ಬೆಂಗಳೂರು: ಸಿಲಿಕಾನ್ ಸಿಟಿಯಲ್ಲಿ ಹೊಸ ವರ್ಷದ ಸ್ವಾಗತಕ್ಕೆ ಸಕಲ ಸಿದ್ಧತೆಗಳು ನಡೆಯುತ್ತಿವೆ. ಆದರೆ, ನಗರದ ಸಾವಿರಾರು ಪಿಜಿಗಳಲ್ಲಿ ವಾಸಿಸುತ್ತಿರುವ ಯುವಕ-ಯುವತಿಯರಿಗೆ ಈ ಬಾರಿಯ ಸಂಭ್ರಮಾಚರಣೆಗೆ ಪಿಜಿ ಮಾಲೀಕರು ಬ್ರೇಕ್ ಹಾಕಿದ್ದಾರೆ. ಶಾಂತಿ ಸುವ್ಯವಸ್ಥೆ ಕಾಪಾಡುವ ಮತ್ತು ಅಹಿತಕರ ಘಟನೆಗಳನ್ನು ತಡೆಯುವ ನಿಟ್ಟಿನಲ್ಲಿ ಬೆಂಗಳೂರು ಸೇರಿದಂತೆ ರಾಜ್ಯದ ಪ್ರಮುಖ ನಗರಗಳ ಪಿಜಿ ಮಾಲೀಕರು ಅತ್ಯಂತ ಕಠಿಣ ನಿಯಮಗಳನ್ನು ಜಾರಿಗೆ ತಂದಿದ್ದಾರೆ.
ಸಾಮಾನ್ಯವಾಗಿ ಹೊಸ ವರ್ಷದ ಸಂಭ್ರಮ ಶುರುವಾಗುವುದೇ ಮಧ್ಯರಾತ್ರಿ 12 ಗಂಟೆಗೆ. ಆದರೆ, ಪಿಜಿ ಮಾಲೀಕರು ನೀಡಿರುವ ಹೊಸ ಸೂಚನೆಯ ಪ್ರಕಾರ, ಪಿಜಿಯಲ್ಲಿರುವ ಯುವಕ, ಯುವತಿಯರು ರಾತ್ರಿ 12 ಗಂಟೆಯ ಒಳಗೆ ಪಿಜಿ ತಲುಪಿರಬೇಕು. ಒಂದು ವೇಳೆ ತಡವಾಗಿ ಬಂದರೆ ಬಾಗಿಲು ತೆರೆಯುವುದಿಲ್ಲ ಎಂದು ಖಡಕ್ ಎಚ್ಚರಿಕೆ ನೀಡಲಾಗಿದೆ. ಇದರಿಂದಾಗಿ ಹೊರಗಡೆ ಪಾರ್ಟಿ ಮುಗಿಸಿ ತಡರಾತ್ರಿ ಮರಳುವ ಪ್ಲಾನ್ ಮಾಡಿದ್ದವರಿಗೆ ಭಾರಿ ನಿರಾಸೆಯಾಗಿದೆ.
ಪಿಜಿ ಮಾಲೀಕರು ನೀಡಿರುವ ಪ್ರಮುಖ ನಿಯಮಗಳು:
-
ಸಮಯದ ಮಿತಿ: ಪಾರ್ಟಿ ಮುಗಿಸಿ ಬರುವವರು ರಾತ್ರಿ 12 ಗಂಟೆಗೆ ಮುಂಚೆಯೇ ಪಿಜಿಗೆ ಮರಳಬೇಕು. ತಡರಾತ್ರಿ ಬಂದರೆ ಯಾವುದೇ ಕಾರಣಕ್ಕೂ ಪ್ರವೇಶವಿರುವುದಿಲ್ಲ.
-
ಮದ್ಯಪಾನಕ್ಕೆ ನಿರ್ಬಂಧ: ಕುಡಿದು ಪಿಜಿ ಒಳಗೆ ಬರುವವರಿಗೆ ಕಟ್ಟುನಿಟ್ಟಿನ ಪಿಜಿ ಒಳಗೆ ಪ್ರವೇಶ ಇರುವುದಿಲ್ಲ. ಮದ್ಯ ಸೇವಿಸಿ ಇತರ ರೋಮ್‌ಮೆಟ್ಸ್‌ಗಳಿಗೆ ತೊಂದರೆ ನೀಡಿದರೆ ತಕ್ಷಣವೇ ಪಿಜಿಯಿಂದ ಹೊರಹಾಕುವ ಎಚ್ಚರಿಕೆ ನೀಡಲಾಗಿದೆ.
-
ಸ್ನೇಹಿತರಿಗೆ ಅವಕಾಶವಿಲ್ಲ: ಹೊಸ ವರ್ಷದ ಆಚರಣೆಗಾಗಿ ಹೊರಗಿನ ಸ್ನೇಹಿತರನ್ನು ಅಥವಾ ಸಂಬಂಧಿಕರನ್ನು ಪಿಜಿ ಒಳಗೆ ಕರೆದುಕೊಂಡು ಬರುವಂತಿಲ್ಲ.
-
ಒಳಾಂಗಣ ಪಾರ್ಟಿ ನಿಷೇಧ: ಪಿಜಿ ಒಳಗೆ ಅಥವಾ ಕಟ್ಟಡದ ಟೆರೆಸ್ (Terrace) ಮೇಲೆ ಡಿಜೆ ಅಳವಡಿಸುವುದು, ಜೋರಾಗಿ ಸಂಗೀತ ಹಾಕುವುದು ಅಥವಾ ಕುಣಿದಾಡುವುದಕ್ಕೆ ಸಂಪೂರ್ಣ ನಿರ್ಬಂಧ ಹೇರಲಾಗಿದೆ.
-
ಸಿಸಿಟಿವಿ ಕಣ್ಗಾವಲು: ನಿಯಮ ಉಲ್ಲಂಘಿಸುವವರನ್ನು ಪತ್ತೆ ಹಚ್ಚಲು ಸಿಸಿಟಿವಿ ದೃಶ್ಯಾವಳಿಗಳನ್ನು ಸೂಕ್ಷ್ಮವಾಗಿ ಗಮನಿಸಲು ಮಾಲೀಕರು ನಿರ್ಧರಿಸಿದ್ದಾರೆ.
ಕೇವಲ ಬೆಂಗಳೂರು ಮಾತ್ರವಲ್ಲದೆ, ಮಂಗಳೂರು, ಹುಬ್ಬಳ್ಳಿ, ಮೈಸೂರಿನಂತಹ ನಗರಗಳಲ್ಲೂ ಪಿಜಿ ಮಾಲೀಕರು ಇದೇ ರೀತಿಯ ಕಟದಟುನಿಟ್ಟಿನ ನಿಯಮ ಹಾಕಿದ್ದಾರೆ. ಪೊಲೀಸ್ ಇಲಾಖೆಯು ನಗರದ ಸುರಕ್ಷತೆಗೆ ಕಠಿಣ ಕ್ರಮಗಳನ್ನು ಕೈಗೊಂಡಿರುವ ಹಿನ್ನೆಲೆಯಲ್ಲಿ, ಪಿಜಿಗಳಲ್ಲಿ ಯಾವುದೇ ಗಲಾಟೆ ನಡೆಯಬಾರದು ಎಂಬುದು ಮಾಲೀಕರ ಉದ್ದೇಶವಾಗಿದೆ.
ಪಿಜಿ ಮಾಲೀಕರ ಈ ದಿಢೀರ್ ನಿರ್ಧಾರದಿಂದಾಗಿ ಸಾವಿರಾರು ಯುವಕರ ಹೊಸ ವರ್ಷದ ಸಂಭ್ರಮಕ್ಕೆ ಬ್ರೇಕ್ ಬಿದ್ದಂತಾಗಿದೆ. ನಾವು ಮುಂಚಿತವಾಗಿಯೇ ಪಾರ್ಟಿ ಟಿಕೆಟ್ ಬುಕ್ ಮಾಡಿದ್ದೇವೆ, ಈಗ ಈ ನಿಯಮಗಳಿಂದಾಗಿ ಏನು ಮಾಡಬೇಕೆಂದು ತಿಳಿಯುತ್ತಿಲ್ಲ ಎಂದು ಪಿಜಿಯಲ್ಲಿ ವಾಸಿಸುವ ಅನೇಕರು ಬೇಸರ ವ್ಯಕ್ತಪಡಿಸಿದ್ದಾರೆ.
