ಈ ವಾರ ಆಪರೇಷನ್ ಲಂಡನ್ ಕೆಫೆ ಸಿನಿಮಾ ಬಿಡುಗಡೆ

ಫಿಲ್ಮ್ ಬ್ಯೂರೋ, ಗ್ಯಾರಂಟಿ ನ್ಯೂಸ್

ಜೊತೆ ಜೊತೆಯಲಿ ಸೀರಿಯಲ್ ಖ್ಯಾತಿಯ ಮೇಘಾ ಶೆಟ್ಟಿ ನಟನೆಯ ಆಪರೇಷನ್ ಲಂಡನ್ ಕೆಫೆ ಈ ವಾರ ತೆರೆಗಪ್ಪಳಿಸುತ್ತಿದೆ. ಕನ್ನಡದ ಜೊತೆ ಮರಾಠಿಯಲ್ಲೂ ಸಿನಿಮಾ ಬಿಡುಗಡೆ ಆಗಲಿದ್ದು, ಧಾರವಾಡದಲ್ಲಿ ಚಿತ್ರದ ಪ್ರಮೋಷನ್ಸ್ ಜೋರಾಗಿ ನಡೆದಿದೆ. ಅದ್ರ ಝಲಕ್ ಹೇಗಿತ್ತು ಅಂತಾ ಹೇಳ್ತೀವಿ ಈ ಸ್ಟೋರಿ ನೋಡಿ.

ಆಪರೇಷನ್ ಲಂಡನ್ ಕೆಫೆ.. ಈ ವಾರ ತೆರೆಗೆ ಬರ್ತಿರೋ ಕನ್ನಡದ ನಿರೀಕ್ಷಿತ ಸಿನಿಮಾ ಇದು. ಚಿತ್ರದ ನಾಯಕನಟ ಕವೀಶ್ ಶೆಟ್ಟಿ ಧಾರವಾಡಕ್ಕೆ ಭೇಟಿ ನೀಡಿ, ನಗರದ ಓಝೋನ್ ಹೋಟೆಲ್‌‌‌ನಲ್ಲಿ ಸಿನಿಮಾದ ಸುದ್ದಿಗೋಷ್ಠಿ ನಡೆಸಿದರು. ಇದೇ ನವೆಂಬರ್ 28ರಂದು ಸಿನಿಮಾ ಬಿಡುಗಡೆ ಹಿನ್ನೆಲೆ ಇಡೀ ಚಿತ್ರತಂಡ ಸಿನಿಮಾ ಪ್ರಚಾರಕ್ಕೆ ಧಾರವಾಡಕ್ಕೆ ಆಗಮಿಸಿತ್ತು. ಮಿಲಿಟರಿ ಮತ್ತು ನಕ್ಸಲ್ ಬ್ಯಾಗ್ರೌಂಡ್ ಕಥೆಯ ಈ ಚಿತ್ರದ ಸ್ಯಾಂಪಲ್ಸ್ ಭರವಸೆ ಮೂಡಿಸಿವೆ.

ಆಕ್ಷನ್, ಡ್ರಾಮಾ, ಸಸ್ಪೆನ್ಸ್, ಥ್ರಿಲ್ಲರ್ ಸೇರಿದಂತೆ ಎಲ್ಲಾ ಕಮರ್ಷಿಯಲ್ ಅಂಶಗಳಿಂದ ಕೂಡಿರೋ ಲವ್ ಸ್ಟೋರಿ ಇದಾಗಲಿದೆ. ಆ್ಯಕ್ಷನ್ ಸೇರಿ ಲವ್ ಸ್ಟೋರಿ ಮೇಲೆ ಈ ಬಾರಿ ಫೋಕಸ್ ಮಾಡಿರೋ ಕವೀಶ್, 7 ಭರ್ಜರಿ ಫೈಟ್ಸ್‌‌ನಿಂದ ನೋಡುಗರನ್ನ ರಂಜಿಸಲಿದ್ದಾರಂತೆ. ಕನ್ನಡ ಹಾಗೂ ಮರಾಠಿ ಭಾಷೆಯಲ್ಲಿ ಏಕಕಾಲಕ್ಕೆ ಶೂಟಿಂಗ್ ಆಗಿದ್ದು, ಮೊದಲು ಕರ್ನಾಟಕದಲ್ಲಿ ರಿಲೀಸ್ ಆಗಲಿದೆ. ನಂತ್ರ ಮರಾಠಿಯಲ್ಲಿ ಸಿನಿಮಾ ತೆರೆಗೆ ಬರಲಿದೆ.

ಸಿನಿಮಾದಲ್ಲಿ ಜೊತೆ ಜೊತೆಯಲಿ ಖ್ಯಾತಿಯ ಮೇಘಾ ಶೆಟ್ಟಿ ಸೇರಿದಂತೆ ತುಳುನಾಡಿನ ಹಲವಾರು ಕಲಾವಿದರು ಬಣ್ಣ ಹಚ್ಚಿದ್ದಾರೆ. ಧಾರವಾಡ ಜಿಲ್ಲೆಯ 3 ಜನ ಕಲಾವಿದರು ಈ ಸಿನಿಮಾದಲ್ಲಿ ನಟಿಸಿರೋದು ಇಂಟರೆಸ್ಟಿಂಗ್. ಸಡಗರ ರಾಘವೇಂದ್ರ ನಿರ್ದೇಶನದ ಈ ಸಿನಿಮಾ ಮೇಕಿಂಗ್‌ನಿಂದ ಸಿನಿಮಾ ಮೇಲಿನ ಕುತೂಹಲ ಹೆಚ್ಚಿಸಿದೆ.