ಕೊಳ್ಳೇಗಾಲ (ಆಗಸ್ಟ್ 31, 2025): ತಿಂಡಿಪೋತರನ್ನು ನೋಡಿರುವಿರಿ, ಕುರುಕಲು ತಿಂಡಿಗಳನ್ನು ರುಚಿಯಾಗಿ ತಿನ್ನುವವರನ್ನೂ ಕಂಡಿರುವಿರಿ. ಆದರೆ, ಬೈಕ್ ಮತ್ತು ಕಾರುಗಳ ಎಂಜಿನ್ ಆಯಿಲ್‌ನ್ನು ಹಣ್ಣಿನ ರಸದಂತೆ ಗಟಗಟನೆ ಕುಡಿಯುವ ವ್ಯಕ್ತಿಯನ್ನು ಕಂಡಿದ್ದೀರಾ? ಹೌದು, ಚಾಮರಾಜನಗರ ಜಿಲ್ಲೆಯ ಕೊಳ್ಳೇಗಾಲದಲ್ಲಿ ಈ ಆಶ್ಚರ್ಯಕರ ಘಟನೆ ನಡೆದಿದೆ. ಮೈಸೂರಿನ ಕುಮಾರ್ ಎಂಬ ಅಯ್ಯಪ್ಪ ಸ್ವಾಮಿಯ ಭಕ್ತ ಕಳೆದ 29 ವರ್ಷಗಳಿಂದ ಎಂಜಿನ್ ಆಯಿಲ್ ಕುಡಿದು ಜೀವನ ಸಾಗಿಸುತ್ತಿದ್ದಾರೆ.
ಕುಮಾರ್, ಶಬರಿಮಲೆಗೆ ತೆರಳುವ ಮಾರ್ಗದಲ್ಲಿ ಕೊಳ್ಳೇಗಾಲದಲ್ಲಿ ತಂಗಿದ್ದಾಗ ಈ ಘಟನೆ ಸ್ಥಳೀಯರ ಗಮನ ಸೆಳೆದಿದೆ. ಸಾಮಾನ್ಯವಾಗಿ ಜನರು ಚಹಾ, ಕಾಫಿ, ಅಥವಾ ತಂಪು ಪಾನೀಯಗಳನ್ನು ಕುಡಿಯುವುದನ್ನು ನಾವು ನೋಡುತ್ತೇವೆ. ಆದರೆ, ಕುಮಾರ್ ತಮ್ಮ ಕೈಯಲ್ಲಿ ಒಂದು ಬಾಟಲಿಯಲ್ಲಿ ಎಂಜಿನ್ ಆಯಿಲ್‌ನ್ನು ತೆಗೆದುಕೊಂಡು, ಅದನ್ನು ರುಚಿಯಾಗಿ ಕುಡಿಯುತ್ತಿದ್ದ ದೃಶ್ಯ ಎಲ್ಲರನ್ನೂ ಬೆಚ್ಚಿಬೀಳಿಸಿತ್ತು. ಸ್ಥಳೀಯರು ಈ ದೃಶ್ಯವನ್ನು ಕಂಡು ಆಶ್ಚರ್ಯಚಕಿತರಾದರು. “ನಾನು ಕಳೆದ 29 ವರ್ಷಗಳಿಂದ ಇದನ್ನೇ ಕುಡಿಯುತ್ತಿದ್ದೇನೆ. ಇದೇ ನನ್ನ ಆಹಾರ, ಇದರಿಂದ ನನಗೆ ಯಾವುದೇ ತೊಂದರೆಯಾಗಿಲ್ಲ,” ಎಂದು ಕುಮಾರ್ ಹೇಳಿದರು.
ಕುಮಾರ್, “ನಾನು ಊಟ-ತಿಂಡಿ ಏನನ್ನೂ ತಿನ್ನುವುದಿಲ್ಲ. ಕಾಫಿ, ಚಹಾದ ಜೊತೆಗೆ ಎಂಜಿನ್ ಆಯಿಲ್ ನನ್ನ ದಿನಚರಿ ಆಹಾರ. ದೇವರ ಕೃಪೆಯಿಂದ ನಾನು ಆರೋಗ್ಯವಾಗಿದ್ದೇನೆ,” ಎಂದು ಕುಮಾರ್ ತಿಳಿಸಿದರು.
