ಬಾಲಿವುಡ್ ಕಿಲಾಡಿ ಅಕ್ಷಯ್ ಕುಮಾರ್.. ಭಾರತೀಯ ಚಿತ್ರರಂಗದ ಮೋಸ್ಟ್ ವರ್ಸಟೈಲ್ ಆ್ಯಕ್ಟರ್. ಇವರ ಕಥೆಗಳ ಆಯ್ಕೆ, ಪಾತ್ರಕ್ಕಾಗಿ ಪರಕಾಯ ಪ್ರವೇಶ, ಆಲೋಚನಾ ಲಹರಿ ಅದ್ಭುತ. ಹಾಗಾಗಿಯೇ ಬಹುದೊಡ್ಡ ಫ್ಯಾನ್ ಫಾಲೋಯಿಂಗ್ ಹೊಂದಿದ್ದಾರೆ. ಪ್ರಧಾನಿ ಮೋದಿಯಿಂದ ಹಿಡಿದು, ಎಲ್ಲಾ ಸೂಪರ್ ಸ್ಟಾರ್ ಗಳ ಅಚ್ಚು ಮೆಚ್ಚಿನ ಕಲಾವಿದರಾಗಿದ್ದಾರೆ.
ಆದ್ರೆ ಇತ್ತೀಚೆಗೆ ಯಾಕೋ ಅಕ್ಷಯ್ ಕುಮಾರ್ ಲೆಕ್ಕಾಚಾರಗಳೆಲ್ಲಾ ಉಲ್ಟಾ ಆಗೋಗಿವೆ.
ಸತತ 16 ಸಿನಿಮಾಗಳು ಬಾಕ್ಸ್ ಆಫೀಸ್ ನಲ್ಲಿ ನೆಲ ಕಚ್ಚಿವೆ. ಹೌದು.. ಒಂದಲ್ಲ ಎರಡಲ್ಲ, ಬ್ಯಾಕ್ ಟು ಬ್ಯಾಕ್ 16 ಸಿನಿಮಾಗಳು ಹಾಕಿರೋ ಬಂಡವಾಳ ಕೂಡ ಗಳಿಸೋಕೆ ಹೆಣಗಾಡಿವೆ. ಪ್ರೊಡ್ಯೂಸರ್ಸ್ ಅಂತೂ ಅಕ್ಷಯ್ ಕುಮಾರ್ ಗೆ ಸಿನಿಮಾ ಮಾಡೋಕೆ ಅಥ್ವಾ ಅವರ ಚಿತ್ರಗಳಿಗೆ ಹಣ ಹೂಡೋಕೆ ಹಿಂದು ಮುಂದು ನೋಡುವಂತಾಗಿದೆ.
ನೂರಾರು ಕೋಟಿ ಬಾಕ್ಸ್ ಆಫೀಸ್ ಗಳಿಸೋ ಅಂತಹ ಸಿನಿಮಾಗಳನ್ನ ಮಾಡೋ ಒಬ್ಬ ಪೈಸಾ ವಸೂಲ್ ಸ್ಟಾರ್, ಹೀಗೆ ತಾನು ಆರಿಸಿಕೊಂಡ ಪ್ರತಿ ಕಥೆಯೂ ನೆಲಕಚ್ಚುವುದರಿಂದ ಅಕ್ಷರಶಃ ವಿಚಲಿತನಾಗುತ್ತಾನೆ. ಹಾಗಂತ ಅಕ್ಷಯ್ ಕಿಂಚಿತ್ತೂ ಟೆನ್ಷನ್ ಆಗಿಲ್ಲ. ಸಕ್ಸಸ್ ನಷ್ಟೇ ಕೂಲ್ ಆಗಿ ಫೇಲ್ಯೂರ್ಸ್ ನ ಕೂಡ ಸ್ವೀಕರಿಸಿದ್ದಾರೆ. ಸತತ ಪ್ರಯತ್ನಗಳನ್ನ ಮಾಡ್ತಾನೇ ಇದ್ದಾರೆ. ಮಾಡಿದ ಪ್ರತಿ ಸಿನಿಮಾದ ಕಥೆ, ಪಾತ್ರ ಪ್ರಯೋಗಾತ್ಮಕ ಅನಿಸುತ್ತೆ. ಆದ್ರೆ ಅದೃಷ್ಠ ಮಾತ್ರ ಕೈ ಕೊಡ್ತಿದೆ.
ಬಹುಶಃ 2019ರಲ್ಲಿ ತೆರೆಕಂಡ ಕೇಸರಿ, ಮಿಷನ್ ಮಂಗಲ್, ಹಾಗೂ ಗುಡ್ ನ್ಯೂಸ್ ಸಿನಿಮಾಗಳೇ ಅಕ್ಷಯ್ ಕುಮಾರ್ ಕಟ್ಟ ಕಡೆಯ ಬ್ಲಾಕ್ ಬಸ್ಟರ್ ಹಿಟ್ಸ್. ಅದಾದ ಬಳಿಕ ಸತತ ಐದಾರು ವರ್ಷಗಳಿಂದ ಮಾಡಿದ ಚಿತ್ರಗಳೆಲ್ಲಾ ಫ್ಲಾಪ್ ಲಿಸ್ಟ್ ಸೇರಿವೆ. ಸದ್ಯ 2025 ಹಾಗೂ 26ರಲ್ಲಿ ಅಕ್ಷಯ್ ಕುಮಾರ್ ಬರೋಬ್ಬರಿ 8ರಿಂದ 10 ಸಿನಿಮಾಗಳ ಶೂಟಿಂಗ್ ನಲ್ಲಿ ಬ್ಯುಸಿ ಆಗಿದ್ದಾರೆ. ಹೌದು.. ಅವರು ಎಂದೂ ಹೋಪ್ಸ್ ನ ಕಳೆದುಕೊಂಡಿಲ್ಲ. ಸಿನಿಮಾ ಮಾಡೋ ಸಿನಿಮೋತ್ಸಾಹವನ್ನ ಸಹ ಕಳೆದುಕೊಂಡಿಲ್ಲ.
ಸದ್ಯ ಟಾಕ್ ಆಫ್ ದಿ ಟೌನ್ ಆಗಿರೋದು ಕೇಸರಿ ಚಿತ್ರದ ಸೀಕ್ವೆಲ್ ಸಿನಿಮಾ ಕೇಸರಿ-2. 2019ರಲ್ಲಿ ಅಕ್ಷಯ್ ಕುಮಾರ್ ಕರಿಯರ್ ಗೆ ಬಿಗ್ಗೆಸ್ಟ್ ಹಿಟ್ ನೀಡಿದ್ದ ಆ ಸಿನಿಮಾದ ಮುಂದುವರೆದ ಭಾಗವೇ ಇದೀಗ 16 ಫ್ಲಾಫ್ಸ್ ನಂತ್ರ ಅಕ್ಷಯ್ ಸಿನಿಯಾನಕ್ಕೊಂದು ಬಿಗ್ ಬ್ರೇಕ್ ನೀಡಬೇಕಿದೆ. ಇದೇ ಮಾರ್ಚ್ 24ಕ್ಕೆ ಕೇಸರಿ 2 ಚಿತ್ರದ ಟೀಸರ್ ಲಾಂಚ್ ಆಗ್ತಿದ್ದು, ಕರಣ್ ಸಿಂಗ್ ತ್ಯಾಗಿ ನಿರ್ದೇಶನದ ಈ ಸಿನಿಮಾ ಏಪ್ರಿಲ್ 18ರಂದು ವರ್ಲ್ಡ್ ವೈಡ್ ತೆರೆಗಪ್ಪಳಿಸುತ್ತಿದೆ.
ಆರ್ ಮಾಧವನ್ ಹಾಗೂ ಅನನ್ಯಾ ಪಾಂಡೆ ಕೂಡ ಲೀಡ್ ನಲ್ಲಿ ನಟಿಸಿರೋ ಕೇಸರಿ-2 ಒನ್ಸ್ ಅಗೈನ್ ಐತಿಹಾಸಿಕ ಘಟನೆ ಆಧಾರಿತ ಕಥೆಯನ್ನ ಹೊತ್ತು ಬೆಳ್ಳಿತೆರೆಗೆ ಬರ್ತಿದೆ. ಜಲಿಯನ್ ವಾಲಾಬಾಗ್ ಹತ್ಯಾಕಾಂಡದ ಕಥಾನಕವನ್ನು ಈ ಜನರೇಷನ್ ಗೂ ಸಾರುವ ಕಾರ್ಯ ಮಾಡ್ತಿರೋ ಅಕ್ಷಯ್ ಕುಮಾರ್ ಆಲೋಚನೆ ಹಾಗೂ ಪ್ರಯೋಗಕ್ಕೆ ಹ್ಯಾಟ್ಸಾಫ್ ಹೇಳಲೇಬೇಕು. ಈ ಸಿನಿಮಾ ದೊಡ್ಡ ಮಟ್ಟಕ್ಕೆ ಹಿಟ್ ಆಗಲಿ, ಅಕ್ಷಯ್ ಕುಮಾರ್ ಭರ್ಜರಿ ಕಂಬ್ಯಾಕ್ ಮಾಡಲಿ ಅನ್ನೋದು ಎಲ್ಲರ ಅಭಿಲಾಷೆ.
– ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
