ಕೊಲಂಬೊ: ಮಹಿಳಾ ಏಕದಿನ ವಿಶ್ವಕಪ್‌ನಲ್ಲಿ ಭಾರತ ಮತ್ತು ಪಾಕಿಸ್ತಾನ (INDW vs PAKW) ನಡುವಿನ ಹೈವೋಲ್ಟೇಜ್‌ ಪಂದ್ಯಕ್ಕೆ ಅನಿರೀಕ್ಷಿತ ಅಡಚಣೆ ಎದುರಾಯಿತು. ಭಾರತದ ಬ್ಯಾಟಿಂಗ್‌ ಇನಿಂಗ್ಸ್‌ನ ಕೊನೆಯ ಓವರ್‌ಗಳಲ್ಲಿ ಮೈದಾನದ ಫ್ಲಡ್‌ಲೈಟ್‌ಗಳನ್ನು ಆನ್‌ ಮಾಡಿದಾಗ, ಕೀಟಗಳ ದಾಳಿಯಿಂದಾಗಿ ಪಂದ್ಯವನ್ನು 15 ನಿಮಿಷಗಳ ಕಾಲ ಸ್ಥಗಿತಗೊಳಿಸಬೇಕಾಯಿತು. ಕೀಟಗಳ ಈ ಹಾವಳಿಯಿಂದ ಆಟಗಾರ್ತಿಯರು ಗಾಬರಿಗೊಂಡು ಡಗೌಟ್‌ ಕಡೆಗೆ ಓಡಿದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.
ಪಂದ್ಯದ ಕೊನೆಯ ಕ್ಷಣಗಳಲ್ಲಿ ಫ್ಲಡ್‌ಲೈಟ್‌ಗಳಿಂದ ಆಕರ್ಷಿತವಾದ ಕೀಟಗಳು ಮೈದಾನಕ್ಕೆ ನುಗ್ಗಿದವು. ಇದರಿಂದ ಆಟಗಾರ್ತಿಯರಿಗೆ ಕಣ್ಣಿಗೆ ತೊಂದರೆಯಾಗಿ, ಆಟಕ್ಕೆ ತಡೆಯೊಡ್ಡಿತ್ತು. ಗ್ರೌಂಡ್‌ ಸಿಬ್ಬಂದಿಗಳು ಕೀಟಗಳನ್ನು ಓಡಿಸಲು ಹೊಗೆಯನ್ನು ಬಳಸಿ, ಸಮಸ್ಯೆಯನ್ನು ತಾತ್ಕಾಲಿಕವಾಗಿ ನಿಯಂತ್ರಿಸಿದರು. ಈ ಘಟನೆಯ ವಿಡಿಯೊ ಕ್ಲಿಪ್‌ಗಳು ಸೋಶಿಯಲ್‌ ಮೀಡಿಯಾದಲ್ಲಿ ಭಾರೀ ಸಂಚಲನ ಮೂಡಿಸಿವೆ.
ಭಾರತದ ಬ್ಯಾಟಿಂಗ್‌
ಟಾಸ್ ಸೋತು ಮೊದಲು ಬ್ಯಾಟಿಂಗ್‌ಗಿಳಿದ ಭಾರತ ತಂಡ 50 ಓವರ್‌ಗಳಲ್ಲಿ 247 ರನ್‌ಗಳಿಗೆ ಆಲೌಟ್‌ ಆಯಿತು. ಹರ್ಲೀನ್‌ ಡಿಯೋಲ್‌ 46 ರನ್‌, ಜೆಮಿಮಾ ರೋಡ್ರಿಗಸ್‌ 32 ರನ್‌ ಮತ್ತು ರಿಚಾ ಘೋಷ್‌ ಅಜೇಯ 35 ರನ್‌ ಗಳಿಸಿ ತಂಡಕ್ಕೆ ಆಸರೆಯಾದರು. ಆದರೆ, ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಕೇವಲ 19 ರನ್‌ ಗಳಿಸಿ ನಿರಾಸೆ ಮೂಡಿಸಿದರು. ವಿಶ್ವಕಪ್‌ನಲ್ಲಿ ಭಾರತದ ಬ್ಯಾಟಿಂಗ್‌ ಶಕ್ತಿಯಾಗಿ ನಿರೀಕ್ಷಿತವಾಗಿದ್ದ ಸ್ಮೃತಿ ಮಂಧಾನ, ಈ ಪಂದ್ಯದಲ್ಲೂ ಕಳಪೆ ಫಾರ್ಮ್‌ ಮುಂದುವರಿಸಿದರು. ಎರಡು ಪಂದ್ಯಗಳಲ್ಲಿ ಎರಡಂಕಿಯ ರನ್‌ ಗಳಿಸಲು ವಿಫಲರಾದ ಅವರು, ಸಾಮಾಜಿಕ ಜಾಲತಾಣಗಳಲ್ಲಿ ಟ್ರೋಲ್‌ಗೆ ಗುರಿಯಾಗಿದ್ದಾರೆ.
ಸ್ಮೃತಿ ಮಂಧಾನ ದ್ವಿಪಕ್ಷೀಯ ಸರಣಿಗಳಲ್ಲಿ ಸ್ಫೋಟಕ ಬ್ಯಾಟಿಂಗ್‌ ಪ್ರದರ್ಶಿಸಿದರೂ, ಐಸಿಸಿ ಟೂರ್ನಿಗಳಲ್ಲಿ ಸತತವಾಗಿ ಕಳಪೆ ಪ್ರದರ್ಶನ ತೋರುತ್ತಿರುವುದು ಅಭಿಮಾನಿಗಳಲ್ಲಿ ಅಸಮಾಧಾನಕ್ಕೆ ಕಾರಣವಾಗಿದೆ.
ಪಾಕಿಸ್ತಾನದ ಘಾತಕ ಬೌಲಿಂಗ್‌
ಪಾಕಿಸ್ತಾನದ ಬೌಲರ್‌ಗಳು ಭಾರತದ ಬ್ಯಾಟಿಂಗ್‌ ದಾಳಿಯನ್ನು ಯಶಸ್ವಿಯಾಗಿ ನಿಯಂತ್ರಿಸಿದರು. ಡಯಾನಾ ಬೇಗ್‌ ತಮ್ಮ 10 ಓವರ್‌ಗಳಲ್ಲಿ ಒಂದು ಮೇಡನ್‌ ಸೇರಿದಂತೆ 69 ರನ್‌ಗೆ 4 ವಿಕೆಟ್‌ ಕಿತ್ತು ಭಾರತದ ಬ್ಯಾಟಿಂಗ್‌ ಕೊಂಡಿಗಳನ್ನು ಕಿತ್ತರು. ಸಾದಿಯಾ ಇಕ್ಬಾಲ್‌ ಮತ್ತು ನಾಯಕಿ ಫಾತಿಮಾ ಸನಾ ತಲಾ ಎರಡು ವಿಕೆಟ್‌ ಪಡೆದು ತಂಡದ ಯಶಸ್ಸಿಗೆ ಕಾರಣರಾದರು. ಪಾಕ್‌ ಬೌಲರ್‌ಗಳ ಶಿಸ್ತಿನ ದಾಳಿಯಿಂದ ಭಾರತಕ್ಕೆ ದೊಡ್ಡ ಮೊತ್ತ ಕಟ್ಟಲು ಸಾಧ್ಯವಾಗಲಿಲ್ಲ.
