ಮುಂಬೈ: ಬಾಲಿವುಡ್ ಸಿನಿಮಾ ಇಂಡಸ್ಟ್ರಿಯಲ್ಲಿ ಈಗ ಹೊಸ ಟ್ರೆಂಡ್ ಒಂದು ಸೃಷ್ಟಿಯಾಗಿದೆ. ಅಲ್ಲಿನ ಸೂಪರ್ ಸ್ಟಾರ್ ನಟರಿಗೆ ದಕ್ಷಿಣ ಭಾರತದ (South India) ನಿರ್ದೇಶಕರ ಮೇಲೆ ವಿಶೇಷ ಪ್ರೀತಿ ಮತ್ತು ನಂಬಿಕೆ ಹುಟ್ಟಿದೆ. ಶಾರುಖ್ ಖಾನ್ ಅವರು ಅಟ್ಲಿ ಜೊತೆ ಸೇರಿ ‘ಜವಾನ್’ ಮೂಲಕ ಸಾವಿರ ಕೋಟಿ ಬಾಚಿದ್ದೇ ಇದಕ್ಕೆ ಪ್ರಮುಖ ಕಾರಣ. ಇದೀಗ ಇದೇ ಹಾದಿಯಲ್ಲಿ ಸಾಗಲು ಬಾಲಿವುಡ್ನ ಹ್ಯಾಂಡ್ಸಮ್ ಹಂಕ್ ಹೃತಿಕ್ ರೋಷನ್ ಕೂಡ ಸಜ್ಜಾಗಿದ್ದಾರೆ.
ದಕ್ಷಿಣದ ಕಥೆಗೆ ಮರುಳಾದ ಹೃತಿಕ್
ಇತ್ತೀಚಿನ ವರದಿಗಳ ಪ್ರಕಾರ, ತೆಲುಗಿನ ಖ್ಯಾತ ಚಿತ್ರಕಥೆಗಾರ ಕೋನಾ ವೆಂಕಟ್ ಮತ್ತು ಇತ್ತೀಚೆಗೆ ‘ಡಾಕು ಮಹಾರಾಜ್’ ಸಿನಿಮಾ ಮೂಲಕ ಸುದ್ದಿಯಲ್ಲಿರುವ ನಿರ್ದೇಶಕ ಬಾಬಿ ಕೊಲ್ಲಿ (ಕೆ.ಎಸ್. ರವೀಂದ್ರ) ಹೃತಿಕ್ ರೋಷನ್ ಅವರನ್ನು ಭೇಟಿಯಾಗಿ ಒಂದು ದೊಡ್ಡ ಪ್ರಾಜೆಕ್ಟ್ ಬಗ್ಗೆ ಚರ್ಚಿಸಿದ್ದಾರೆ. ಈ ಕಥೆಯು ಹೃತಿಕ್ ಅವರಿಗೆ ತುಂಬಾ ಇಷ್ಟವಾಗಿದ್ದು, ಸಿನಿಮಾ ಮಾಡಲು ಅವರು ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆ ಎಂದು ತಿಳಿದುಬಂದಿದೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ ಶೀಘ್ರದಲ್ಲೇ ಈ ಬಿಗ್ ಬಜೆಟ್ ಸಿನಿಮಾದ ಅಧಿಕೃತ ಘೋಷಣೆ ಹೊರಬೀಳಲಿದೆ.
ಹೊಂಬಾಳೆ ಫಿಲ್ಮ್ಸ್ ಜೊತೆ ಒಪ್ಪಂದ ?
ಮತ್ತೊಂದು ವಿಶೇಷವೆಂದರೆ, ಹೃತಿಕ್ ರೋಷನ್ ಅವರು ದಕ್ಷಿಣದ ಪ್ರತಿಷ್ಠಿತ ನಿರ್ಮಾಣ ಸಂಸ್ಥೆ ಹಾಗೂ ‘ಕೆಜಿಎಫ್’, ‘ಕಾಂತಾರ’ ಖ್ಯಾತಿಯ ಹೊಂಬಾಳೆ ಫಿಲ್ಮ್ಸ್ ಜೊತೆ ಒಂದು ದೊಡ್ಡ ಪ್ರಾಜೆಕ್ಟ್ಗಾಗಿ ಒಪ್ಪಂದ ಮಾಡಿಕೊಂಡಿದ್ದಾರೆ ಎಂಬ ಸುದ್ದಿಯೂ ಇದೆ. ಬಾಬಿ ಮತ್ತು ಕೋನಾ ವೆಂಕಟ್ ಅವರು ಹೇಳುತ್ತಿರುವ ಸಿನಿಮಾ ಇದೇ ಇರಬಹುದೇ ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಮನೆಮಾಡಿದೆ. ಸದ್ಯಕ್ಕೆ ಹೃತಿಕ್ ‘ಕೃಷ್ 4’ ಮತ್ತು ಯಶ್ ರಾಜ್ ಫಿಲಮ್ಸ್ನ ಸಿನಿಮಾಗಳಲ್ಲಿ ಬ್ಯುಸಿ ಇದ್ದರೂ, ಈ ಹೊಸ ಪ್ರಾಜೆಕ್ಟ್ಗೆ ಆದ್ಯತೆ ನೀಡುವ ಸಾಧ್ಯತೆ ಇದೆ.
ಬಾಲಿವುಡ್ನಲ್ಲಿ ಸೌತ್ ನಿರ್ದೇಶಕರ ಹವಾ
ಶಾರುಖ್ ಖಾನ್ ‘ಜವಾನ್’ ಮೂಲಕ ಗೆದ್ದರೆ, ಸಲ್ಮಾನ್ ಖಾನ್ ತಮಿಳಿನ ಮುರುಗದಾಸ್ ಜೊತೆ ಮಾಡಿದ ‘ಸಿಖಂಧರ್’ ಅಟ್ಟರ್ ಫ್ಲಾಪ್ ಕಂಡಿತು. ಇನ್ನು ಆಮಿರ್ ಖಾನ್ ಅವರು ಲೋಕೇಶ್ ಕನಗರಾಜ್ ಅವರ ಜೊತೆ ಕೆಲಸ ಮಾಡಲು ಸಿದ್ಧತೆ ನಡೆಸುತ್ತಿದ್ದಾರೆ. ಟೈಗರ್ ಶ್ರಾಫ್ ಕೂಡ ಇದೇ ಸಾಲಿನಲ್ಲಿದ್ದಾರೆ. ದಕ್ಷಿಣದ ನಿರ್ದೇಶಕರು ಆಕ್ಷನ್ ಮತ್ತು ಕಮರ್ಷಿಯಲ್ ಅಂಶಗಳನ್ನು ಕಟ್ಟಿಕೊಡುವ ರೀತಿ ಬಾಲಿವುಡ್ ನಟರಿಗೆ ಹೊಸ ಯಶಸ್ಸಿನ ಭರವಸೆ ನೀಡಿದೆ.
ಹೃತಿಕ್ ರೋಷನ್ ಅವರಿಗೆ ದಕ್ಷಿಣದ ಈ ಕಾಂಬಿನೇಷನ್ ಕೈಹಿಡಿಯಲಿದೆಯೇ ? ಶಾರುಖ್ ಖಾನ್ ಅವರಂತೆ ಹೃತಿಕ್ ಕೂಡ ಬಾಕ್ಸ್ ಆಫೀಸ್ನಲ್ಲಿ ಸುನಾಮಿ ಸೃಷ್ಟಿಸುತ್ತಾರೆಯೇ ಎಂಬುದು ಸದ್ಯದ ಕುತೂಹಲ. ಸೌತ್ ಮಸಾಲ ಮತ್ತು ಹೃತಿಕ್ ರೋಷನ್ ಅವರ ಸ್ಟೈಲ್ ಸೇರಿದರೆ ಖಂಡಿತವಾಗಿಯೂ ಅದು ಚಿತ್ರಮಂದಿರಗಳಲ್ಲಿ ಧೂಳೆಬ್ಬಿಸುವುದರಲ್ಲಿ ಸಂಶಯವಿಲ್ಲ.
