ದಾಂಪತ್ಯ ಎನ್ನುವುದು ಕೇವಲ ಹೊಂದಾಣಿಕೆಯಲ್ಲ, ಅದು ಎರಡು ಮನಸ್ಸುಗಳ ನಡುವಿನ ಸಹಜ ಆಕರ್ಷಣೆಯೂ ಹೌದು. ಆದರೆ, ಅನೇಕ ಬಾರಿ ಸಮಾಜಕ್ಕೆ ಹೆದರಿ ನಮ್ಮ ನೈಜ ಭಾವನೆಗಳನ್ನು ಹತ್ತಿಕ್ಕಿ ಬದುಕುತ್ತೇವೆ. ಇಲ್ಲಿ ಒಬ್ಬ ಮಹಿಳೆ (ರೀಟಾ – ಹೆಸರು ಬದಲಾಯಿಸಲಾಗಿದೆ) ತನ್ನ 20 ವರ್ಷಗಳ ಸುದೀರ್ಘ ವೈವಾಹಿಕ ಜೀವನಕ್ಕೆ ಪೂರ್ಣವಿರಾಮವಿಟ್ಟು, ತನ್ನ ಸಮಾನ ಲಿಂಗದ ಸಂಗಾತಿಯನ್ನು ಆರಿಸಿಕೊಂಡ ಕಥೆಯನ್ನು ಹಂಚಿಕೊಂಡಿದ್ದಾರೆ.
ನಾನು ಹೆಟೆರೋಸೆಕ್ಸುವಲ್ (ವಿರುದ್ಧ ಲಿಂಗದವರತ್ತ ಆಕರ್ಷಣೆ ಇರುವವರು) ಎಂದೇ ಭಾವಿಸಿದ್ದೆ. ನನ್ನ ಗಂಡ ಮ್ಯಾಥ್ಯೂ ಕೂಡ ಅದನ್ನೇ ನಂಬಿದ್ದ. ಆದರೆ ಮದುವೆಯಾಗಿ ಎರಡು ದಶಕಗಳ ನಂತರ ನನ್ನ ಸಹೋದ್ಯೋಗಿನಿ ಕ್ಯಾರೋ ಪರಿಚಯವಾಯಿತು. ಅವಳನ್ನು ನೋಡಿದಾಗ ನನ್ನಲ್ಲಿ ಉಂಟಾದ ಭಾವನೆಗಳು ಹಿಂದೆಂದೂ ಅನುಭವಿಸದಂಥವು. ನಾನು ಹೆಣ್ಣನ್ನೇ ಪ್ರೀತಿಸುತ್ತಿದ್ದೇನೆ ಎಂದು ತಿಳಿದಾಗ ನನಗೇ ಆಶ್ಚರ್ಯವಾಯಿತು ಎನ್ನುತ್ತಾರೆ ರೀಟಾ. ಈ ನಿರ್ಧಾರವು ಅವರ ಗಂಡ ಮತ್ತು ಮಕ್ಕಳಿಗೆ ದೊಡ್ಡ ಆಘಾತ ನೀಡಿತು. ಆದರೆ ಇಂದಿನ ಪೀಳಿಗೆಯ ಮಕ್ಕಳಾದ ಕಾರಣ, ಕಾಲಕ್ರಮೇಣ ಅವರು ತಾಯಿಯ ನಿರ್ಧಾರವನ್ನು ಅರ್ಥಮಾಡಿಕೊಂಡಿದ್ದಾರೆ.
ಬಾಲ್ಯದ ನೆನಪುಗಳಲ್ಲಿ ಅಡಗಿದ್ದ ಸಲಿಂಗ ಆಕರ್ಷಣೆ
ಈ ಬದಲಾವಣೆಯ ನಂತರ ರೀಟಾ ತನ್ನ ಬಾಲ್ಯವನ್ನು ಮೆಲುಕು ಹಾಕಿದಾಗ, ತನಗೆ ಹೆಣ್ಣು ಮಕ್ಕಳ ಮೇಲಿದ್ದ ಆಕರ್ಷಣೆಯ ಸುಳಿವುಗಳು ದೊರೆತವು. 1980ರ ದಶಕದಲ್ಲಿ ಬೆಳೆದ ಅವರಿಗೆ ಸಲಿಂಗ ಕಾಮದ ಬಗ್ಗೆ ಅರಿವಿರಲಿಲ್ಲ. ಶಾಲೆಯಲ್ಲಿ ಫಿಯೋನಾ ಎಂಬ ಗೆಳತಿಯೊಂದಿಗೆ ಇದ್ದ ಆಪ್ತತೆ ಮತ್ತು ಅಂದು ನಡೆದ ಸಣ್ಣ ಘಟನೆಗೆ ತಾಯಿ ಅಸಹ್ಯ ಎಂದು ಬೈದಿದ್ದರಿಂದ, ರೀಟಾ ತನ್ನ ಭಾವನೆಗಳನ್ನು ಅಲ್ಲಿಗೇ ಹೂತುಹಾಕಿದ್ದರು. ಸಮಾಜ ಮತ್ತು ಪೋಷಕರ ಆಸೆಯಂತೆ 25ನೇ ವಯಸ್ಸಿನಲ್ಲಿ ಮ್ಯಾಥ್ಯೂನನ್ನು ಮದುವೆಯಾಗಿ ಮಕ್ಕಳನ್ನೂ ಪಡೆದರು. ಆದರೆ, ಅವರ ಲೈಂಗಿಕ ಜೀವನದಲ್ಲಿ ಎಂದಿಗೂ ಪೂರ್ಣ ತೃಪ್ತಿ ಇರಲಿಲ್ಲ.
ಹೊಸ ಜೀವನದ ಆರಂಭ ಮತ್ತು ನೆಮ್ಮದಿ
ಕ್ಯಾರೋಳ ಭೇಟಿಯಾದ ಮೂರು ತಿಂಗಳ ನಂತರ ರೀಟಾ ತನ್ನ ಗಂಡನಿಗೆ ಸತ್ಯ ತಿಳಿಸಿ ವಿಚ್ಛೇದನ ಪಡೆದರು. ಮ್ಯಾಥ್ಯೂ ಆರಂಭದಲ್ಲಿ ನೊಂದರೂ, ಈಗ ಅವನಿಗೂ ಹೊಸ ಸಂಗಾತಿ ಸಿಕ್ಕಿದ್ದಾಳೆ. ವಿಶೇಷವೆಂದರೆ, ಇಂದು ರೀಟಾ-ಕ್ಯಾರೋ ಮತ್ತು ಮ್ಯಾಥ್ಯೂ ಹಾಗೂ ಆತನ ಸಂಗಾತಿ ನಾಲ್ವರೂ ಒಳ್ಳೆಯ ಸ್ನೇಹಿತರಾಗಿದ್ದಾರೆ.
ನಾನು ಈಗ ಕ್ಯಾರೋಳೊಂದಿಗೆ ತುಂಬಾ ಸಂತೋಷವಾಗಿದ್ದೇನೆ. ಹಿಂದೆಂದೂ ಕಾಣದ ಪ್ರೀತಿ ಮತ್ತು ಲೈಂಗಿಕ ಸುಖವನ್ನು ನಾನು ಈಗ ಅನುಭವಿಸುತ್ತಿದ್ದೇನೆ. ಸಮಾಜದ ಕಾರಣಕ್ಕಾಗಿ ನನ್ನಂತೆ ಎಷ್ಟು ಮಂದಿ ತಮ್ಮ ನೈಜ ಅಸ್ಮಿತೆಯನ್ನು ಮರೆತು ಬದುಕುತ್ತಿದ್ದಾರೋ ತಿಳಿಯದು. ಪ್ರತಿಯೊಬ್ಬರಿಗೂ ತಮ್ಮಿಷ್ಟದಂತೆ ಮುಕ್ತವಾಗಿ ಬದುಕುವ ಅವಕಾಶ ಸಿಗಲಿ ಎಂಬುದು ರೀಟಾ ಅವರ ಆಶಯ.
