ಚಿಕ್ಕಬಳ್ಳಾಪುರ: ಪ್ರೀತಿಯು ಯಾವ ಜಾತಿ, ಧರ್ಮ, ಭಾಷೆ ಎಂಬ ಬೇಧಭಾವವನ್ನು ಅರಿಯದು ಎಂಬುದಕ್ಕೆ ಮತ್ತೊಮ್ಮೆ ಸಾಕ್ಷಿಯಾಗಿರುವ ಘಟನೆ ಚಿಕ್ಕಬಳ್ಳಾಪುರ ಜಿಲ್ಲೆಯ ಮೈಲಪ್ಪನಹಳ್ಳಿಯಲ್ಲಿ ನಡೆದಿದೆ.
ಮೈಲಪ್ಪನಹಳ್ಳಿಯ ಮುಸ್ಲಿಂ ಯುವತಿ ಅದೇ ಹಳ್ಳಿಯ ಹಿಂದೂ ಯುವಕನನ್ನು ಮದುವೆಯಾಗಿದ್ದಾಳೆ. ಮುಸ್ಲಿಂ ಯುವತಿ ಫಸೀಹಾ (23) ಮತ್ತು ಹಿಂದೂ ಯುವಕ ನಾಗಾರ್ಜುನ (24) ಪ್ರೀತಿಸಿ ಪೋಷಕರ ವಿರೋಧದ ನಡುವೆಯೂ ಪೊಲೀಸ್ ಠಾಣೆಯ ಮೊರೆಹೋಗಿ ವಿವಾಹಿತರಾಗಿದ್ದಾರೆ.
ಮೈಲಪ್ಪನಹಳ್ಳಿಯಲ್ಲಿ ಎದುರುಮನೆಗಳಲ್ಲಿ ವಾಸಿಸುತ್ತಿದ್ದ ಫಸೀಹಾ ಮತ್ತು ನಾಗಾರ್ಜುನ ನಡುವೆ ಸ್ನೇಹ ಬೆಳೆದು ನಂತರ ಪ್ರೀತಿಸಲು ಪ್ರಾರಂಭಿಸಿದ್ದಾರೆ. ಎರಡು ವರ್ಷಗಳ ಕಾಲ ಪ್ರೀತಿಸಿದ ಈ ಜೋಡಿ ದಾಂಪತ್ಯ ಜೀವನಕ್ಕೆ ಕಾಲಿಡಲು ತೀರ್ಮಾನಿಸಿದರು. ಆದರೆ, ಜಾತಿ-ಧರ್ಮದ ಬೇಧದ ಕಾರಣದಿಂದ ಎರಡೂ ಮನೆಯ ಪೋಷಕರು ಅವರ ಪ್ರೀತಿಗೆ ತೀವ್ರ ವಿರೋಧ ವ್ಯಕ್ತಪಡಿಸಿದರು.
ಪೋಷಕರ ವಿರೋಧದ ನಡುವೆಯೂ ತಮ್ಮ ಪ್ರೀತಿಯನ್ನು ಉಳಿಸಿಕೊಳ್ಳಲು ಮತ್ತು ತಮ್ಮ ಭವಿಷ್ಯವನ್ನು ಒಟ್ಟಿಗೆ ಕಟ್ಟಿಕೊಳ್ಳಲು ಈ ಜೋಡಿ ತಮ್ಮ ಮನೆಯನ್ನೇ ತೊರೆದು, ಚಿಕ್ಕಬಳ್ಳಾಪುರ ಗ್ರಾಮಾಂತರ ಪೊಲೀಸ್ ಠಾಣೆಗೆ ಆಶ್ರಯ ಪಡೆದರು. ಠಾಣೆಗೆ ಬಂದಿದ್ದ ಇಬ್ಬರೂ, ಪೊಲೀಸರಿಗೆ ತಮ್ಮ ಸಮಸ್ಯೆಯನ್ನು ವಿವರಿಸಿದರು. ವಿಷಯ ತಿಳಿದು ಇಬ್ಬರ ಪೋಷಕರು ಠಾಣೆಗೆ ಆಗಮಿಸಿ ತೀವ್ರ ವಿರೋಧ ವ್ಯಕ್ತಪಡಿಸಿದರು. ಆದರೆ, ನಾಗಾರ್ಜುನ ಮತ್ತು ಫಸೀಹಾ ತಮ್ಮ ನಿರ್ಧಾರದಲ್ಲಿ ದೃಢರಾಗಿದ್ದರು.
ಕುಟುಂಬದವರ ವಿರೋಧದ ನಡುವೆಯೂ ನಾಗಾರ್ಜುನ ಮತ್ತು ಫಸೀಹಾ ದೇವಸ್ಥಾನವೊಂದರಲ್ಲಿ ಹಸೆಮಣೆ ಏರಿ ವಿವಾಹಿತರಾದರು. ಈ ಜೋಡಿ ತಮ್ಮ ಭದ್ರತೆಗಾಗಿ ಪೊಲೀಸರು ಸೂಕ್ತ ರಕ್ಷಣೆಯನ್ನು ನೀಡಬೇಕೆಂದು ಮನವಿ ಮಾಡಿದ್ದಾರೆ. ಇದರ ಬೆನ್ನಲ್ಲೇ, ಸ್ಥಳೀಯ ಪೊಲೀಸರು ಅವರಿಗೆ ಭದ್ರತೆ ನೀಡಲು ಕ್ರಮ ಕೈಗೊಂಡಿದ್ದಾರೆ.
