ಕಲಬುರಗಿ: ಶಾರ್ಟ್ ಸರ್ಕ್ಯೂಟ್ನಿಂದ ಬೆಂಕಿ ಸಂಭವಿಸಿ, ಖಾಸಗಿ ವೈದ್ಯಕೀಯ ಕ್ಲಿನಿಕ್ ಹೊತ್ತಿ ಉರಿದ ಘಟನೆ ಕಲಬುರಗಿ ಜಿಲ್ಲೆಯ ಅಫಜಲಪುರ ತಾಲೂಕಿನ ಕರಜಗಿ ಗ್ರಾಮದಲ್ಲಿ ನಡೆದಿದೆ.
ಡಾ. ಶ್ರೀದೇವಿ ಬಿರಾದರ್ ಅವರಿಗೆ ಸೇರಿದ್ದ ಈ ಕ್ಲಿನಿಕ್ ಧಗಧಗನೆ ಹೊತ್ತಿ ಉರಿದು ಸಂಪೂರ್ಣವಾಗಿ ಸುಟ್ಟು ಕರಕಲಾಗಿದೆ. ಅದೃಷ್ಟವಶಾತ್ ಕ್ಲಿನಿಕ್ ಬಂದ್ ಆಗಿದ್ದ ಸಮಯದಲ್ಲಿ ಈ ಅವಘಡ ಸಂಭವಿಸಿದ್ದರಿಂದ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ.
ಡಾ. ಶ್ರೀದೇವಿ ಬಿರಾದರ್ ಅವರು ಸಿಂದಗಿ ಪಟ್ಟಣದಿಂದ ಪ್ರತೀ ಶನಿವಾರ ಕರಜಗಿ ಗ್ರಾಮಕ್ಕೆ ಬಂದು ರೋಗಿಗಳನ್ನು ಪರೀಕ್ಷಿಸಿ ಚಿಕಿತ್ಸೆ ನೀಡುತ್ತಿದ್ದರು. ಗ್ರಾಮೀಣ ಭಾಗದ ಜನರಿಗೆ ಇದು ಪ್ರಮುಖ ಆರೋಗ್ಯ ಕೇಂದ್ರವಾಗಿತ್ತು. ವಿದ್ಯುತ್ ಸಂಪರ್ಕದ ಶಾರ್ಟ್ ಸರ್ಕ್ಯೂಟ್ನಿಂದಾಗಿ ಬೆಂಕಿ ಹೊತ್ತಿಕೊಂಡಿದೆ ಎನ್ನಲಾಗುತ್ತಿದೆ.
ಕ್ಲಿನಿಕ್ನೊಳಗಿನಿಂದ ಹೊಗೆ ಏಳುತ್ತಿರುವುದು ಕಂಡುಬಂದಿದೆ. ಕೆಲವೇ ಕ್ಷಣಗಳಲ್ಲಿ ಬೆಂಕಿ ವ್ಯಾಪಕವಾಗಿ ಹರಡಿ ಕ್ಲಿನಿಕ್ನೊಳಗಿನ ವೈದ್ಯಕೀಯ ಉಪಕರಣಗಳು, ಔಷಧಿಗಳು, ಫರ್ನಿಚರ್ ಸೇರಿದಂತೆ ಎಲ್ಲವೂ ಬೆಂಕಿಗಾಹುತಿಯಾಗಿವೆ. ಗ್ರಾಮಸ್ಥರು ತಕ್ಷಣವೇ ಅಗ್ನಿಶಾಮಕ ದಳ ಹಾಗೂ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.
ಅಗ್ನಿಶಾಮಕ ಸಿಬ್ಬಂದಿ ಸ್ಥಳಕ್ಕೆ ಧಾವಿಸಿ ಬೆಂಕಿ ನಂದಿಸುವ ಪ್ರಯತ್ನ ಮಾಡಿದರೂ, ಅಷ್ಟರಲ್ಲಿ ಬಹುತೇಕ ವಸ್ತುಗಳು ಸುಟ್ಟು ಕರಕಲಾಗಿದ್ದವು. ಕ್ಲಿನಿಕ್ನಲ್ಲಿದ್ದ ಸುಮಾರು 2 ರಿಂದ 3 ಲಕ್ಷ ರೂಪಾಯಿ ಮೌಲ್ಯದ ಔಷಧಿಗಳು ಸಂಪೂರ್ಣವಾಗಿ ಸುಟ್ಟು ಕರಕಲಾಗಿವೆ. ಜೊತೆಗೆ ಬೆಲೆಬಾಳುವ ವೈದ್ಯಕೀಯ ಯಂತ್ರೋಪಕರಣಗಳು, ಫರ್ನಿಚರ್ ಸೇರಿದಂತೆ ಒಟ್ಟು 7 ರಿಂದ 8 ಲಕ್ಷ ರೂಪಾಯಿ ನಷ್ಟ ಸಂಭವಿಸಿದೆ ಎನ್ನಲಾಗಿದೆ.
ಘಟನೆ ನಡೆದ ಸ್ಥಳ ಅಫಜಲಪುರ ಪೊಲೀಸ್ ಠಾಣಾ ವ್ಯಾಪ್ತಿಗೆ ಸೇರಿದ್ದು, ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
COP30 ಶೃಂಗಸಭೆಯಲ್ಲಿ ಬೆಂಕಿ ಅವಘಡ: 21 ಜನರಿಗೆ ಗಾಯ
ಬೆಲೆಮ್ (ಬ್ರೆಜಿಲ್), ನವೆಂಬರ್ 2025: ಬ್ರೆಜಿಲ್ನ ಬೆಲೆಮ್ ನಗರದಲ್ಲಿ ನಡೆಯುತ್ತಿರುವ ಯುಎನ್ ಹವಾಮಾನ ಶೃಂಗಸಭೆ COP30ರ ಮುಖ್ಯ ಸ್ಥಳದಲ್ಲಿ ಆಕಸ್ಮಿಕ ಬೆಂಕಿ ಅವಘಡ ಸಂಭವಿಸಿ ಭಾರೀ ಆತಂಕ ಮೂಡಿಸಿದೆ. ‘ಬ್ಲೂ ಝೋನ್’ ಎಂಬ ಹೆಸರಿನ ಪ್ರದೇಶದಲ್ಲಿ ಬೆಂಕಿ ಕಾಣಿಸಿಕೊಂಡಿದ್ದು, ಈ ಭಾಗದಲ್ಲಿ ಮುಖ್ಯ ಸಭಾಂಗಣ, ಎಲ್ಲ ದೇಶಗಳ ಪೆವಿಲಿಯನ್ಗಳು, ಮಾಧ್ಯಮ ಕೇಂದ್ರ, ಉನ್ನತ ಮಟ್ಟದ ಗಣ್ಯರ ಸಭೆಗಳು ಮತ್ತು ಕಚೇರಿಗಳಿವೆ. ಬೆಂಕಿಯಿಂದ ಕನಿಷ್ಠ 21 ಜನರು ಗಾಯಗೊಂಡಿದ್ದು, ಅವರೆಲ್ಲರನ್ನೂ ತಕ್ಷಣ ಆಸ್ಪತ್ರೆಗೆ ಸ್ಥಳಾಂತರಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಗಾಯಾಳುಗಳ ಪೈಕಿ ಯಾರ ಪರಿಸ್ಥಿತಿಯೂ ಗಂಭೀರವಲ್ಲ ಎಂದು ವೈದ್ಯರು ತಿಳಿಸಿದ್ದಾರೆ.
ಬೆಂಕಿ ಆರಂಭವಾದ ತಕ್ಷಣವೇ ಸೈರನ್ಗಳು ಮೊಳಗಿ, ಸಾವಿರಾರು ಪ್ರತಿನಿಧಿಗಳು, ಮಾಧ್ಯಮ ವ್ಯಕ್ತಿಗಳು, ಸಿಬ್ಬಂದಿ ಮತ್ತು ಸ್ವಯಂಸೇವಕರು ಆತಂಕದಿಂದ ಎಲ್ಲ ನಿರ್ಗಮನ ದ್ವಾರಗಳ ಕಡೆಗೆ ಓಡಿದರು. ಹೊಗೆಯಿಂದ ಕೆಲವರು ಉಸಿರುಗಟ್ಟಿತ್ತು ಹೀಗಾಗಿ ಅವರಿಗೆಲ್ಲಾ ಸ್ಥಳದಲ್ಲಿಯೇ ಆಕ್ಸಿಜನ್ ಒದಗಿಸಲಾಯಿತು. ಬ್ರೆಜಿಲ್ನ ಅಗ್ನಿಶಾಮಕ ದಳ ಮತ್ತು ಪೊಲೀಸರು ತಕ್ಷಣ ಕಾರ್ಯಾಚರಣೆ ಆರಂಭಿಸಿ, ಬೆಂಕಿಯನ್ನು ಆರು ಗಂಟೆಗಳ ತೀವ್ರ ಹೋರಾಟದ ನಂತರ ನಿಯಂತ್ರಿಸಿದರು.
ಬೆಂಕಿ ಆರಂಭವಾದುದು ‘ಬ್ಲೂ ಝೋನ್’ನ ತಾಂತ್ರಿಕ ವಿಭಾಗದಲ್ಲಿರುವ ವಿದ್ಯುತ್ ಸರಬರಾಜು ವ್ಯವಸ್ಥೆಯ ಶಾರ್ಟ್ ಸರ್ಕ್ಯೂಟ್ನಿಂದ ಎಂದು ಪ್ರಾಥಮಿಕ ತನಿಖೆಯಲ್ಲಿ ತಿಳಿದುಬಂದಿದೆ. ಆದರೆ ಇದು ದುರ್ಘಟನೆಯೇ ಆಗಿದೆಯೇ ಅಥವಾ ಯಾವುದೇ ಷಡ್ಯಂತರವಿದೆಯೇ ಎಂಬುದನ್ನು ಖಚಿತಪಡಿಸಲು ಬ್ರೆಜಿಲ್ ಸರ್ಕಾರವು ಉನ್ನತ ಮಟ್ಟದ ತನಿಖಾ ತಂಡವನ್ನು ರಚಿಸಿದೆ. COP30ರ ಆಯೋಜಕರಾದ ಯುಎನ್ಎಫ್ಸಿಸಿಸಿ (UNFCCC) ಕೂಡ ಈ ಘಟನೆಯ ಬಗ್ಗೆ ಆಘಾತ ವ್ಯಕ್ತಪಡಿಸಿದೆ.
ಬೆಂಕಿ ನಂದಿಸಿದ ಬಳಿಕ ಸಂಪೂರ್ಣ ಸುರಕ್ಷತಾ ಪರಿಶೀಲನೆ ನಡೆಸಿ, ಹೊತ್ತಿಕೊಂಡಿದ್ದ ತಾಂತ್ರಿಕ ಪ್ರದೇಶವನ್ನು ಹೊರತುಪಡಿಸಿ ಉಳಿದ ‘ಬ್ಲೂ ಝೋನ್’ ಅನ್ನು ಮತ್ತೆ ತೆರೆಯಲಾಯಿತು. ಸೋಮವಾರದಿಂದ ಮುಖ್ಯ ಸಭೆಗಳು ಮತ್ತೆ ಆರಂಭವಾಗಲಿವೆ ಎಂದು ಆಯೋಜಕರು ಘೋಷಿಸಿದ್ದಾರೆ. ಆದರೆ ಈ ಘಟನೆಯಿಂದಾಗಿ ಹಲವು ದೇಶಗಳ ಪ್ರತಿನಿಧಿಗಳು ಹೆಚ್ಚುವರಿ ಸುರಕ್ಷತಾ ಕ್ರಮಗಳನ್ನು ಒತ್ತಾಯಿಸಿದ್ದಾರೆ.
COP30 ಈ ಬಾರಿ ಅಮೆಜಾನ್ ಕಾಡುಗಳ ಸಂರಕ್ಷಣೆ, 1.5°C ಗುರಿ ಸಾಧನೆ, ಹಣಕಾಸು ಸಹಾಯ ಹಾಗೂ ಕಾರ್ಬನ್ ಮಾರುಕಟ್ಟೆ ನಿಯಮಗಳ ಬಗ್ಗೆ ನಿರ್ಣಾಯಕ ಚರ್ಚೆಗಳನ್ನು ನಡೆಸುತ್ತಿದೆ. ಈ ಘಟನೆಯಿಂದಾಗಿ ಸಭೆಯ ಕೆಲವು ಕಾರ್ಯಕ್ರಮಗಳಲ್ಲಿ ವಿಳಂಬವಾಗಿದ್ದು, ಆದರೆ ಮುಖ್ಯ ಒಪ್ಪಂದದ ಚರ್ಚೆಗಳು ಯಥಾವತ್ತಾಗಿ ಮುಂದುವರಿಯಲಿವೆ ಎಂದು ಬ್ರೆಜಿಲ್ ಸರ್ಕಾರ ತಿಳಿಸಿದೆ.
ಈ ಬೆಂಕಿ ಅವಘಡವು ಹವಾಮಾನ ಶೃಂಗಸಭೆಯ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಈ ದುರ್ಘಟನೆ ಸಂಭವಿದ್ದು, ಆಯೋಜಕರು ಆತಂಕಗೊಂಡಿದ್ದಾರೆ. 2015ರ ಪ್ಯಾರಿಸ್ COP21ರಲ್ಲಿ ಸಭಾಂಗಣದ ಹೊರಗೆ ಭೀಕರ ದಾಳಿಗಳಾಗಿದ್ದವು, ಆದರೆ ಸಭಾಂಗಣದ ಒಳಗೆ ಬೆಂಕಿ ಬಿದ್ದಿರಲಿಲ್ಲ. ಈ ಘಟನೆಯು COP ಸಭೆಗಳ ಸುರಕ್ಷತಾ ವ್ಯವಸ್ಥೆಯ ಬಗ್ಗೆ ಜಾಗತಿಕ ಮಟ್ಟದಲ್ಲಿ ಚರ್ಚೆಗೆ ಕಾರಣವಾಗಿದೆ.
ಬ್ರೆಜಿಲ್ ಅಧ್ಯಕ್ಷ ಲೂಲಾ ದ ಸಿಲ್ವಾ ಅವರು ಘಟನಾ ಸ್ಥಳಕ್ಕೆ ಭೇಟಿ ನೀಡಿ, ಗಾಯಾಳುಗಳನ್ನು ಭೇಟಿಯಾಗಿ ಸಂತೈಸಿದರು ಮತ್ತು “ಈ ದುರದೃಷ್ಟಕರ ಘಟನೆಯಿಂದಾಗಿ ಜಗತ್ತಿನ ಹವಾಮಾನ ಹೋರಾಟಕ್ಕೆ ಧಕ್ಕೆ ಬರಲಾರದು” ಎಂದು ಹೇಳಿದ್ದಾರೆ. ಭಾರತದ ಪರಿಸರ ಸಚಿವ ಭೂಪೇಂದ್ರ ಯಾದವ್ ಸೇರಿದಂತೆ ಹಲವು ದೇಶಗಳ ನಾಯಕರು ಈ ಬಗ್ಗೆ ಬೇಸರ ವ್ಯಕ್ತಪಡಿಸಿದ್ದಾರೆ.
