ನವದೆಹಲಿ: ವಿಚ್ಛೇದನದ ನಂತರ ಪತ್ನಿ ಪಡೆಯುವ ಜೀವನಾಂಶದ ಕುರಿತು ದೆಹಲಿ ಫ್ಯಾಮಿಲಿ ಕೋರ್ಟ್ ಅತ್ಯಂತ ಮಹತ್ವದ ತೀರ್ಪು ಪ್ರಕಟಿಸಿದೆ. ಮದುವೆಯಾಗಿ ಕೇವಲ 13 ತಿಂಗಳಿಗೆ ದೂರವಾಗಿದ್ದ ಪತ್ನಿಯೊಬ್ಬಳು ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಾಲಯ, ಪತಿಯ ಸಾಮಾಜಿಕ ಸ್ಥಾನಮಾನಕ್ಕೆ ಅನುಗುಣವಾಗಿ ಪತ್ನಿಗೆ ಪ್ರತಿ ತಿಂಗಳು 5 ಲಕ್ಷ ರೂಪಾಯಿ ಮಧ್ಯಂತರ ಜೀವನಾಂಶ ನೀಡುವಂತೆ ಪತಿಗೆ ಆದೇಶಿಸಿದೆ.
ಜೀವನಾಂಶ ಎಂದರೆ ಏನು ಎಂಬುದರ ಬಗ್ಗೆ ನ್ಯಾಯಾಧೀಶ ದೇವೇಂದ್ರ ಕುಮಾರ್ ಗರ್ಗ್ ಅವರು ಸ್ಪಷ್ಟ ವ್ಯಾಖ್ಯಾನ ನೀಡಿದ್ದಾರೆ. ಜೀವನಾಂಶ ಎಂದರೆ ಕೇವಲ ಪ್ರಾಣಿಗಳಂತೆ ಬದುಕುವುದು ಅಥವಾ ಅಮಾನವೀಯ ಸ್ಥಿತಿಯಲ್ಲಿ ದಿನ ದೂಡುವುದಲ್ಲ. ಇದು ಪತಿಯ ಸಾಮಾಜಿಕ ಮತ್ತು ಆರ್ಥಿಕ ಸ್ಥಾನಮಾನಕ್ಕೆ ತಕ್ಕಂತೆ ಪತ್ನಿಯೂ ಗೌರವಯುತ ಜೀವನ ನಡೆಸುವುದನ್ನು ಖಚಿತಪಡಿಸುವ ಕಾನೂನು ವ್ಯವಸ್ಥೆ ಎಂದು ಕೋರ್ಟ್ ಹೇಳಿದೆ. ಆರ್ಥಿಕ ನೆರವು ಕೇವಲ ಬದುಕಲಿಕ್ಕಾಗಿ ನೀಡುವ ಹಣವಲ್ಲ, ಅದು ಮಹಿಳೆಯ ಘನತೆಗೆ ಸಂಬಂಧಿಸಿದ ವಿಷಯ ಎಂದು ನ್ಯಾಯಾಲಯ ಒತ್ತಿ ಹೇಳಿದೆ.
ಈ ಪ್ರಕರಣದಲ್ಲಿ ಪತಿಯು ದುಬೈನಲ್ಲಿ ನೆಲೆಸಿದ್ದು, ತಾನು ಭಾರತದ ಕಾನೂನಿನ ಅಡಿ ಜೀವನಾಂಶ ನೀಡುವ ಬಾಧ್ಯತೆಯಿಂದ ಮುಕ್ತನಾಗಬೇಕು ಎಂದು ವಾದಿಸಿದ್ದನು. ಅಲ್ಲದೆ, ಪತ್ನಿ ವಿದ್ಯಾವಂತೆಯಾಗಿದ್ದು, ಕೆಲಸ ಮಾಡುವ ಸಾಮರ್ಥ್ಯ ಹೊಂದಿದ್ದಾರೆ. ಮದುವೆ ನಡೆದಿದ್ದು ಕೇವಲ 13 ತಿಂಗಳು ಮಾತ್ರ, ಹೀಗಾಗಿ 8 ಲಕ್ಷ ರೂ. ಬೇಡಿಕೆ ಸಮಂಜಸವಲ್ಲ ಎಂಬುದು ಪತಿ ಪರ ವಕೀಲರ ವಾದವಾಗಿತ್ತು.
ಆದರೆ ಇದನ್ನು ತಳ್ಳಿಹಾಕಿದ ನ್ಯಾಯಾಲಯ, ಕೆಲಸ ಮಾಡುವ ಸಾಮರ್ಥ್ಯ ಇರುವುದು ಮತ್ತು ಪ್ರಸ್ತುತ ಕೆಲಸ ಮಾಡುತ್ತಿರುವುದು ಎರಡೂ ಬೇರೆ ಬೇರೆ ವಿಷಯಗಳು. ಒಬ್ಬ ಸಮರ್ಥ ಪತಿ ತನ್ನ ಶಾಸನಬದ್ಧ ಕರ್ತವ್ಯದಿಂದ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ ಮತ್ತು ತನ್ನ ಪತ್ನಿಯನ್ನು ಆರ್ಥಿಕ ಸಂಕಷ್ಟಕ್ಕೆ ತಳ್ಳಲು ಕಾನೂನು ಬಿಡುವುದಿಲ್ಲ ಎಂದು ಖಡಕ್ ಆಗಿ ತಿಳಿಸಿದೆ.
ಪತ್ನಿ ಪರ ವಕೀಲರು ವಾದ ಮಂಡಿಸಿ, ಮದುವೆಗೆ ಮೊದಲು ಪತ್ನಿ ಅನುಭವಿಸುತ್ತಿದ್ದ ಅದೇ ಜೀವನಮಟ್ಟವನ್ನು ಮದುವೆಯ ನಂತರವೂ ಹೊಂದುವ ಹಕ್ಕು ಆಕೆಗೆ ಇದೆ. ಕೌಟುಂಬಿಕ ದೌರ್ಜನ್ಯದ ಕಾರಣದಿಂದ ಪತ್ನಿ ಮನೆ ಬಿಟ್ಟಿದ್ದಾಳೆ ಮತ್ತು ಈಗ ಪೋಷಕರ ಮೇಲೆ ಅವಲಂಬಿತಳಾಗಿದ್ದಾಳೆ ಎಂದು ನ್ಯಾಯಾಲಯಕ್ಕೆ ತಿಳಿಸಿದರು. ಭಾರತೀಯ ನಾಗರಿಕ ಸೇವಾ ಸಂಹಿತೆಯ (BNSS) ಸೆಕ್ಷನ್ 144 ರ ಅಡಿಯಲ್ಲಿ ಈ ಮಧ್ಯಂತರ ಜೀವನಾಂಶವನ್ನು ನೀಡಲಾಗಿದೆ.
