ವಾಷಿಂಗ್ಟನ್: ಅಮೆರಿಕದ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡಾಗಿನಿಂದಲೂ ಒಂದಲ್ಲ ಒಂದು ಸಂಚಲನಾತ್ಮಕ ತೀರ್ಮಾನಗಳನ್ನು ಕೈಗೊಳ್ಳುತ್ತಿರುವ ಡೊನಾಲ್ಡ್ ಟ್ರಂಪ್, ಇದೀಗ ದೇಶದ ಸಶಸ್ತ್ರ ಪಡೆಗಳಿಗೆ ದೊಡ್ಡ ಮಟ್ಟದ ಆರ್ಥಿಕ ಪ್ಯಾಕೇಜ್ ಘೋಷಣೆ ಮಾಡಿದ್ದಾರೆ. ಅಮೆರಿಕದ ಸ್ಥಾಪನಾ ವರ್ಷಾಚರಣೆಯ ನೆನಪಿಗಾಗಿ ಪ್ರತಿ ಸೈನಿಕನಿಗೆ 1,776 ಡಾಲರ್ (ಸುಮಾರು 1.60 ಲಕ್ಷ ರೂ.) ವಿಶೇಷ ನಗದು ಪಾವತಿಸುವುದಾಗಿ ಟ್ರಂಪ್ ಘೋಷಿಸಿದ್ದಾರೆ.
ಏನಿದು ‘ವಾರಿಯರ್ ಡಿವಿಡೆಂಡ್’ ?
ಅಮೆರಿಕವು 1776ರಲ್ಲಿ ಬ್ರಿಟಿಷರಿಂದ ಸ್ವಾತಂತ್ರ್ಯ ಪಡೆಯಿತು. ಇದರ ಗೌರವಾರ್ಥವಾಗಿ ಅದೇ ನಂಬರ್ನ ಮೊತ್ತವನ್ನೇ ಸೈನಿಕರಿಗೆ ನೀಡಲು ನಿರ್ಧರಿಸಲಾಗಿದ್ದು, ಇದಕ್ಕೆ ‘ವಾರಿಯರ್ ಡಿವಿಡೆಂಡ್’ (Warrior Dividend) ಎಂದು ಹೆಸರಿಸಲಾಗಿದೆ. ಅಮೆರಿಕದ ರಕ್ಷಣೆಗಾಗಿ ಸೈನಿಕರು ಮಾಡುತ್ತಿರುವ ತ್ಯಾಗ ಮತ್ತು ಸೇವೆಯನ್ನು ಸ್ಮರಿಸಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಟ್ರಂಪ್ ತಿಳಿಸಿದ್ದಾರೆ. ಈ ಯೋಜನೆಯಿಂದ ಅಮೆರಿಕದ ಸರಿಸುಮಾರು 14.5 ಲಕ್ಷ ಸೈನಿಕರಿಗೆ ನೇರ ಲಾಭವಾಗಲಿದ್ದು, ಕ್ರಿಸ್ಮಸ್ ಹಬ್ಬಕ್ಕೂ ಮುನ್ನವೇ ಈ ಮೊತ್ತ ಅವರ ಕೈ ಸೇರಲಿದೆ.
ಸುಂಕದ ಆದಾಯದಿಂದ ಸೈನಿಕರಿಗೆ ನೆರವು:
ರಾಷ್ಟ್ರವನ್ನುದ್ದೇಶಿಸಿ ಮಾತನಾಡಿದ ಟ್ರಂಪ್, ಹೊಸ ಸುಂಕದ ಮಸೂದೆಗಳಿಂದ ಅಮೆರಿಕದ ಆದಾಯವು ನಾವು ನಿರೀಕ್ಷಿಸಿದ್ದಕ್ಕಿಂತಲೂ ಅಧಿಕವಾಗಿದೆ. ಅನ್ಯ ದೇಶಗಳಿಂದ ಬರುವ ಉತ್ಪನ್ನಗಳ ಮೇಲೆ ವಿಧಿಸಿದ ಸುಂಕದಿಂದ ಬಂದ ಹಣವನ್ನು ನಮ್ಮ ದೇಶದ ವೀರ ಸೈನಿಕರಿಗೆ ಹಂಚಲು ನನಗೆ ಹೆಮ್ಮೆಯಿದೆ. ಈ ಹಣ ನಮ್ಮ ಮಿಲಿಟರಿಗೆ ಬಿಟ್ಟು ಬೇರಾರಿಗೂ ಈ ಹಣ ಸಿಗುವುದು ಹೆಚ್ಚು ಸೂಕ್ತವಲ್ಲ ಬೇರಾರು ಅರ್ಹರೂ ಅಲ್ಲ ಎಂದು ಟ್ರಂಪ್ ಹೇಳಿದ್ದಾರೆ. ಈಗಾಗಲೇ ಸೈನಿಕರ ಹೆಸರಿನಲ್ಲಿ ಚೆಕ್ಗಳನ್ನು ಸಿದ್ಧಪಡಿಸಲಾಗಿದ್ದು, ವಿತರಣಾ ಪ್ರಕ್ರಿಯೆ ಆರಂಭವಾಗಿದೆ.
ಯಾರಿಗೆಲ್ಲ ಈ ಸವಲತ್ತು ಸಿಗಲಿದೆ ?
ಈ ವಿಶೇಷ ಆರ್ಥಿಕ ಪ್ಯಾಕೇಜ್ ಪಡೆಯಲು ಕೆಲವು ಮಾನದಂಡಗಳನ್ನು ನಿಗದಿಪಡಿಸಲಾಗಿದೆ ಅವುಗಳನ್ನ ಈ ಕೆಳಗಿನ ಅಂಶಗಳಿಂದ ತಿಳಿಯಬಹುದು.
-
ಸಕ್ರಿಯ ಸಿಬ್ಬಂದಿ: 2025ರ ನವೆಂಬರ್ 30ರ ವೇಳೆಗೆ 0-6 ಮತ್ತು ಅದಕ್ಕಿಂತ ಕಡಿಮೆ ವೇತನ ಶ್ರೇಣಿಯಲ್ಲಿ ಸಕ್ರಿಯ ಕರ್ತವ್ಯದಲ್ಲಿರುವ ಸೈನಿಕರು.
-
ಮೀಸಲು ಪಡೆಗಳು: ನವೆಂಬರ್ 30ಕ್ಕೆ ಅನ್ವಯವಾಗುವಂತೆ ಕನಿಷ್ಠ 31 ದಿನಗಳು ಸಕ್ರಿಯ ಕರ್ತವ್ಯ ನಿರ್ವಹಿಸಿದ ಮೀಸಲು ಘಟಕದ (Reserve Unit) ಸಿಬ್ಬಂದಿ.
-
ಏಕಕಾಲದ ಪಾವತಿ: ಇದು ಒಂದು ಬಾರಿ ನೀಡಲಾಗುವ ವಿಶೇಷ ಗೌರವ ಧನವಾಗಿದೆ.
ಒಂದೆಡೆ ಕಟ್ಟುನಿಟ್ಟಾದ ವಲಸೆ ನೀತಿಗಳ ಮೂಲಕ ಅಮೆರಿಕವನ್ನು ವಲಸಿಗರಹಿತ ಮಾಡುವ ಗುರಿ ಹೊಂದಿರುವ ಟ್ರಂಪ್, ಇನ್ನೊಂದೆಡೆ ಸೈನಿಕರ ಮನಗೆಲ್ಲುವ ಮೂಲಕ ದೇಶದ ಆಂತರಿಕ ಭದ್ರತೆ ಮತ್ತು ಶಕ್ತಿಯನ್ನು ಹೆಚ್ಚಿಸುವತ್ತ ಗಮನ ಹರಿಸಿದ್ದಾರೆ. ಕ್ರಿಸ್ಮಸ್ ಸಂದರ್ಭದಲ್ಲೇ ಈ ಘೋಷಣೆ ಹೊರಬಿದ್ದಿರುವುದು ಅಮೆರಿಕನ್ ಮಿಲಿಟರಿ ಕುಟುಂಬಗಳಲ್ಲಿ ಸಂಭ್ರಮ ತಂದಿದೆ.
