ಚಳಿಗಾಲದಲ್ಲಿ ನಿಮ್ಮ ಚರ್ಮಕ್ಕೆ ಎಣ್ಣೆ-ಬಾಡಿ ಲೋಷನ್ ಯಾವುದು ಸೂಕ್ತ? ತ್ವಚೆ ಆರೈಕೆಗೆ ಇಲ್ಲಿದೆ ಸಲಹೆ

ಚಳಿಗಾಲ ಆರಂಭವಾದಾಗ ಬಹುತೇಕ ಎಲ್ಲರಿಗೂ ಕಾಣಿಸಿಕೊಳ್ಳುವ ಸಾಮಾನ್ಯ ಸಮಸ್ಯೆ ಎಂದರೆ ಒಣಗಿದ, ಬಿರುಕು ಬಿಟ್ಟ ಮತ್ತು ತುರಿಕೆ ಉಂಟಾಗುವ ಚರ್ಮ. ತಣ್ಣನೆಯ ಗಾಳಿ, ಕಡಿಮೆ ಆರ್ದ್ರತೆ ಮತ್ತು ಬಿಸಿನೀರಿನ ಸ್ನಾನ ಈ ಎಲ್ಲಾ ಕಾರಣಗಳಿಂದ ನಮ್ಮ ಚರ್ಮ ತನ್ನ ಸಹಜ ತೇವಾಂಶವನ್ನು ಕಳೆದುಕೊಳ್ಳುತ್ತದೆ. ಇದರಿಂದ ಚರ್ಮ ಉಜ್ಜುವಂತೆ ಕಾಣುವುದು, ಕಿರಿಕಿರಿ, ಕೆಲವೊಮ್ಮೆ ಉರಿಯೂತವೂ ಉಂಟಾಗಬಹುದು. ಇಂತಹ ಸಂದರ್ಭದಲ್ಲಿ ಸರಿಯಾದ ತ್ವಚಾ ಆರೈಕೆ ಅತ್ಯಂತ ಅಗತ್ಯ.

ಚಳಿಗಾಲದಲ್ಲಿ ಸಾಮಾನ್ಯವಾಗಿ ಕೇಳಿಬರುವ ಪ್ರಶ್ನೆ ಏನೆಂದರೆ ಚರ್ಮದ ಆರೈಕೆಗೆ ಎಣ್ಣೆ ಬಳಕೆ ಉತ್ತಮವೇ ಅಥವಾ ಬಾಡಿ ಲೋಷನ್‌? ಈ ಎರಡೂ ಉತ್ಪನ್ನಗಳು ಚರ್ಮಕ್ಕೆ ಯಾವುದು ಉಪಯುಕ್ತ ಎನ್ನುವುದು ತಿಳಿಯಿರಿ.

ಎಣ್ಣೆ (Body Oil): ಆಳವಾದ ಪೋಷಣೆಗೆ ಸೂಕ್ತ

ದೇಹದ ಎಣ್ಣೆಗಳು ಚರ್ಮಕ್ಕೆ ಆಳವಾದ ಪೋಷಣೆ ನೀಡುತ್ತವೆ. ಇವು ಚರ್ಮದೊಳಗೆ ತೇವಾಂಶವನ್ನು ಸೆರೆಹಿಡಿದು, ಮೇಲ್ಮೈ ಮೇಲೆ ರಕ್ಷಣಾತ್ಮಕ ಪದರವನ್ನು ನಿರ್ಮಿಸುತ್ತವೆ. ಈ ಪದರವು ತೇವಾಂಶ ಹೊರಹೋಗದಂತೆ ತಡೆದು, ಚರ್ಮವನ್ನು ದೀರ್ಘಕಾಲ ಹೈಡ್ರೇಟೆಡ್ ಆಗಿರಿಸುತ್ತದೆ.

ಎಣ್ಣೆಯಿಂದ ಮಸಾಜ್ ಮಾಡಿದಾಗ, ಅದು ಚರ್ಮದ ಆಳಕ್ಕೆ ಇಳಿದು ಅಗತ್ಯ ಕೊಬ್ಬಿನಾಮ್ಲಗಳು ಮತ್ತು ವಿಟಮಿನ್‌ಗಳನ್ನು ಒದಗಿಸುತ್ತದೆ. ಇದರಿಂದ ತೀವ್ರ ಶುಷ್ಕತೆಯಿಂದ ಉಂಟಾಗುವ ತುರಿಕೆ, ಕಿರಿಕಿರಿ ಮತ್ತು ಉರಿಯೂತ ಕಡಿಮೆಯಾಗುತ್ತದೆ. ಜೊತೆಗೆ ಚರ್ಮಕ್ಕೆ ನೈಸರ್ಗಿಕ ಹೊಳಪು ಮತ್ತು ಆರೋಗ್ಯಕರ ಕಾಂತಿ ದೊರಕುತ್ತದೆ.

ವಿಶೇಷವಾಗಿ ಡ್ರೈ ಸ್ಕಿನ್ ಹೊಂದಿರುವವರಿಗೆ ಎಣ್ಣೆ ಅತ್ಯಂತ ಉಪಯುಕ್ತ. ರಾತ್ರಿ ಮಲಗುವ ಮೊದಲು ಎಣ್ಣೆ ಹಚ್ಚಿದರೆ, ಅದು ರಾತ್ರಿಯಿಡೀ ಕೆಲಸ ಮಾಡಿ ಚರ್ಮವನ್ನು ಪುನಶ್ಚೇತನಗೊಳಿಸುತ್ತದೆ.

ಬಾಡಿ ಲೋಷನ್: ತಕ್ಷಣದ ಹೈಡ್ರೇಶನ್‌ಗೆ ಉತ್ತಮ

ಬಾಡಿ ಲೋಷನ್‌ಗಳು ಸಾಮಾನ್ಯವಾಗಿ ಎಣ್ಣೆ ಮತ್ತು ನೀರಿನ ಮಿಶ್ರಣ (Emulsion) ಆಗಿರುತ್ತವೆ. ಇದರಲ್ಲಿ ಗ್ಲಿಸರಿನ್, ಹೈಲುರಾನಿಕ್ ಆಮ್ಲದಂತಹ ಹ್ಯೂಮೆಕ್ಟಂಟ್‌ಗಳು ಇದ್ದು, ಇವು ಚರ್ಮದಲ್ಲಿ ನೀರಿನ ಅಂಶವನ್ನು ಕಾಪಾಡುತ್ತವೆ.

ಲೋಷನ್‌ಗಳ ಹಗುರವಾದ ವಿನ್ಯಾಸ ಹೊಂದಿದ್ದು, ಬೇಗನೆ ಚರ್ಮದಲ್ಲಿ ಹೀರಿಕೊಳ್ಳುತ್ತವೆ. ಜಿಡ್ಡಿನಾಂಶ ಕಡಿಮೆ ಇರುವುದರಿಂದ ದಿನನಿತ್ಯದ ಬಳಕೆಗೆ ತುಂಬಾ ಅನುಕೂಲಕರ. ಸ್ನಾನದ ನಂತರ ಒದ್ದೆಯಾದ ಚರ್ಮಕ್ಕೆ ಲೋಷನ್ ಹಚ್ಚಿದರೆ, ಅದು ಚರ್ಮದ ಪದರಗಳೊಳಗೆ ಆಳವಾಗಿ ಹೈಡ್ರೇಶನ್ ನೀಡುತ್ತದೆ.

ಸಾಮಾನ್ಯ ಅಥವಾ ಎಣ್ಣೆಯುಕ್ತ ಚರ್ಮ ಹೊಂದಿರುವವರಿಗೆ ಲೋಷನ್ ಹೆಚ್ಚು ಸೂಕ್ತ. ಕೆಲವು ಔಷಧೀಯ ಲೋಷನ್‌ಗಳು ನಿರ್ದಿಷ್ಟ ಚರ್ಮದ ಸಮಸ್ಯೆಗಳಾದ ಕೆಂಪು, ತುರಿಕೆ ಅಥವಾ ಅಲರ್ಜಿಗಳಿಗೂ ಪರಿಹಾರ ನೀಡುತ್ತವೆ.

ತೆಂಗಿನೆಣ್ಣೆ: ನೈಸರ್ಗಿಕ ಮಾಯಿಶ್ಚರೈಸರ್

ಚರ್ಮದ ಆರೈಕೆಗೆ ತೆಂಗಿನೆಣ್ಣೆ ಒಂದು ಅತ್ಯುತ್ತಮ ನೈಸರ್ಗಿಕ ಆಯ್ಕೆ. ಸೌಂದರ್ಯ ತಜ್ಞರು ಮತ್ತು ವೈದ್ಯರು ಕೂಡ ಇದನ್ನು ಶಿಫಾರಸು ಮಾಡುತ್ತಾರೆ. ಇದು ಚರ್ಮದ ಆಳಕ್ಕೆ ಹೋಗಿ ದೀರ್ಘಕಾಲ ತೇವಾಂಶವನ್ನು ಕಾಪಾಡುತ್ತದೆ.

ಉತ್ಕರ್ಷಣ ನಿರೋಧಕಗಳಲ್ಲಿ ಸಮೃದ್ಧವಾಗಿರುವ ತೆಂಗಿನೆಣ್ಣೆ, ಚರ್ಮದ ಉರಿಯೂತವನ್ನು ಕಡಿಮೆ ಮಾಡುತ್ತದೆ. ದದ್ದುಗಳು, ಸಣ್ಣ ಗಾಯಗಳು ಮತ್ತು ಇತರ ಚರ್ಮದ ಸಮಸ್ಯೆಗಳನ್ನು ನಿವಾರಿಸಲು ಸಹ ಸಹಾಯಕ. ಡ್ರೈ ಅಥವಾ ಸಾಮಾನ್ಯ ಚರ್ಮ ಹೊಂದಿರುವವರು ಇದನ್ನು ರಾತ್ರಿಯಿಡೀ ಮಾಯಿಶ್ಚರೈಸರ್ ಆಗಿ ಬಳಸಬಹುದು.

ಆದರೆ ಎಣ್ಣೆಯುಕ್ತ ಚರ್ಮ ಹೊಂದಿರುವವರು ಜಾಗರೂಕರಾಗಿರಬೇಕು, ಏಕೆಂದರೆ ತೆಂಗಿನೆಣ್ಣೆ ರಂಧ್ರಗಳನ್ನು ಮುಚ್ಚಿ ಮೊಡವೆ ಸಮಸ್ಯೆ ಹೆಚ್ಚಿಸಬಹುದು.

ಚಳಿಗಾಲದಲ್ಲಿ ಉತ್ತಮ ಚರ್ಮದ ಆರೈಕೆಗೆ ಎಣ್ಣೆ ಮತ್ತು ಲೋಷನ್ ಎರಡನ್ನೂ ಸರಿಯಾದ ರೀತಿಯಲ್ಲಿ ಬಳಸುವುದು ಅತ್ಯುತ್ತಮ ಮಾರ್ಗ

• ಸ್ನಾನದ ನಂತರ ಒದ್ದೆಯಾದ ಚರ್ಮಕ್ಕೆ ಮೊದಲು ಲೋಷನ್ ಹಚ್ಚಿ

• ನಂತರ ಕೆಲವು ಹನಿಗಳ ಎಣ್ಣೆ ಬಳಸಿ ತೇವಾಂಶವನ್ನು ಲಾಕ್ ಮಾಡಬಹುದು

ಇದರಿಂದ ನಿಮ್ಮ ಚರ್ಮ ಮೃದುವಾಗಿದ್ದು, ಒಣಗದಂತೆ, ಆರೋಗ್ಯಕರವಾಗಿ ಉಳಿಯುತ್ತದೆ.