ವಾಷಿಂಗ್ಟನ್: ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನ ಪರಿಸ್ಥಿತಿಯ ನಡುವೆ ಪಶ್ಚಿಮ ಇರಾಕ್ನಲ್ಲಿ ಅಮೆರಿಕದ KC-135 ವೈಮಾನಿಕ ಇಂಧನ ತುಂಬುವ ಮಿಲಿಟರಿ ವಿಮಾನ ಪತನಗೊಂಡ ಘಟನೆ ನಡೆದಿದೆ. ಈ ಘಟನೆ ಅಮೆರಿಕ ಸೇನೆಗೆ ದೊಡ್ಡ ಆತಂಕವನ್ನುಂಟುಮಾಡಿದ್ದು, ವಿಮಾನದಲ್ಲಿದ್ದ ಆರು ಸಿಬ್ಬಂದಿಯನ್ನು ಪತ್ತೆಹಚ್ಚಲು ತೀವ್ರ ಶೋಧ ಕಾರ್ಯಾಚರಣೆ ಆರಂಭಿಸಲಾಗಿದೆ.
ಅಮೆರಿಕ ಸೇನೆಯ ಕೇಂದ್ರ ಕಮಾಂಡ್ (CENTCOM) ಈ ಘಟನೆಯನ್ನು ಅಧಿಕೃತವಾಗಿ ದೃಢಪಡಿಸಿದೆ. ‘Operation Epic Fury’ ಎನ್ನುವ ಮಿಲಿಟರಿ ಕಾರ್ಯಾಚರಣೆಯ ಭಾಗವಾಗಿ ಈ ವಿಮಾನ ಕಾರ್ಯನಿರ್ವಹಿಸುತ್ತಿತ್ತು. ಆದರೆ ವಿಮಾನ ಪತನವು ಶತ್ರುಗಳ ದಾಳಿಯಿಂದ ಸಂಭವಿಸಿಲ್ಲ ಎಂದು ಅಮೆರಿಕ ಸ್ಪಷ್ಟಪಡಿಸಿದೆ.
ಎರಡನೇ ವಿಮಾನ ಸುರಕ್ಷಿತ ಲ್ಯಾಂಡಿಂಗ್
ಇದೇ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದ ಮತ್ತೊಂದು ಅಮೆರಿಕನ್ ಮಿಲಿಟರಿ ವಿಮಾನವು ಸುರಕ್ಷಿತವಾಗಿ ಇಳಿದಿದೆ ಎಂದು ಸೇನೆ ತಿಳಿಸಿದೆ. ಎರಡು ವಿಮಾನಗಳು ಒಂದೇ ಸಮಯದಲ್ಲಿ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದವು. ಅದರಲ್ಲೊಂದು ವಿಮಾನ ಪಶ್ಚಿಮ ಇರಾಕ್ ಪ್ರದೇಶದಲ್ಲಿ ಪತನಗೊಂಡಿದ್ದು, ಇನ್ನೊಂದು ಯಾವುದೇ ಸಮಸ್ಯೆಯಿಲ್ಲದೆ ಸುರಕ್ಷಿತವಾಗಿ ನೆಲಕ್ಕೆ ಇಳಿದಿದೆ.
ಈ ಘಟನೆಯ ನಂತರ ಅಮೆರಿಕ ಸೇನೆ ಹಾಗೂ ರಕ್ಷಣಾ ಅಧಿಕಾರಿಗಳು ತಕ್ಷಣವೇ ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಗಳನ್ನು ಆರಂಭಿಸಿದ್ದಾರೆ. ವಿಮಾನ ಪತನಗೊಂಡ ಪ್ರದೇಶವನ್ನು ಗುರುತಿಸಿ ಸಿಬ್ಬಂದಿಯನ್ನು ಪತ್ತೆಹಚ್ಚಲು ಸೇನಾ ತಂಡಗಳು, ಹೆಲಿಕಾಪ್ಟರ್ಗಳು ಹಾಗೂ ರಕ್ಷಣಾ ಘಟಕಗಳನ್ನು ಬಳಸಲಾಗುತ್ತಿದೆ.
ಸಿಬ್ಬಂದಿಯ ಪತ್ತೆಗೆ ತೀವ್ರ ಶೋಧ
ಇತ್ತೀಚಿನ KC-135 ವಿಮಾನ ಪತನದ ನಂತರ ವಿಮಾನದಲ್ಲಿದ್ದ ಸಿಬ್ಬಂದಿಯ ಸ್ಥಿತಿಗತಿ ಬಗ್ಗೆ ಇನ್ನೂ ಮಾಹಿತಿ ದೊರಕಿಲ್ಲ. ಇದರಿಂದ ಅಮೆರಿಕ ಸೇನೆ ಶೋಧ ಕಾರ್ಯಾಚರಣೆ ಮುಂದುವರೆದಿದೆ. ಸ್ಥಳೀಯ ಪ್ರದೇಶಗಳಲ್ಲಿ ಸೇನಾ ಪಡೆಗಳು ಹಾಗೂ ರಕ್ಷಣಾ ತಂಡಗಳು ಕಾರ್ಯಾಚರಣೆ ನಡೆಸುತ್ತಿವೆ.
ಅಧಿಕಾರಿಗಳು ಈ ಘಟನೆಗೆ ಕಾರಣವಾದ ನಿಖರ ಕಾರಣವನ್ನು ಪತ್ತೆಹಚ್ಚಲು ತನಿಖೆ ಆರಂಭಿಸಿದ್ದಾರೆ. ತಾಂತ್ರಿಕ ದೋಷವೇ ಅಥವಾ ಇನ್ನಾವುದೇ ಕಾರಣವೇ ಎಂಬುದನ್ನು ಪರಿಶೀಲಿಸಲಾಗುತ್ತಿದೆ.
KC-135 ವಿಮಾನದ ವಿಶೇಷತೆ
KC-135 ಎಂಬುದು ಅಮೆರಿಕದ ವಾಯುಪಡೆಯ ಪ್ರಮುಖ ವೈಮಾನಿಕ ಇಂಧನ ತುಂಬುವ ವಿಮಾನವಾಗಿದೆ. ಈ ವಿಮಾನವು ಇತರ ಯುದ್ಧವಿಮಾನಗಳಿಗೆ ಗಗನದಲ್ಲೇ ಇಂಧನ ತುಂಬುವ ಸಾಮರ್ಥ್ಯ ಹೊಂದಿದೆ. ಸುಮಾರು 60 ವರ್ಷಗಳಿಗಿಂತಲೂ ಹೆಚ್ಚು ಕಾಲದಿಂದ ಈ ವಿಮಾನ ಅಮೆರಿಕ ಸೇನೆಯ ಸೇವೆಯಲ್ಲಿ ಇದೆ.
ಸಾಮಾನ್ಯವಾಗಿ KC-135 ವಿಮಾನದಲ್ಲಿ ಮೂವರು ಸಿಬ್ಬಂದಿ ಕಾರ್ಯನಿರ್ವಹಿಸುತ್ತಾರೆ. ಒಬ್ಬ ಪೈಲಟ್, ಒಬ್ಬ ಸಹ ಪೈಲಟ್ ಮತ್ತು ಇನ್ನೊಬ್ಬರು ‘ಬೂಮ್ ಆಪರೇಟರ್’ ಆಗಿದ್ದು, ಗಗನದಲ್ಲಿ ಇತರ ವಿಮಾನಗಳಿಗೆ ಇಂಧನ ತುಂಬುವ ಜವಾಬ್ದಾರಿ ಹೊಂದಿರುತ್ತಾರೆ. ಆದರೆ ಕೆಲವು ಕಾರ್ಯಾಚರಣೆಗಳಲ್ಲಿ ನ್ಯಾವಿಗೇಟರ್ ಸಹ ಅಗತ್ಯವಿರಬಹುದು. ಇದಲ್ಲದೆ ಈ ವಿಮಾನವು ಸುಮಾರು 37 ಪ್ರಯಾಣಿಕರನ್ನು ಹೊತ್ತೊಯ್ಯುವ ಸಾಮರ್ಥ್ಯವೂ ಹೊಂದಿದೆ ಎಂದು ಅಮೆರಿಕ ವಾಯುಪಡೆಯ ಮಾಹಿತಿ ಹೇಳುತ್ತದೆ.
ಮಧ್ಯಪ್ರಾಚ್ಯದಲ್ಲಿ ಹೆಚ್ಚುತ್ತಿರುವ ಯುದ್ಧ ಉದ್ವಿಗ್ನತೆ
ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧದ ಹಿನ್ನೆಲೆ ಈ ಘಟನೆ ಸಂಭವಿಸಿದ್ದು, ಪರಿಸ್ಥಿತಿ ಇನ್ನಷ್ಟು ಗಂಭೀರವಾಗುತ್ತಿದೆ. ಫೆಬ್ರವರಿ 28ರಂದು ಪ್ರಾರಂಭವಾದ ಯುದ್ಧದ ಆರಂಭಿಕ ದಿನಗಳಲ್ಲಿ ಕೂಡ ಅಮೆರಿಕ ಸೇನೆಗೆ ದೊಡ್ಡ ಹೊಡೆತ ಬಿದ್ದಿತ್ತು. ಕುವೈತ್ ಪಡೆಗಳು ಮೂರು ಅಮೆರಿಕನ್ F-15E ಯುದ್ಧವಿಮಾನಗಳನ್ನು ಹೊಡೆದುರುಳಿಸಿದ್ದವು.
