ಸ್ಯಾಂಡಲ್‌ವುಡ್ ಲೇಡಿ ಸೂಪರ್ ಸ್ಟಾರ್ ರಚಿತಾ ರಾಮ್ ಸಿನಿ ಕರಿಯರ್ಗೆ ಬರೋಬ್ಬರಿ 12 ವರ್ಷ. ಕಿರುತೆರೆ ಹಾಗೂ ಬೆಳ್ಳಿತೆರೆ ಎರಡರಲ್ಲೂ ಸಿಕ್ಕಾಪಟ್ಟೆ ಬ್ಯುಸಿ ಇರೋ ಡಿಂಪಲ್ ಕ್ವೀನ್‌ಗೆ ಡೈಮಂಡ್ ಕಿರೀಟ ತೊಡಿಸಿ ಸಂಭ್ರಮಿಸಲಾಗಿದೆ. ಅದಕ್ಕಿಂತ ಹೆಚ್ಚಾಗಿ ಡಿಬಾಸ್ ದರ್ಶನ್, ಬುಲ್ ಬುಲ್ ಬೆಡಗಿಗೆ ತುಂಬು ಹೃದಯದಿಂದ ಶುಭ ಕೋರಿದ್ದಾರೆ.
- ರಚ್ಚು ಕರಿಯರ್ಗೆ 12 ವರ್ಷ.. ದಚ್ಚು ಹರುಷ..!!
- ಬುಲ್ ಬುಲ್ ಹುಡ್ಗಿಗೆ ಗಾಡ್‌ಫಾದರ್ ಡಿಬಾಸ್
- ಡಿಂಪಲ್ ಕ್ವೀನ್‌ಗೆ ಕಿರೀಟ ತೊಡಿಸಿದ ಕ್ರೇಜಿಸ್ಟಾರ್
- ಕನ್ನಡದ ಲೇಡಿ ಸೂಪರ್ ಸ್ಟಾರ್ ರಚಿತಾ ಮಿಂಚು
ಬೆಂಕಿಯಲ್ಲಿ ಅರಳಿದ ಹೂವು ಹಾಗೂ ಅರಸಿ ಸೀರಿಯಲ್‌‌ಗಳಲ್ಲಿ ಬಣ್ಣ ಹಚ್ಚಿದ್ದ ಬಿಂದ್ಯಾ ರಾಮ್‌‌‌ಗೆ ರಚಿತಾ ರಾಮ್ ಅಂತ ಹೆಸರು ಬದಲಿಸಿ, ಬೆಳ್ಳಿತೆರೆಗೆ ಪರಿಚಯಿಸಿದ್ದು ಡಿಬಾಸ್ ದರ್ಶನ್. ಹೌದು.. ತಮ್ಮದೇ ಹೋಮ್ ಬ್ಯಾನರ್‌‌ನಡಿ ದರ್ಶನ್ ಅವರು ನಟಿಸಿ, ನಿರ್ಮಿಸಿದ ಬುಲ್‌ಬುಲ್ ಸಿನಿಮಾದ ಮೂಲಕ ರಚಿತಾ ಸ್ಯಾಂಡಲ್‌ವುಡ್‌‌ನಲ್ಲಿ ಸಿನಿಯಾನ ಶುಭಾರಂಭಿಸಿದ್ದರು.
ಚೊಚ್ಚಲ ಚಿತ್ರದಲ್ಲೇ ಚಾಲೆಂಜಿಂಗ್ ಸ್ಟಾರ್ ಹಾಗೂ ರೆಬೆಲ್ ಸ್ಟಾರ್ ಅಂಬರೀಶ್ ಅಂತಹ ಬಿಗ್ ಸ್ಟಾರ್ಸ್‌ ಜೊತೆ ತೆರೆಹಂಚಿಕೊಂಡ ರಚಿತಾ, ಭವಿಷ್ಯದ ಭರವಸೆಯ ಅಭಿನೇತ್ರಿ ಅನ್ನೋ ಲಕ್ಷಣ ತೋರಿದ್ದರು. ಅದ್ರಂತೆ ಸ್ಯಾಂಡಲ್ವುಡ್ನ ಆಳುವಂತಹ ಯುವ ಪೀಳಿಗೆಯ ದಿ ಬೆಸ್ಟ್ ಹೀರೋಯಿನ್ ಆಗಿ ಗುರ್ತಿಸಿಕೊಂಡರು.
ದರ್ಶನ್, ಸುದೀಪ್, ಶಿವರಾಜ್‌ಕುಮಾರ್, ಪುನೀತ್ ರಾಜ್‌ಕುಮಾರ್, ಉಪೇಂದ್ರ, ಗಣೇಶ್, ದುನಿಯಾ ವಿಜಯ್, ಶ್ರೀಮುರಳಿ, ಧ್ರುವ ಸರ್ಜಾ, ರಮೇಶ್ ಅರವಿಂದ್, ಡಾಲಿ, ಪ್ರಜ್ವಲ್ ದೇವರಾಜ್, ಶ್ರೀನಗರ ಕಿಟ್ಟಿ, ನೀನಾಸಂ ಸತೀಶ್.. ಹೀಗೆ ಬಹುತೇಕ ಎಲ್ಲಾ ಸ್ಟಾರ್ಸ್‌ ಜೊತೆ ಸ್ಕ್ರೀನ್ ಶೇರ್ ಮಾಡಿದ್ದಾರೆ ರಚಿತಾ ರಾಮ್. ಮಾಡಿದ ಬಹುತೇಕ ಎಲ್ಲಾ ಸಿನಿಮಾಗಳು ಬ್ಲಾಕ್ ಬಸ್ಟರ್ ಹಿಟ್.
ಅದರಲ್ಲೂ ದಚ್ಚು-ರಚ್ಚು ಕಾಂಬೋ ಬೆಸ್ಟ್ ಕಾಂಬಿನೇಷನ್ ಆಗಿ ಹೊರಹೊಮ್ಮಿತ್ತು. ಬುಲ್ ಬುಲ್ ಸಿನಿಮಾದ ಬಳಿಕ ಅಂಬರೀಶ, ಜಗ್ಗುದಾದಾ, ಕ್ರಾಂತಿ ಹೀಗೆ ಸಾಕಷ್ಟು ಸಿನಿಮಾಗಳಲ್ಲಿ ದರ್ಶನ್ ಜೊತೆ ನಟಿಸೋ ಮೂಲಕ ರಚ್ಚು ರಂಗೇರಿಸಿದ್ದರು. ಇಂದಿಗೂ ತನ್ನ ಸಿನಿಯಾನದ ಬಗ್ಗೆ ರಚಿತಾಗೆ ಬಹಳ ಹೆಮ್ಮೆ ಇದೆ. ಅಷ್ಟೇ ಅಲ್ಲ, ತನ್ನ ಮೆಂಟರ್, ಗುರು ದರ್ಶನ್ ಅಂದ್ರೆ ಆಕೆಗೆ ಪಂಚಪ್ರಾಣ.
ಸದ್ಯ ಸ್ಯಾಂಡಲ್ವುಡ್ನ ಲೇಡಿ ಸೂಪರ್ ಸ್ಟಾರ್ ಆಗಿ ಧೂಳೆಬ್ಬಿಸ್ತಿರೋ ರಚಿತಾ ರಾಮ್ ಸಿನಿಕರಿಯರ್‌ಗೆ ಬರೋಬ್ಬರಿ 12 ವರ್ಷಗಳಾಗಿದೆ. ಕಿರುತೆರೆಯಲ್ಲೂ ಬ್ಯುಸಿ ಇರೋ ರಚಿತಾ ಒಂದಷ್ಟು ಕಾರ್ಯಕ್ರಮಗಳಿಗೆ ಜಡ್ಜ್ ಆಗಿಯೂ ಕಾರ್ಯ ನಿರ್ವಹಿಸುತ್ತಿದ್ದಾರೆ.
ಭರ್ಜರಿ ಬ್ಯಾಚುಲರ್ಸ್‌ ವೇದಿಕೆಯಲ್ಲಿ ಆಕೆಯ ಯಶಸ್ವಿ 12 ವರ್ಷಗಳ ಜರ್ನಿಯನ್ನ ಅವಿಸ್ಮರಣೀಯವಾಗಿ ಸೆಲೆಬ್ರೇಟ್ ಮಾಡಲಾಗಿದೆ. ಅಲ್ಲಿ ಡಿಂಪಲ್ ಕ್ವೀನ್‌ಗೆ ಡೈಮಂಡ್ ಕಿರೀಟ ಹಾಕೋ ಮೂಲಕ ಸೆಲೆಬ್ರೇಷನ್ ದುಪ್ಪಟ್ಟು ಮಾಡಿದ್ದಾರೆ ಕ್ರೇಜಿಸ್ಟಾರ್ ರವಿಚಂದ್ರನ್.
ವಿಶೇಷ ಅಂದ್ರೆ ರಚಿತಾ ಮೆಂಟರ್ ಡಿಬಾಸ್ ದರ್ಶನ್ ಕೂಡ ಶುಭ ಕೋರಿದ್ದಾರೆ. ಹೌದು.. ಆಡಿಯೋ ಮೂಲಕ ಅಭಿನಂದನೆ ಸಲ್ಲಿಸಿರೋ ದರ್ಶನ್, ನಮ್ಮ ಬುಲ್ ಬುಲ್ ಇದೇ ತರ ಹೆಚ್ಚು ರಂಜಿಸ್ತಾ ಇರಲಿ ಎಂದಿದ್ದಾರೆ. ದಚ್ಚು ವಾಯ್ಸ್ ರಚ್ಚು ಕಿವಿಗೆ ಬೀಳ್ತಿದ್ದಂತೆ ರಚಿತಾ ಅಕ್ಷರಶಃ ಪುಳಕಿತರಾಗಿದ್ದಾರೆ. ಇದನ್ನೇ ಅಲ್ಲವೇ ಗುರು-ಶಿಷ್ಯರ ಅನುಬಂಧ ಅನ್ನೋದು. ಅದೇನೇ ಇರಲಿ, ರಚಿತಾ ಸಿನಿಯಾನ ಮತ್ತಷ್ಟು ಕಲರ್‌ಫುಲ್ ಆಗಿರಲಿ ಅಂತ ಹಾರೈಸೋಣ.
