ಪ್ರಧಾನಿ ನರೇಂದ್ರ ಮೋದಿ ಅವರು ತಮ್ಮ ಆಕಾಶವಾಣಿ ಕಾರ್ಯಕ್ರಮ ‘ಮನ್ ಕಿ ಬಾತ್’ನ 128ನೇ ಸಂಚಿಕೆಯಲ್ಲಿ ಉತ್ತರ ಕನ್ನಡ ಜಿಲ್ಲೆಯ ಕಾರವಾರದಲ್ಲಿರುವ ಭಾರತೀಯ ನೌಕಾಪಡೆಯ ಹೆಮ್ಮೆಯ ಯುದ್ಧನೌಕೆ ಮ್ಯೂಸಿಯಂ ಐಎನ್ಎಸ್ ಚಾಪೆಲ್ (INS Chapal Warship Museum) ಬಗ್ಗೆ ವಿಶೇಷವಾಗಿ ಪ್ರಸ್ತಾಪಿಸಿದ್ದಾರೆ. ರಾಷ್ಟ್ರಭಕ್ತಿ ಮತ್ತು ಪ್ರವಾಸೋದ್ಯಮವನ್ನು ಒಟ್ಟಿಗೆ ಬೆಳೆಸುವ ಉದ್ದೇಶದಿಂದ ದೇಶದಾದ್ಯಂತ ನೌಕಾಪಡೆಗೆ ಸಂಬಂಧಿಸಿದ ಮ್ಯೂಸಿಯಂಗಳಿಗೆ ಜನರು ಭೇಟಿ ನೀಡಬೇಕೆಂದು ಅವರು ಕರೆ ನೀಡಿದ್ದಾರೆ. ಈ ಪ್ರಸ್ತಾಪದಿಂದ ಕಾರವಾರದ ಈ ವಿಶಿಷ್ಟ ಮ್ಯೂಸಿಯಂ ಮತ್ತೊಮ್ಮೆ ದೇಶದ ಗಮನ ಸೆಳೆದಿದೆ.
ರಷ್ಯಾ ನಿರ್ಮಿತ ಈ ಕ್ಷಿಪಣಿ ದಾಳಿ ನೌಕೆ 1976ರಲ್ಲಿ ವಿಶಾಖಪಟ್ಟಣಂ ನೌಕಾನೆಲೆಗೆ ಸೇರ್ಪಡೆಯಾಗಿತ್ತು. ಸುಮಾರು 375 ಟನ್ ತೂಕದ ಚಾಪೆಲ್ ಗಂಟೆಗೆ 70 ಕಿಲೋಮೀಟರ್ ವೇಗದಲ್ಲಿ ಸಾಗುವ ಶಕ್ತಿ ಹೊಂದಿತ್ತು. ನಾಲ್ಕು ಸ್ಟಿಕ್ಸ್ ಕ್ಷಿಪಣಿಗಳು ಮತ್ತು ಎರಡು ವಾಯುರಕ್ಷಣಾ ಫಿರಂಗಿಗಳನ್ನು ಹೊತ್ತಿದ್ದ ಈ ನೌಕೆ 4 ಕಿಲೋಮೀಟರ್ ದೂರದಲ್ಲಿರುವ ವೈಮಾನಿಕ ಗುರಿಗಳನ್ನು ಧ್ವಂಸ ಮಾಡಬಲ್ಲದಾಗಿತ್ತು. ಸತತ 29 ವರ್ಷಗಳ ಕಾಲ ಭಾರತೀಯ ನೌಕಾಪಡೆಯಲ್ಲಿ ಸೇವೆ ಸಲ್ಲಿಸಿದ ಚಾಪೆಲ್ 2005ರಲ್ಲಿ ನಿವೃತ್ತಿಯಾಯಿತು.
ನಿವೃತ್ತಿಯ ನಂತರ ಈ ಯುದ್ಧನೌಕೆಯನ್ನು ಜನಸಾಮಾನ್ಯರಿಗೆ ತಲುಪಿಸುವ ನಿಟ್ಟಿನಲ್ಲಿ ಉತ್ತರ ಕನ್ನಡ ಜಿಲ್ಲಾಡಳಿತಕ್ಕೆ ಹಸ್ತಾಂತರಿಸಲಾಯಿತು. 2006ರ ಡಿಸೆಂಬರ್ 7ರಂದು ಕಾರವಾರದ ರವೀಂದ್ರನಾಥ ಟ್ಯಾಗೋರ್ ಬೀಚ್‌ನಲ್ಲಿ ಭಾರತದ ಮೊದಲ ‘ವಾರ್ಶಿಪ್ ಮ್ಯೂಸಿಯಂ’ ಆಗಿ ಸಾರ್ವಜನಿಕರಿಗೆ ತೆರೆಯಿತು. ಕರಾವಳಿಯ ಮರಳಿನ ಮೇಲೆ ಸ್ಥಾಪಿತವಾದ ಈ ನೌಕೆ ಇಂದಿಗೂ ತನ್ನ ಭವ್ಯತೆಯನ್ನು ಕಾಪಾಡಿಕೊಂಡಿದೆ.
ಕಳೆದ ಕೆಲವು ವರ್ಷಗಳಲ್ಲಿ ಸುಮಾರು 45 ಲಕ್ಷ ರೂಪಾಯಿ ವೆಚ್ಚದಲ್ಲಿ ನೌಕೆಯ ದೇಹಕ್ಕೆ ಹೊಸ ಬಣ್ಣ, ತುಕ್ಕು ತೆಗೆಯುವಿಕೆ ಮತ್ತು ದುರಸ್ತಿ ಕಾರ್ಯಗಳನ್ನು ಮಾಡಲಾಗಿದೆ. ಪ್ರತಿದಿನ ನೂರಾರು ಪ್ರವಾಸಿಗರು ಇಲ್ಲಿಗೆ ಆಗಮಿಸುತ್ತಾರೆ. ಕಳೆದ 19 ವರ್ಷಗಳಲ್ಲಿ ಲಕ್ಷಕ್ಕೂ ಹೆಚ್ಚು ಜನರು ಈ ಮ್ಯೂಸಿಯಂ ಭೇಟಿ ನೀಡಿದ್ದಾರೆ.
ನೌಕೆಯ ಒಳಗೆ ಪ್ರವೇಶಿಸಿದ ತಕ್ಷಣ ಸಿಬ್ಬಂದಿ ವಾಸಿಸುತ್ತಿದ್ದ ಕಿರಿದಾದ ಕೊಠಡಿಗಳು, ಊಟದ ಸ್ಥಳ, ಕಾಕ್‌ಪಿಟ್, ಕ್ಷಿಪಣಿ ಉಡಾವಣಾ ವ್ಯವಸ್ಥೆ, ರೇಡಾರ್ ಕೊಠಡಿ ಎಲ್ಲವೂ ಯಥಾಸ್ಥಿತಿಯಲ್ಲಿವೆ. ನೌಕಾಪಡೆಯ ಅಧಿಕಾರಿಗಳು ಮತ್ತು ತರಬೇತಿ ಪಡೆದ ಮಾರ್ಗದರ್ಶಕರು ಪ್ರವಾಸಿಗರಿಗೆ ಆ ನೌಕೆಯ ಇತಿಹಾಸ, 1971ರ ಯುದ್ಧದಲ್ಲಿ ಇಂತಹ ನೌಕೆಗಳ ಪಾತ್ರ ಹಾಗೂ ಭಾರತೀಯ ನೌಕಾಪಡೆಯ ಶಕ್ತಿಯ ಬಗ್ಗೆ ವಿವರವಾಗಿ ತಿಳಿಸುತ್ತಾರೆ.
