ಟೆಹ್ರಾನ್: ಹಾರ್ಮುಜ್ ಜಲಸಂಧಿಯಲ್ಲಿ ಉದ್ವಿಗ್ನತೆ ಸೃಷ್ಟಿಸಿರುವ ಇರಾನ್, ಈಗ ಮತ್ತೊಂದು ಪ್ರಮುಖ ಜಲಸಂಧಿಯನ್ನು ಮುಚ್ಚುವ ತಂತ್ರಗಾರಿಕೆ ನಡೆಸುತ್ತಿದೆ. ಅರಬ್ಬಿ ಸಮುದ್ರ ಮತ್ತು ಕೆಂಪು ಸಮುದ್ರವನ್ನು ಸಂಪರ್ಕಿಸುವ ಬಾಬ್ ಅಲ್ ಮಂದೆಬ್ ಜಲಸಂಧಿಯ ಮೇಲೆ ಇರಾನ್ ಸೇನೆ ಕಣ್ಣು ಹಾಕಿದೆ. ಇದರ ಮೂಲಕ ಯುರೋಪ್ ಮತ್ತು ಏಷ್ಯಾ ನಡುವಿನ ಸಾಗಣೆ ಮಾರ್ಗವನ್ನು ಸಂಪೂರ್ಣವಾಗಿ ಕಡಿತಗೊಳಿಸುವ ಯೋಜನೆಯನ್ನು ಇರಾನ್ ರೂಪಿಸಿದೆ ಎಂದು ಮೂಲಗಳು ತಿಳಿಸಿವೆ.
ಬಾಬ್ ಅಲ್ ಮಂದೆಬ್ ಎಂಬುದು ಯೆಮನ್ ಮತ್ತು ಜಿಬೂಟಿ ದೇಶಗಳ ನಡುವೆ ಇರುವ ಕಿರಿದಾದ ಜಲಸಂಧಿಯಾಗಿದೆ. ಅರಬ್ಬಿ ಸಮುದ್ರದಿಂದ ಕೆಂಪು ಸಮುದ್ರಕ್ಕೆ ಪ್ರವೇಶಿಸಲು ಈ ಜಲಸಂಧಿ ಏಕೈಕ ಮಾರ್ಗವಾಗಿದೆ. ಕೆಂಪು ಸಮುದ್ರದ ಮೂಲಕ ಸುಯೆಜ್ ಕಾಲುವೆಗೆ ಸಂಪರ್ಕ ಕಲ್ಪಿಸುವ ಈ ಜಲಸಂಧಿ, ಏಷ್ಯಾ ಮತ್ತು ಯುರೋಪ್ ನಡುವಿನ ಸಮುದ್ರ ಸಾಗಣೆಗೆ ಅತ್ಯಂತ ನಿರ್ಣಾಯಕ ಸ್ಥಾನವನ್ನು ಹೊಂದಿದೆ.
ಈ ಜಲಸಂಧಿಯ ಮೂಲಕ ಪ್ರತಿದಿನ ಬ್ಯಾರೆಲ್ ತೈಲ ಸೇರಿದಂತೆ ಅಪಾರ ಪ್ರಮಾಣದ ಸರಕುಗಳು ಈ ಮಾರ್ಗದಲ್ಲಿ ಸಾಗುತ್ತವೆ. ಈ ಜಲಸಂಧಿ ಮುಚ್ಚಿಹೋದರೆ, ಯುರೋಪ್ ಮತ್ತು ಅಮೆರಿಕಕ್ಕೆ ತೈಲ ಪೂರೈಕೆಯ ಸಂಪೂರ್ಣ ಸರಪಳಿಯೇ ಸ್ಥಗಿತಗೊಳ್ಳುವ ಸಾಧ್ಯತೆಯಿದೆ.
ಹೌತಿ ಉಗ್ರರ ಮೂಲಕ ತಂತ್ರ:
ಈ ಜಲಸಂಧಿಯನ್ನು ಮುಚ್ಚುವ ಕಾರ್ಯವನ್ನು ಇರಾನ್ ನೇರವಾಗಿ ಮಾಡುತ್ತಿಲ್ಲ. ಬದಲಿಗೆ, ಯೆಮನ್ ದೇಶದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಹೌತಿ ಉಗ್ರ ಸಂಘಟನೆಯನ್ನು ಬಳಸಿಕೊಳ್ಳಲಿದೆ. ಹೌತಿಗಳು ಇರಾನ್ ಸರ್ಕಾರದ ಪ್ರಾಕ್ಸಿ ಉಗ್ರ ಸಂಘಟನೆಯಾಗಿದೆ.
ಈ ಹಿಂದೆಯೂ ಹೌತಿ ಉಗ್ರರು ಬಾಬ್ ಅಲ್ ಮಂದೆಬ್ ಜಲಸಂಧಿಯಲ್ಲಿ ವ್ಯಾಪಾರಿ ಹಡಗುಗಳ ಮೇಲೆ ದಾಳಿ ನಡೆಸಿದ್ದಾರೆ. ಡ್ರೋನ್ ಮತ್ತು ಕ್ಷಿಪಣಿಗಳ ಮೂಲಕ ಹಡಗುಗಳನ್ನು ಗುರಿಯಾಗಿಸುವ ತಂತ್ರವನ್ನು ಅವರು ಅಭಿವೃದ್ಧಿಪಡಿಸಿಕೊಂಡಿದ್ದಾರೆ. ಈಗ ಇರಾನ್ ಅವರಿಗೆ ಹೆಚ್ಚುವರಿ ಸೈನಿಕ ಸಾಮಗ್ರಿಗಳನ್ನು ಒದಗಿಸುವ ಮೂಲಕ ಜಲಸಂಧಿಯನ್ನು ಸಂಪೂರ್ಣವಾಗಿ ಮುತ್ತಿಗೆ ಹಾಕುವ ಯೋಜನೆಯನ್ನು ರೂಪಿಸಿದೆ.
ಹಾರ್ಮುಜ್ ಮುಖ್ಯವಾಗಿ ತೈಲ ಸಾಗಣೆಗೆ ಮಾತ್ರ ಸೀಮಿತವಾಗಿದ್ದರೆ, ಬಾಬ್ ಅಲ್ ಮಂದೆಬ್ ಸಾಮಾನ್ಯ ಸರಕುಗಳ ಸಾಗಣೆಗೂ ಪ್ರಮುಖ ಮಾರ್ಗವಾಗಿದೆ. ಸುಯೆಜ್ ಕಾಲುವೆ ಮಾರ್ಗವು ಏಷ್ಯಾ ಮತ್ತು ಯುರೋಪ್ ನಡುವಿನ ವ್ಯಾಪಾರದ ಬೆನ್ನೆಲುಬಾಗಿದೆ. ಬಾಬ್ ಅಲ್ ಮಂದೆಬ್ ಮುಚ್ಚಿಹೋದರೆ ಈ ಸಂಪರ್ಕ ಕೊಂಡಿಯೇ ಕಡಿತಗೊಳ್ಳಲಿದೆ. ಚೀನಾ, ಭಾರತ, ಜಪಾನ್ ಸೇರಿದಂತೆ ಏಷ್ಯಾದ ಪ್ರಮುಖ ಆರ್ಥಿಕತೆಗಳಿಗೆ ಇದು ದೊಡ್ಡ ಹೊಡೆತವಾಗಲಿದೆ.
