ರಾತ್ರಿ ಮಲಗುವ ಮುನ್ನ ನೀರು ಕುಡಿಯುವುದು ಅಪಾಯವೇ? ಇಲ್ಲಿದೆ ವೈದ್ಯರ ಸಲಹೆ

ಅನೇಕರು ಮಲಗುವ ಮುನ್ನ ಒಂದು ಲೋಟ ನೀರು ಅಥವಾ ಇತರ ಪಾನೀಯಗಳನ್ನು ಕುಡಿಯುವ ಅಭ್ಯಾಸವನ್ನು ಹೊಂದಿರುತ್ತಾರೆ. ದೇಹವನ್ನು ಹೈಡ್ರೇಟ್ ಆಗಿಡಲು ಈ ಅಭ್ಯಾಸ ಸಹಾಯಕ ಎಂದು ಕೆಲವರು ಭಾವಿಸಿದರೆ, ಇನ್ನೂ ಕೆಲವರಿಗೆ ರಾತ್ರಿ ಪದೇಪದೇ ಮೂತ್ರ ವಿಸರ್ಜನೆಗೆ ಹೋಗಬೇಕಾಗಿ ನಿದ್ರೆ ಭಂಗವಾಗುವ ಸಮಸ್ಯೆ ಎದುರಾಗುತ್ತದೆ. ಹಾಗಾದರೆ, ಮಲಗುವ ಮುನ್ನ ನೀರು ಕುಡಿಯುವುದು ಒಳ್ಳೆಯದೋ ಅಲ್ಲವೋ? ತಜ್ಞರು ಏನು ಹೇಳುತ್ತಾರೆ? ಇಲ್ಲಿದೆ ಸಂಪೂರ್ಣ ಮಾಹಿತಿ.

ದೇಹಕ್ಕೆ ನೀರು ಅಗತ್ಯ, ಆದರೆ ಸಮಯ ಮುಖ್ಯ

ನಮ್ಮ ದೇಹದ ಉತ್ತಮ ಕಾರ್ಯಚಟುವಟಿಕೆಗೆ ನೀರು ಅತ್ಯಗತ್ಯ. ಆದರೆ, ದಿನವಿಡೀ ಸಾಕಷ್ಟು ನೀರು ಕುಡಿಯದಿದ್ದರೆ, ರಾತ್ರಿ ವೇಳೆ ಅತಿಯಾಗಿ ಕುಡಿಯಲು ಪ್ರಯತ್ನಿಸುವುದು ಸರಿಯಲ್ಲ. ತಜ್ಞರ ಪ್ರಕಾರ, ದೇಹವನ್ನು ಹೈಡ್ರೇಟ್ ಆಗಿಡಬೇಕಾದರೆ ಬೆಳಿಗ್ಗೆಯಿಂದ ಸಂಜೆಯವರೆಗೆ ಸಮರ್ಪಕ ಪ್ರಮಾಣದಲ್ಲಿ ನೀರು ಸೇವಿಸುವುದು ಉತ್ತಮ. ಮಲಗುವ ಸಮಯ ಹೊತ್ತಿಗೆ ದೇಹದಲ್ಲಿ ನೀರಿನ ಅಗತ್ಯ ಕಡಿಮೆ ಇರುತ್ತದೆ, ಏಕೆಂದರೆ ನಿದ್ರೆಯ ಸಮಯದಲ್ಲಿ ದೇಹದ ಚಟುವಟಿಕೆಗಳು ನಿಧಾನಗೊಳ್ಳುತ್ತವೆ.

ಮಲಗುವ ಮುನ್ನ ಎಷ್ಟು ನೀರು ಕುಡಿಯಬೇಕು?

ಆರೋಗ್ಯ ತಜ್ಞರು ಮತ್ತು ವೈದ್ಯರ ಪ್ರಕಾರ, ಮಲಗುವ ಮೊದಲು ಸುಮಾರು 100 ರಿಂದ 200 ಮಿಲಿಲೀಟರ್ ನೀರು ಕುಡಿಯುವುದು ಸಾಮಾನ್ಯವಾಗಿ ಸುರಕ್ಷಿತವೆಂದು ಪರಿಗಣಿಸಲಾಗುತ್ತದೆ. ಅಂದರೆ, ಸಣ್ಣ ಲೋಟ ನೀರು ಅಥವಾ ಅರ್ಧ ಲೋಟದಷ್ಟು ಪ್ರಮಾಣ. ಈ ಪ್ರಮಾಣವು ದೇಹದ ನೀರಿನ ಸಮತೋಲನ ಕಾಪಾಡಲು ಸಹಾಯ ಮಾಡುತ್ತದೆ ಮತ್ತು ರಾತ್ರಿ ವೇಳೆ ಪದೇಪದೇ ಮೂತ್ರಕ್ಕೆ ಎದ್ದೇಳುವ ಸಮಸ್ಯೆಯನ್ನು ತಪ್ಪಿಸುತ್ತದೆ. ಆದರೆ, ಇದು ಪ್ರತಿಯೊಬ್ಬರ ದೇಹ ಸ್ಥಿತಿ, ಜೀವನಶೈಲಿ ಮತ್ತು ಆರೋಗ್ಯ ಸಮಸ್ಯೆಗಳ ಮೇಲೆ ಅವಲಂಬಿತವಾಗಿರುತ್ತದೆ.

ಅತಿಯಾಗಿ ನೀರು ಕುಡಿದರೆ ಏನಾಗಬಹುದು?

ರಾತ್ರಿ ವೇಳೆ ಅಗತ್ಯಕ್ಕಿಂತ ಹೆಚ್ಚು ನೀರು (500 ಮಿಲಿ ಅಥವಾ ಅದಕ್ಕಿಂತ ಹೆಚ್ಚು) ಕುಡಿಯುವುದರಿಂದ ಕೆಳಗಿನ ಸಮಸ್ಯೆಗಳು ಉಂಟಾಗಬಹುದು.

• ಪದೇಪದೇ ಮೂತ್ರ ವಿಸರ್ಜನೆ: ನಿದ್ರೆಯ ಮಧ್ಯದಲ್ಲಿ ೨-೩ ಬಾರಿ ಎದ್ದೇಳಬೇಕಾಗಬಹುದು, ಇದರಿಂದ ನಿದ್ರೆಯ ಗುಣಮಟ್ಟ ಕುಸಿಯುತ್ತದೆ.

• ನಿದ್ರಾಭಂಗ: ಬೆಳಿಗ್ಗೆ ಎದ್ದಾಗ ದಣಿವು, ಏಕಾಗ್ರತೆಯ ಕೊರತೆ, ತಲೆಭಾರ ಅನುಭವಕ್ಕೆ ಬರಬಹುದು.

• ಹೊಟ್ಟೆ ಉಬ್ಬರ ಮತ್ತು ಅಸ್ವಸ್ಥತೆ: ಕೆಲವರಿಗೆ ಹೊಟ್ಟೆ ಭಾರ ಅಥವಾ ಉಬ್ಬರವಾಗುವ ಸಮಸ್ಯೆ ಕಾಣಿಸಬಹುದು.

• ಹೃದಯ ಮತ್ತು ಕಿಡ್ನಿ ಸಮಸ್ಯೆ ಇರುವವರಿಗೆ ಅಪಾಯ: ಹೆಚ್ಚು ನೀರು ದೇಹದಲ್ಲಿ ಶೇಖರವಾಗಿ ರಕ್ತದೊತ್ತಡ ಏರಿಳಿತಕ್ಕೆ ಕಾರಣವಾಗಬಹುದು.

ಯಾರು ವಿಶೇಷ ಎಚ್ಚರಿಕೆ ವಹಿಸಬೇಕು?

• ಮಧುಮೇಹ (ಸಕ್ಕರೆ ಕಾಯಿಲೆ) ಇರುವವರು

• ರಾತ್ರಿ ಪದೇಪದೇ ಮೂತ್ರಕ್ಕೆ ಹೋಗುವ ಸಮಸ್ಯೆ (Nocturia) ಇರುವವರು

• ಕಿಡ್ನಿ ಅಥವಾ ಹೃದಯ ಸಂಬಂಧಿ ತೊಂದರೆ ಇರುವವರು

• ಮೂತ್ರಾಶಯ ಸೋಂಕು (UTI) ಸಮಸ್ಯೆ ಇರುವವರು

ಇಂತಹವರು ಮಲಗುವ ಮುನ್ನ ನೀರು ಕುಡಿಯುವ ಮೊದಲು ವೈದ್ಯರ ಸಲಹೆಯನ್ನು ಪಡೆಯುವುದು ಅತ್ಯಗತ್ಯ.

ಕ್ಯಾಫಿನ್ ಪಾನೀಯಗಳಿಂದ ದೂರವಿರಿ

ರಾತ್ರಿ ವೇಳೆ ಚಹಾ, ಕಾಫಿ, ಕೋಲ್ಡ್ರಿಂಕ್, ಅಥವಾ ಯಾವುದೇ ಕ್ಯಾಫಿನ್ ಅಂಶವಿರುವ ಪಾನೀಯಗಳನ್ನು ಕುಡಿಯುವುದು ನಿದ್ರೆಯ ಗುಣಮಟ್ಟದ ಮೇಲೆ ತೀವ್ರ ಪರಿಣಾಮ ಬೀರುತ್ತದೆ. ಕ್ಯಾಫಿನ್ ಮೂತ್ರವರ್ಧಕ (diuretic) ಆಗಿ ಕಾರ್ಯನಿರ್ವಹಿಸುತ್ತದೆ, ಇದರಿಂದಾಗಿ ಪದೇಪದೇ ಮೂತ್ರದ ಅನುಭವವಾಗುತ್ತದೆ ಮತ್ತು ನಿದ್ರೆ ಬರುವುದು ಕಷ್ಟವಾಗುತ್ತದೆ.

ಆರೋಗ್ಯ ಕಾಪಾಡಲು ತಜ್ಞರ ಸಲಹೆಗಳು

1. ಮಲಗುವ 1 ಗಂಟೆ ಮೊದಲು ಯಾವುದೇ ಪಾನೀಯ ಸೇವನೆ ಮಾಡಬೇಡಿ.

2. ದಿನವಿಡೀ 6-8 ಲೋಟ ನೀರು ಸೇವಿಸಿ – ಬೆಳಿಗ್ಗೆ, ಮಧ್ಯಾಹ್ನ, ಸಂಜೆ ಹಂಚಿಕೊಳ್ಳಿ.

3. ರಾತ್ರಿ ವೇಳೆ ಕ್ಯಾಫಿನ್, ಸಿಹಿ ಪಾನೀಯಗಳನ್ನು ಸಂಪೂರ್ಣವಾಗಿ ತಪ್ಪಿಸಿ.

4. ರಾತ್ರಿ ಕುಡಿಯಲೇಬೇಕೆನಿಸಿದರೆ ಕೇವಲ 100 ಮಿಲಿಗಿಂತ ಹೆಚ್ಚಿಲ್ಲದಂತೆ ನೋಡಿಕೊಳ್ಳಿ.

5. ನಿದ್ರೆ ಸಮಸ್ಯೆ ಮುಂದುವರಿದರೆ ನಿಮ್ಮ ವೈದ್ಯರನ್ನು ತಕ್ಷಣ ಸಂಪರ್ಕಿಸಿ.

ಮಲಗುವ ಮುನ್ನ ಸ್ವಲ್ಪ ಪ್ರಮಾಣದಲ್ಲಿ ನೀರು ಕುಡಿಯುವುದು (100-200 ಮಿಲಿ) ಹಾನಿಕಾರಕವಲ್ಲ, ಆದರೆ ಅತಿಯಾದ ಸೇವನೆ ನಿದ್ರೆ ಮತ್ತು ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರಬಹುದು. ಸಮಯಕ್ಕೆ ಸರಿಯಾಗಿ, ಸಮರ್ಪಕ ಪ್ರಮಾಣದಲ್ಲಿ ನೀರು ಕುಡಿಯುವ ಅಭ್ಯಾಸವೇ ನಿಜವಾದ ಆರೋಗ್ಯದ ಸೂತ್ರವಾಗಿದೆ.