ವಾಷಿಂಗ್ಟನ್‌: ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೇತೃತ್ವದ ಸರ್ಕಾರವು ಸೆಪ್ಟೆಂಬರ್ 19, 2025ರಂದು H-1B ವೀಸಾಗಳಿಗೆ ಒಂದು ಲಕ್ಷ ಡಾಲರ್‌ನ ದುಬಾರಿ ಶುಲ್ಕವನ್ನು ಘೋಷಿಸಿತ್ತು. ಈ ಘೋಷಣೆಯು ಉದ್ಯೋಗದಾತ ಕಂಪನಿಗಳಿಗೆ ಮತ್ತು ವೀಸಾ ಹೊಂದಿರುವವರಿಗೆ ಆಘಾತಕಾರಿಯಾಗಿತ್ತು. ಆದರೆ, ಇದೀಗ ಈ ಶುಲ್ಕದ ಬಗ್ಗೆ ಗೊಂದಲಗಳಿಗೆ ತೆರೆ ಬಿದ್ದಿದೆ. ಅಮೆರಿಕದಲ್ಲಿ ಈಗಾಗಲೇ ಇರುವವರಿಗೆ, ವಿಶೇಷವಾಗಿ ತಮ್ಮ ವೀಸಾ ಸ್ಥಿತಿಯನ್ನು ಬದಲಾಯಿಸಿಕೊಳ್ಳುವವರಿಗೆ (ಉದಾಹರಣೆಗೆ, ಎಫ್-1 ವಿದ್ಯಾರ್ಥಿ ವೀಸಾದಿಂದ H-1B ಉದ್ಯೋಗ ವೀಸಾಗೆ) ಈ ದುಬಾರಿ ಶುಲ್ಕ ಅನ್ವಯವಾಗುವುದಿಲ್ಲ ಎಂದು ಯುಎಸ್‌ಸಿಐಎಸ್‌ (USCIS) ಸ್ಪಷ್ಟಪಡಿಸಿದೆ.
H-1B ವೀಸಾವು ಅಮೆರಿಕದ ತಾತ್ಕಾಲಿಕ ಉದ್ಯೋಗ ವೀಸಾವಾಗಿದ್ದು, ವಿಶೇಷ ಕೌಶಲ್ಯ ಹೊಂದಿರುವ ವಿದೇಶಿ ವೃತ್ತಿಪರರನ್ನು ನೇಮಿಸಿಕೊಳ್ಳಲು ಕಂಪನಿಗಳಿಗೆ ಅನುವು ಮಾಡಿಕೊಡುತ್ತದೆ. 1990ರಲ್ಲಿ ಆರಂಭವಾದ ಈ ವೀಸಾ ವಿಜ್ಞಾನ, ತಂತ್ರಜ್ಞಾನ, ಎಂಜಿನಿಯರಿಂಗ್ ಮತ್ತು ಗಣಿತ (STEM) ಕ್ಷೇತ್ರಗಳಲ್ಲಿ ಪದವಿ ಅಥವಾ ಅದಕ್ಕಿಂತ ಹೆಚ್ಚಿನ ಶಿಕ್ಷಣ ಹೊಂದಿರುವವರಿಗೆ ರಚಿಸಲಾಯಿತು. ಈ ವೀಸಾವನ್ನು ಆರಂಭದಲ್ಲಿ ಮೂರು ವರ್ಷಗಳವರೆಗೆ ನೀಡಲಾಗುತ್ತದೆ. ಆದರೆ ಗರಿಷ್ಠ ಆರು ವರ್ಷಗಳವರೆಗೆ ವಿಸ್ತರಿಸಬಹುದು. ಗ್ರೀನ್ ಕಾರ್ಡ್ ಪಡೆದವರಿಗೆ ಈ ವೀಸಾವನ್ನು ಅನಿರ್ದಿಷ್ಟವಾಗಿ ನವೀಕರಿಸಬಹುದು. ಭಾರತೀಯರು H-1B ವೀಸಾ ಫಲಾನುಭವಿಗಳಲ್ಲಿ ಯಾವಾಗಲೂ ಮುಂಚೂಣಿಯಲ್ಲಿದ್ದಾರೆ. 2024ರ ಸರ್ಕಾರಿ ದತ್ತಾಂಶದ ಪ್ರಕಾರ, ಒಟ್ಟು ಅನುಮೋದಿತ H-1B ವೀಸಾಗಳಲ್ಲಿ ಶೇ. 71 ಭಾರತೀಯರಿಗೆ ದೊರೆತಿದೆ.
ಯುಎಸ್‌ಸಿಐಎಸ್‌ನ ಸ್ಪಷ್ಟನೆಯ ಪ್ರಕಾರ, ಎಫ್-1 ವಿದ್ಯಾರ್ಥಿ ವೀಸಾದಿಂದ H-1B ವೀಸಾಗೆ ಬದಲಾಯಿಸುವವರು ಅಥವಾ ಅಮೆರಿಕದೊಳಗೆ ತಮ್ಮ ವಾಸ್ತವ್ಯವನ್ನು ವಿಸ್ತರಿಸಲು ಕೋರುವವರು ಈ ಒಂದು ಲಕ್ಷ ಡಾಲರ್ ಶುಲ್ಕವನ್ನು ಪಾವತಿಸಬೇಕಾಗಿಲ್ಲ. ಆದರೆ, ಅಮೆರಿಕದ ಹೊರಗಿನಿಂದ ಹೊಸದಾಗಿ H-1B ವೀಸಾಗೆ ಅರ್ಜಿ ಸಲ್ಲಿಸುವವರಿಗೆ ಅಥವಾ ಅಮೆರಿಕದಲ್ಲಿದ್ದು, ಅರ್ಜಿ ಪ್ರಕ್ರಿಯೆ ಪೂರ್ಣಗೊಳ್ಳುವ ಮೊದಲು ದೇಶ ತೊರೆಯಬೇಕಾದವರಿಗೆ ಈ ಶುಲ್ಕ ಅನ್ವಯವಾಗುತ್ತದೆ. ಈ ನಿಯಮವು ಸೆಪ್ಟೆಂಬರ್ 21, 2025ರ ನಂತರ ಸಲ್ಲಿಕೆಯಾಗುವ ಹೊಸ ಅರ್ಜಿಗಳಿಗೆ ಮಾತ್ರ ಅನ್ವಯವಾಗಲಿದೆ. ಈ ಶುಲ್ಕದ ಪಾವತಿಗಾಗಿ ಆನ್‌ಲೈನ್‌ ಪೋರ್ಟಲ್‌ ಕೂಡ ಸ್ಥಾಪಿಸಲಾಗಿದೆ, ಇದರಿಂದ ಅರ್ಜಿದಾರರಿಗೆ ಪಾವತಿ ಪ್ರಕ್ರಿಯೆ ಸುಲಭವಾಗಲಿದೆ.
ಈಗಾಗಲೇ H-1B ವೀಸಾ ಹೊಂದಿರುವವರಿಗೆ ಅಮೆರಿಕಕ್ಕೆ ಪ್ರವೇಶಿಸಲು ಅಥವಾ ದೇಶದಿಂದ ನಿರ್ಗಮಿಸಲು ಯಾವುದೇ ತೊಂದರೆ ಇಲ್ಲ ಎಂದು ಯುಎಸ್‌ಸಿಐಎಸ್‌ ಖಚಿತಪಡಿಸಿದೆ.
