ಮುಂದಿನ ತಿಂಗಳು ನೆದರ್ಲ್ಯಾಂಡ್ಸ್ ಮತ್ತು ಬೆಲ್ಜಿಯಂನಲ್ಲಿ ನಡೆಯಲಿರುವ ಎಫ್ಐಎಚ್ ಹಾಕಿ ವಿಶ್ವಕಪ್ಗಾಗಿ ಭಾರತೀಯ ಪುರುಷ ಹಾಗೂ ಮಹಿಳಾ ಹಾಕಿ ತಂಡಗಳಿಗೆ ಹೊಸ ಜೆರ್ಸಿಯನ್ನು ಹಾಕಿ ಇಂಡಿಯಾ ಅನಾವರಣಗೊಳಿಸಿದೆ. ಹಲವು ವರ್ಷಗಳಿಂದ ಭಾರತದ ಗುರುತಾಗಿದ್ದ ಸಾಂಪ್ರದಾಯಿಕ ನೀಲಿ ಜೆರ್ಸಿಯ ಬದಲು ಈ ಬಾರಿ ಕೇಸರಿ ಬಣ್ಣದ ಜೆರ್ಸಿಯನ್ನು ಪರಿಚಯಿಸಲಾಗಿದ್ದು, ಇದು ಕ್ರೀಡಾಭಿಮಾನಿಗಳು ಮತ್ತು ರಾಜಕೀಯ ವಲಯದಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ.
ಆಗಸ್ಟ್ 15ರಿಂದ 30ರವರೆಗೆ ನಡೆಯಲಿರುವ ವಿಶ್ವಕಪ್ನಲ್ಲಿ ಭಾರತೀಯ ಆಟಗಾರರು ಈ ಹೊಸ ಜೆರ್ಸಿಯನ್ನು ಧರಿಸಲಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಬಿಡುಗಡೆಗೊಂಡಿರುವ ಜೆರ್ಸಿಯ ವಿನ್ಯಾಸವು ಭಾರತದ ಸಂಸ್ಕೃತಿ, ಪರಂಪರೆ ಮತ್ತು ರಾಷ್ಟ್ರೀಯ ಹೆಮ್ಮೆಯನ್ನು ಪ್ರತಿಬಿಂಬಿಸುವ ರೀತಿಯಲ್ಲಿ ರೂಪಿಸಲಾಗಿದೆ ಎಂದು ಹಾಕಿ ಇಂಡಿಯಾ ತಿಳಿಸಿದೆ.
ಸಂಸ್ಥೆಯ ಪ್ರಕಾರ, ಕೇಸರಿ ಬಣ್ಣವು ಧೈರ್ಯ, ತ್ಯಾಗ ಮತ್ತು ವಿಜಯದ ಸಂಕೇತವಾಗಿದೆ. ರಾಷ್ಟ್ರಧ್ವಜ ಹಾಗೂ ಉದಯಿಸುತ್ತಿರುವ ಸೂರ್ಯನಿಂದ ಸ್ಫೂರ್ತಿ ಪಡೆದಿರುವ ಈ ವಿನ್ಯಾಸವು ಹೊಸ ಆರಂಭದ ಸಂದೇಶವನ್ನು ಸಾರುತ್ತದೆ. ಜೆರ್ಸಿಯಲ್ಲಿ ಭಾರತೀಯ ಸಾಂಸ್ಕೃತಿಕ ಪರಂಪರೆಯನ್ನು ಪ್ರತಿನಿಧಿಸುವ ಮಂಡಲ ವಿನ್ಯಾಸಗಳನ್ನು ಅಳವಡಿಸಲಾಗಿದ್ದು, ಗಾಢ ನೀಲಿ ಬಣ್ಣದ ಅಲಂಕಾರಗಳು ಅಶೋಕ ಚಕ್ರದಿಂದ ಪ್ರೇರಿತವಾಗಿವೆ. ಇವು ಪ್ರಗತಿ, ಶಾಂತಿ ಮತ್ತು ಏಕಾಗ್ರತೆಯನ್ನು ಸೂಚಿಸುತ್ತವೆ ಎಂದು ಸಂಸ್ಥೆ ವಿವರಿಸಿದೆ.
ಜೆರ್ಸಿಯ ಎದೆಯ ಭಾಗದಲ್ಲಿರುವ ಸುದರ್ಶನ ಚಕ್ರದ ಆಧುನಿಕ ವಿನ್ಯಾಸವು ಶಕ್ತಿ, ಏಕತೆ ಮತ್ತು ಚಲನಶೀಲತೆಯ ಸಂಕೇತವಾಗಿದ್ದು, ಭುಜಗಳು ಹಾಗೂ ಬದಿಗಳಲ್ಲಿ ತ್ರಿವರ್ಣದ ಪಟ್ಟಿಗಳನ್ನು ಸೇರಿಸಲಾಗಿದೆ. ಜೆರ್ಸಿಯ ಮುಂಭಾಗದಲ್ಲಿ ‘INDIA’ ಎಂಬ ಪದವನ್ನು ದೇವನಾಗರಿ ಶೈಲಿಯ ಅಕ್ಷರಗಳಲ್ಲಿ ವಿನ್ಯಾಸಗೊಳಿಸಲಾಗಿದ್ದು, ದೇಶದ ಭಾಷಾ ಮತ್ತು ಸಾಂಸ್ಕೃತಿಕ ವೈವಿಧ್ಯತೆಯನ್ನು ಗೌರವಿಸುವ ಉದ್ದೇಶ ಇದಾಗಿದೆ ಎಂದು ಹಾಕಿ ಇಂಡಿಯಾ ಹೇಳಿದೆ. ಕೇಸರಿ ಜೆರ್ಸಿಯ ಜೊತೆಗೆ ಇದೇ ವಿನ್ಯಾಸದ ಬಿಳಿ ಬಣ್ಣದ ಪರ್ಯಾಯ ಜೆರ್ಸಿಯೂ ತಂಡದ ಕಿಟ್ನಲ್ಲಿ ಇರಲಿದೆ.
ಇದಕ್ಕೆ ಕಾಂಗ್ರೆಸ್ ಸಂಸದೆ ಪ್ರಿಯಾಂಕಾ ಗಾಂಧಿ ವಿರೋಧ ವ್ಯಕ್ತಪಡಿಸಿದ್ದಾರೆ. ದೇಶದ ಆತ್ಮ ಅಹಿಂಸೆ, ಸತ್ಯ ಮತ್ತು ಸಹೋದರತ್ವದ ಮೌಲ್ಯಗಳಲ್ಲಿ ನೆಲೆಗೊಂಡಿದ್ದು, ಸಮವಸ್ತ್ರ ಅಥವಾ ಇತಿಹಾಸದ ಬದಲಾವಣೆಗಳಿಂದ ಆ ಮೌಲ್ಯಗಳನ್ನು ಬದಲಾಯಿಸಲು ಸಾಧ್ಯವಿಲ್ಲ ಎಂದು ಹೇಳಿದ್ದಾರೆ.
ಭಾರತದ ಮಾಜಿ ಹಾಕಿ ನಾಯಕ ವಿರೇನ್ ರಸ್ಕಿನ್ಹಾ ಕೂಡ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದು, ಭಾರತೀಯ ಹಾಕಿಯ ಪರಂಪರೆ ನೀಲಿ ಜೆರ್ಸಿಯೊಂದಿಗೆ ಬೆಸೆದುಕೊಂಡಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಹಲವು ವರ್ಷಗಳ ಕಾಲ ಹೆಮ್ಮೆಯಿಂದ ನೀಲಿ ಜೆರ್ಸಿ ಧರಿಸಿದ್ದೇನೆ. ಅಭಿಮಾನಿಗಳ ಮನಸ್ಸಿನಲ್ಲೂ ಭಾರತದ ಗುರುತು ನೀಲಿ ಬಣ್ಣವೇ ಎಂದು ಅವರು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.
ಈ ಟೀಕೆಗಳಿಗೆ ಪ್ರತಿಕ್ರಿಯಿಸಿರುವ ಹಾಕಿ ಇಂಡಿಯಾ, ಕೇಸರಿ ಬಣ್ಣವು ರಾಷ್ಟ್ರಧ್ವಜದ ಅವಿಭಾಜ್ಯ ಅಂಗವಾಗಿದ್ದು, ಅದರ ಬಳಕೆಯಲ್ಲಿ ಯಾವುದೇ ವಿವಾದವಿಲ್ಲ ಎಂದು ಸ್ಪಷ್ಟಪಡಿಸಿದೆ. ಜೊತೆಗೆ, 2014ರ ವಿಶ್ವಕಪ್ನಲ್ಲಿ ಹಳದಿ ಬಣ್ಣದ ಹಾಗೂ 2018ರ ವಿಶ್ವಕಪ್ನಲ್ಲಿ ಆಕಾಶ ನೀಲಿ ಬಣ್ಣದ ಜೆರ್ಸಿಗಳನ್ನು ಬಳಸಲಾಗಿತ್ತು ಎಂದು ನೆನಪಿಸಿದ ಸಂಸ್ಥೆ, ಈ ಬದಲಾವಣೆ ಆಟಗಾರರು ಮತ್ತು ತರಬೇತುದಾರರ ತಾಂತ್ರಿಕ ಸಲಹೆಗಳ ಜೊತೆಗೆ ರಾಷ್ಟ್ರೀಯ ಸಂಕೇತಗಳ ಮಹತ್ವವನ್ನು ಪರಿಗಣಿಸಿ ಮಾಡಲಾಗಿದೆ ಎಂದು ಸಮರ್ಥಿಸಿಕೊಂಡಿದೆ.
