ಬೆಂಗಳೂರು, ಆಗಸ್ಟ್ 17: ರಾಜ್ಯದಲ್ಲಿ ನಡೆಯುತ್ತಿರುವ ವಿಶೇಷ ತೀವ್ರ ಪರಿಷ್ಕರಣೆ ಪ್ರಕ್ರಿಯೆಯಲ್ಲಿ ಮತದಾರರ ಗಣತಿ ನಮೂನೆ ವಾಪಸ್ ಸಲ್ಲಿಸಲು ಇಂದು (ಆಗಸ್ಟ್ 17) ಸಂಜೆ 4 ಗಂಟೆಯವರೆಗೆ ಮಾತ್ರ ಅವಕಾಶ ಇದೆ. ಚುನಾವಣಾ ಆಯೋಗವು ನೀಡಿರುವ ಈ ಗಡುವಿನೊಳಗೆ ನಮೂನೆ ಸಲ್ಲಿಸದಿದ್ದರೆ, ನಿಮ್ಮ ಹೆಸರು ಕರಡು ಮತದಾರರ ಪಟ್ಟಿಯಿಂದ ಕೈಬಿಡುವ ಸಾಧ್ಯತೆ ಇದೆ.
ಈಗಾಗಲೇ ಬೂತ್ ಮಟ್ಟದ ಅಧಿಕಾರಿ (BLO) ಮೂಲಕ ಗಣತಿ ನಮೂನೆ ಪಡೆದಿರುವ ಮತದಾರರು ಅದರಲ್ಲಿ ಅಗತ್ಯ ಮಾಹಿತಿಯನ್ನು ಸರಿಯಾಗಿ ಭರ್ತಿ ಮಾಡಿ, ಸಹಿ ಮಾಡಿ, ಇಂದು ಸಂಜೆ 4 ಗಂಟೆಯೊಳಗೆ ಸಂಬಂಧಪಟ್ಟ BLOಗೆ ಹಿಂತಿರುಗಿಸಬೇಕು ಎಂದು ಚುನಾವಣಾ ಅಧಿಕಾರಿಗಳು ಸೂಚಿಸಿದ್ದಾರೆ.
ಹೆಸರು ASDDO ಪಟ್ಟಿಯಲ್ಲಿ ಇದ್ದರೆ ಏನು ಮಾಡಬೇಕು?
ಕೆಲವು ಮತದಾರರನ್ನು Absent (A), Shifted (S), Death (D), Duplicate (D) ಮತ್ತು Others (O) ವರ್ಗಗಳಲ್ಲಿ ಸೇರಿಸಲಾಗಿದೆ. ನಿಮ್ಮ ಹೆಸರೂ ಈ ಪಟ್ಟಿಯಲ್ಲಿ ಕಂಡುಬಂದರೆ ತಕ್ಷಣ ಸಂಬಂಧಪಟ್ಟ BLO ಅಥವಾ ಮತದಾರರ ನೋಂದಣಾಧಿಕಾರಿ (ERO) ಅವರನ್ನು ಸಂಪರ್ಕಿಸಬೇಕು.
ಅವರಿಂದ ಗಣತಿ ನಮೂನೆ ಪಡೆದು ಸರಿಯಾದ ಮಾಹಿತಿ ಹಾಗೂ ಅಗತ್ಯ ದಾಖಲೆಗಳನ್ನು ಸಲ್ಲಿಸಿದರೆ ಪರಿಶೀಲನೆ ನಡೆಸಿ ರೋಲ್ಬ್ಯಾಕ್ ಮಾಡುವ ಅವಕಾಶವಿದೆ. ಇಲ್ಲವಾದರೆ ನಿಮ್ಮ ಹೆಸರು ಆಗಸ್ಟ್ 24ರಂದು ಪ್ರಕಟವಾಗುವ ಕರಡು ಮತದಾರರ ಪಟ್ಟಿಯಲ್ಲಿ ಕಾಣಿಸಿಕೊಳ್ಳದಿರಬಹುದು.
ನಿಮ್ಮ ಹೆಸರು ASDDO ಪಟ್ಟಿಯಲ್ಲಿ ಇದೆಯೇ?
SIR ಪ್ರಕ್ರಿಯೆಯಲ್ಲಿ ಕೆಲವು ಮತದಾರರನ್ನು ಐದು ವರ್ಗಗಳಲ್ಲಿ ಗುರುತಿಸಲಾಗಿದೆ. ಅವುಗಳೆಂದರೆ:
-
A – Absent: ಮನೆಯಲ್ಲಿ ಲಭ್ಯವಿಲ್ಲದವರು
-
S – Shifted: ಶಾಶ್ವತವಾಗಿ ಸ್ಥಳಾಂತರಗೊಂಡವರು
-
D – Death: ಮೃತಪಟ್ಟವರು
-
D – Duplicate: ಒಂದಕ್ಕಿಂತ ಹೆಚ್ಚು ನೋಂದಣಿ ಹೊಂದಿರುವವರು
-
O – Others: ಇತರೆ ಕಾರಣಗಳು
ನಿಮ್ಮ ಹೆಸರು ಈ ಪಟ್ಟಿಯಲ್ಲಿ ಸೇರಿದ್ದರೆ ನಿರ್ಲಕ್ಷ್ಯ ಮಾಡಬೇಡಿ. ತಕ್ಷಣ BLO ಅಥವಾ ಮತದಾರರ ನೋಂದಣಾಧಿಕಾರಿ (ERO) ಅವರನ್ನು ಸಂಪರ್ಕಿಸಿ ಅಗತ್ಯ ದಾಖಲೆಗಳೊಂದಿಗೆ ಮಾಹಿತಿ ನೀಡಿ ರೋಲ್ಬ್ಯಾಕ್ ಮಾಡಿಸಿಕೊಳ್ಳಬೇಕು. ಇಲ್ಲವಾದರೆ ನಿಮ್ಮ ಹೆಸರು ಮುಂದಿನ ಕರಡು ಮತದಾರರ ಪಟ್ಟಿಯಲ್ಲಿ ಕಾಣಿಸಿಕೊಳ್ಳುವುದಿಲ್ಲ.
1.08 ಕೋಟಿ ಮತದಾರರ ಹೆಸರು ರದ್ದಾಗುವ ಸಾಧ್ಯತೆ
ರಾಜ್ಯದಲ್ಲಿ ಒಟ್ಟು 5,54,32,314 ಮತದಾರರಿದ್ದು, SIR ಪ್ರಕ್ರಿಯೆಯಲ್ಲಿ 1,08,34,595 ಮಂದಿಯನ್ನು ASDDO ವರ್ಗಕ್ಕೆ ಸೇರಿಸಲಾಗಿದೆ. ಇದು ಒಟ್ಟು ಮತದಾರರ 19.55% ಆಗಿದೆ.
ASDDO ಪಟ್ಟಿಯಲ್ಲಿ ಇರುವವರ ಪೈಕಿ 65.62 ಲಕ್ಷ ಮಂದಿಯನ್ನು ಶಾಶ್ವತವಾಗಿ ಸ್ಥಳಾಂತರಗೊಂಡವರು ಎಂದು ಗುರುತಿಸಲಾಗಿದೆ. ಇವರು ಹೊಸ ವಿಳಾಸದ ದಾಖಲೆಗಳೊಂದಿಗೆ Form 6 ಸಲ್ಲಿಸಿದರೆ, ERO ಪರಿಶೀಲನೆಯ ಬಳಿಕ ಅರ್ಹತೆ ಇದ್ದಲ್ಲಿ ಮತದಾರರ ಪಟ್ಟಿಗೆ ಹೆಸರು ಮರು ಸೇರ್ಪಡೆಯಾಗಲಿದೆ.
ಇದುವರೆಗೆ ಮತದಾರರ ಪಟ್ಟಿಯಲ್ಲಿ ಹೆಸರು ನೋಂದಾಯಿಸದ ಹೊಸ ಮತದಾರರೂ Form 6 ಮೂಲಕ ಅರ್ಜಿ ಸಲ್ಲಿಸಬಹುದು.
ಮುಂದಿನ ವೇಳಾಪಟ್ಟಿ
ಚುನಾವಣಾ ಆಯೋಗವು ರೋಲ್ಬ್ಯಾಕ್ಗೆ ಅವಕಾಶ ನೀಡುವಂತೆ SIR ವೇಳಾಪಟ್ಟಿಯನ್ನು ಎರಡು ಬಾರಿ ಪರಿಷ್ಕರಿಸಿದೆ. ಇಂದಿನ ಗಡುವಿನ ಬಳಿಕ ಈ ಪ್ರಮುಖ ದಿನಾಂಕಗಳು ಅನ್ವಯವಾಗಲಿವೆ:
-
ಆಗಸ್ಟ್ 17: ಸಂಜೆ 4 ಗಂಟೆಗೆ ರೋಲ್ಬ್ಯಾಕ್ ಹಾಗೂ ಮನೆ-ಮನೆ ಭೇಟಿ ಪ್ರಕ್ರಿಯೆ ಮುಕ್ತಾಯ
-
ಆಗಸ್ಟ್ 24: ಕರಡು ಮತದಾರರ ಪಟ್ಟಿ ಪ್ರಕಟ
-
ಆಗಸ್ಟ್ 24 – ಸೆಪ್ಟೆಂಬರ್ 23: ಹೆಸರು ಸೇರ್ಪಡೆ, ತಿದ್ದುಪಡಿ ಹಾಗೂ ಆಕ್ಷೇಪಣೆ ಸಲ್ಲಿಕೆ
-
ಅಕ್ಟೋಬರ್ 27: ಅಂತಿಮ ಮತದಾರರ ಪಟ್ಟಿ ಪ್ರಕಟ
