ಟೆಹ್ರಾನ್/ವಾಷಿಂಗ್ಟನ್: ಇರಾನ್ನೊಂದಿಗೆ ಕದನ ವಿರಾಮ ಮತ್ತು ಸಂಘರ್ಷ ಶಮನದ ಮಾತುಕತೆ ಅಂತಿಮ ಹಂತದಲ್ಲಿದ್ದಾಗಲೇ ಅಮೆರಿಕ ಪಡೆಗಳು ಬೃಹತ್ ವಾಯುದಾಳಿ ನಡೆಸಿವೆ. ದಕ್ಷಿಣ ಇರಾನ್ನಲ್ಲಿರುವ ಕ್ಷಿಪಣಿ ಉಡಾವಣಾ ತಾಣಗಳು ಹಾಗೂ ಹಾರ್ಮುಜ್ ಜಲಸಂಧಿಯಲ್ಲಿ ನೌಕಾ ಗಣಿಗಳನ್ನು (ಜಲಬಾಂಬ್) ನಿಯೋಜಿಸುತ್ತಿದ್ದ ಬೋಟ್ಗಳನ್ನು ಗುರಿಯಾಗಿಸಿ ಈ ದಾಳಿ ನಡೆಸಲಾಗಿದೆ. ಬಂದರ್ ಅಬ್ಬಾಸ್ನಲ್ಲೂ ಸ್ಫೋಟಗಳು ಸಂಭವಿಸಿವೆ ಎಂದು ಅಮೆರಿಕದ ಸೆಂಟ್ರಲ್ ಕಮಾಂಡ್ (CENTCOM) ದೃಢಪಡಿಸಿದೆ.
ಭಾರತೀಯ ಕಾಲಮಾನ ಮಂಗಳವಾರ ಮುಂಜಾನೆ ನಡೆದ ಈ ಕಾರ್ಯಾಚರಣೆಯಲ್ಲಿ, ಅಮೆರಿಕದ ಯುದ್ಧನೌಕೆಗಳ ಸುರಕ್ಷತೆಗಾಗಿ ದಾಳಿ ನಡೆಸಲಾಗಿದೆ ಎಂದು CENTCOM ಹೇಳಿಕೊಂಡಿದೆ. “ಇರಾನಿನ ಕ್ರಾಂತಿಕಾರಿ ಗಾರ್ಡ್ ಕಾರ್ಪ್ಸ್ (IRGC) ನೌಕಾ ಪಡೆಗಳು ಹಾರ್ಮುಜ್ ಜಲಸಂಧಿಯಲ್ಲಿ ಗಣಿಗಳನ್ನು ಇಡುತ್ತಿದ್ದುದನ್ನು ನಮ್ಮ ಕಣ್ಗಾವಲು ಪತ್ತೆ ಮಾಡಿತು. ಈ ಕ್ರಮವು ಅಂತಾರಾಷ್ಟ್ರೀಯ ಜಲಮಾರ್ಗದ ಸುರಕ್ಷತೆಗೆ ಗಂಭೀರ ಬೆದರಿಕೆಯಾಗಿತ್ತು” ಎಂದು CENTCOM ವಕ್ತಾರ ಕ್ಯಾಪ್ಟನ್ ಟಿಮ್ ಹಾಕಿನ್ಸ್ ವಿವರಿಸಿದ್ದಾರೆ. ದಾಳಿಯಲ್ಲಿ ಗಣಿಗಳನ್ನು ನಿಯೋಜಿಸುತ್ತಿದ್ದ ಎರಡು ದೋಣಿಗಳು ಸಂಪೂರ್ಣವಾಗಿ ನಾಶವಾದವು.
ಇದೇ ಸಮಯದಲ್ಲಿ, ಅಮೆರಿಕದ ಫೈಟರ್ ಜೆಟ್ಗಳನ್ನೇ ಗುರಿಯಾಗಿಸಿಕೊಳ್ಳಲು ಸಜ್ಜಾಗಿದ್ದ ಬಂದರ್ ಅಬ್ಬಾಸ್ ನಗರದ ಹೊರವಲಯದಲ್ಲಿನ ಕ್ಷಿಪಣಿ ಉಡಾವಣಾ ತಾಣಗಳ ಮೇಲೂ ನಿಖರ ದಾಳಿಗಳನ್ನು ಮಾಡಲಾಯಿತು. ಕ್ಷಿಪಣಿ ಲಾಂಚರ್ಗಳು, ರಾಡಾರ್ ವ್ಯವಸ್ಥೆಗಳು ಮತ್ತು ಸಂಬಂಧಿತ ಮಿಲಿಟರಿ ಮೂಲಸೌಕರ್ಯ ಸಂಪೂರ್ಣವಾಗಿ ಧ್ವಂಸವಾದವು. ಈ ಸ್ಫೋಟಗಳಿಂದ ಆಕಾಶದೆತ್ತರಕ್ಕೆ ದಟ್ಟ ಹೊಗೆ ಏಳುವ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಮ್ಮ ‘ಟ್ರುತ್ ಸೋಷಿಯಲ್’ ಖಾತೆಯಲ್ಲಿ ದಾಳಿಯ ಚಿತ್ರವನ್ನು ಹಂಚಿಕೊಂಡು, “ಇದು ಟ್ರಂಪ್ ನೀತಿ” ಎಂದು ಬರೆದುಕೊಂಡಿದ್ದಾರೆ. ಇದು ಸಂಘರ್ಷವನ್ನು ಮತ್ತಷ್ಟು ತೀವ್ರಗೊಳಿಸುವ ಸೂಚನೆಯಾಗಿದೆ.
ಆದರೆ, ಈ ದಾಳಿಯ ವ್ಯಾಪ್ತಿ ಸೀಮಿತವಾಗಿದ್ದು, ಇರಾನ್ನೊಂದಿಗೆ ಪೂರ್ಣ ಪ್ರಮಾಣದ ಯುದ್ಧವನ್ನು ಬಯಸುವುದಿಲ್ಲ ಎಂದು ಅಮೆರಿಕ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. “ನಾವು ಕದನ ವಿರಾಮವನ್ನು ಉಲ್ಲಂಘಿಸುತ್ತಿಲ್ಲ. ಬದಲಿಗೆ, ನಮ್ಮ ಸೈನಿಕರು ಮತ್ತು ಮಿತ್ರರಾಷ್ಟ್ರಗಳ ನೌಕೆಗಳ ಮೇಲಿನ ನೇರ ಬೆದರಿಕೆಯನ್ನು ತಟಸ್ಥಗೊಳಿಸುತ್ತಿದ್ದೇವೆ” ಎಂದು ಅವರು ಹೇಳಿದ್ದಾರೆ.
ಪ್ರತಿಕ್ರಿಯೆಯಾಗಿ, ಇರಾನ್ನ ಕ್ರಾಂತಿಕಾರಿ ಗಾರ್ಡ್ ಕಾರ್ಪ್ಸ್ ತೀವ್ರ ಎಚ್ಚರಿಕೆ ನೀಡಿದೆ. “ಈ ದಾಳಿಗೆ ಸೂಕ್ತ ಪ್ರತೀಕಾರ ನೀಡಲಾಗುವುದು. ಅಮೆರಿಕದ ಯಾವುದೇ ಅತಿರೇಕದ ಕ್ರಮವನ್ನು ಪ್ರಶ್ನಿಸದೆ ಬಿಡುವುದಿಲ್ಲ” ಎಂದು IRGC ಹೇಳಿಕೆಯಲ್ಲಿ ತಿಳಿಸಿದೆ. ಅಲ್ಲದೇ, ಹಾರ್ಮುಜ್ ಜಲಸಂಧಿಯನ್ನು ಮುಚ್ಚುವ ಭೀತಿಯನ್ನೂ ಇರಾನ್ ಮೂಡಿಸಿದೆ.
ಪ್ರಸ್ತುತ, ಅಮೆರಿಕವು ತನ್ನ ಸಂಯಮವನ್ನು ಮುಂದುವರೆಸಿದೆ, ಆದರೆ ಯಾವುದೇ ಹಂತದಲ್ಲೂ ತನ್ನ ಸೈನಿಕರ ರಕ್ಷಣೆಗಾಗಿ ಕಠಿಣ ಕ್ರಮಕ್ಕೆ ಹಿಂಜರಿಯುವುದಿಲ್ಲ ಎಂಬುದನ್ನು CENTCOM ಸ್ಪಷ್ಟಪಡಿಸಿದೆ.
