ವಿಂಬಲ್ಡನ್ ಜೂನಿಯರ್ಸ್‌ನಲ್ಲಿ ಐತಿಹಾಸಿಕ ಸಾಧನೆ ಮಾಡಿದ ಅರ್ನವ್ ಪಾಪರ್ಕರ್

ಲಂಡನ್: ಭಾರತೀಯ ಟೆನಿಸ್‌ಗೆ ಮತ್ತೊಂದು ಹೊಸ ಅಧ್ಯಾಯ ಬರೆಯುವತ್ತ ಯುವ ಆಟಗಾರ ಅರ್ನವ್ ಪಾಪರ್ಕರ್ ದಿಟ್ಟ ಹೆಜ್ಜೆ ಇಟ್ಟಿದ್ದಾರೆ. 2026ರ ವಿಂಬಲ್ಡನ್ ಜೂನಿಯರ್ಸ್ ಬಾಲಕರ ಸಿಂಗಲ್ಸ್ ವಿಭಾಗದಲ್ಲಿ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ್ದಾರೆ. ಈ ಮೂಲಕ ಅರ್ನವ್ ಪಾಪರ್ಕರ್ ಅವರು 36 ವರ್ಷಗಳ ಬಳಿಕ ಈ ಸಾಧನೆ ಮಾಡಿದ ಮೊದಲ ಭಾರತೀಯ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

1990ರಲ್ಲಿ ಲಿಯಾಂಡರ್ ಪೇಸ್ ಅವರು ವಿಂಬಲ್ಡನ್ ಜೂನಿಯರ್ಸ್‌ನಲ್ಲಿ ಕ್ವಾರ್ಟರ್ ಫೈನಲ್ ತಲುಪಿ ನಂತರ ಪ್ರಶಸ್ತಿಯನ್ನೂ ಗೆದ್ದಿದ್ದರು. ಆ ಬಳಿಕ ಯಾವುದೇ ಭಾರತೀಯ ಆಟಗಾರ ಈ ಹಂತವನ್ನು ತಲುಪಿರಲಿಲ್ಲ. ಇದೀಗ ಅರ್ನವ್ ಆ ಸಾಧನೆಯನ್ನು ಮರುಕಳಿಸಿ ಭಾರತೀಯ ಟೆನಿಸ್ ಅಭಿಮಾನಿಗಳಲ್ಲಿ ಹೊಸ ಭರವಸೆಯನ್ನು ಮೂಡಿಸಿದ್ದಾರೆ.

ಬುಧವಾರ ನಡೆದ ಪ್ರೀ-ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ 18 ವರ್ಷದ ಅರ್ನವ್ ಜಪಾನ್‌ನ ರಿಯೊ ಟಬಾಟ ವಿರುದ್ಧ ಅದ್ಭುತ ಪ್ರದರ್ಶನ ನೀಡಿ ಕೇವಲ 52 ನಿಮಿಷಗಳಲ್ಲಿ 6-2, 6-1 ನೇರ ಸೆಟ್‌ಗಳಲ್ಲಿ ಭರ್ಜರಿ ಗೆಲುವು ಸಾಧಿಸಿದರು. ಆರಂಭದಿಂದಲೇ ಆಕ್ರಮಣಕಾರಿ ಆಟ ಪ್ರದರ್ಶಿಸಿದ ಅವರು ಎದುರಾಳಿಗೆ ಯಾವುದೇ ಅವಕಾಶ ನೀಡದೆ ಸಂಪೂರ್ಣ ಮೇಲುಗೈ ಸಾಧಿಸಿದರು.

ಈ ಸಾಧನೆಗೂ ಮುನ್ನವೇ ಅರ್ನವ್ ಟೆನಿಸ್ ಜಗತ್ತಿನ ಗಮನ ಸೆಳೆದಿದ್ದರು. 32ರ ಸುತ್ತಿನ ಪಂದ್ಯದಲ್ಲಿ ವಿಶ್ವದ ಮೂರನೇ ಶ್ರೇಯಾಂಕಿತ ಅಮೆರಿಕದ ಕೀಟನ್ ಹ್ಯಾನ್ಸ್ ಅವರನ್ನು 6-2, 6-3 ನೇರ ಸೆಟ್‌ಗಳಲ್ಲಿ ಸೋಲಿಸಿ ಭಾರೀ ಅಚ್ಚರಿ ಮೂಡಿಸಿದ್ದರು. ವಿಶ್ವದ ಅಗ್ರ ಆಟಗಾರರ ವಿರುದ್ಧವೂ ಆತ್ಮವಿಶ್ವಾಸದಿಂದ ಆಡಿದ ಅವರ ಪ್ರದರ್ಶನ ಭಾರತೀಯ ಟೆನಿಸ್ ಭವಿಷ್ಯದ ಬಗ್ಗೆ ಹೊಸ ನಿರೀಕ್ಷೆಗಳನ್ನು ಹುಟ್ಟುಹಾಕಿದೆ.

ವಿಂಬಲ್ಡನ್ ಅಭಿಯಾನವನ್ನು ಕೂಡ ಅರ್ನವ್ ಅದ್ಭುತ ರೀತಿಯಲ್ಲಿ ಆರಂಭಿಸಿದ್ದರು. ಮೊದಲ ಸುತ್ತಿನಲ್ಲಿ ಆತಿಥೇಯ ಗ್ರೇಟ್ ಬ್ರಿಟನ್‌ನ ಜೋಶುವಾ ಕ್ರೇಜ್ ವಿರುದ್ಧ 6-2, 6-2 ಅಂತರದಿಂದ ಸುಲಭ ಜಯ ಸಾಧಿಸಿದ್ದರು. ಈ ಟೂರ್ನಿಯಲ್ಲಿ ಇದುವರೆಗೆ ಅವರು ಒಂದೇ ಒಂದು ಸೆಟ್‌ನ್ನೂ ಕಳೆದುಕೊಂಡಿಲ್ಲ. ನಿರಂತರವಾಗಿ ನೇರ ಸೆಟ್‌ಗಳಲ್ಲಿ ಗೆಲುವು ದಾಖಲಿಸುತ್ತಿರುವುದು ಅವರ ಅತ್ಯುತ್ತಮ ಫಾರ್ಮ್‌ಗೆ ಸಾಕ್ಷಿಯಾಗಿದೆ.

🚨#news l An Indian in Wimbledon Juniors Quarter-finals after 36 years

Arnav Paparkar, 18, becomes first Indian to reach Junior Wimbledon quarterfinals since Leander Paes in 1990.

Beat Japan’s Ryo Tabata 6-2, 6-1 in straight sets a day after stunning world No.3 Keaton Hance… pic.twitter.com/xP53QoMcPg

— The Bridge (@the_bridge_in) July 8, 2026

ಕ್ವಾರ್ಟರ್ ಫೈನಲ್‌ನಲ್ಲಿ ಅರ್ನವ್ ಅಮೆರಿಕದ ಜೋರ್ಡಾನ್ ಲೀ ಅಥವಾ ಭಾರತದ ತನಿಷ್ಕ್ ಕೊಂಡೂರಿ ಅವರ ವಿರುದ್ಧ ಸೆಣಸಲಿದ್ದಾರೆ. ಈ ಪಂದ್ಯದಲ್ಲೂ ಜಯ ಸಾಧಿಸಿದರೆ ಭಾರತೀಯ ಟೆನಿಸ್ ಇತಿಹಾಸದಲ್ಲಿ ಮತ್ತೊಂದು ಮಹತ್ವದ ಅಧ್ಯಾಯ ಬರೆಯುವ ಅವಕಾಶ ಅವರಿಗೆ ಸಿಗಲಿದೆ.

ಭಾರತದ ಟೆನಿಸ್ ಇತಿಹಾಸದಲ್ಲಿ ರಾಮನಾಥನ್ ಕೃಷ್ಣನ್ (1954), ರಮೇಶ್ ಕೃಷ್ಣನ್ (1979) ಮತ್ತು ಲಿಯಾಂಡರ್ ಪೇಸ್ (1990) ಮಾತ್ರ ವಿಂಬಲ್ಡನ್ ಜೂನಿಯರ್ಸ್ ಬಾಲಕರ ಸಿಂಗಲ್ಸ್ ಪ್ರಶಸ್ತಿಯನ್ನು ಗೆದ್ದಿದ್ದಾರೆ. ಇದೀಗ ಅರ್ನವ್ ಪಾಪಾರ್ಕರ್ ಅವರ ಪ್ರದರ್ಶನವನ್ನು ನೋಡಿದರೆ ಆ ಪ್ರತಿಷ್ಠಿತ ಪಟ್ಟಿಗೆ ಸೇರುವ ಸಾಮರ್ಥ್ಯ ಅವರಲ್ಲಿದೆ ಎಂಬ ವಿಶ್ವಾಸ ಕ್ರೀಡಾಭಿಮಾನಿಗಳಲ್ಲಿ ಮೂಡಿದೆ.

ಮಹಾರಾಷ್ಟ್ರದ ಪುಣೆಯ ಮೂಲದ ಅರ್ನವ್ ಈಗಾಗಲೇ ಭಾರತದ ನಂ.1 ಜೂನಿಯರ್ ಟೆನಿಸ್ ಆಟಗಾರರಾಗಿದ್ದಾರೆ. ಐಟಿಎಫ್ ಜೂನಿಯರ್ ವಿಶ್ವ ರ‍್ಯಾಂಕಿಂಗ್‌ನಲ್ಲಿ ಮೊದಲ ಬಾರಿಗೆ ಟಾಪ್-20ರಲ್ಲಿ ಸ್ಥಾನ ಪಡೆದಿರುವ ಅವರು ಪ್ರಸ್ತುತ 19ನೇ ಸ್ಥಾನದಲ್ಲಿದ್ದಾರೆ. ತಮ್ಮ ಸ್ಥಿರ ಪ್ರದರ್ಶನದ ಮೂಲಕ ಅಂತರರಾಷ್ಟ್ರೀಯ ಮಟ್ಟದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಯುವ ಪ್ರತಿಭೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಫ್ರೆಂಚ್ ಓಪನ್ ಜೂನಿಯರ್ಸ್‌ನಲ್ಲಿ ಚೊಚ್ಚಲ ಬಾರಿಗೆ ಆಡಿದ ಅರ್ನವ್ ಮೂರನೇ ಸುತ್ತು ತಲುಪಿ ಸಾಮರ್ಥ್ಯ ಸಾಬೀತು ಪಡಿಸಿದ್ದರು. ಅಲ್ಲದೆ ಮಲೇಷ್ಯಾದ ಐಟಿಎಫ್ J200 ಕೌಲಾಲಂಪುರ ಟೂರ್ನಿಯಲ್ಲಿ ಸಿಂಗಲ್ಸ್ ಪ್ರಶಸ್ತಿ, ಬಹ್ರೇನ್‌ನ ಐಟಿಎಫ್ J60 ಮನಾಮ ಟೂರ್ನಿಯಲ್ಲಿ ಚಾಂಪಿಯನ್ ಪಟ್ಟ, ಜೆ300 ಪುಣೆ ಏಷ್ಯನ್ ಚಾಂಪಿಯನ್‌ಶಿಪ್‌ನಲ್ಲಿ ಡಬಲ್ಸ್ ಪ್ರಶಸ್ತಿ ಹಾಗೂ ಸಿಂಗಲ್ಸ್ ರನ್ನರ್-ಅಪ್ ಸ್ಥಾನ ಪಡೆದು ಹಲವು ಅಂತರರಾಷ್ಟ್ರೀಯ ಸಾಧನೆಗಳನ್ನು ಮಾಡಿದ್ದಾರೆ.