ಕೈಯಲ್ಲಿ ಮೊಬೈಲ್ ಹಿಡಿದು ಜಗತ್ತನ್ನೇ ಮರೆಯುತ್ತಿರೋ ಇಂದಿನ ಯುವ ಪೀಳಿಗೆಗೆ ಬಿಸಿ ಮುಟ್ಟಿಸಲು ಡೈರೆಕ್ಟರ್ ಸಿಂಪಲ್ ಸುನಿ ಒಂದು ವಿನೂತನ ಅಸ್ತ್ರದೊಂದಿಗೆ ಬರ್ತಿದ್ದಾರೆ. ಯೆಸ್.. ಗ್ರಾಫಿಕ್ಸ್, ಗಿಮಿಕ್‌‌‌ಗಳಿಗೆ ಗುಡ್‌ಬೈ ಹೇಳಿ, ಭಾರತೀಯ ಚಿತ್ರರಂಗದಲ್ಲೇ ಮೊದಲ ಬಾರಿಗೆ ನೈಜ ಹ್ಯೂಮನಾಯ್ಡ್ ರೋಬೋಟ್ ಕಣಕ್ಕಿಳಿಸ್ತಿದ್ದಾರೆ. ಈ ವಾರ ಲಂಬೋದರ 2.0 ತೆರೆಗೆ ಬರ್ತಿದ್ದು.. ಐದು ದಿನ ಮೊದಲೇ ಆನ್‌ಲೈನ್ ಅಡ್ವಾನ್ಸ್ ಬುಕ್ಕಿಂಗ್ ಶುರುವಾಗಿದೆ.
- ‘ಲಂಬೋದರ 2.O’ ಬುಕ್ಕಿಂಗ್.. ರೋಬೋ-ಸುನಿ ಮ್ಯಾಜಿಕ್
- ಮೊಬೈಲ್ ಹುಚ್ಚಿಗೆ ಬ್ರೇಕ್ ಹಾಕಲು ಬಂತು ಲಂಬೋದರ 2.0
- ಕುನಾಲ್ ಕಪೂರ್ ಎಂಟ್ರಿಯಿಂದ ಚಿತ್ರಕ್ಕೆ ಬಾಲಿವುಡ್ ಕನೆಕ್ಷನ್
- ಪ್ರೀತಿ, ಮಾಸ್, ಸಸ್ಪೆನ್ಸ್ ಮಿಶ್ರಣ.. 5 ಹಾಡುಗಳ ಸಂಗೀತ ಹಬ್ಬ
ಸಿನಿಮಾ ಲೋಕದಲ್ಲಿ ಇದುವರೆಗೆ VFX ಮತ್ತು ಗ್ರಾಫಿಕ್ಸ್ ಮ್ಯಾಜಿಕ್ ನೋಡಿದ್ದ ಪ್ರೇಕ್ಷಕರಿಗೆ ಚಂದನವನ ಈಗ ಅಚ್ಚರಿಯ ಮೆಟ್ಟಿಲು ಹತ್ತಿದೆ. ನಿರ್ದೇಶಕ ಸಿಂಪಲ್ ಸುನಿ ಯಾವುದೇ ಕೃತಕ ಮೇಕಪ್ ಅಥ್ವಾ ಡಿಜಿಟಲ್ CG ಗ್ರಾಫಿಕ್ಸ್ ಇಲ್ಲದೆ, ಬೆಂಗಳೂರು ಮೂಲದ ಮಚಾನಿ ರೋಬೋಟಿಕ್ಸ್ ಅಭಿವೃದ್ಧಿಪಡಿಸಿರುವ ಜಿಯಾ ಹೆಸರಿನ ನೈಜ ಹ್ಯೂಮನಾಯ್ಡ್ ರೋಬೋಟ್‌ಗೆ ಕ್ಯಾಮೆರಾ ಮುಂದೆ ನಟಿಸುವಂತೆ ಮಾಡಿ, ಭಾರತೀಯ ಚಿತ್ರರಂಗದಲ್ಲೇ ಬಿಗ್ ಹಿಸ್ಟರಿ ಕ್ರಿಯೇಟ್ ಮಾಡಿದ್ದಾರೆ. ಟ್ರೈಲರ್ ರಿಲೀಸ್ ಆದ ದಿನದಿಂದ್ಲೂ ಈ ರೋಬೋಟ್ ಎಲ್ಲರ ಹುಬ್ಬೇರಿಸಿದ್ದು, ಚಿತ್ರರಂಗದಲ್ಲಿ ಹೊಸ ಯುಗಾರಂಭವಾದಂತಿದೆ.
ಈ ಚಿತ್ರದ ಮೂಲಕ ಕಥೆಗಾರ ಅನಿಲ್ ಶೆಟ್ಟಿ ನಾಯಕನಟನಾಗಿ ಕನ್ನಡ ಚಿತ್ರರಂಗಕ್ಕೆ ಭರ್ಜರಿ ಎಂಟ್ರಿ ಕೊಟ್ಟಿದ್ದಾರೆ. ಇದುವರೆಗೆ ಬೇರೆಯವರ ಕಥೆಗೆ ಆ್ಯಕ್ಷನ್ ಕಟ್ ಹೇಳುತ್ತಿದ್ದ ಸಿಂಪಲ್ ಸುನಿ, ಅನಿಲ್ ಶೆಟ್ಟಿ ಅವರ ಕಥೆಗೆ ನಿರ್ದೇಶನ ಮಾಡಿರುವುದು ಮತ್ತೊಂದು ವಿಶೇಷ. ಇನ್ನು ನಾಯಕಿಯಾಗಿ ಮುದ್ದಾದ ಮುಖದ ಸಾಚಿ ಬಿಂದ್ರಾ ಗ್ಲಾಮರ್ ಸಾಥ್ ನೀಡಿದ್ರೆ, ಪ್ರಮುಖ ಪಾತ್ರದಲ್ಲಿ ಮೇಘನಾ ಗಾಂವ್ಕರ್ ಹಾಗೂ ಬಾಲಿವುಡ್‌ನ ರಂಗ್ ದೇ ಬಸಂತಿ ಖ್ಯಾತಿಯ ಹ್ಯಾಂಡ್ಸಮ್ ಹಂಕ್ ಕುನಾಲ್ ಕಪೂರ್ ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟು ಇಡೀ ಕಥೆಗೆ ಬಿಗ್ ಟ್ವಿಸ್ಟ್ ನೀಡಲು ಸಜ್ಜಾಗಿದ್ದಾರೆ.
ಸಿನಿಮಾದ ನಿರೀಕ್ಷೆಯನ್ನು ಪೀಕ್‌ಗೆ ಕೊಂಡೊಯ್ದಿರುವ ಟ್ರೈಲರ್ ಯಶಸ್ಸಿನ ಬೆನ್ನಲ್ಲೇ, ಇದೀಗ ಲಹರಿ ಮ್ಯೂಸಿಕ್ ಮೂಲಕ ಬಿಡುಗಡೆಗೊಂಡಿರುವ ಆಡಿಯೋ ಜ್ಯೂಕ್‌ಬಾಕ್ಸ್ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ಸೌಂಡ್ ಮಾಡ್ತಿದೆ. ಪ್ರೇಮದ ತಲ್ಲಣ ಸಾರುವ ಆಕರ್ಷಕ ನಿನ್ನನ್ನು ಕಂಡ ವೇಳೆ, ಓಬೆ ಓಬೆ, ಎಲ್ಲರು ಹ್ಯಾಪಿ ಹ್ಯಾಪಿ, ಕಣ್ಣಲ್ಲೊಮ್ಮೆ ಹಾಗೂ ಸಸ್ಪೆನ್ಸ್ ತುಂಬಿದ ಮಾಯಾ ಜಾಲಾ ಹಾಡುಗಳು ಯುವಜನತೆಯನ್ನು ಹುರುದುಂಬಿಸುವ ಹೈ-ಎನರ್ಜಿ ಸಾಂಗ್ಸ್ ಆಗಿ ಎಲ್ಲರ ಮನಗೆದ್ದಿವೆ.
ಕೇವಲ ಸೈನ್ಸ್ ಫಿಕ್ಷನ್ ಕಥೆಯಷ್ಟೇ ಅಲ್ಲದೆ, ಇಂದಿನ ಸ್ಮಾರ್ಟ್‌ಫೋನ್ ಹಾಗೂ ಡಿಜಿಟಲ್ ಲೋಕದಲ್ಲಿ ಬದುಕುತ್ತಾ ಸಾವಿರಾರು ಜನರ ಮಧ್ಯೆಯೂ ಒಂಟಿತನ ಅನುಭವಿಸುವ ಯುವಜನತೆಯ ಮಾನಸಿಕ ತುಮುಲಗಳ ಮೇಲೆ ಈ ಸಿನಿಮಾ ಬೆಳಕು ಚೆಲ್ಲಿದೆ. ಬೆಂಗಳೂರಿನ ಹೈಟೆಕ್ ಹಿನ್ನೆಲೆಯಲ್ಲಿ ಸಾಗುವ ಈ ಕಥೆ, ಆನ್‌ಲೈನ್ ಬದುಕಿನ ಕಹಿ ಸತ್ಯಗಳನ್ನು ಹಾಗೂ ಡಿಜಿಟಲ್ ಕಣ್ಗಾವಲಿನ ಅಸಲಿ ಆಟವನ್ನು ಅತ್ಯಂತ ರೋಚಕವಾಗಿ ತೆರೆದಿಡಲು ಕಾಯುತ್ತಿದೆ. ಬಾಲಿವುಡ್‌ನ ಖ್ಯಾತ ಮಹಾವೀರ್ ಜೈನ್ ಫಿಲಂಸ್ ಈ ಸಿನಿಮಾಗೆ ಬೆನ್ನೆಲುಬಾಗಿ ನಿಂತಿದೆ.
ಕನ್ನಡ ಹಾಗೂ ಹಿಂದಿಯಲ್ಲಿ ಲಂಬೋದರ 2.0 ಚಿತ್ರ ಇದೇ ನವೆಂಬರ್ 13ರಂದು ವಿಶ್ವಾದ್ಯಂತ ಅದ್ದೂರಿಯಾಗಿ ಬಿಡುಗಡೆಗೆ ಆಗ್ತಿದೆ. ಕೃತಕ ಬುದ್ಧಿಮತ್ತೆ, ರೋಬೋಟಿಕ್ಸ್ ಹಾಗೂ ಸಿಂಪಲ್ ಸುನಿ ಅವರ ಹೊಸ ಶೈಲಿಯ ಮೇಕಿಂಗ್‌ನಿಂದಾಗಿ ಈ ಸಿನಿಮಾ ಯಾವ ರೀತಿಯ ಮ್ಯಾಜಿಕ್ ಮಾಡುತ್ತೆ ಅನ್ನೋ ಕ್ಯೂರಿಯಾಸಿಟಿ ಹೆಚ್ಚಿದೆ. ಈ ವಾರ ತೆರೆಗೆ ಬರ್ತಿರೋ ಲಂಬೋದರ 2.ಓ ಸಿನಿಮಾದ ಅಡ್ವಾನ್ಸ್ ಟಿಕೆಟ್ ಬುಕ್ಕಿಂಗ್ ಈಗಾಗ್ಲೇ ಶುರುವಾಗಿದ್ದು, ಬಿಡುಗಡೆಗೆ ಐದು ದಿನ ಮೊದ್ಲೇ ಮುಂಗಡ ಟಿಕೆಟ್ ಖರೀದಿಗೆ ಅವಕಾಶ ಮಾಡಿಕೊಟ್ಟಿದೆ ಚಿತ್ರತಂಡ.
ಕೀರ್ತಿ ಪಾಟೀಲ್, ಫಿಲಂ ಬ್ಯೂಯೋ, ಗ್ಯಾರಂಟಿ ನ್ಯೂಸ್
