ಅಂತೂ ಇಂತೂ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಟಾಕ್ಸಿಕ್ ಸಿನಿಮಾ ವಿಶ್ವದಾದ್ಯಂತ ಅದ್ಧೂರಿಯಾಗಿ ರಿಲೀಸ್ ಆಗಿದೆ.. ಹಾಗಾದ್ರೆ ಹೇಗಿದೆ ಸಿನಿಮಾ..? ಟಾಕ್ಸಿಕ್ ಆರ್ಭಟ ಹೇಗಿದೆ..? ಸಿನಿಮಾ ನೋಡಿದ ಪ್ಯಾನ್ ಇಂಡಿಯಾ ಪ್ರೇಕ್ಷಕರ ಅಭಿಪ್ರಾಯ ಏನು..? ನೋಡಿ.
- ಎಲ್ಲೆಡೆ ಟಾಕ್ಸಿಕ್ ಫೀವರ್.. ಥಿಯೇಟರ್ ಮುಂದೆ ಫ್ಯಾನ್ಸ್ ಡ್ಯಾನ್ಸ್
- ರಾಯನ ಅರ್ಭಟ.. ಇಂಡಿಯನ್ ಬಾಕ್ಸ್ ಆಫೀಸ್ ಪೀಸ್ ಪೀಸ್
- ಗಾಂಧಿನಗರದ 4 ಥಿಯೇಟರ್ಗಳಲ್ಲಿ ಟಾಕ್ಸಿಕ್.. ಹೊಸ ಇತಿಹಾಸ
- ಕಿಚ್ಚ-ದಚ್ಚು ಅಭಿಮಾನಿಗಳು ಯಶ್ಗೆ ಸಾಥ್.. ನೋ ಫ್ಯಾನ್ಸ್ ವಾರ್
ಅಂದುಕೊಂಡಂತೆಯೇ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಟಾಕ್ಸಿಕ್ ಸಿನಿಮಾ ವಿಶ್ವದಾದ್ಯಂತ ಅತಿ ದೊಡ್ಡ ಮಟ್ಟದಲ್ಲಿ ಬಿಡುಗಡೆಯಾಗಿದೆ. ವಿಶ್ವದಾದ್ಯಂತ ಬರೋಬ್ಬರಿ 12,000ಕ್ಕೂ ಅಧಿಕ ಸ್ಕ್ರೀನ್ಗಳಲ್ಲಿ ಹಾಗು ಭಾರತದಲ್ಲೇ 4,500 ರಿಂದ 5,000 ಸ್ಕ್ರೀನ್ ಲಗ್ಗೆ ಇಟ್ಟಿರುವ ಟಾಕ್ಸಿಕ್ ಪ್ರತಿಯೊಂದು ಹೆಜ್ಜೆಯಲ್ಲೂ ಪ್ರೇಕ್ಷಕರಿಗೆ ಕಣ್ಣುಕೋರೈಸುವ ಥ್ರಿಲ್ ನೀಡಿದೆ. ಯಶ್ swag ಹಾಗೂ ಮಾಸ್ ಲುಕ್ ಇಡೀ ಬೆಳ್ಳಿಪರದೆಗೆ ಬೆಂಕಿ ಹಚ್ಚಿದ್ದು, ಪ್ರೇಕ್ಷಕರು ಸ್ಕ್ರೀನ್ ನೋಡಿ ಹುಚ್ಚೆದ್ದು ಕುಣಿಯುತ್ತಿದ್ದಾರೆ.
ಸ್ಯಾಂಡಲ್ವುಡ್ನ ಇತಿಹಾಸದಲ್ಲೇ ಪ್ರಥಮ ಬಾರಿಗೆ ಬೆಂಗಳೂರಿನ ಗಾಂಧಿನಗರದ ನಾಲ್ಕು ಪ್ರಮುಖ ಚಿತ್ರಮಂದಿರಗಳಲ್ಲಿ ಒಟ್ಟಿಗೆ ಟಾಕ್ಸಿಕ್ ಬಿಡುಗಡೆಯಾಗಿ ಇತಿಹಾಸ ಬರೆದಿದೆ. ಸಂತೋಷ್ ಥಿಯೇಟರ್ನಲ್ಲಿ ಬೆಳಗಿನ ಜಾವ 6 ಗಂಟೆಯ ಶೋಗೆ ಆಗಮಿಸಿದ ಅಭಿಮಾನಿಗಳು ತಮಟೆ ನಾದಕ್ಕೆ ಭರ್ಜರಿ ಸ್ಟೆಪ್ಸ್ ಹಾಕಿ ಹಬ್ಬದ ವಾತಾವರಣ ಸೃಷ್ಟಿಸಿದ್ರು. ವಿಶೇಷವೆಂದರೆ, ರಾಕಿಂಗ್ ಸ್ಟಾರ್ಗೆ ಸಾಥ್ ನೀಡಲು ಕಿಚ್ಚ ಸುದೀಪ್ ಹಾಗೂ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಫ್ಯಾನ್ಸ್ ಕೂಡ ಥಿಯೇಟರ್ಗೆ ಆಗಮಿಸಿ ಫಸ್ಟ್ ಡೇ ಫಸ್ಟ್ ಶೋ ನೋಡಿ ಸಂಭ್ರಮಿಸಿದ್ದು ಕನ್ನಡಿಗರ ಒಗ್ಗಟ್ಟಿಗೆ ಸಾಕ್ಷಿಯಾಯಿತು.
ಕೇವಲ ಗಾಂಧಿನಗರ ಮಾತ್ರವಲ್ಲ, ಮಾಗಡಿ ರಸ್ತೆಯ ಪ್ರಸನ್ನ ಹಾಗೂ ನವರಂಗ್ ಥಿಯೇಟರ್ಗಳಲ್ಲೂ ಟಾಕ್ಸಿಕ್ ಕ್ರೇಜ್ ಮುಗಿಲು ಮುಟ್ಟಿತ್ತು. ಯಶ್ ಕಟೌಟ್ಗಳಿಗೆ ಬಣ್ಣ ಬಣ್ಣದ ಹೂವಿನ ಹಾರ ಹಾಕಿ, ಪಟಾಕಿ ಸಿಡಿಸಿ ಅಭಿಮಾನಿಗಳು ಸೆಲೆಬ್ರೇಷನ್ಗೆ ಚಾಲನೆ ನೀಡಿದ್ರು. 6 ಗಂಟೆಯ ಮೊದಲ ಶೋ ಮುಗಿಸಿ ಹೊರಬಂದ ಪ್ರೇಕ್ಷಕರು ರಾಯನ ಆಕ್ಷನ್ ಅವತಾರಕ್ಕೆ ಏನು ಹೇಳಿದ್ರು ನೀವೇ ನೋಡಿ.
- ‘ಟಾಕ್ಸಿಕ್’ ನೋಡಿದ ಫ್ಯಾನ್ಸ್ ಏನಂದ್ರು ಗೊತ್ತಾ..?!
- ರಾಯನ ಆ್ಯಕ್ಷನ್ಗೆ ಪ್ರೇಕ್ಷಕರಿಂದ ಫುಲ್ ಮಾರ್ಕ್ಸ್
ಬೆಂಗಳೂರು ಮಾತ್ರವಲ್ಲದೆ ಮಂಗಳೂರು, ಮೈಸೂರು, ಹುಬ್ಬಳ್ಳಿ, ದಾವಣಗೆರೆ ಸೇರಿದಂತೆ ಕರ್ನಾಟಕದಾದ್ಯಂತ ಟಾಕ್ಸಿಕ್ ಆರ್ಭಟ ಜೋರಾಗಿದೆ. ಇಂದು ಮತ್ತು ನಾಳೆಯ ಎಲ್ಲಾ ಶೋಗಳು ಈಗಾಗಲೇ ಕಂಪ್ಲೀಟ್ ಹೌಸ್ಫುಲ್ ಆಗಿದ್ದು, ಈ ಹಿಂದೆ ಬಿಡುಗಡೆಯಾಗಿದ್ದ ಬಾಹುಬಲಿ 2 ಹಾಗೂ ಧುರಂಧರ್ 2 ಸಿನಿಮಾಗಳ ಓಪನಿಂಗ್ ಶೋ ದಾಖಲೆಗಳನ್ನು ಟಾಕ್ಸಿಕ್ ಸುಲಭವಾಗಿ ಪುಡಿಪುಡಿ ಮಾಡಿದೆ.
ಕಲೆಕ್ಷನ್ ವಿಚಾರದಲ್ಲಿ ಟಾಕ್ಸಿಕ್ ಹೊಸ ಅಧ್ಯಾಯವನ್ನೇ ಬರೆದಿದೆ. ಮೊದಲ ದಿನವೇ ಕರ್ನಾಟಕದಲ್ಲಿ ಬರೋಬ್ಬರಿ 27 ಕೋಟಿ, ಕೇವಲ ಬೆಂಗಳೂರು ನಗರ ಒಂದರಲ್ಲೇ ₹22 ಕೋಟಿ ಗಳಿಸಿದೆ. ಹಿಂದಿ ಬೆಲ್ಟ್ನಲ್ಲಿ 18 ಕೋಟಿ, ತೆಲುಗಿನಲ್ಲಿ 7 ಕೋಟಿ, ತಮಿಳಿನಲ್ಲಿ 2 ಕೋಟಿ ಹಾಗೂ ಮಲಯಾಳಂನಲ್ಲಿ 25 ಲಕ್ಷ ಸೇರಿ ಭಾರತದಾದ್ಯಂತ ಒಟ್ಟು 57 ಕೋಟಿ ನೆಟ್ ಕಲೆಕ್ಷನ್ ಮಾಡಿದೆ. ಇನ್ನು ಓವರ್ಸೀಸ್ ಮಾರುಕಟ್ಟೆಯ ಅಧಿಕೃತ ರಿಪೋರ್ಟ್ ಬರಬೇಕಿದ್ದರೂ, ಜಾಗತಿಕವಾಗಿ ಮೊದಲ ದಿನವೇ ಭರ್ಜರಿ 110 ಕೋಟಿ ಗ್ರಾಸ್ ಕಲೆಕ್ಷನ್ ಮಾಡುವ ಮೂಲಕ ಯಶ್ ತಮ್ಮ ಸಾಮರ್ಥ್ಯವನ್ನ ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ.
ಸಿನಿಮಾ ನೋಡಿದ ಪ್ರೇಕ್ಷಕರು ಚಿತ್ರಕ್ಕೆ ಫುಲ್ ಮಾರ್ಕ್ಸ್ ನೀಡಿದ್ದಾರೆ. ಕೆಲವೆಡೆ ಮಿಶ್ರಪ್ರತಿಕ್ರಿಯೆ ಕೇಳಿಬಂದರೂ, ಬಾಕ್ಸ್ ಆಫೀಸ್ನಲ್ಲಿ ಮಾತ್ರ ರಾಯನ ಓಟವನ್ನು ತಡೆಯಲು ಯಾರಿಂದಲೂ ಸಾಧ್ಯವಾಗುತ್ತಿಲ್ಲ. ಕೆಜಿಎಫ್ ಸರಣಿಯ ನಂತರ ಕನ್ನಡದ ನಟನೊಬ್ಬ ವಿಶ್ವಮಟ್ಟದಲ್ಲಿ ಪ್ಯಾನ್-ವರ್ಲ್ಡ್ ಸೂಪರ್ ಸ್ಟಾರ್ ಆಗಿ ಹೊರಹೊಮ್ಮಿ, ಭಾರತೀಯ ಚಿತ್ರರಂಗ ಹೆಮ್ಮೆಪಡುವಂತಹ ಮತ್ತೊಂದು ಸಾರ್ವಕಾಲಿಕ ಹಿಟ್ ಸಿನಿಮಾ ನೀಡಿದ್ದಾರೆ ಎಂದು ದೇಶಾದ್ಯಂತ ಸಿನಿಪ್ರಿಯರು ಮುಕ್ತಕಂಠದಿಂದ ಶ್ಲಾಘಿಸುತ್ತಿದ್ದಾರೆ.
ಕೀರ್ತಿ ಪಾಟೀಲ್, ಫಿಲ್ಮ್ ಬ್ಯೂರೋ, ಗ್ಯಾರಂಟಿ ನ್ಯೂಸ್
