ ಬೃಹತ್ ಮೊತ್ತವನ್ನು ವ್ಯಯಿಸಿದೆ. ಇದರೊಂದಿಗೆ ಕೆಕೆಆರ್ ತಂಡ ಮಥೀಶ ಪತಿರಾನ ಅವರನ್ನೂ 18 ಕೋಟಿ ರೂ.ಗೆ ಖರೀದಿಸಿ ತನ್ನ ಬೌಲಿಂಗ್ ವಿಭಾಗವನ್ನು ಬಲಿಷ್ಠಗೊಳಿಸಿದೆ.
ಸಿಎಸ್ಕೆ ಮಾಸ್ಟರ್ ಪ್ಲಾನ್: ಇಬ್ಬರಿಗೆ ತಲಾ 14.20 ಕೋಟಿ!
ಯಾವಾಗಲೂ ಶಾಂತವಾಗಿ ಹರಾಜಿನಲ್ಲಿ ಪಾಲ್ಗೊಳ್ಳುವ ಚೆನ್ನೈ ಸೂಪರ್ ಕಿಂಗ್ಸ್ (CSK) ಈ ಬಾರಿ ಎಲ್ಲರ ಹುಬ್ಬೇರಿಸುವಂತೆ ಮಾಡಿದೆ. ಯುವ ಆಟಗಾರರಾದ ಪ್ರಶಾಂತ್ ವೀರ್ ಮತ್ತು ಕಾರ್ತಿಕ್ ಶರ್ಮಾ ಎಂಬ ಇಬ್ಬರ ಆಟಗಾರರ ಮೇಲೆ ತಲಾ 14.20 ಕೋಟಿ ರೂಪಾಯಿಗಳ ದೊಡ್ಡ ಮೊತ್ತವನ್ನು ಹೂಡಿಕೆ ಮಾಡಿ ಆಟಗಾರರನ್ನ ತನ್ನದಾಗಿಸಿಕೊಂಡಿದ್ದಾರೆ.
ಆರ್ಸಿಬಿ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ತಂತ್ರ
ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಈ ಬಾರಿ ತಂಡದ ಸಮತೋಲನಕ್ಕೆ ಹೆಚ್ಚಿನ ಒತ್ತು ನೀಡಿದೆ. ಆಟಗಾರ ವೆಂಕಟೇಶ್ ಅಯ್ಯರ್ ಅವರನ್ನು 7 ಕೋಟಿ ರೂ.ಗೆ ಹಾಗೂ ವಿದೇಶಿ ವೇಗಿ ಜಾಕೋಬ್ ಡಫ್ಫಿ ಅವರನ್ನು 2 ಕೋಟಿ ರೂ.ಗೆ ಖರೀದಿಸಿದೆ.
ಇತ್ತ ಡೆಲ್ಲಿ ಕ್ಯಾಪಿಟಲ್ಸ್ ತಂಡವು ಅನುಭವಿ ಡೇವಿಡ್ ಮಿಲ್ಲರ್ (2 ಕೋಟಿ), ಬೆನ್ ಡಕೆಟ್ (2 ಕೋಟಿ) ಹಾಗೂ ಆಕಿಬ್ ದಾರ್ (8.40 ಕೋಟಿ) ಅವರನ್ನು ತಂಡಕ್ಕೆ ಸೇರಿಸಿಕೊಂಡಿದೆ.