ನವದೆಹಲಿ (ಜುಲೈ 16): ಭಾರತೀಯ ರೈಲ್ವೆ ಇಲಾಖೆಯು ಆನ್ಲೈನ್ ರೈಲು ಟಿಕೆಟ್ ಬುಕ್ಕಿಂಗ್ ವ್ಯವಸ್ಥೆಯನ್ನು ಮತ್ತಷ್ಟು ವೇಗವಾಗಿ ಹಾಗೂ ಬಳಕೆದಾರಿಗೆ ಸುಲಭವಾಗುವ ರೀತಿಯಲ್ಲಿ ರೂಪಿಸುವ ಉದ್ದೇಶದಿಂದ ಹೊಸ IRCTC (Indian Railway Catering and Tourism Corporation) ವೆಬ್ಸೈಟ್ನ ಬೀಟಾ (ಪ್ರಾಯೋಗಿಕ) ಆವೃತ್ತಿಯನ್ನು ಬಿಡುಗಡೆ ಮಾಡಿದೆ. ಇಂದು ಜುಲೈ 16ರಂದು ರಾತ್ರಿ 9 ಗಂಟೆಯಿಂದ ಈ ಹೊಸ ಆವೃತ್ತಿ ಸಾರ್ವಜನಿಕರಿಗೆ ಲಭ್ಯವಾಗಿದ್ದು, ಈಗಿರುವ ಅಧಿಕೃತ IRCTC ವೆಬ್ಸೈಟ್ನಲ್ಲೇ ಬೀಟಾ ಆವೃತ್ತಿಯ ಲಿಂಕ್ ಮೂಲಕ ಬಳಕೆದಾರರು ಪ್ರವೇಶ ಪಡೆಯಬಹುದು.
ಹಳೆಯ IRCTC ವೆಬ್ಸೈಟ್ ನಿಧಾನಗತಿ, ಗೊಂದಲಕಾರಿ ವಿನ್ಯಾಸ ಹಾಗೂ ಪದೇ ಪದೇ ಎದುರಾಗುತ್ತಿದ್ದ ಕ್ಯಾಪ್ಚಾ ಕಿರಿಕಿರಿಯಿಂದ ಪ್ರಯಾಣಿಕರ ಅಸಮಾಧಾನಕ್ಕೆ ಕಾರಣವಾಗಿತ್ತು. ಇತ್ತೀಚೆಗೆ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರು ಜೈಪುರದ MNIT ವಿದ್ಯಾರ್ಥಿಗಳೊಂದಿಗೆ ನಡೆಸಿದ ಸಂವಾದದಲ್ಲಿ ಈ ಸಮಸ್ಯೆಗಳು ಅವರ ಗಮನಕ್ಕೆ ಬಂದಿದ್ದರು. ವಿದ್ಯಾರ್ಥಿಗಳ ಸಲಹೆ ಮತ್ತು ಬಳಕೆದಾರರ ಅಭಿಪ್ರಾಯಗಳನ್ನು ಆಧರಿಸಿ ಹೊಸ ವೆಬ್ಸೈಟ್ ರೂಪಿಸಲಾಗಿದೆ.
ಹೊಸ ವೆಬ್ಸೈಟ್ ಹೇಗೆ ಕಾರ್ಯ ನಿರ್ವಹಿಸುತ್ತದೆ?
ಹೊಸ ಬೀಟಾ ವೆಬ್ಸೈಟ್ನಲ್ಲಿ ಬಳಕೆದಾರರಿಗೆ ಸರಳ ಹಾಗೂ ಸ್ವಚ್ಛ ಇಂಟರ್ಫೇಸ್ ಒದಗಿಸಲಾಗಿದೆ. ಅನಗತ್ಯ ಜಾಹೀರಾತುಗಳು, ಪಾಪ್ಅಪ್ಗಳು ಹಾಗೂ ಗೊಂದಲ ಉಂಟುಮಾಡುವ ಗ್ರಾಫಿಕ್ಸ್ ತೆಗೆದುಹಾಕಿರುವುದರಿಂದ ವೆಬ್ಸೈಟ್ ವೇಗವಾಗಿ ಕಾರ್ಯನಿರ್ವಹಿಸುತ್ತದೆ. ಟಿಕೆಟ್ ಬುಕ್ಕಿಂಗ್ ವೇಳೆ ಕಡ್ಡಾಯ ಕ್ಯಾಪ್ಚಾ ಬಳಕೆಯನ್ನು ಕಡಿಮೆ ಮಾಡಲಾಗಿದ್ದು, ಬಳಕೆದಾರ ಅನುಭವವನ್ನು ಸುಧಾರಿಸಲಾಗಿದೆ.
ಇದರ ಜೊತೆಗೆ ಒಂದೇ ಪರದೆಯಲ್ಲೇ Sleeper, 3AC, 2AC ಸೇರಿದಂತೆ ವಿವಿಧ ವರ್ಗಗಳ ಸೀಟು ಲಭ್ಯತೆಯನ್ನು ವೀಕ್ಷಿಸುವ ವ್ಯವಸ್ಥೆ ಕಲ್ಪಿಸಲಾಗಿದೆ. ಪದೇ ಪದೇ ಪ್ರಯಾಣಿಸುವವರು ತಮ್ಮ ವೈಯಕ್ತಿಕ ವಿವರಗಳನ್ನು ಸೇವ್ ಮಾಡಿಕೊಂಡು ಮುಂದಿನ ಬಾರಿ ಇನ್ನಷ್ಟು ವೇಗವಾಗಿ ಟಿಕೆಟ್ ಬುಕ್ ಮಾಡಬಹುದು. ಟಿಕೆಟ್ ಬುಕ್ಕಿಂಗ್ ಹಂತಗಳ ಸಂಖ್ಯೆಯನ್ನೂ ಕಡಿಮೆ ಮಾಡಿರುವುದರಿಂದ ಸಂಪೂರ್ಣ ಪ್ರಕ್ರಿಯೆ ಸುಲಭ ಮತ್ತು ವೇಗವಾಗಲಿದೆ.
ಹೊಸ ವೆಬ್ಸೈಟ್ನಲ್ಲಿ ಟಿಕೆಟ್ ಬುಕ್ ಮಾಡುವುದು ಹೇಗೆ?
ಹೊಸ ವೆಬ್ಸೈಟ್ [www.irctc.co.in/eticket] ಗೆ ಭೇಟಿ ನೀಡಬೇಕು. ಟಿಕೆಟ್ ಬುಕ್ ಮಾಡಲು ಮೊದಲು IRCTC ಯೂಸರ್ ಐಡಿ ಮತ್ತು ಪಾಸ್ವರ್ಡ್ ಮೂಲಕ ಲಾಗಿನ್ ಆಗಬೇಕು. ನಂತರ ಹೊರಡುವ ಮತ್ತು ತಲುಪುವ ನಿಲ್ದಾಣ, ಪ್ರಯಾಣದ ದಿನಾಂಕವನ್ನು ಆಯ್ಕೆ ಮಾಡಿ ರೈಲುಗಳನ್ನು ಹುಡುಕಬಹುದು. ಅಗತ್ಯವಿರುವ ಕ್ಲಾಸ್ ಆಯ್ಕೆ ಮಾಡಿದ ಬಳಿಕ ಪ್ರಯಾಣಿಕರ ವಿವರಗಳನ್ನು ನಮೂದಿಸಿ UPI, ಡೆಬಿಟ್ ಅಥವಾ ಕ್ರೆಡಿಟ್ ಕಾರ್ಡ್ ಹಾಗೂ ನೆಟ್ ಬ್ಯಾಂಕಿಂಗ್ ಮೂಲಕ ಪಾವತಿ ಪೂರ್ಣಗೊಳಿಸಿದರೆ ಕೆಲವೇ ಕ್ಷಣಗಳಲ್ಲಿ ಟಿಕೆಟ್ ಬುಕ್ ಆಗುತ್ತದೆ. ನೀವು ಪ್ರಯಾಣಿಸುವ ರೈಲಿನ ಲೈವ್ ಅಪ್ಡೇಟ್ಸ್ ಅನ್ನು enquiry.indianrail.gov.in/mntes ಲಿಂಕ್ನಲ್ಲಿ ಪಡೆಯಬಹುದು
ಪ್ರಸ್ತುತ IRCTC ವೆಬ್ಸೈಟ್ ಪ್ರತಿದಿನ ಸರಾಸರಿ 14.5 ಲಕ್ಷ ಟಿಕೆಟ್ ಬುಕ್ಕಿಂಗ್ಗಳನ್ನು ನಿರ್ವಹಿಸುತ್ತಿದೆ. ಹೊಸ ತಂತ್ರಜ್ಞಾನ ಅಳವಡಿಕೆಯಿಂದ ಕೋಟ್ಯಂತರ ಪ್ರಯಾಣಿಕರಿಗೆ ವೇಗವಾದ ಹಾಗೂ ತೊಂದರೆರಹಿತ ಸೇವೆ ದೊರೆಯುವ ನಿರೀಕ್ಷೆಯಿದ್ದು, ಭಾರತೀಯ ರೈಲ್ವೆಯ ಪ್ಯಾಸೆಂಜರ್ ರಿಸರ್ವೇಶನ್ ವ್ಯವಸ್ಥೆಯ ಆಧುನೀಕರಣದತ್ತ ಇದು ಮಹತ್ವದ ಹೆಜ್ಜೆಯಾಗಿದೆ.
