ನವದೆಹಲಿ: ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ನಾಳೆ (ಫೆಬ್ರವರಿ 1) ಬೆಳಿಗ್ಗೆ 11 ಗಂಟೆಗೆ ಲೋಕಸಭೆಯಲ್ಲಿ 2026ರ ಕೇಂದ್ರ ಬಜೆಟ್ ಮಂಡಿಸಲಿದ್ದಾರೆ. ಈ ಬಜೆಟ್ ಕೇವಲ ಸರ್ಕಾರದ ಲೆಕ್ಕಾಚಾರವಲ್ಲ, ಬದಲಾಗಿ ಸಾಮಾನ್ಯ ಜನರ ದೈನಂದಿನ ಜೀವನದ ಮೇಲೆ ನೇರ ಪರಿಣಾಮ ಬೀರುವ ಹಲವು ಬದಲಾವಣೆಗಳಿಗೆ ಮುನ್ನುಡಿ ಬರೆಯಲಿದೆ. ನಾಳೆಯಿಂದ ಜಾರಿಗೆ ಬರಲಿರುವ 5 ಪ್ರಮುಖ ಬದಲಾವಣೆಗಳ ಪಟ್ಟಿ ಇಲ್ಲಿದೆ.
1. ಎಲ್ಪಿಜಿ ಸಿಲಿಂಡರ್ ಬೆಲೆ ಪರಿಷ್ಕರಣೆ
ಪ್ರತಿ ತಿಂಗಳ ಮೊದಲ ದಿನದಂತೆ, ಫೆಬ್ರವರಿ 1 ರಂದು ತೈಲ ಕಂಪನಿಗಳು ಅಡುಗೆ ಅನಿಲದ (LPG) ಬೆಲೆಗಳನ್ನು ಪರಿಷ್ಕರಿಸಲಿವೆ. ಕಳೆದ ತಿಂಗಳು ₹14.50 ರಷ್ಟು ಕಡಿತವಾಗಿದ್ದು, ಈ ಬಾರಿ ಬಜೆಟ್ ದಿನವೇ ಬೆಲೆ ಘೋಷಣೆಯಾಗುತ್ತಿರುವುದರಿಂದ ಗ್ರಾಹಕರು ಹೆಚ್ಚಿನ ಕಡಿತದ ನಿರೀಕ್ಷೆಯಲ್ಲಿದ್ದಾರೆ. ಇದರ ಜೊತೆಗೆ ಸಿಎನ್ಜಿ (CNG) ಮತ್ತು ವಿಮಾನ ಇಂಧನದ ಬೆಲೆಗಳೂ ಬದಲಾಗುವ ಸಾಧ್ಯತೆಯಿದೆ.
2. ಸಿಗರೇಟ್ ಮತ್ತು ತಂಬಾಕು ಉತ್ಪನ್ನಗಳು ದುಬಾರಿ
ಬಜೆಟ್ನಲ್ಲಿ ಆರೋಗ್ಯಕ್ಕೆ ಹಾನಿಕಾರಕವಾಗಿರುವ ಉತ್ಪನ್ನಗಳ ಮೇಲೆ ತೆರಿಗೆ ಹೆಚ್ಚಿಸುವುದು ಮೋದಿ ಸರ್ಕಾರದ ವಾಡಿಕೆ. ಅದರಂತೆ ಈ ಬಾರಿ ಪಾನ್ ಮಸಾಲಾ, ಸಿಗರೇಟ್ ಮತ್ತು ತಂಬಾಕು ಉತ್ಪನ್ನಗಳ ಮೇಲೆ ಹೆಚ್ಚುವರಿ ತೆರಿಗೆ ವಿಧಿಸುವ ಸಾಧ್ಯತೆಯಿದೆ. ಇದು ಸಾಮಾನ್ಯ ಜಿಎಸ್ಟಿಗಿಂತ ಹೊರತಾದ ತೆರಿಗೆಯಾಗಿದ್ದು, ತಂಬಾಕು ಉತ್ಪನ್ನಗಳನ್ನ ಸೇವಿಸುವವರ ಜೇಬಿಗೆ ಕತ್ತರಿ ಬೀಳಲಿದೆ.
3. ಫಾಸ್ಟ್ಟ್ಯಾಗ್ (FASTag) ಕೆವೈಸಿ ನಿಯಮ ಸರಳೀಕರಣ
ವಾಹನ ಸವಾರರಿಗೆ ಗುಡ್ ನ್ಯೂಸ್ ಎಂಬಂತೆ, ಇನ್ನು ಮುಂದೆ ಫಾಸ್ಟ್ಟ್ಯಾಗ್ ಬಳಕೆದಾರರು ಪದೇ ಪದೇ ಕೆವೈಸಿ (KYC) ಪರಿಶೀಲನೆಗೆ ಒಳಗಾಗುವ ಅಗತ್ಯವಿಲ್ಲ ಎಂದು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ತಿಳಿಸಿದೆ. ಫೆಬ್ರವರಿ 1 ರಿಂದ ಫಾಸ್ಟ್ಟ್ಯಾಗ್ ವಿತರಿಸುವ ಬ್ಯಾಂಕುಗಳೇ ವಾಹನದ ತಪಾಸಣೆಯ ಜವಾಬ್ದಾರಿಯನ್ನು ಹೊತ್ತುಕೊಳ್ಳಲಿವೆ.
4. ಕ್ರೆಡಿಟ್ ಕಾರ್ಡ್ ನಿಯಮಗಳಲ್ಲಿ ಬದಲಾವಣೆ
ಎಚ್ಡಿಎಫ್ಸಿ (HDFC) ಮತ್ತು ಐಸಿಐಸಿಐ (ICICI) ಬ್ಯಾಂಕ್ಗಳು ತಮ್ಮ ಕ್ರೆಡಿಟ್ ಕಾರ್ಡ್ ನಿಯಮಗಳನ್ನು ಫೆಬ್ರವರಿ 1 ರಿಂದ ಬದಲಾಯಿಸುತ್ತಿವೆ. HDFC ಇನ್ಫಿನಿಯಾ ಕಾರ್ಡ್ನ ರಿವಾರ್ಡ್ ಪಾಯಿಂಟ್ಸ್ ಮಿತಿ ಮತ್ತು ICICI ಬ್ಯಾಂಕ್ನ ಬುಕ್ಮೈಶೋ ಮೂಲಕ ಸಿಗುತ್ತಿದ್ದ ಉಚಿತ ಮೂವಿ ಟಿಕೆಟ್ ಸೌಲಭ್ಯಗಳಲ್ಲಿ ಕಡಿತವಾಗಲಿದೆ. ರಿವಾರ್ಡ್ ಪಾಯಿಂಟ್ಗಳ ಲೆಕ್ಕಾಚಾರದಲ್ಲೂ ಹೊಸ ಬದಲಾವಣೆಗಳು ಜಾರಿಗೆ ಬರಲಿವೆ.
5. ಬಜೆಟ್ ಅಧಿವೇಶನದ ವೇಳಾಪಟ್ಟಿ
ಜನವರಿ 28 ರಿಂದ ಆರಂಭವಾಗಿರುವ ಬಜೆಟ್ ಅಧಿವೇಶನವು ಎರಡು ಹಂತಗಳಲ್ಲಿ ನಡೆಯಲಿದೆ. ಫೆಬ್ರವರಿ 1 ರಂದು ಬಜೆಟ್ ಮಂಡನೆಯಾದ ನಂತರ, ಮೊದಲಾರ್ಧವು ಫೆಬ್ರವರಿ 13 ಕ್ಕೆ ಮುಕ್ತಾಯವಾಗಲಿದೆ. ದ್ವಿತೀಯಾರ್ಧವು ಮಾರ್ಚ್ 9 ರಿಂದ ಏಪ್ರಿಲ್ 2 ರವರೆಗೆ ನಡೆಯಲಿದ್ದು, ಈ ಅವಧಿಯಲ್ಲಿ ಸರ್ಕಾರದ ಯೋಜನೆಗಳ ಮೇಲೆ ವಿಸ್ತೃತ ಚರ್ಚೆ ನಡೆಯಲಿದೆ.
