ಟೆಹ್ರಾನ್: ಅಮೆರಿಕ ಮತ್ತು ಇಸ್ರೇಲ್ ಗೆ ಇರಾನ್ ಮತ್ತೊಂದು ಕಟು ಎಚ್ಚರಿಕೆ ನೀಡಿದೆ. ಸಂಧಾನದ ಪ್ರಸ್ತಾವನೆಯನ್ನು ಅಮೆರಿಕ ತಿರಸ್ಕರಿಸಿದ ಬೆನ್ನಲ್ಲೇ, ಇರಾನ್ ತನ್ನ ಹೊಸ ಅಸ್ತ್ರದ ಬಗ್ಗೆ ಮಾಹಿತಿ ನೀಡಿದೆ. ಈ ಅಸ್ತ್ರದ ಹೆಸರೇ ‘ಹಾರ್ಟ್ ಅಟ್ಯಾಕ್’ ಎದುರಾಳಿಗಳಲ್ಲಿ ಹೃದಯ ಸ್ತಂಭನವನ್ನೇ ಉಂಟುಮಾಡಬಲ್ಲ ಸಾಮರ್ಥ್ಯ ಹೊಂದಿರುವ ತಂತ್ರಜ್ಞಾನ ಇದಾಗಿದೆ ಎಂದು ಇರಾನಿನ ನೌಕಾ ಪಡೆ ಮುಖ್ಯಸ್ಥರು ಹೇಳಿಕೊಂಡಿದ್ದಾರೆ.
“ನಿಮಗೆ ಹಾರ್ಟ್ ಅಟ್ಯಾಕ್ ತರಬಹುದು”
ಇರಾನ್ ಸರ್ಕಾರಿ ಸ್ವಾಮ್ಯದ ಪ್ರೆಸ್ ಟಿವಿಗೆ ನೀಡಿದ ಸಂದರ್ಶನದಲ್ಲಿ ಅಡ್ಮಿರಲ್ ಶಾರಾಮ್ ಇರಾನಿ ಅವರು ಮಾತನಾಡಿ, “ನಮ್ಮ ವಿರುದ್ಧ ಯಾರಾದರೂ ದಾಳಿ ಮಾಡಿದರೆ, ನಮ್ಮ ಹೊಸ ಅಸ್ತ್ರ ಅವರಿಗೆ ‘ಹಾರ್ಟ್ ಅಟ್ಯಾಕ್’ ತರಬಲ್ಲದು. ಎದುರಾಳಿಯ ರಕ್ಷಣಾ ವ್ಯವಸ್ಥೆಗಳನ್ನು ಸಂಪೂರ್ಣವಾಗಿ ನಿಷ್ಕ್ರೀಯಗೊಳಿಸುತ್ತದೆ” ಎಂದು ಬೆದರಿಕೆ ವ್ಯಕ್ತಪಡಿಸಿದ್ದಾರೆ.
ಅಮೆರಿಕದ ಹಾರ್ಮುಜ್ ಜಲಸಂಧಿಯಲ್ಲಿನ ನೌಕಾ ದಿಗ್ಬಂಧನವನ್ನು ತೆರವು ಮಾಡುವ ಪ್ರಸ್ತಾಪವನ್ನು ಇರಾನ್ ಮುಂದಿಟ್ಟಿತ್ತು. ಆದರೆ ಅಮೆರಿಕ ಅದನ್ನು ತಿರಸ್ಕರಿಸಿದ್ದಲ್ಲದೆ, ದಿಗ್ಬಂಧನವನ್ನು ಮುಂದುವರಿಸುವುದಾಗಿ ಸ್ಪಷ್ಟಪಡಿಸಿತು. ಇದರಿಂದ ಕುಪಿತಗೊಂಡ ಇರಾನ್, ತನ್ನ ಹೊಸ ಆಯುಧದ ಬಗ್ಗೆ ಮಾಹಿತಿ ತಿಳಿಸಿದೆ.
ಅಬ್ರಹಾಂ ಲಿಂಕನ್ ಮೇಲೆ ಕ್ಷಿಪಣಿ ದಾಳಿ
ಇರಾನ್ ನೌಕಾ ಪಡೆಯ ಹೇಳಿಕೆಯ ಪ್ರಕಾರ, ಕಳೆದ ವಾರ ಅಮೆರಿಕದ ಯುದ್ಧ ನೌಕೆ ಅಬ್ರಹಾಂ ಲಿಂಕನ್ ಮೇಲೆ ಸೀಕ್ರೆಟ್ ಆಗಿ 7 ಕ್ಷಿಪಣಿ ದಾಳಿಗಳನ್ನು ಇರಾನ್ ಯಶಸ್ವಿಯಾಗಿ ನಡೆಸಿದೆ. ಆ ಯುದ್ಧ ನೌಕೆಯಿಂದ ಯುದ್ಧ ವಿಮಾನಗಳನ್ನು ಹಾರಿಸಿ ಇರಾನ್ ಮೇಲೆ ದಾಳಿ ನಡೆಸುವ ಯೋಜನೆಯನ್ನು ಈ ಮೂಲಕ ತಪ್ಪಿಸಿದ್ದೇವೆ ಎಂದು ಅಡ್ಮಿರಲ್ ಹೇಳಿದ್ದಾರೆ. ಈ ಮಾಹಿತಿ ನೀಡಿದ ನಂತರವೇ ಹೊಸ ಅಸ್ತ್ರದ ಅನಾವರಣ ಮಾಡಲಾಗುತ್ತಿದೆ ಎಂದು ತಿಳಿಸಿದ್ದಾರೆ.
ಏನದು ಹೊಸ ಅಸ್ತ್ರ?
“ಹಾರ್ಟ್ ಅಟ್ಯಾಕ್” ಅಸ್ತ್ರವು ನಿಖರವಾಗಿ ಏನು ಎಂಬುದರ ಬಗ್ಗೆ ಸಂಪೂರ್ಣ ತಾಂತ್ರಿಕ ವಿವರಗಳನ್ನು ಇರಾನ್ ಬಹಿರಂಗಪಡಿಸಿಲ್ಲ. ಇದು ದಾಳಿ ನಡೆಸಿದ ಕೆಲವೇ ಸೆಕೆಂಡುಗಳಲ್ಲಿ ಎದುರಾಳಿಯ ಸಂವಹನ, ರಾಡಾರ್ ಮತ್ತು ಮಾರ್ಗದರ್ಶನ ವ್ಯವಸ್ಥೆಗಳನ್ನು ಬಂದ್ ಮಾಡಿ, ಅವರ ಯುದ್ಧ ಸಾಮರ್ಥ್ಯವನ್ನು ಸಂಪೂರ್ಣವಾಗಿ ನಿಶ್ಚೇಷ್ಟಿತಗೊಳಿಸಬಲ್ಲದು ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.
