ಬೆಂಗಳೂರು: ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಏರಿಕೆಯ ಭೀತಿ ಮತ್ತು ಜಾಗತಿಕ ಕಚ್ಚಾ ತೈಲದ ಬೆಲೆ ಹೆಚ್ಚಳದ ಹಿನ್ನೆಲೆಯಲ್ಲಿ ದೇಶಾದ್ಯಂತ ಮತ್ತೆ ವರ್ಕ್ ಫ್ರಂ ಹೋಂ (WFH) ಸಂಸ್ಕೃತಿ ಜೋರಾಗುತ್ತಿದೆ. ಕೋವಿಡ್ ಕಾಲದ ನಂತರ ಕಚೇರಿ ಕೆಲಸಕ್ಕೆ ಹೊಂದಿಕೊಂಡಿದ್ದ ಜನರು ಈಗ ಮತ್ತೆ ಮನೆಯಿಂದಲೇ ಕೆಲಸ ಮಾಡುವತ್ತ ಮುಖ ಮಾಡುವಂತಾಗಿದೆ.
ಪ್ರಧಾನಿ ನರೇಂದ್ರ ಮೋದಿ ಅವರು ಇತ್ತೀಚೆಗೆ ಪೆಟ್ರೋಲ್-ಡೀಸೆಲ್ ಉಳಿತಾಯಕ್ಕಾಗಿ ವರ್ಕ್ ಫ್ರಂ ಹೋಂ, ವರ್ಚುವಲ್ ಮೀಟಿಂಗ್ಗಳು ಮತ್ತು ಕಾರ್ ಪೂಲಿಂಗ್ ಅನುಸರಿಸುವಂತೆ ಜನರಿಗೆ ಮನವಿ ಮಾಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಆಂಧ್ರ ಪ್ರದೇಶ ಸರ್ಕಾರವು ಮುಂದೆ ಬಂದಿದೆ. ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಅವರು ಸರ್ಕಾರಿ ನೌಕರರಿಗೆ ವರ್ಕ್ ಫ್ರಂ ಹೋಂ ಜಾರಿ ಮಾಡುವುದಾಗಿ ಘೋಷಿಸಿದ್ದಾರೆ. ಕೆಲವು ಇಲಾಖೆಗಳಲ್ಲಿ ಹೈಬ್ರಿಡ್ ಮಾಡೆಲ್ ಅನುಸರಿಸಲು ಯೋಜಿಸಲಾಗಿದೆ.
ಆಂಧ್ರ ಪ್ರದೇಶದ ನಿಯಮ:
ಕಚೇರಿಗೆ ಬರಲು ಅಗತ್ಯವಿಲ್ಲದ ಕೆಲಸಗಳಲ್ಲಿ ಮನೆಯಿಂದಲೇ ಕೆಲಸ ಮಾಡುವ ಅವಕಾಶ. ಅಗತ್ಯ ಕ್ಷೇತ್ರಗಳಲ್ಲಿ ಮಾತ್ರ ಕಚೇರಿ ಹಾಜರಾತಿ. ಮಹಿಳೆಯರಿಗೆ ವಿಶೇಷವಾಗಿ WFH ಅವಕಾಶ ನೀಡುವ ಯೋಜನೆಯೂ ಇದೆ. ಇದು ಇಂಧನ ಉಳಿತಾಯಕ್ಕೆ ಸಹಕಾರಿ ಎಂದು ಸರ್ಕಾರ ವಿವರಿಸಿದೆ.
ಕರ್ನಾಟಕದಲ್ಲಿ ಸಾಧ್ಯತೆ?
ಬೆಂಗಳೂರು ಐಟಿ ನಗರವಾಗಿರುವುದರಿಂದ ಟೆಕ್ ಕಂಪನಿಗಳಲ್ಲಿ ಈಗಾಗಲೇ ಹೈಬ್ರಿಡ್ ಮಾಡೆಲ್ ಜಾರಿಯಲ್ಲಿದೆ. ಪ್ರಧಾನಿಯ ಮನವಿ ಮತ್ತು ಆಂಧ್ರದ ಕ್ರಮದ ನಂತರ ಕರ್ನಾಟಕ ಸರ್ಕಾರವೂ WFH ಅಥವಾ ಹೈಬ್ರಿಡ್ ಪಾಲಿಸಿ ಜಾರಿಗೆ ತರುವ ಸಾಧ್ಯತೆ ಇದೆ. ಬೆಂಗಳೂರಿನ ಟೆಕ್ಕಿಗಳು ವಾರಕ್ಕೊಮ್ಮೆ ಅಥವಾ ಹೆಚ್ಚು ದಿನಗಳ ವರ್ಕ್ ಫ್ರಂ ಹೋಂ ಭಾಗ್ಯ ಪಡೆಯುವ ನಿರೀಕ್ಷೆ ಹುಟ್ಟಿದೆ.
ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಏರಿಕೆಯಿಂದ ದೇಶೀಯ ತೈಲ ಕಂಪನಿಗಳು ಭಾರೀ ನಷ್ಟ ಅನುಭವಿಸುತ್ತಿವೆ. ಪ್ರತಿ ದಿನ ಸಾವಿರಾರು ಕೋಟಿ ರೂಪಾಯಿ ನಷ್ಟ ತಪ್ಪಿಸಲು ಇಂಧನ ಉಳಿತಾಯ ಅಗತ್ಯವಾಗಿದೆ. WFH ಅನುಸರಿಸಿದರೆ ದೈನಂದಿನ ಪ್ರಯಾಣ ಕಡಿಮೆಯಾಗಿ ಪೆಟ್ರೋಲ್-ಡೀಸೆಲ್ ಬಳಕೆ ಗಣನೀಯವಾಗಿ ತಗ್ಗುತ್ತದೆ ಎಂದು ಅಂದಾಜಿದೆ.
ಆದರೆ ಕೆಲವು ವಲಯಗಳಲ್ಲಿ WFH ಸಾಧ್ಯವಿಲ್ಲ. ಉದ್ಯೋಗಿಗಳು ಮತ್ತು ಕಂಪನಿಗಳು ಸಮತೋಲನ ಕಾಯ್ದುಕೊಳ್ಳಬೇಕಿದೆ. ಈ ಕ್ರಮವು ಪರಿಸರ ಸ್ನೇಹಿ ಕೂಡ ಆಗಿದೆ ಎಂದು ತಜ್ಞರು ಹೇಳುತ್ತಿದ್ದಾರೆ.
