ನಾನೇನು ಸನ್ಯಾಸಿಯಲ್ಲ, ದೈಹಿಕ ಸುಖಕ್ಕೆ ಮದುವೆಯೇ ಆಗಬೇಕಿಲ್ಲ: ಹಸಿಬಿಸಿ ವಿಷಯ ಹಂಚಿಕೊಂಡ ನಟಿ ಗೀತಾ ʼಮಾʼ

ಮುಂಬೈ: ಬಾಲಿವುಡ್‌ನ ಅತ್ಯುತ್ತಮ ಕೊರಿಯೋಗ್ರಾಫರ್ ಹಾಗೂ ರಿಯಾಲಿಟಿ ಶೋಗಳ ನೆಚ್ಚಿನ ತೀರ್ಪುಗಾರ್ತಿ ಗೀತಾ ಕಪೂರ್ (Geeta Kapoor) ತಮ್ಮವೊಂದು ಹೇಳಿಕೆಯಿಂದ ಭಾರಿ ಚರ್ಚೆಯಲ್ಲಿದ್ದಾರೆ. 52 ವರ್ಷದ ಗೀತಾ ಕಪೂರ್ ಅವರನ್ನು ಅಭಿಮಾನಿಗಳು ಪ್ರೀತಿಯಿಂದ ಗೀತಾ ಮಾ ಎಂದೇ ಕರೆಯುತ್ತಾರೆ. ಇತ್ತೀಚಿನ ಸಂದರ್ಶನವೊಂದರಲ್ಲಿ ಅವರು ತಮ್ಮ ಸೆ*ಕ್ಸ್ ಲೈಫ್ ಹಾಗೂ ಇತರೆ ಸಂಬಂಧಗಳ ಬಗ್ಗೆ ನೇರವಾಗಿ ಹಂಚಿಕೊಂಡಿದ್ದಾರೆ.

‘ಮಾ’ ಎಂದರೆ ಸನ್ಯಾಸಿನಿ ಎಂದರ್ಥವಲ್ಲ!

ಡಾನ್ಸ್‌ ರಿಯಾಲಿಟಿ ಶೋಗಳಲ್ಲಿ ಸ್ಪರ್ಧಿಗಳು ಮತ್ತು ಸಹ-ತೀರ್ಪುಗಾರರು ಗೀತಾ ಅವರನ್ನು ಮಾ ಎಂದು ಕರೆಯುತ್ತಾರೆ. ಈ ಬಗ್ಗೆ ಮಾತನಾಡಿರುವ ಅವರು, ಎಲ್ಲರೂ ನನ್ನನ್ನು ಗೀತಾ ಮಾ ಎಂದು ಕರೆದ ಮಾತ್ರಕ್ಕೆ ನನಗೆ ವೈಯಕ್ತಿಕ ಜೀವನವಿಲ್ಲ ಎಂದರ್ಥವಲ್ಲ. ಅಮ್ಮಾ ಎನ್ನುವ ಟ್ಯಾಗ್‌ನಿಂದಾಗಿ ನಾನು ಸನ್ಯಾಸಿನಿಯಂತೆ ಬದುಕಬೇಕು ಎಂದು ನೀವು ಭಾವಿಸಬಹುದು, ಆದರೆ ನಾನೂ ಕೂಡ ರಕ್ತ ಮಾಂಸದ ಸಾಮಾನ್ಯ ಮನುಷ್ಯಳು. ನನಗೂ ಭಾವನೆಗಳಿವೆ, ದೈಹಿಕ ಅಗತ್ಯಗಳಿವೆ ಎಂದು ಹೇಳಿದ್ದಾರೆ.

ತಮ್ಮ ವೈವಾಹಕ್ಕೆ ಸಂಬಂಧಿಸಿದಂತೆ ಕೇಳಲಾದ ಪ್ರಶ್ನೆಗೆ ಉತ್ತರಿಸಿದ ಗೀತಾ, ನಾನು ವಿವಾಹಿತೆ ಅಲ್ಲ ನಿಜ, ಆದರೆ ನಾನು ಕನ್ಯೆಯಾಗಿ ಉಳಿದಿಲ್ಲ (Virgin). ನಾನು ಎಲ್ಲರಂತೆ ಸಾಮಾನ್ಯ ಜೀವನ ನಡೆಸುತ್ತೇನೆ. ಜನರನ್ನು ಭೇಟಿಯಾಗುತ್ತೇನೆ, ಡೇಟಿಂಗ್ ಮಾಡುತ್ತೇನೆ ಮತ್ತು ನನ್ನ ಖಾಸಗಿ ಕ್ಷಣಗಳನ್ನು ಕಂಡುಕೊಳ್ಳುತ್ತೇನೆ. ದೈಹಿಕವಾಗಿ ನಾನು ತೃಪ್ತಳಾಗಿದ್ದೇನೆ ಮತ್ತು ಸಂತೋಷವಾಗಿದ್ದೇನೆ ಎಂದು ಹೇಳಿದ್ದಾರೆ. ಹೀಗಾಗಿ ಸಧ್ಯ ಗೀತಾ ಮಾ ಅವರ ಈ ಹೇಳಿಕೆ ಬಾಲಿವುಡ್‌ನಲ್ಲಿ ಸಂಚಲನ ಮೂಡಿಸಿದೆ.

ದೈಹಿಕ ಸಂತೋಷ ಅಥವಾ ಅನ್ಯೋನ್ಯತೆ ಪಡೆಯಲು ಮದುವೆಯೇ ಆಗಬೇಕೆಂಬ ನಿಯಮವಿಲ್ಲ ಎಂದು ಹೇಳಿದ ಗೀತಾ ಕಪೂರ್, ಮದುವೆಯಾಗದಿದ್ದರೆ ವೈಯಕ್ತಿಕ ಜೀವನವಿಲ್ಲ ಎಂದು ಭಾವಿಸುವುದು ತಪ್ಪು. ಮದುವೆಯಿಲ್ಲದೆಯೂ ಒಬ್ಬ ವ್ಯಕ್ತಿ ದೈಹಿಕವಾಗಿ ಮತ್ತು ಮಾನಸಿಕವಾಗಿ ತೃಪ್ತಿ ಹೊಂದಲು ಸಾಧ್ಯವಿದೆ. ನಾನು ನನ್ನ ಬದುಕಿನ ಈ ಹಂತದಲ್ಲಿ ಅತ್ಯಂತ ಸುಖವಾಗಿದ್ದೇನೆ ಎಂದಿದ್ದಾರೆ.

ಗೀತಾ ಕಪೂರ್ ಅವರ ಈ ಹೇಳಿಕೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಕೆಲವರು ಅವರ ಧೈರ್ಯ ಮತ್ತು ಪಾರದರ್ಶಕತೆಯನ್ನು ಮೆಚ್ಚಿಕೊಂಡರೆ, ಇನ್ನು ಕೆಲವರು ಸಂಪ್ರದಾಯದ ಹೆಸರಿನಲ್ಲಿ ಟ್ರೋಲ್ ಮಾಡುತ್ತಿದ್ದಾರೆ. ಆದರೆ ಯಾವುದಕ್ಕೂ ತಲೆಕೆಡಿಸಿಕೊಳ್ಳದ ಗೀತಾ ಮಾ, ತಮ್ಮ ಜೀವನದ ಕೆಲವು ಸತ್ಯಗಳನ್ನ ಯಾವುದೇ ಮುಚ್ಚುಮರೆಯಿಲ್ಲದೆ ಜಗತ್ತಿನ ತಿಳಿಸಿದ್ದಾರೆ.