ಬೆಂಗಳೂರು: ರಣಹದ್ದುಗಳು ಹೊಂಚುಹಾಕಿ ಸಂಚುಮಾಡಿ ಬೇಟೆಯಾಡುತ್ತವೆ ಎಂಬ ತಪ್ಪು ಹೇಳಿಕೆ ಬಿಗ್ಬಾಸ್ ಕಾರ್ಯಕ್ರಮದಲ್ಲಿ ಬಂದಿತ್ತು. ಇದರಿಂದ ಸಿಡಿದುಬಿದ್ದ ರಣಹದ್ದು ಸಂರಕ್ಷಣಾ ಟ್ರಸ್ಟ್ ದೂರಿನ ನಂತರ ಅರಣ್ಯ ಇಲಾಖೆ ಕಾರ್ಯಕ್ರಮದ ಪ್ರೋಗ್ರಾಂ ಹೆಡ್ಗೆ ತಿಳುವಳಿಕೆ ನೋಟೀಸ್ ಜಾರಿ ಮಾಡಿದೆ. ಖಾಸಗಿ ವಾಹಿನಿಯಲ್ಲಿ ಪ್ರಸಾರವಾದ ಬಿಗ್ಬಾಸ್ನ ಭಾನುವಾರದ ಎಪಿಸೋಡ್ನಲ್ಲಿ ಈ ತಪ್ಪು ಹೇಳಿಕೆ ನೀಡಿದ್ದರು.
ರಣಹದ್ದುಗಳ ಬಗ್ಗೆ ಕೊಟ್ಟ ಮಾಹಿತಿ ಸಂಪೂರ್ಣ ತಪ್ಪು ಮತ್ತು ಹಾನಿಕಾರಕ ಎಂದು ಸಂರಕ್ಷಣಾ ಸಂಸ್ಥೆಗಳು ತೀವ್ರ ಆರೋಪಿಸಿದೆ. ರಣಹದ್ದುಗಳು ಸತ್ತ ಪ್ರಾಣಿಗಳ ಮಾಂಸವನ್ನು ಮಾತ್ರ ತಿನ್ನುವ ನೇಚುರಲ್ ಕ್ಲೀನರ್ಸ್ ಎಂಬುದು ವೈಜ್ಞಾನಿಕ ಸತ್ಯ. ಅವು ಬೇಟೆಯಾಡುವುದಿಲ್ಲ. ಹದ್ದು (Eagle) ಮತ್ತು ರಣಹದ್ದು (Vulture) ಸಂಪೂರ್ಣ ವಿಭಿನ್ನ ಪಕ್ಷಿಗಳು. ಎರಡನ್ನೂ ಒಂದೇ ಎಂದು ಚಿತ್ರಿಸುವುದು ಜ್ಞಾನವಿಲ್ಲದೆ ಹರಡುವ ದುಷ್ಪ್ರಚಾರ ಎಂದು ಆಕ್ರೋಶ ಹೊರಹಾಕಿದ್ದಾರೆ. ಅಳಿವಿನಂಚಿನಲ್ಲಿರುವ ಈ ಪಕ್ಷಿಗಳ ಸಂರಕ್ಷಣೆಗೆ ಇಂತಹ ತಪ್ಪು ಮಾಹಿತಿ ದೊಡ್ಡ ಹಿನ್ನಡೆಯಾಗಬಹುದು. ತಪ್ಪು ಕಲ್ಪನೆ ಹರಡಿ ಸಾರ್ವಜನಿಕರಲ್ಲಿ ರಣಹದ್ದುಗಳ ಬಗೆಗೆ ನಕಾರಾತ್ಮಕ ದೃಷ್ಟಿಕೋನ ಮೂಡಿಸಬಹುದು.
ಈ ಬಗ್ಗೆ ಮಾತನಾಡಿರುವ ಅರಣ್ಯ ಇಲಾಖೆಯ ಡಿಆರ್ಎಫ್ಓ ಸುಷ್ಮಾ, ಹದ್ದು ಮತ್ತು ರಣಹದ್ದಿನ ವ್ಯತ್ಯಾಸ ಕುರಿತು ಸ್ಪಷ್ಟತೆ ನೀಡುವಂತೆ ಖಾಸಗಿ ಚಾನಲ್ನ ಬಿಗ್ಬಾಸ್ ಪ್ರೋಗ್ರಾಂ ಹೆಡ್ಗೆ ನೋಟೀಸ್ ನೀಡಲಾಗಿದೆ. ಜನಪ್ರಿಯ ಮಾಧ್ಯಮಗಳು ಕೆಲ ವಿಷಯಗಳನ್ನು ತಿಳಿಸುವಾಗ ಹೆಚ್ಚಿನ ಜವಾಬ್ದಾರಿ ತೋರಬೇಕು. ಈ ಸಂದರ್ಭದಲ್ಲಿ, ಬಿಗ್ ಬಾಸ್ ವಾಹಿನಿಯಿಂದ ಇನ್ನೂ ಯಾವುದೇ ಅಧಿಕೃತ ಹೇಳಿಕೆ ಬಂದಿಲ್ಲ. ಈ ಬಗ್ಗೆ ಯಾವ ರೀತಿ ಪ್ರತಿಕ್ರಿಯಿಸುತ್ತಾರೆ ಕಾದು ನೋಡಬೇಕಿದೆ.
ಬಿಗ್ ಬಾಸ್ ಕಿಚ್ಚ ಸುದೀಪ್ ವಿರುದ್ಧ ದೂರು ದಾಖಲು: ರಣಹದ್ದು ಹೊಂಚುಹಾಕಿ ಸಂಚು ಮಾಡಿ ಹಿಡಿಯುತ್ತೆ!
ಕನ್ನಡದ ಅತ್ಯಂತ ಜನಪ್ರಿಯ ರಿಯಾಲಿಟಿ ಶೋ ‘ಬಿಗ್ ಬಾಸ್ ಕನ್ನಡ ಸೀಸನ್ 12’ಗೆ ಮತ್ತೊಂದು ಸಂಕಷ್ಟ ಎದುರಾಗಿದೆ. ಈ ಬಾರಿ ನಿರೂಪಕ ಕಿಚ್ಚ ಸುದೀಪ್ ಅವರ ವಿರುದ್ಧ ರಣಹದ್ದುಗಳ ಬಗ್ಗೆ ತಪ್ಪು ಮತ್ತು ಆಕ್ಷೇಪಾರ್ಹ ಹೇಳಿಕೆ ನೀಡಿದ್ದಾರೆ ಎಂಬ ಆರೋಪದಲ್ಲಿ ದೂರು ದಾಖಲಾಗಿದೆ. ಕರ್ನಾಟಕ ರಣಹದ್ದು ಸಂರಕ್ಷಣಾ ಟ್ರಸ್ಟ್ ಅವರು ರಾಮನಗರ ಜಿಲ್ಲಾ ಅರಣ್ಯಾಧಿಕಾರಿಗಳಿಗೆ ದೂರು ಸಲ್ಲಿಸಿದ್ದಾರೆ.
ವೀಕೆಂಡ್ ಎಪಿಸೋಡ್ನಲ್ಲಿ ಕಿಚ್ಚ ಸುದೀಪ್ ಅವರು ರಣಹದ್ದುಗಳ ಬಗ್ಗೆ ಹೇಳಿಕೆ ನೀಡಿದ್ದಾರೆ. ಅವರು ಹೇಳಿದ್ದು: “ರಣಹದ್ದು ರೀತಿ ಹೊಂಚುಹಾಕಿ ಸಂಚು ಮಾಡಿ ಕರೆಕ್ಟ್ ಟೈಮ್ಗೆ ಹಿಡಿಯುತ್ತೆ” ಎಂದು. ಈ ಹೇಳಿಕೆಯನ್ನು ಟ್ರಸ್ಟ್ ತೀವ್ರವಾಗಿ ಖಂಡಿಸಿದೆ. ರಣಹದ್ದುಗಳು ಯಾವುದೇ ಜೀವಿಗೆ ಹಾನಿ ಮಾಡುವುದಿಲ್ಲ ಎಂದು ತಿಳಿಸಿದ್ದಾರೆ. ಅವು ಸತ್ತ ಪ್ರಾಣಿಗಳನ್ನು ಮಾತ್ರ ತಿಂದು ಪರಿಸರ ಸಮತೋಲನವನ್ನು ಕಾಪಾಡುತ್ತವೆ. ಇಂತಹ ಅಳಿವಿನಂಚಿನಲ್ಲಿರುವ ಪ್ರಾಣಿಗಳ ಬಗ್ಗೆ ತಪ್ಪು ಮಾಹಿತಿ ಹರಡುವುದು ಸರಿಯಲ್ಲ ಎಂದು ಟ್ರಸ್ಟ್ ಆರೋಪಿಸಿದೆ.ರಣಹದ್ದುಗಳು ಪರಿಸರದ ಸ್ಕ್ಯಾವೆಂಜರ್ಗಳಾಗಿ ಕಾರ್ಯನಿರ್ವಹಿಸುತ್ತವೆ. ಅವುಗಳನ್ನು ‘ಸಂಚು ಮಾಡುವ’ ಅಥವಾ ‘ಹೊಂಚುಹಾಕುವ’ ಎಂದು ಚಿತ್ರಿಸುವುದು ತಪ್ಪು ಚಿತ್ರಣವಾಗಿದ್ದು, ಸಾರ್ವಜನಿಕರಲ್ಲಿ ತಪ್ಪು ಗ್ರಹಿಕೆ ಮೂಡಿಸುತ್ತದೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಇದರಿಂದ ರಣಹದ್ದುಗಳ ಸಂರಕ್ಷಣೆಗೆ ತೊಂದರೆಯಾಗಬಹುದು ಎಂಬ ಆತಂಕ ವ್ಯಕ್ತಪಡಿಸಲಾಗಿದೆ.ದೂರು ಬೆಂಗಳೂರು ದಕ್ಷಿಣ ಡಿವಿಜನ್ನ ಡಿಸಿಎಫ್ ಮತ್ತು ಆರ್ಎಫ್ಒ ಅವರಿಗೆ ಸಲ್ಲಿಸಲಾಗಿದೆ. ಟ್ರಸ್ಟ್ ಅಧಿಕಾರಿಗಳು ಕಿಚ್ಚ ಸುದೀಪ್ ಅವರು ಸರಿಯಾದ ಮಾಹಿತಿ ನೀಡುವಂತೆ ಮತ್ತು ಭವಿಷ್ಯದಲ್ಲಿ ಇಂತಹ ಹೇಳಿಕೆಗಳನ್ನು ತಪ್ಪಿಸುವಂತೆ ಆಗ್ರಹಿಸಿದ್ದಾರೆ. ಇದರಿಂದ ಶೋದ ವೀಕ್ಷಕರಿಗೆ ಸರಿಯಾದ ಜ್ಞಾನ ನೀಡಬೇಕು ಎಂಬುದು ಅವರ ಮುಖ್ಯ ಬೇಡಿಕೆ.
ಬಿಗ್ ಬಾಸ್ ಕನ್ನಡ ಸೀಸನ್ 12 ಆರಂಭವಾದಾಗಿನಿಂದಲೂ ವಿವಾದಗಳಿಂದ ಸುತ್ತುವರಿದಿದೆ. ಮೊದಲು ಪರಿಸರ ಉಲ್ಲಂಘನೆಯಿಂದ ಶೂಟಿಂಗ್ ನಿಲುಗಡೆ, ನಂತರ ಸ್ಪರ್ಧಿಗಳ ನಡವಳಿಕೆಗೆ ಸಂಬಂಧಿಸಿದ ದೂರುಗಳು, ಮಹಿಳೆಯರ ಮಾನಹಾನಿ ಆರೋಪಗಳು ಮತ್ತು ಈಗ ರಣಹದ್ದುಗಳ ಬಗ್ಗೆ ತಪ್ಪು ಚಿತ್ರಣದ ದೂರು. ಕಿಚ್ಚ ಸುದೀಪ್ ಅವರು ಈ ವಿಷಯದ ಬಗ್ಗೆ ಇನ್ನೂ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಶೋದ ಉತ್ಪಾದಕರು ಮತ್ತು ಚಾನೆಲ್ ಪರಿಸ್ಥಿತಿಯನ್ನು ಪರಿಶೀಲಿಸುತ್ತಿದ್ದಾರೆ ಎಂದು ತಿಳಿದುಬಂದಿದೆ.ರಣಹದ್ದುಗಳು ಭಾರತದಲ್ಲಿ ಅಳಿವಿನಂಚಿನ ಪ್ರಾಣಿಗಳ ಪಟ್ಟಿಯಲ್ಲಿವೆ. ಅವುಗಳ ಸಂರಕ್ಷಣೆಗೆ ಸರ್ಕಾರ ಮತ್ತು ಟ್ರಸ್ಟ್ಗಳು ಶ್ರಮಿಸುತ್ತಿವೆ. ಇಂತಹ ಜನಪ್ರಿಯ ಪ್ಲಾಟ್ಫಾರ್ಮ್ನಲ್ಲಿ ಸರಿಯಾದ ಮಾಹಿತಿ ನೀಡುವುದು ಅಗತ್ಯ ಎಂಬುದು ಈ ದೂರಿನ ಮೂಲಕ ಎತ್ತಿ ತೋರಿಸಲಾಗಿದೆ. ಈ ಪ್ರಕರಣವು ಮುಂದೆ ಯಾವ ತಿರುವು ಪಡೆಯುತ್ತದೋ ಎಂಬುದು ಆಸಕ್ತಿಯ ವಿಷಯವಾಗಿದೆ
