ಪೇಟ್ರಿಯಾಟ್‌ನಲ್ಲಿ ಮಮ್ಮುಟ್ಟಿ..ಮೋಹನ್ ಲಾಲ್ ಆರ್ಭಟ

ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್

ಮಾಲಿವುಡ್​ ಇಬ್ಬರು ಸ್ಟಾರ್ಸ್​ ಮಮ್ಮುಟ್ಟಿ ಮತ್ತು ಮೋಹನ್ ಲಾಲ್ ನಟನೆಯ ಬಹುನಿರೀಕ್ಷಿತ ಮಲಯಾಳಂ ಸ್ಪೈ ಥ್ರಿಲ್ಲರ್ ‘ಪೇಟ್ರಿಯಾಟ್’ ಚಿತ್ರದ ರಿಲೀಸ್​ಗೆ ಸಂಕಷ್ಟ ಎದುರಾಗಿದೆ. ಸದ್ಯ ಚಿತ್ರದ ಟ್ರೈಲರ್ ರಿಲೀಸ್ ಆಗಿದ್ದು, ಮತ್ತೊಂದು ಶಾಕಿಂಗ್ ವಿಚಾರ ಕೂಡ ರೀವಿಲ್ ಆಗಿದೆ. ಈ ಸುದ್ದಿ ಕೇಳಿ ಇಬ್ಬರು ದಿಗ್ಗಜರ ಅಭಿಮಾನಿಗಳು ಬೇಸರಗೊಂಡಿದ್ದಾರೆ. ಅದೇನು ಅಂತ ತಿಳಿದುಕೊಳ್ಳಬೇಕಾ ಹಾಗಾದ್ರೆ ಈ ಸ್ಟೋರಿ ನೋಡಿ.

• ಪೇಟ್ರಿಯಾಟ್ ನಲ್ಲಿ ಮಮ್ಮುಟ್ಟಿ-ಮೋಹನ್ ಲಾಲ್ ಆರ್ಭಟ
• ಸಿನಿಮಾ ರಿಲೀಸ್‌ಗೆ ವಿಘ್ನ, ಪೇಟ್ರಿಯಾಟ್ ಪೋಸ್ಟ್​ಪೋನ್..!
• ಕೇರಳದ ಚಿತ್ರಮಂದಿರಗಳ ಮಾಲೀಕರ ಸಂಘದಿಂದ ಕಿರಿಕ್..!
• ಶೀಘ್ರದಲ್ಲೇ ಹೊಸ ರಿಲೀಸ್​ ಡೇಟ್​ ಅನೌನ್ಸ್, ಫ್ಯಾನ್ಸ್‌‌ ನಿರಾಸೆ!

ಮಲಯಾಳಂ ಚಿತ್ರರಂಗದ ಇಬ್ಬರು ಸುಲ್ತಾನರಾದ ಮಮ್ಮೂಟ್ಟಿ ಮತ್ತು ಮೋಹನ್ ಲಾಲ್ ಅವರನ್ನು ಒಂದೇ ಸ್ಕ್ರೀನ್ ಮೇಲೆ ನೋಡಲು ಕಾಯುತ್ತಿದ್ದ ಅಭಿಮಾನಿಗಳಿಗೆ ಹಬ್ಬದ ಸುದ್ದಿ ಸಿಕ್ಕಿದೆ. ಬರೋಬ್ಬರಿ ಹತ್ತು ವರ್ಷಗಳ ನಂತರ ಈ ಲೆಜೆಂಡ್‌ಗಳು ‘ಪೇಟ್ರಿಯಾಟ್’ ಸ್ಪೈ ಆಕ್ಷನ್ ಥ್ರಿಲ್ಲರ್ ಮೂಲಕ ಬೆಂಕಿ ಹಚ್ಚಲು ಬಂದಿದ್ದಾರೆ. ಸದ್ಯ ಚಿತ್ರದ ಟ್ರೈಲರ್ ಬಿಡುಗಡೆ ಆಗಿದ್ದು, ಈ ಟ್ರೈಲರ್‌ನ ಅತಿದೊಡ್ಡ ಪ್ಲಸ್ ಪಾಯಿಂಟ್ ಎಂದರೆ ಮಮ್ಮೂಟ್ಟಿ ಮತ್ತು ಮೋಹನ್ ಲಾಲ್ ಅವರ ಸ್ಕ್ರೀನ್ ಪ್ರೆಸೆನ್ಸ್.

ಹತ್ತು ವರ್ಷಗಳ ನಂತರ ಇವರನ್ನು ಒಟ್ಟಿಗೆ ನೋಡುವುದೇ ಒಂದು ಹಬ್ಬ. ಮಮ್ಮೂಟ್ಟಿ ಅವರು ಡಾ. ಡೇನಿಯಲ್ ಜೇಮ್ಸ್ ಆಗಿ  ಕರ್ನಲ್ ರಹೀಮ್ ನಾಯಕ್ ಆಗಿ ಮೋಹನ್ ಲಾಲ್ ಅವರ ಎಂಟ್ರಿ ಅಭಿಮಾನಿಗಳಲ್ಲಿ ರೋಮಾಂಚನ ಮೂಡಿಸಿದೆ. ಇವರಿಬ್ಬರ ನಡುವಿನ ಗೆಳೆತನ ಮತ್ತು ಆಕ್ಷನ್ ಸೀನ್‌ಗಳು ಚಿತ್ರದ ಮೇಲಿನ ನಿರೀಕ್ಷೆಯನ್ನು ದುಪ್ಪಟ್ಟುಗೊಳಿಸಿವೆ. ನಿರ್ದೇಶಕ ಮಹೇಶ್ ನಾರಾಯಣನ್ ಅವರ ಶ್ರಮ ಟ್ರೈಲರ್‌ನ ಪ್ರತಿ ಫ್ರೇಮ್‌ನಲ್ಲೂ ಎದ್ದು ಕಾಣುತ್ತದೆ. ಕೇವಲ ಸಾಧಾರಣ ಆಕ್ಷನ್ ಸಿನಿಮಾ ಮಾತ್ರವಲ್ಲದೆ, ‘ಸರ್ವೈಲೆನ್ಸ್’ ಮತ್ತು ಡಿಜಿಟಲ್ ಯುಗದ ಅಪಾಯಗಳ ಬಗ್ಗೆ ಒಂದು ಗಂಭೀರ ಚರ್ಚೆಯನ್ನು ಈ ಸಿನಿಮಾ ಮಾಡಲಿದೆ ಎಂಬುದು ಟ್ರೈಲರ್‌ನಿಂದ ಸ್ಪಷ್ಟವಾಗುತ್ತದೆ.

ಅಂದ ಹಾಗೆ ‘ಪೇಟ್ರಿಯಾಟ್’ ಚಿತ್ರದ ರಿಲೀಸ್​ಗೆ ಈಗ ಸಂಕಷ್ಟ ಎದುರಾಗಿದೆ. ಏಪ್ರಿಲ್​ 23ಕ್ಕೆ ರಿಲೀಸ್​ ಆಗಬೇಕಿದ ಈ ಸಿನಿಮಾ ಇದೀಗ ಪೋಸ್ಟ್​ಪೋನ್​ ಆಗಿದೆ.. ಸದ್ಯ ಈ ಸುದ್ದಿ ಕೇಳಿ ಇಬ್ಬರು ದಿಗ್ಗಜರ ಅಭಿಮಾನಿಗಳು ಬೇಸರಗೊಂಡಿದ್ದಾರೆ. ಚಿತ್ರದ ನಿರ್ಮಾಪಕರು ಮತ್ತು ಚಿತ್ರಮಂದಿರಗಳ ಮಾಲೀಕರ ನಡುವೆ ಲಾಭ ಹಂಚಿಕೆ ವಿಚಾರವಾಗಿ ಉಂಟಾಗಿರುವ ಬಿಕ್ಕಟ್ಟಿನಿಂದ ಸಿನಿಮಾದ ರಿಲೀಸ್​ ವಿಳಂಬವಾಗಿದೆ.

ಈ ವಿವಾದದ ಹಿಂದೆ ದೊಡ್ಡ ಹಗ್ಗಜಗ್ಗಾಟವೇ ನಡೆಯುತ್ತಿದೆ. ಆಂಟೋ ಜೋಸೆಫ್ ಮತ್ತು ಕೆ.ಜಿ. ಅನಿಲ್ ಕುಮಾರ್ ನಿರ್ಮಾಣದ ಈ ಚಿತ್ರದ ಆದಾಯ ಹಂಚಿಕೆ ಮತ್ತು ವಿತರಕರ ಕಠಿಣ ನಿಯಮಗಳ ಬಗ್ಗೆ ಸಿಂಗಲ್ ಸ್ಕ್ರೀನ್ ಮಾಲೀಕರು ರೆಕ್ಕೆ ಬಿಚ್ಚಿದ್ದಾರೆ. ಅಷ್ಟೇ ಅಲ್ಲ, ಕೆಲವು ಚಿತ್ರಮಂದಿರಗಳವರು ಈ ಚಿತ್ರವನ್ನು ‘ಬ್ಲ್ಯಾಕ್‌ಲಿಸ್ಟ್’ ಮಾಡುವ ಎಚ್ಚರಿಕೆಯನ್ನೂ ನೀಡಿದ್ದಾರೆ ಎನ್ನಲಾಗುತ್ತಿದೆ. ಕೇರಳ ಚಿತ್ರರಂಗದಲ್ಲಿ ಇಂತಹ ಬಿಕ್ಕಟ್ಟುಗಳು ಆಗಾಗ ಮರುಕಳಿಸುತ್ತಿದ್ದರೂ, ಮಮ್ಮುಟ್ಟಿ, ಮೋಹನ್ ಲಾಲ್ ಜೊತೆಗೆ ಫಹಾದ್ ಫಾಸಿಲ್, ಕುಂಚಾಕೊ ಬೋಬನ್, ನಯನತಾರಾ ಮತ್ತು ರೇವತಿ ಅವರಂತಹ ದೊಡ್ಡ  ತಾರಾಬಳಗವಿರುವ ಸಿನಿಮಾಗೆ ಇಂತಹ ಅಗ್ನಿಪರೀಕ್ಷೆ ಎದುರಾಗಿರುವುದು ದೊಡ್ಡ ಚರ್ಚೆಗೆ ಗ್ರಾಸವಾಗಿದೆ.

ಸದ್ಯಕ್ಕೆ ಏಪ್ರಿಲ್ 23ರ ಬಿಡುಗಡೆಯನ್ನು ಅಧಿಕೃತವಾಗಿ ಮುಂದೂಡಲಾಗಿದ್ದು, ಚಿತ್ರತಂಡ ಈಗ ಸಂಧಾನದ ಹಾದಿಯಲ್ಲಿದೆ. ಮಮ್ಮೂಟ್ಟಿ, ಮೋಹನ್ ಲಾಲ್ ಜೊತೆಗೆ ಫಹಾದ್ ಫಾಸಿಲ್, ನಯನತಾರಾ ಅಂತಹ ಸ್ಟಾರ್‌ಗಳೇ ಇರುವ ಕಾರಣ ಈ ಬಿಕ್ಕಟ್ಟು ಶೀಘ್ರದಲ್ಲೇ ಶಮನವಾಗುವ ಭರವಸೆ ಇದೆ. ಶೀಘ್ರದಲ್ಲೇ ಹೊಸ ರಿಲೀಸ್ ಡೇಟ್ ಅನ್ನು ಸ್ವತಃ ಮಮ್ಮೂಟ್ಟಿ ಮತ್ತು ಮೋಹನ್ ಲಾಲ್ ಅವರ ಸೋಶಿಯಲ್ ಮೀಡಿಯಾ ಖಾತೆಗಳ ಮೂಲಕ ಅನೌನ್ಸ್ ಮಾಡಲಿದ್ದು, ಅಭಿಮಾನಿಗಳು ಈಗ “ಲೆಜೆಂಡ್‌ಗಳ ದರ್ಶನ ಯಾವಾಗ?” ಎಂದು ಕಾತರದಿಂದ ಕಾಯುತ್ತಿದ್ದಾರೆ.