ಭಾರತದ ಇತಿಹಾಸದಲ್ಲಿ ಕರಾಳ ದಿನವಾಗಿ ದಾಖಲಾಗಿದೆ. ಗುಜರಾತ್‌ನ ಅಹಮದಾಬಾದ್ ವಿಮಾನ ನಿಲ್ದಾಣದ ಬಳಿ ಏರ್ ಇಂಡಿಯಾದ ಬೋಯಿಂಗ್ 787-8 ವಿಮಾನವು ಅಪಘಾತಕ್ಕೀಡಾಗಿ ವೈದ್ಯರ ಹಾಸ್ಟೆಲ್‌ಗೆ ಡಿಕ್ಕಿ ಹೊಡೆದ ಪರಿಣಾಮ 241 ಪ್ರಯಾಣಿಕರು ಹಾಗೂ 30 ಹಾಸ್ಟೆಲ್ ಸಿಬ್ಬಂದಿ ದಾರುಣವಾಗಿ ಮೃತಪಟ್ಟಿದ್ದರು. ಈ ದುರಂತದ ತನಿಖೆಯಲ್ಲಿ ಇಂಧನ ಸ್ವಿಚ್ ಲಾಕಿಂಗ್ ವ್ಯವಸ್ಥೆಯ ದೋಷವೇ ಪ್ರಮುಖ ಕಾರಣ ಎಂದು ಬಯಲಾಗಿದೆ. ಆಶ್ಚರ್ಯಕರ ಸಂಗತಿಯೆಂದರೆ, ಈ ದೋಷದ ಬಗ್ಗೆ 2018ರಲ್ಲೇ ಅಮೆರಿಕದ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ (FAA) ಎಚ್ಚರಿಕೆ ನೀಡಿತ್ತು, ಆದರೆ ಏರ್ ಇಂಡಿಯಾ ಅದನ್ನು ನಿರ್ಲಕ್ಷ್ಯಿಸಿತ್ತು.
ತನಿಖೆಯಿಂದ ತಿಳಿದುಬಂದಿರುವಂತೆ, ವಿಮಾನದ ಇಂಧನ ನಿಯಂತ್ರಣ ಸ್ವಿಚ್‌ಗಳು ರನ್‌ನಿಂದ ಕಟ್ ಆಫ್‌ಗೆ ಆಟೋಮ್ಯಾಟಿಕ್‌ ಆಗಿ ಬದಲಾದವು. ಇದರಿಂದ ಕೇವಲ ಒಂದು ಸೆಕೆಂಡಿನಲ್ಲಿ ಎರಡೂ ಇಂಜಿನ್‌ಗಳಿಗೆ ಇಂಧನ ಪೂರೈಕೆ ಸ್ಥಗಿತಗೊಂಡಿತು. ಫಲಿತಾಂಶವಾಗಿ, ವಿಮಾನ ಟೇಕ್ ಆಫ್ ಆಗಲು ಸಾಧ್ಯವಾಗದೆ, ಎದುರಿನ ಕಟ್ಟಡಕ್ಕೆ ಡಿಕ್ಕಿಯಾಯಿತು. ಕಾಕ್‌ಪಿಟ್ ವಾಯ್ಸ್ ರೆಕಾರ್ಡರ್ನಲ್ಲಿ ದಾಖಲಾದ ಪೈಲಟ್‌ಗಳ ಸಂಭಾಷಣೆಯಿಂದ ಈ ವಿಷಯ ದೃಢಪಟ್ಟಿದೆ. ಒಬ್ಬ ಪೈಲಟ್, “ನೀವೇಕೆ ಇಂಧನವನ್ನು ಕಟ್ ಆಫ್ ಮಾಡಿದ್ದೀರಿ?” ಎಂದು ಕೇಳಿದರೆ, ಇನ್ನೊಬ್ಬರು “ನಾನು ಮಾಡಿಲ್ಲ” ಎಂದು ಉತ್ತರಿಸಿದ್ದಾರೆ. ಆದರೆ, ಸ್ವಿಚ್‌ಗಳು ಸ್ವಯಂಚಾಲಿತವಾಗಿ ಕಟ್ ಆಫ್ ಆಗಿದ್ದವು.
2018ರ FAA ಎಚ್ಚರಿಕೆ
2018ರಲ್ಲಿ FAA ಬೋಯಿಂಗ್ ವಿಮಾನಗಳ ಇಂಧನ ಸ್ವಿಚ್ ಲಾಕಿಂಗ್ ಕಾರ್ಯವಿಧಾನದ ಸಂಭಾವ್ಯ ದೋಷಗಳ ಬಗ್ಗೆ ಎಚ್ಚರಿಕೆ ನೀಡಿತ್ತು. ಈ ದೋಷವು ಇಂಧನ ಪೂರೈಕೆಯನ್ನು ಅನಿರೀಕ್ಷಿತವಾಗಿ ಸ್ಥಗಿತಗೊಳಿಸಬಹುದೆಂದು ತಿಳಿಸಿ, ತಪಾಸಣೆಗೆ ಸಲಹೆ ನೀಡಿತ್ತು. ಆದರೆ, ಈ ತಪಾಸಣೆಯನ್ನು ಕಡ್ಡಾಯವೆಂದು ಸೂಚಿಸದ ಕಾರಣ, ಏರ್ ಇಂಡಿಯಾ ಯಾವುದೇ ಕ್ರಮ ಕೈಗೊಂಡಿರಲಿಲ್ಲ. ಈ ನಿರ್ಲಕ್ಷ್ಯವೇ ಈ ದುರಂತಕ್ಕೆ ಕಾರಣವಾಯಿತು ಎಂದು ತನಿಖೆಯಿಂದ ತಿಳಿದುಬಂದಿದೆ.
ಪತನವಾದ ಏರ್ ಇಂಡಿಯಾ ವಿಮಾನವು ಎರಡು ಜಿಇ ಇಂಜಿನ್‌ಗಳನ್ನು ಹೊಂದಿತ್ತು. ಇಂಧನ ನಿಯಂತ್ರಣ ಸ್ವಿಚ್‌ಗಳು ಇಂಜಿನ್‌ಗಳನ್ನು ಸ್ಟಾರ್ಟ್ ಮಾಡಲು ಮತ್ತು ಆಫ್ ಮಾಡಲು ಅತ್ಯಗತ್ಯ. ಆದರೆ, ಟೇಕ್ ಆಫ್ ಸಮಯದಲ್ಲಿ ಸ್ವಿಚ್‌ಗಳು ಆಫ್ ಆಗಿದ್ದರಿಂದ, ಇಂಜಿನ್‌ಗಳಿಗೆ ಇಂಧನ ಸರಬರಾಜು ನಿಂತು, ವಿಮಾನ ಅಪಘಾತಕ್ಕೀಡಾಯಿತು. ಈ ತಾಂತ್ರಿಕ ದೋಷವು ಆಧುನಿಕ ಜೆಟ್ ಲೈನರ್‌ಗಳಲ್ಲಿ ಮೊದಲ ಬಾರಿಗೆ ಕಂಡುಬಂದಿದ್ದು, ಇಂಧನ ನಿಯಂತ್ರಣ ಸ್ವಿಚ್‌ಗಳ ಮಹತ್ವ ಕಾಪಾಡಿಕೊಳ್ಳುವ ಅಗತ್ಯವನ್ನು ಎತ್ತಿ ತೋರಿಸಿದೆ.
ಈ ದುರಂತದ ಬಗ್ಗೆ ತನಿಖೆ ಇನ್ನೂ ಮುಂದುವರಿದಿದ್ದು, ಏರ್ ಇಂಡಿಯಾ ಮತ್ತು ಬೋಯಿಂಗ್ ಕಂಪನಿಗಳು ಇಂಧನ ಸ್ವಿಚ್ ವ್ಯವಸ್ಥೆಯ ತಪಾಸಣೆಯನ್ನು ಕಡ್ಡಾಯಗೊಳಿಸುವ ಕುರಿತು ಚರ್ಚೆ ನಡೆಸುತ್ತಿವೆ. ಈ ಘಟನೆಯಿಂದ ವಿಮಾನಯಾನ ಉದ್ಯಮದಲ್ಲಿ ಸುರಕ್ಷತಾ ಕ್ರಮಗಳನ್ನು ಮತ್ತಷ್ಟು ಬಿಗಿಗೊಳಿಸುವ ಅಗತ್ಯವಿದೆ ಎಂಬುದು ಸ್ಪಷ್ಟವಾಗಿದೆ.
