ಯಾದಗಿರಿ: ಯಾದಗಿರಿ ನಗರದ ಕಾಂಗ್ರೆಸ್ ಕಚೇರಿಗೆ ಬೆಂಕಿ ಹಚ್ಚಿದ ಪ್ರಕರಣದಲ್ಲಿ ಮಾಜಿ ಜಿಲ್ಲಾ ಮಹಿಳಾ ಕಾಂಗ್ರೆಸ್ ಅಧ್ಯಕ್ಷೆ ಮಂಜುಳಾ ಗೂಳಿಯನ್ನು ಯಾದಗಿರಿ ಪೊಲೀಸರು ಬೀದರ್‌ನಲ್ಲಿ ಬಂಧಿಸಿದ್ದಾರೆ. ಮಂಜುಳಾ ಗೂಳಿ ಹೈದರಾಬಾದ್‌ಗೆ ತಪ್ಪಿಸಿಕೊಳ್ಳಲು ಯತ್ನಿಸುತ್ತಿದ್ದಾಗ ಖಚಿತ ಮಾಹಿತಿಯ ಮೇರೆಗೆ ಯಾದಗಿರಿ ನಗರ ಪೊಲೀಸರು ಕಾರ್ಯಾಚರಣೆ ನಡೆಸಿ ಬಂಧಿಸಿದ್ದಾರೆ.
ಕಾಂಗ್ರೆಸ್ ಪಕ್ಷದ ಜಿಲ್ಲಾ ಮಹಿಳಾ ಅಧ್ಯಕ್ಷೆಯ ಸ್ಥಾನದಿಂದ ಮಂಜುಳಾ ಗೂಳಿಯನ್ನು ಕೈಬಿಟ್ಟು ನೀಲೋಫರ್ ಬಾದಲ್‌ರನ್ನು ನೇಮಕ ಮಾಡಲಾಗಿತ್ತು. ಈ ನಿರ್ಧಾರದಿಂದ ಆಕ್ರೋಶಗೊಂಡ ಮಂಜುಳಾ ಗೂಳಿ ಮತ್ತು ಅವರ ಪತಿ ಶಂಕರ್ ಗೂಳಿ, ರೌಡಿಶೀಟರ್ ಬಾಪುಗೌಡ ಅಗತೀರ್ಥನೊಂದಿಗೆ ಸೇರಿಕೊಂಡು ಕಾಂಗ್ರೆಸ್ ಕಚೇರಿಗೆ ಬೆಂಕಿ ಹಚ್ಚಿದ್ದರು. ಮೇ 24, 2025 ರಂದು ತಡರಾತ್ರಿ ಸುಮಾರು 1:30ಕ್ಕೆ 10 ಲೀಟರ್ ಪೆಟ್ರೋಲ್ ಸುರಿದು ಕಚೇರಿಗೆ ಬೆಂಕಿ ಇಡಲಾಗಿತ್ತು. ಈ ಘಟನೆಯಿಂದ ಕಚೇರಿಯ ಒಳಗಿನ ಪೀಠೋಪಕರಣ, ಏರ್ ಕಂಡೀಷನರ್, ಸೋಫಾ, ಕಿಟಕಿ-ಬಾಗಿಲುಗಳು ಸುಟ್ಟು ಹಾನಿಗೊಳಗಾದವು.
ಕಾಂಗ್ರೆಸ್ ಕಚೇರಿಯ ಎದುರಿನ ಅಂಗಡಿಯ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದ ನಂತರ ಈ ಘಟನೆಯಲ್ಲಿ ಶಂಕರ್ ಗೂಳಿ ಮತ್ತು ಬಾಪುಗೌಡರ ಭಾಗೀದಾರಿಕೆ ದೃಢಪಟ್ಟಿತು. ಈ ಘಟನೆಯಲ್ಲಿ ಮಂಜುಳಾ ಗೂಳಿಯ ಪಾತ್ರವೂ ಸಾಧ್ಯತೆಯಿರುವುದರಿಂದ ಅವರನ್ನು ಬಂಧಿಸಲಾಗಿದೆ ಎಂದು ಯಾದಗಿರಿ ಎಸ್‌ಪಿ ಪೃಥ್ವಿಕ್ ಶಂಕರ್ ತಿಳಿಸಿದ್ದಾರೆ.
