ಇರಾನ್ ಮತ್ತು ಇಸ್ರೇಲ್ ನಡುವೆ ಉದ್ವಿಗ್ನತೆ ಹೆಚ್ಚಿರುವ ಬೆನ್ನಲ್ಲೇ ಇಸ್ರೇಲ್ ನಡೆಸಿದ ಖಮೇನಿ ಹತ್ಯೆ ಕಾರ್ಯಾಚರಣೆಯ ಸಂಪೂರ್ಣ ಮಾಹಿತಿ ಈಗ ಬಹಿರಂಗವಾಗಿದೆ. ಕೇವಲ ಯುದ್ಧದ ಹೊತ್ತಿನಲ್ಲಿ ನಡೆದ ಘಟನೆ ಅಲ್ಲ, ಬದಲಾಗಿ ಕಳೆದ ಒಂದು ವರ್ಷದಿಂದ ಯೋಜಿಸಲಾಗಿದ್ದ ಮೊಸಾದ್ ಮತ್ತು ಸಿಐಎ ಜಂಟಿ ಕಾರ್ಯಾಚರಣೆಯ ಪರಿಣಾಮವಾಗಿ ಈ ಹತ್ಯೆ ನಡೆದಿದೆ ಎಂಬ ಅಂಶ ಬೆಳಕಿಗೆ ಬಂದಿದೆ.
ಇರಾನ್ ಸರ್ವೋಚ್ಚ ನಾಯಕ ಅಯತೋಲ್ಲಾ ಖಮೇನಿ ಅವರ ಚಲನವಲನಗಳ ಮೇಲೆ ನಿಗಾ ವಹಿಸಲು ಇಸ್ರೇಲ್ನ ಗುಪ್ತಚರ ಸಂಸ್ಥೆ ಮೊಸಾದ್ ಮತ್ತು ಅಮೆರಿಕದ ಸಿಐಎ ಸಂಯುಕ್ತವಾಗಿ ನಡೆಸಿದ ಕಾರ್ಯಾಚರಣೆ ಅತ್ಯಂತ ರೋಚಕವಾಗಿತ್ತು. ಟೆಹ್ರಾನ್ ನಗರದ ಪ್ರಮುಖ ಟ್ರಾಫಿಕ್ ಕ್ಯಾಮೆರಾಗಳು, ಮೊಬೈಲ್ ನೆಟ್ವರ್ಕ್ ಮತ್ತು ಸಂಪೂರ್ಣ ಸಂಪರ್ಕ ಜಾಲವನ್ನೇ ಹ್ಯಾಕ್ ಮಾಡುವ ಮೂಲಕ ಖಮೇನಿಯ ಪ್ರತಿ ಹೆಜ್ಜೆಯನ್ನೂ ರೆಕಾರ್ಡ್ ಮಾಡಲಾಗಿತ್ತು.
ಇರಾನ್ ಪರಮಾಣು ಬಾಂಬ್ ಅಭಿವೃದ್ಧಿ ಪಡಿಸುತ್ತಿರುವುದಾಗಿ ಘೋಷಿಸಿದ ನಂತರ ಖಮೇನಿ ನೀಡಿದ್ದ ‘ಡೆತ್ ಟು ಇಸ್ರೇಲ್, ಡೆತ್ ಟು ಅಮೆರಿಕಾ’ ಘೋಷಣೆಯೇ ಈ ಕಾರ್ಯಾಚರಣೆಗೆ ಟ್ರಿಗರ್ ಆಗಿತ್ತು.. ಕಳೆದ ಒಂದು ವರ್ಷದಿಂದ ಖಮೇನಿ ಯಾರನ್ನು ಭೇಟಿಯಾಗುತ್ತಾರೆ, ಎಲ್ಲಿ ತಂಗುತ್ತಾರೆ, ಅವರ ಭದ್ರತಾ ವ್ಯವಸ್ಥೆ ಹೇಗಿದೆ ಎಂಬ ಸಂಪೂರ್ಣ ಮಾಹಿತಿಯನ್ನು ಸಂಗ್ರಹಿಸಲಾಗಿತ್ತು.
ತುರ್ತು ಸಂದರ್ಭದಲ್ಲಿ ಖಮೇನಿ ಆಶ್ರಯ ಪಡೆಯುವ ಸ್ಥಳಗಳ ಮಾಹಿತಿಯನ್ನೂ ಸಂಗ್ರಹಿಸಲಾಗಿತ್ತು. ಕೆಲ ತಿಂಗಳ ಹಿಂದೆ ಅಮೆರಿಕ ನಡೆಸಿದ್ದ ದಾಳಿ ವೇಳೆ ಖಮೇನಿ ಎಲ್ಲಿ ಅಡಗಿದ್ದರು ಎಂಬುದನ್ನೂ ಈ ಸಂದರ್ಭದಲ್ಲಿ ಖಚಿತಪಡಿಸಿಕೊಳ್ಳಲಾಗಿತ್ತು. ಇದರಿಂದಾಗಿ ಯುದ್ಧ ಆರಂಭವಾದ ಕೆಲವೇ ಕ್ಷಣಗಳಲ್ಲಿ ಖಮೇನಿಯನ್ನು ನಿಖರವಾಗಿ ಗುರಿಯಾಗಿಸಲು ಸಾಧ್ಯವಾಯಿತು.
ಇಸ್ರೇಲ್ ರಕ್ಷಣಾ ಪಡೆ ಮತ್ತು ಮೊಸಾದ್ ತಂಡವು ಟೆಹ್ರಾನ್ನಲ್ಲಿ ನೂರಾರು ಸ್ಥಳಗಳಲ್ಲಿ ಕ್ಯಾಮೆರಾಗಳನ್ನು ಅಳವಡಿಸಿತ್ತು. ಟ್ರಾಫಿಕ್ ಕ್ಯಾಮೆರಾಗಳು, ಸರ್ಕಾರಿ ಕಟ್ಟಡಗಳ ಸುತ್ತಮುತ್ತಲಿನ ಸಿಸಿಟಿವಿಗಳು, ಖಾಸಗಿ ಸ್ಥಳಗಳಲ್ಲಿ ಅಳವಡಿಸಲಾಗಿದ್ದ ಕ್ಯಾಮೆರಾಗಳು ಸೇರಿದಂತೆ ಎಲ್ಲವನ್ನೂ ಹ್ಯಾಕ್ ಮಾಡಿ ಕೇಂದ್ರೀಯ ವ್ಯವಸ್ಥೆಗೆ ಜೋಡಿಸಲಾಗಿತ್ತು. ಟೆಹ್ರಾನ್ನಲ್ಲಿ ಹುಲ್ಲುಕಡ್ಡಿ ಅಲುಗಾಡಿದರೂ ಅದು ಖಮೇನಿಗಿಂತ ಮೊದಲು ಮೊಸಾದ್ಗೆ ತಿಳಿಯುವಷ್ಟು ಸೂಕ್ಷ್ಮವಾಗಿ ನಿಗಾ ವಹಿಸಲಾಗಿತ್ತು.
ಈ ಕಾರ್ಯಾಚರಣೆಯ ಯಶಸ್ಸಿಗೆ ಕಾರಣವೆಂದರೆ ಮೊಸಾದ್ ಮತ್ತು ಸಿಐಎ ನಡುವಿನ ಜಂಟಿ ಕಾರ್ಯಾಚರಣೆ. ಅಮೆರಿಕದ ಡ್ರೋನ್ ದಾಳಿ ಮತ್ತು ಇಸ್ರೇಲ್ನ ಫೈಟರ್ ಜೆಟ್ಗಳು ಏಕಕಾಲದಲ್ಲಿ ಕಾರ್ಯಾಚರಣೆ ನಡೆಸಿದ್ದರಿಂದ ಖಮೇನಿ ಇರುವ ನಿಖರ ಸ್ಥಳವನ್ನು ಗುರುತಿಸಲು ಸಾಧ್ಯವಾಯಿತು. ಯುದ್ಧದ ವೇಳೆ ಖಮೇನಿಯನ್ನು ಸುರಕ್ಷಿತ ಸ್ಥಳಕ್ಕೆ ಸ್ಥಳಾಂತರಿಸುವ ಪ್ರಯತ್ನ ನಡೆದಿತ್ತು. ಆದರೆ, ಅವರ ಬೆಂಗಾವಲು ಪಡೆಯ ಚಲನವಲನವನ್ನು ಮೊದಲೇ ಗುರುತಿಸಿದ್ದ ಇಸ್ರೇಲ್, ಖಮೇನಿ ಪ್ರಯಾಣಿಸುತ್ತಿದ್ದ ವಾಹನದ ಮೇಲೆ ನಿಖರ ದಾಳಿ ನಡೆಸಿತು.
ಈ ಕಾರ್ಯಾಚರಣೆಯಿಂದಾಗಿ ಮಧ್ಯಪ್ರಾಚ್ಯದ ರಾಜಕೀಯ ಸಮೀಕರಣಗಳೇ ಬದಲಾಗುವ ಸಾಧ್ಯತೆ ಇದೆ. ಇರಾನ್ ತನ್ನ ಮುಖ್ಯ ನಾಯಕನನ್ನು ಕಳೆದುಕೊಂಡಿರುವುದರಿಂದ ದೇಶದಲ್ಲಿ ಅಧಿಕಾರ ಹೋರಾಟ ತೀವ್ರಗೊಳ್ಳುವ ಸಾಧ್ಯತೆ ಇದೆ. ಇನ್ನೊಂದೆಡೆ, ಇಸ್ರೇಲ್ ತನ್ನ ಶತ್ರು ಎಂದು ಘೋಷಿಸಿಕೊಂಡಿದ್ದ ನಾಯಕನನ್ನು ಹತ್ಯೆ ಮಾಡುವ ಮೂಲಕ ತನ್ನ ಸಾಮರ್ಥ್ಯವನ್ನು ಪ್ರದರ್ಶಿಸಿದೆ. ಅಮೆರಿಕ ಮತ್ತು ಇಸ್ರೇಲ್ ನಡುವಿನ ಮೈತ್ರಿ ಮತ್ತಷ್ಟು ಗಟ್ಟಿಯಾಗಿದ್ದು, ಮುಂದಿನ ದಿನಗಳಲ್ಲಿ ಇರಾನ್ ವಿರುದ್ಧ ಮತ್ತಷ್ಟು ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳುವ ಸಾಧ್ಯತೆ ಇದೆ.
