ಬೆಂಗಳೂರು: ಕರ್ನಾಟಕದ ಹೆಮ್ಮೆಯ ‘ನಂದಿನಿ’ ಬ್ರಾಂಡ್ ತನ್ನ ಸಿಹಿ ಉತ್ಪನ್ನಗಳ ಮೂಲಕ ದಸರಾ ಮತ್ತು ದೀಪಾವಳಿ ಹಬ್ಬಗಳಲ್ಲಿ ಐತಿಹಾಸಿಕ ಸಾಧನೆ ಮಾಡಿದೆ. ಕರ್ನಾಟಕ ಹಾಲು ಮಹಾಮಂಡಳಿ (ಕೆಎಂಎಫ್) ಮತ್ತು ಅದರ ಸದಸ್ಯ ಹಾಲು ಒಕ್ಕೂಟಗಳು ಈ ಹಬ್ಬದ ಅವಧಿಯಲ್ಲಿ 1,100 ಮೆಟ್ರಿಕ್ ಟನ್ ಸಿಹಿ ಉತ್ಪನ್ನಗಳ ಮಾರಾಟ ಮಾಡಿ 46 ಕೋಟಿ ರೂಪಾಯಿಗಳ ದಾಖಲೆ ವಹಿವಾಟು ನಡೆಸಿದೆ.
ಕಳೆದ ವರ್ಷ ದಸರಾ-ದೀಪಾವಳಿ ಅವಧಿಯಲ್ಲಿ 725 ಮೆಟ್ರಿಕ್ ಟನ್ ಸಿಹಿ ಉತ್ಪನ್ನಗಳ ಮಾರಾಟ ಮಾಡಿ 33.48 ಕೋಟಿ ರೂಪಾಯಿ ವಹಿವಾಟು ದಾಖಲಾಗಿತ್ತು. ಈ ವರ್ಷ ಕೆಎಂಎಫ್ ಈ ದಾಖಲೆಯನ್ನು ಮೀರಿಸಿ 38% ವಹಿವಾಟು ಏರಿಕೆ ಸಾಧಿಸಿದೆ. ಕೆಎಂಎಫ್ ಇತಿಹಾಸದಲ್ಲೇ ಇದು ಸಾರ್ವಕಾಲಿಕ ದಾಖಲೆಯಾಗಿ ನಿಂತಿದೆ.
ಹಬ್ಬಗಳಿಗೆ ಎರಡು ತಿಂಗಳ ಮುಂಚೆ ನಂದಿನಿ ತನ್ನ ಎಲ್ಲಾ ಸದಸ್ಯ ಒಕ್ಕೂಟಗಳ ಸಹಕಾರದೊಂದಿಗೆ ನಿಖರವಾದ ಯೋಜನೆ ರೂಪಿಸಿತ್ತು. 1,000 ಮೆಟ್ರಿಕ್ ಟನ್ ಮಾರಾಟ ಗುರಿ ಹಾಕಿಕೊಂಡಿದ್ದ ಸಂಸ್ಥೆ ಅದಕ್ಕಿಂತಲೂ 100 ಟನ್ ಹೆಚ್ಚು ಮಾರಾಟ ಮಾಡಿ ಗುರಿ ಮೀರಿಸಿದೆ.
ನಂದಿನಿ ಬ್ರಾಂಡ್‌ನ ಗುಣಮಟ್ಟ, ಶುದ್ಧತೆ ಮತ್ತು ಕೈಗೆಟುಕುವ ಬೆಲೆಯೇ ಈ ಸಾಧನೆಗೆ ಮೂಲ ಕಾರಣ. ಗ್ರಾಹಕರು ನಂದಿನಿ ಉತ್ಪನ್ನಗಳ ಮೇಲೆ ಇಡುವ ಅಪಾರ ವಿಶ್ವಾಸವೇ ಈ ದಾಖಲೆ ಸಾಧನೆಗೆ ಕಾರಣವಾಗಿದೆ. ನಂದಿನಿ ಬ್ರಾಂಡ್‌ನಡಿಯಲ್ಲಿ 40 ರಿಂದ ಅಧಿಕ ಬಗೆಯ ಸಿಹಿ ಉತ್ಪನ್ನಗಳು ಈ ಹಬ್ಬದ ಅವಧಿಯಲ್ಲಿ ಗ್ರಾಹಕರನ್ನು ಆಕರ್ಷಿಸಿವೆ.
ಈ ಸಾಧನೆ ಕೇವಲ ಕೆಎಂಎಫ್‌ನದು ಮಾತ್ರವಲ್ಲ, ಬದಲಿಗೆ ರಾಜ್ಯದ ಲಕ್ಷಾಂತರ ಹಾಲು ಉತ್ಪಾದಕ ರೈತರು ಮತ್ತು ಸಹಕಾರಿ ಚಳುವಳಿಯ ದೃಢತೆಯ ಪ್ರತೀಕ. ಕೆಎಂಎಫ್ ಪ್ರತಿದಿನ ಸರಾಸರಿ 1 ಕೋಟಿ ಲೀಟರ್ ಹಾಲು ಸಂಗ್ರಹಿಸಿ, ರಾಜ್ಯ ಮತ್ತು ಹೊರರಾಜ್ಯ ಮಾರುಕಟ್ಟೆಗಳಲ್ಲಿ ಶುದ್ಧ ಮತ್ತು ಗುಣಮಟ್ಟದ ಉತ್ಪನ್ನಗಳನ್ನು ತಲುಪಿಸುತ್ತಿದೆ.
ನಂದಿನಿ ಬ್ರಾಂಡ್‌ನಡಿಯಲ್ಲಿ ಹಾಲು, ತುಪ್ಪ, ಮೊಸರು, ಬೆಣ್ಣೆ, ಪನೀರ್ ಮತ್ತು ಸಿಹಿ ಉತ್ಪನ್ನಗಳನ್ನು ಒಳಗೊಂಡು 175 ಕ್ಕೂ ಅಧಿಕ ಉತ್ಪನ್ನಗಳನ್ನು ತಯಾರಿಸಲಾಗುತ್ತಿದೆ. ಇವು ಕೇವಲ ಕರ್ನಾಟಕದಲ್ಲಷ್ಟೇ ಅಲ್ಲದೆ ಆಂಧ್ರಪ್ರದೇಶ, ತೆಲಂಗಾಣ, ತಮಿಳುನಾಡು, ಮಹಾರಾಷ್ಟ್ರ, ಗೋವಾ, ಕೇರಳ, ದೆಹಲಿ, ಅಸ್ಸಾಂ ಸೇರಿದಂತೆ ಹಲವು ರಾಜ್ಯಗಳಲ್ಲಿ ಮಾರಾಟವಾಗುತ್ತಿದೆ. ಕೆಲ ವಿದೇಶಿ ಮಾರುಕಟ್ಟೆಗಳಲ್ಲೂ ನಂದಿನಿ ಉತ್ಪನ್ನಗಳಿಗೆ ಉತ್ತಮ ಬೇಡಿಕೆ ಇದೆ.
