ಬೆಂಗಳೂರು: ಬೆಂಗಳೂರಿನ ಸಂಚಾರ ದಟ್ಟಣೆ ಮತ್ತು ನಗರ ಯೋಜನೆಯ ಸವಾಲುಗಳ ಕುರಿತು ರಾಜ್ಯ ಸರ್ಕಾರದ ವಿಧಾನವನ್ನು ಟೀಕಿಸಿದ ಕೇಂದ್ರ ಐಟಿ-ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ ಅವರ ಹೇಳಿಕೆಗಳನ್ನು ಇನ್ಫೋಸಿಸ್‌ನ ಮಾಜಿ ಸಿಎಫ್‌ಒ ಮೋಹನ್‌ದಾಸ್‌ ಪೈ ಅವರು ತೀವ್ರವಾಗಿ ಟೀಕಿಸಿದ್ದಾರೆ.
ಐಟಿ-ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ ಅವರು ‘ಮೂವ್ ಇನ್‌ಸಿಂಕ್’ ಆಯೋಜಿಸಿದ್ದ ‘ಮೊಬಿಲಿಟಿ ಸಿಂಪೋಸಿಯಂ-2025’ ರಲ್ಲಿ ಮಾತನಾಡಿದ ಅವರು, ಬೆಂಗಳೂರಿನ ಸಂಚಾರ ಸಮಸ್ಯೆಗಿಂತ ನಗರ ಯೋಜನೆಯೇ ದೊಡ್ಡ ಸವಾಲಾಗಿದೆ. ರಾಜ್ಯ ಸರ್ಕಾರ ಸರಿಯಾದ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿಲ್ಲ ಮತ್ತು ನಗರ ಯೋಜನಾ ಕೌಶಲ್ಯ ಪ್ರತಿಭಾನ್ವಿತ ಗುಂಪನ್ನು ನಿರ್ಮಿಸಿಲ್ಲ ಎಂದರು.ಜೊತೆಗೆ ಕೇಂದ್ರ ಸರ್ಕಾರದಿಂದ ಮೂಲಸೌಕರ್ಯ ನಿರ್ಮಾಣಕ್ಕೆ ಸಾಕಷ್ಟು ಹಣಕಾಸು ಸಹಾಯ ಸಿಗುತ್ತಿಲ್ಲ ಎಂದು ಆರೋಪಿಸಿದರು. ಬೆಂಗಳೂರು ಕೇಂದ್ರಕ್ಕೆ ವಾರ್ಷಿಕವಾಗಿ 4.5 ಲಕ್ಷ ಕೋಟಿ ರೂಪಾಯಿಗಳನ್ನು ಕೊಡುಗೆಯಾಗಿ ನೀಡುತ್ತದೆ ಎಂದು ಹೇಳಿದ ಅವರು, ಆ ಹಣದಲ್ಲಿ ಸ್ವಲ್ಪ ಭಾಗವಾದರೂ ಹಿಂತಿರುಗಿಸಲ್ಪಟ್ಟರೆ ಅದನ್ನು ನಗರದ ಮೂಲಸೌಕರ್ಯ ಸುಧಾರಣೆಗೆ ಬಳಸಿಕೊಳ್ಳಬಹುದು ಎಂದರು.
ಸಚಿವ ಖರ್ಗೆ ಅವರ ಹೇಳಿಕೆಗಳನ್ನು ತೀವ್ರವಾಗಿ ಟೀಕಿಸಿದ ಮೋಹನ್‌ದಾಸ್‌ ಪೈ , ರಾಜ್ಯದಲ್ಲಿ ಸಾಕಷ್ಟು ನಗರ ಯೋಜಕರಿದ್ದಾರೆ, ಆದರೆ ಅವರನ್ನು ಬಳಸಿಕೊಳ್ಳಲಾಗುತ್ತಿಲ್ಲ ಎಂದು ಹೇಳಿದರು. ಇದು ಸರ್ಕಾರ ಹೇಳುತ್ತಿರುವ ಒಂದು ನೆಪ ಮಾತ್ರ ಎಂದು ಟೀಕಿಸಿದರು. ಬಳಿಕ ಕರ್ನಾಟಕದ ಎಲ್ಲಾ ಜನರಿಗೆ ಉಚಿತ ಸೌಲಭ್ಯಗಳನ್ನು ನೀಡುವ ಅಗತ್ಯವಿಲ್ಲ ಎಂದು ವಾದಿಸಿದರು. ಕರ್ನಾಟಕದ ಶೇಕಡಾ 60 ರಷ್ಟು ಜನರು ಬಡವರಲ್ಲ ಎಂದು ಹೇಳಿದ ಅವರು, ಅಗತ್ಯವಿರುವವರಿಗೆ ಮಾತ್ರ ಉಚಿತ ವಿದ್ಯುತ್‌ನಂತಹ ಸೌಲಭ್ಯಗಳನ್ನು ನೀಡಬೇಕು ಎಂದರು. ಪ್ರಧಾನಿಯವರನ್ನೇ ಎಲ್ಲದಕ್ಕೂ ಟೀಕಿಸುವ ಬದಲು, ರಾಜ್ಯ ನಾಯಕರು ಹಣಕ್ಕಾಗಿ ಅವರನ್ನು ಸಂಪರ್ಕಿಸಬೇಕು ಎಂದು ಸೂಚಿಸಿದರು.
ಬೆಂಗಳೂರಿನ ಸಂಚಾರವನ್ನು ಸುಗಮಗೊಳಿಸುವ ಸ್ಯಾಟಲೈಟ್ ಟೌನ್ ರಿಂಗ್ ರಸ್ತೆ (STRR) ಯೋಜನೆಯನ್ನು ರಾಜ್ಯ ಸರ್ಕಾರವು ನಿರ್ಮಿಸಲು ಕೇಂದ್ರ ರಸ್ತೆ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಅವರ ಸಹಾಯವನ್ನು ಕೇಳಬೇಕು ಎಂದು ಪೈ ಅವರು ಸಲಹೆ ನೀಡಿದರು.
ಗುಂಡಿಗಳ ಸಮಸ್ಯೆಯನ್ನು ಪರಿಹರಿಸುವಲ್ಲಿ ಸರ್ಕಾರ ಅಸಹಾಯಕರಾಗಿದ್ದಾರೆ ಎಂದು ಪೈ ಅವರು ಟೀಕಿಸಿದರು. ಲಂಡನ್‌ನಲ್ಲಿ ಯಾವುದೇ ಗುಂಡಿಗಳಿಲ್ಲ ಮತ್ತು ದೆಹಲಿ ರಸ್ತೆಗಳು ಉತ್ತಮವಾಗಿವೆ ಎಂದು ಉದಾಹರಣೆ ನೀಡಿದ ಅವರು, ವರ್ಷಗಳಲ್ಲಿ ಗುಂಡಿಗಳನ್ನು ಸರಿಪಡಿಸಲು 74,000 ಕೋಟಿ ರೂಪಾಯಿಗಳನ್ನು ಖರ್ಚು ಮಾಡಲಾಗಿದೆ ಎಂದು ಹೇಳಿ, ಹಣ ಎಲ್ಲಿಗೆ ಹೋಗಿದೆ ಎಂದು ಪ್ರಶ್ನಿಸಿದರು. ಡಿಸಿಎಂ ಒಬ್ಬ ಪ್ರಭಾವಿ ನಾಯಕ, ಅವರು ಗುಂಡಿ ಮಾಫಿಯಾವನ್ನು ಮುರಿಯಬೇಕು ಎಂದು ಒತ್ತಾಯಿಸಿದರು.
