ಯಾವಾಗ್ಲೂ ಲವರ್ ಬಾಯ್ ಆಗಿ ಕಾಣಿಸಿಕೊಳ್ತಿದ್ದ ಮಳೆ ಹುಡುಗ, ಇದೀಗ ಕೈಯಲ್ಲಿ ತಲ್ವಾರ್ ಹಿಡಿದು ಫುಲ್ ಮಾಸ್ ಅವತಾರ ತಾಳಿದ್ದಾರೆ. ಅಷ್ಟಕ್ಕೂ ಗೋಲ್ಡನ್ ಸ್ಟಾರ್ ಗಣೇಶ್‌ರ ಈ ಬದಲಾವಣೆಗೆ ಕಾರಣ ಏನು..? ತಿಮ್ಮಪ್ಪನ ಸನ್ನಿಧಿಯಲ್ಲಿ ಹುಟ್ಟುಹಬ್ಬ ಆಚರಿಸಿದ್ದ ಗಣಿ, ಮಾಟ ಮಂತ್ರದ ಮೊರೆ ಹೋಗಿದ್ಯಾಕೆ ಅನ್ನೋದನ್ನ ತಿಳ್ಕೋಬೇಕಾದ್ರೆ ಈ ಸ್ಟೋರಿ ನೋಡಿ.
- ಪಿನಾಕ ಟೀಸರ್ ಖದರ್.. ಗೋಲ್ಡನ್ ಮೆಗಾಸ್ಟಾರ್ ಪವರ್
- ಅಬ್ಬಬ್ಬಾ.. ಬಾಹುಬಲಿ ರೇಂಜ್‌‌ನಲ್ಲಿ ವಿಶ್ಯುವಲ್ ಟ್ರೀಟ್ ಗುರು
- 22 ದಿನದ ಕ್ಲೈಮ್ಯಾಕ್ಸ್ ರಹಸ್ಯ ಬಿಚ್ಚಿಟ್ಟ ಗೋಲ್ಡನ್ ಸ್ಟಾರ್
- ಬ್ಲ್ಯಾಕ್ ಮ್ಯಾಜಿಕ್ ಅಖಾಡ.. ದಸರಾಗೆ ಡಬಲ್ ಧಮಾಕ
ಯಾವಾಗ್ಲೂ ರೊಮ್ಯಾಂಟಿಕ್ ಆ್ಯಂಡ್ ಫ್ಯಾಮಿಲಿ ಸಿನಿಮಾಗಳ ಮೂಲಕ ಪ್ರೇಕ್ಷಕರ ಮನಸ್ಸು ಗೆಲ್ಲುತ್ತಿದ್ದ ಗೋಲ್ಡನ್ ಸ್ಟಾರ್ ಗಣೇಶ್, ಇದೀಗ ಸಡನ್ ಆಗಿ ಮಾಟ-ಮಂತ್ರ, ಬ್ಲ್ಯಾಕ್ ಮ್ಯಾಜಿಕ್ ಮೊರೆ ಹೋಗಿದ್ದಾರೆ. ಕೃಷ್ಣಂ ಪ್ರಣಯ ಸಖಿ ಯಶಸ್ಸಿನ ಬಳಿಕ ಗಣಿ ಕೈಗೆತ್ತಿಕೊಂಡಿರುವ ಫಿನಾಕ ಚಿತ್ರದ ಅದ್ದೂರಿ ಟೀಸರ್ ರಿಲೀಸ್ ಆಗಿದ್ದು, ಮಳೆ ಹುಡುಗನ ಕಂಪ್ಲೀಟ್ ಮಾಸ್ ಅವತಾರ ಕಂಡು ಫ್ಯಾನ್ಸ್ ಫಿದಾ ಆಗಿದ್ದಾರೆ. ಇತ್ತೀಚೆಗೆ ತಿಮ್ಮಪ್ಪನ ಸನ್ನಿಧಿಯಲ್ಲಿ ಹುಟ್ಟುಹಬ್ಬ ಆಚರಿಸಿದ್ದ ಗಣೇಶ್, ಈಗ ಚಾರುಕೇಶ ಫಿನಾಕ ರಾಜನಾಗಿ ಪ್ರೇಕ್ಷಕರನ್ನು ವಶೀಕರಣ ಮಾಡಿಕೊಳ್ಳಲು ಸಜ್ಜಾಗಿದ್ದಾರೆ.
ಕೊರಿಯೋಗ್ರಾಫರ್ ಧನಂಜಯ್ ಬಿ ಫಿನಾಕ ಚಿತ್ರದ ಮೂಲಕ ಮೊದಲ ಬಾರಿಗೆ ನಿರ್ದೇಶಕನ ಕ್ಯಾಪ್ ತೊಟ್ಟಿದ್ದು, ಟಾಲಿವುಡ್‌ನ ಪ್ರತಿಷ್ಠಿತ ಬ್ಯಾನರ್ ಆದ ಪೀಪಲ್ ಮೀಡಿಯಾ ಫ್ಯಾಕ್ಟರಿ ಅಡಿಯಲ್ಲಿ ನಿರ್ಮಾಪಕರಾದ ಟಿ.ಜಿ. ವಿಶ್ವಪ್ರಸಾದ್ ಮತ್ತು ಟಿ.ಜಿ. ಕೃತಿ ಪ್ರಸಾದ್ ಬಂಡವಾಳ ಹೂಡಿ ನಿರ್ಮಿಸುತ್ತಿದ್ದಾರೆ.
ಬನಶಂಕರಿಯ ಖಾಸಗಿ ಶಾಲೆಯ ಮಕ್ಕಳ ಸಮ್ಮುಖದಲ್ಲಿ ತಡವಾಗಿ ಹುಟ್ಟುಹಬ್ಬ ಆಚರಿಸಿಕೊಂಡ ಗಣೇಶ್, ಪಿನಾಕ ಚಿತ್ರದ ರಿಲೀಸ್ ಡೇಟ್ ಅನೌನ್ಸ್ ಮಾಡಿದ್ದಾರೆ. ಚಿತ್ರದಲ್ಲಿ ಬಳಸಿರುವ ವಿಶೇಷ ಖಡ್ಗವನ್ನು ರಿವೀಲ್ ಮಾಡಿದ ಗಣೇಶ್, ಇದು ತುಂಬಾ ದೊಡ್ಡ ಬಜೆಟ್ ಸಿನಿಮಾ. ಬರೋಬ್ಬರಿ 22 ದಿನಗಳ ಕಾಲ ಚಿತ್ರದ 12 ನಿಮಿಷಗಳ ಹೈ-ವೋಲ್ಟೇಜ್ ಕ್ಲೈಮ್ಯಾಕ್ಸ್ ಶೂಟ್ ಮಾಡಿದ್ದೇವೆ ಎಂದರು. ಇದೇ ವೇದಿಕೆಯಲ್ಲಿ ಹಾಸ್ಯ ದಿಗ್ಗಜರಾದ ಸಾಧು ಕೋಕಿಲ ಮತ್ತು ರಂಗಾಯಣ ರಘು ಒಟ್ಟಾಗಿ ಗಣೇಶ್ ಕಾಲೆಳೆದು ಕಾರ್ಯಕ್ರಮದ ಮಜಾವನ್ನು ಡಬಲ್ ಮಾಡಿದ್ರು.
ನಾನು ಕನ್ನಡದ ನಟ, ಕನ್ನಡದಲ್ಲೇ ಸಂತೋಷವಾಗಿದ್ದೇನೆ. ಸಿನಿಮಾ ಬ್ಯುಸಿನೆಸ್‌‌ಗೋಸ್ಕರ ಬೇರೆ ಭಾಷೆಗೆ ಹೋದ್ರೂ, ನನ್ನ ಮೊದಲ ಆದ್ಯತೆ ಕನ್ನಡ ಎನ್ನುವ ಮೂಲಕ ಗಣೇಶ್ ವೇದಿಕೆಯಲ್ಲಿ ಕನ್ನಡತನ ಮೆರೆದರು. ಇಂಟರೆಸ್ಟಿಂಗ್ ಅಂದ್ರೆ, ಅಕ್ಟೋಬರ್ 2 ಕ್ಕೆ ‘ಫಿನಾಕ’ ಬಂದ್ರೆ, ಅಕ್ಟೋಬರ್ 16 ಕ್ಕೆ ಗಣೇಶ್ ನಟನೆಯ ಮತ್ತೊಂದು ಸಿನಿಮಾ ಬೃಂದಾವಿಹಾರಿ ತೆರೆಗೆ ಬರಲಿದೆ. ಒಟ್ಟಿನಲ್ಲಿ ಈ ದಸರಾ ರಜೆಯನ್ನ ಸಂಪೂರ್ಣವಾಗಿ ಕಬ್ಜ ಮಾಡಲು ಮಳೆ ಹುಡುಗ ಎರಡು ಭರ್ಜರಿ ಸಿನಿಮಾಗಳೊಂದಿಗೆ ಸಜ್ಜಾಗಿದ್ದಾರೆ. ಈ ವರ್ಷವೂ ಸ್ಯಾಂಡಲ್‌ವುಡ್ ಬಾಕ್ಸ್ ಆಫೀಸ್ ಸುಲ್ತಾನ್ ಆಗ್ತಾರಾ ಗಣಿ ಅನ್ನೋದನ್ನ ಕಾದು ನೋಡಬೇಕು.
ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್
