ದುಬೈ: ಏಷ್ಯಾಕಪ್ ಟಿ20 (Asia Cup 2025) ಟೂರ್ನಿಯಲ್ಲಿ ಬುಧವಾರ ರಾತ್ರಿ ನಡೆದ ಯುಎಇ ವಿರುದ್ಧದ (UAE vs IND) ಪಂದ್ಯದಲ್ಲಿ ಹಾಲಿ ವಿಶ್ವ ಚಾಂಪಿಯನ್ ಭಾರತ ತಂಡವು 9 ವಿಕೆಟ್ಗಳ ಸುಲಭ ಜಯ ಸಾಧಿಸಿತು. ಈ ಗೆಲುವಿನೊಂದಿಗೆ ಟೀಮ್ ಇಂಡಿಯಾವು ದಾಖಲೆಯೊಂದನ್ನು ತನ್ನ ಹೆಸರಿಗೆ ಬರೆದುಕೊಂಡಿತ್ತು. ಟಿ20 ಕ್ರಿಕೆಟ್ನಲ್ಲಿ ಅತೀ ಹೆಚ್ಚು ಎಸೆತ ಉಳಿಸಿ ಪಂದ್ಯ ಗೆದ್ದ ಎರಡನೇ ತಂಡ ಎನಿಸಿಕೊಂಡಿತ್ತು. ಕೇವಲ 93 ಎಸೆತ ಬಾಕಿರುವಂತೆ ಭಾರತ ಈ ಗೆಲುವನ್ನು ದಾಖಲಿಸಿತು.
ಈ ದಾಖಲೆಯಲ್ಲಿ ಮೊದಲ ಸ್ಥಾನವನ್ನು ಇಂಗ್ಲೆಂಡ್ ತಂಡ ಹೊಂದಿದೆ. 2024ರಲ್ಲಿ ಒಮಾನ್ ವಿರುದ್ಧ 101 ಎಸೆತ ಉಳಿಸಿ ಗೆದ್ದಿತ್ತು. ಭಾರತ ಈಗ 93 ಎಸೆತಗಳೊಂದಿಗೆ ಎರಡನೇ ಸ್ಥಾನದಲ್ಲಿದೆ. ಈ ಪಟ್ಟಿಯಲ್ಲಿ ಶ್ರೀಲಂಕಾ ಮತ್ತು ಜಿಂಬಾಬ್ವೆ ತಂಡಗಳು 90 ಎಸೆತಗಳೊಂದಿಗೆ ಮೂರನೇ ಸ್ಥಾನದಲ್ಲಿವೆ.
ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಇಳಿದ ಯುಎಇ ತಂಡ ಆರಂಭಿಕರಾದ ಅಲಿಶಾನ್ ಶರಾಫು (22 ರನ್) ಮತ್ತು ನಾಯಕ ಮುಹಮ್ಮದ್ ವಸೀಂ (19 ರನ್) ಬಿಟ್ಟರೆ ಯಾವುದೇ ಬ್ಯಾಟ್ಸ್ಮನ್ ಉತ್ತಮ ಪ್ರದರ್ಶನ ತೋರಲಿಲ್ಲ. ಉಳಿದ ಬ್ಯಾಟ್ಸ್ಮನ್ಗಳು 3 ರನ್ಗಿಂತ ಹೆಚ್ಚು ಗಳಿಸಲಾಗಲಿಲ್ಲ. ಕೇವಲ 13.1 ಓವರ್ಗಳಲ್ಲಿ ಯುಎಇ 57 ರನ್ಗೆ ಆಲೌಟ್ ಆಯಿತು. ಕೊನೆಯ 8 ವಿಕೆಟ್ಗಳು ಕೇವಲ 31 ಎಸೆತಗಳಲ್ಲಿ 10 ರನ್ಗೆ ಕುಸಿಯಿತು. ಭಾರತದ ಬೌಲರ್ಗಳಾದ ಕುಲ್ದೀಪ್ ಯಾದವ್ (4-7) ಮತ್ತು ಶಿವಂ ದುಬೆ (3-4) ಯುಎಇ ಬ್ಯಾಟಿಂಗ್ ವಿಭಾಗವನ್ನು ಧ್ವಂಸಗೊಳಿಸಿದರು.
ಭಾರತದ ಸುಲಭ ಗೆಲುವು
58 ರನ್ಗಳ ಸಣ್ಣ ಗುರಿಯನ್ನು ಬೆನ್ನಟ್ಟಿದ ಭಾರತಕ್ಕೆ ಆರಂಭಿಕ ಬ್ಯಾಟ್ಸ್ಮನ್ ಅಭಿಷೇಕ್ ಶರ್ಮಾ 16 ಎಸೆತಗಳಲ್ಲಿ 30 ರನ್ ಗಳಿಸಿ ಆಕರ್ಷಕ ಆರಂಭ ಒದಗಿಸಿದರು. ಶುಭ್ಮನ್ ಗಿಲ್ 9 ಎಸೆತಗಳಲ್ಲಿ 20 ರನ್ ಮತ್ತು ಸೂರ್ಯಕುಮಾರ್ ಯಾದವ್ 2 ಎಸೆತಗಳಲ್ಲಿ 7 ರನ್ ಗಳಿಸಿ ಕೇವಲ 4.3 ಓವರ್ಗಳಲ್ಲಿ ಗೆಲುವು ತಂದಿಟ್ಟರು. ಯುಎಇಯ ಏಕೈಕ ವಿಕೆಟ್ ಸಿದ್ದಿಕಿ (1-16) ಪಾಲಾಯಿತು. ಕುಲ್ದೀಪ್ ಯಾದವ್ ತಮ್ಮ ಅದ್ಭುತ ಬೌಲಿಂಗ್ಗಾಗಿ ಪಂದ್ಯಶ್ರೇಷ್ಠ ಪ್ರಶಸ್ತಿಯನ್ನು ಪಡೆದರು.
ಈ ಭರ್ಜರಿ ಗೆಲುವಿನೊಂದಿಗೆ ಭಾರತ ತನ್ನ ಮುಂದಿನ ಪಂದ್ಯಕ್ಕೆ ಸಜ್ಜಾಗಿದೆ. ‘ಎ’ ಗುಂಪಿನಲ್ಲಿ ಸೆಪ್ಟೆಂಬರ್ 14ರ ಭಾನುವಾರ, ಬದ್ಧವೈರಿ ಪಾಕಿಸ್ತಾನದ ವಿರುದ್ಧ ಭಾರತ ತಂಡ ಕಾದಾಡಲಿದೆ.
