ಬೀಜಿಂಗ್, ಡಿ.27: ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಚೀನಾ ಮತ್ತೊಮ್ಮೆ ವಿಶ್ವದ ಗಮನ ಸೆಳೆದಿದೆ. ಸಾರಿಗೆ ಕ್ಷೇತ್ರದಲ್ಲಿ ಕ್ರಾಂತಿಕಾರಕ ಬದಲಾವಣೆಗೆ ಕಾರಣವಾಗುವಂತಹ ಮಹತ್ವದ ಸಾಧನೆಯನ್ನು ಚೀನಾ ಮಾಡಿದ್ದು, ಅತೀ ವೇಗದ ಮ್ಯಾಗ್ಲೆವ್ (Maglev) ರೈಲನ್ನು ಯಶಸ್ವಿಯಾಗಿ ಪರೀಕ್ಷಿಸುವ ಮೂಲಕ ಹೊಸ ವಿಶ್ವ ದಾಖಲೆಯನ್ನು ನಿರ್ಮಿಸಿದೆ. ಕೇವಲ ಎರಡು ಸೆಕೆಂಡ್ಗಳಲ್ಲಿ ಗಂಟೆಗೆ 700 ಕಿಲೋಮೀಟರ್ ವೇಗ ತಲುಪಿರುವ ಈ ರೈಲು ಇದೀಗ ಜಗತ್ತಿನಾದ್ಯಂತ ಚರ್ಚೆಯ ವಿಷಯವಾಗಿದ್ದು, ಅದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.
ಚೀನಾದ ರಾಷ್ಟ್ರೀಯ ರಕ್ಷಣಾ ತಂತ್ರಜ್ಞಾನ ವಿಶ್ವವಿದ್ಯಾಲಯ (National University of Defense Technology)ದ ವಿಜ್ಞಾನಿಗಳು ಈ ಅತ್ಯಾಧುನಿಕ ಮ್ಯಾಗ್ಲೆವ್ ರೈಲಿನ ಪರೀಕ್ಷೆಯನ್ನು ಯಶಸ್ವಿಯಾಗಿ ನಡೆಸಿದ್ದಾರೆ. ಸುಮಾರು 400 ಮೀಟರ್ ಉದ್ದದ ವಿಶೇಷ ಟ್ರ್ಯಾಕ್ನಲ್ಲಿ ಈ ಪ್ರಯೋಗ ನಡೆದಿದ್ದು, ಅತ್ಯಂತ ಕಡಿಮೆ ಅವಧಿಯಲ್ಲಿ ಅಸಾಧಾರಣ ವೇಗದ ಜೊತೆಗೆ ಸುರಕ್ಷಿತವಾಗಿ ರೈಲನ್ನು ನಿಲ್ಲಿಸುವುದೂ ವಿಜ್ಞಾನಿಗಳಿಗೆ ಸಾಧ್ಯವಾಗಿದೆ. ಸುಮಾರು 1,000 ಕಿಲೋಗ್ರಾಂ ತೂಕದ ಈ ರೈಲು, ಎರಡು ಸೆಕೆಂಡ್ಗಳಲ್ಲಿ 700 ಕಿ.ಮೀ ವೇಗ ತಲುಪಿರುವುದು ವಿಶ್ವ ಸಾರಿಗೆ ಇತಿಹಾಸದಲ್ಲೇ ಅಪರೂಪದ ಸಾಧನೆಯಾಗಿದೆ.
ಈ ರೈಲು ‘ಸೂಪರ್ ಕಂಡಕ್ಟಿಂಗ್ ಎಲೆಕ್ಟ್ರಿಕ್ ಮ್ಯಾಗ್ಲೆವ್’ ತಂತ್ರಜ್ಞಾನವನ್ನು ಬಳಸಿಕೊಂಡಿದೆ. ಮ್ಯಾಗ್ನೆಟಿಕ್ ಲೆವಿಟೇಶನ್ ತಂತ್ರಜ್ಞಾನದಿಂದಾಗಿ ರೈಲು ಟ್ರ್ಯಾಕ್ನ ಮೇಲೆ ತೇಲುತ್ತಾ ಸಾಗುತ್ತದೆ. ಇದರಿಂದ ಘರ್ಷಣೆ ಶೂನ್ಯವಾಗಿದ್ದು, ಸಾಮಾನ್ಯ ರೈಲುಗಳಿಗಿಂತ ವೇಗವಾಗಿ ಸಾಗುತ್ತದೆ. ತಜ್ಞರ ಪ್ರಕಾರ, ಇದು ಇದುವರೆಗೂ ಅಭಿವೃದ್ಧಿಪಡಿಸಿರುವ ಅತೀ ವೇಗದ ಸೂಪರ್ ಕಂಡಕ್ಟಿಂಗ್ ಮ್ಯಾಗ್ಲೆವ್ ರೈಲು ಎಂದು ಪರಿಗಣಿಸಲಾಗಿದೆ.
ಈ ರೈಲಿನ ವೇಗವರ್ಧನೆ ಸಾಮರ್ಥ್ಯ ಅಷ್ಟೊಂದು ಪ್ರಬಲವಾಗಿದ್ದು, ಅದನ್ನು ರಾಕೆಟ್ ಉಡಾವಣಾ ತಂತ್ರಜ್ಞಾನಕ್ಕೆ ಹೋಲಿಕೆ ಮಾಡಲಾಗುತ್ತಿದೆ. ಕೆಲ ವಿಜ್ಞಾನಿಗಳು ಇದೇ ಎಲೆಕ್ಟ್ರೋಮ್ಯಾಗ್ನೆಟಿಕ್ ವ್ಯವಸ್ಥೆಯನ್ನು ಭವಿಷ್ಯದಲ್ಲಿ ರಾಕೆಟ್ಗಳನ್ನು ಉಡಾವಣೆ ಮಾಡಲು ಬಳಸಬಹುದು ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ರೈಲು ಪರೀಕ್ಷೆಯ ಸಂದರ್ಭದಲ್ಲಿ ಅದು ಮಿಂಚಿನಂತೆ ಕಣ್ಮರೆಯಾದ ದೃಶ್ಯ ನೋಡುಗರಿಗೆ ಸಿನಿಮಾದ ದೃಶ್ಯವನ್ನೇ ನೆನಪಿಸುವಂತಿತ್ತು.
ಈ ಯೋಜನೆಯ ಹಿಂದೆ ಚೀನಾದ ವಿಜ್ಞಾನಿಗಳು ಕಳೆದ 10 ವರ್ಷಗಳಿಂದ ನಿರಂತರ ಸಂಶೋಧನೆ ಮತ್ತು ಪರಿಶ್ರಮ ವಹಿಸಿದ್ದಾರೆ. ಈ ವರ್ಷದ ಜನವರಿ ತಿಂಗಳಲ್ಲಿ ಇದೇ ಮ್ಯಾಗ್ಲೆವ್ ರೈಲು ಗಂಟೆಗೆ 648 ಕಿಲೋಮೀಟರ್ ವೇಗ ಸಾಧಿಸಿತ್ತು. ಇದೀಗ ಅದನ್ನೂ ಮೀರಿಸಿ 700 ಕಿ.ಮೀ ವೇಗ ತಲುಪಿರುವುದು ಚೀನಾದ ತಾಂತ್ರಿಕ ಪ್ರಾಬಲ್ಯವನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.
