ನವದೆಹಲಿ (ಆಗಸ್ಟ್ 02): ಭಾರತದ ಪ್ರಮುಖ ಮನರಂಜನಾ ಸಂಸ್ಥೆಗಳಲ್ಲಿ ಒಂದಾದ ಜೀ ಎಂಟರ್ಟೈನ್ಮೆಂಟ್ ಎಂಟರ್ಪ್ರೈಸಸ್ ಲಿಮಿಟೆಡ್ (ZEEL) ವಿರುದ್ಧ ಭಾರತೀಯ ಷೇರುಪೇಟೆ ನಿಯಂತ್ರಕ ಸಂಸ್ಥೆ ಸೆಬಿ (SEBI) ಕಠಿಣ ಕ್ರಮ ಕೈಗೊಂಡಿದೆ. ಭದ್ರತಾ ನಿಯಮಗಳ ಉಲ್ಲಂಘನೆ ಹಾಗೂ ಕಂಪನಿಯ ಆಸ್ತಿಯನ್ನು ಅಗತ್ಯ ಅನುಮೋದನೆ ಇಲ್ಲದೆ ಸಾಲಕ್ಕೆ ಅಡಮಾನವಿಟ್ಟ ಆರೋಪಕ್ಕೆ ಸಂಬಂಧಿಸಿದಂತೆ ಸೆಬಿ ಒಟ್ಟು 1.48 ಕೋಟಿ ರೂಪಾಯಿ ದಂಡ ವಿಧಿಸಿದ್ದು, ಕಂಪನಿ ಹಾಗೂ ಅದರ ಪ್ರಮುಖ ಅಧಿಕಾರಿಗಳ ಮೇಲೆ ಷೇರು ಮಾರುಕಟ್ಟೆ ನಿಷೇಧವನ್ನೂ ಹೇರಿದೆ.
- ಸೆಬಿಯಿಂದ ZEELಗೆ 1.48 ಕೋಟಿ ರೂ. ದಂಡ
- 726 ಕೋಟಿ ರೂ. ಸಾಲಕ್ಕೆ ಕಂಪನಿಯ ಆಸ್ತಿ ಅಡಮಾನ ಇಟ್ಟ ಆರೋಪ
- ಸುಭಾಷ್ ಚಂದ್ರ ಹಾಗೂ ಪುನೀತ್ ಗೋಯೆಂಕಾಗೆ 1 ವರ್ಷದ ಷೇರು ಮಾರುಕಟ್ಟೆ ನಿಷೇಧ
- ZEELಗೆ 2 ತಿಂಗಳ ಸೆಕ್ಯುರಿಟೀಸ್ ಮಾರುಕಟ್ಟೆ ನಿಷೇಧ
ಏನಿದು ಪ್ರಕರಣ?
ಸೆಬಿ ತನಿಖೆಯ ಪ್ರಕಾರ, ಹೈದರಾಬಾದ್ನಲ್ಲಿರುವ ಜೀ ಎಂಟರ್ಟೈನ್ಮೆಂಟ್ಗೆ ಸೇರಿದ ಭೂಮಿಯನ್ನು, ಎಸೆಲ್ ಗ್ರೂಪ್ನ ಇತರೆ ಕಂಪನಿಗಳು ಪಡೆದಿದ್ದ ಸುಮಾರು 726 ಕೋಟಿ ರೂಪಾಯಿ ಸಾಲಕ್ಕೆ ಹೆಚ್ಚುವರಿ ಭದ್ರತೆ (Collateral) ಯಾಗಿ ಬಳಸಲಾಗಿತ್ತು. ಈ ಕ್ರಮಕ್ಕೆ ಅಗತ್ಯವಿರುವ ಷೇರುದಾರರು ಅಥವಾ ಆಡಿಟ್ ಸಮಿತಿಯ ಅನುಮೋದನೆ ಪಡೆಯಲಾಗಿಲ್ಲ ಎಂಬುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ಈ ಪ್ರಕರಣದ ಕುರಿತು ಸುದೀರ್ಘ ತನಿಖೆ ನಡೆಸಿದ ಸೆಬಿ ಸುಮಾರು 150 ಪುಟಗಳ ಅಂತಿಮ ಆದೇಶ ಹೊರಡಿಸಿದ್ದು, ಕಂಪನಿಯ ಆಸ್ತಿಯನ್ನು ಹೂಡಿಕೆದಾರರ ಹಿತಾಸಕ್ತಿಗೆ ವಿರುದ್ಧವಾಗಿ ಬಳಸಲಾಗಿದೆ ಎಂದು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ. ಪ್ರಮೋಟರ್ಗಳ ಹಿತಾಸಕ್ತಿಗಾಗಿ ಕಂಪನಿಯ ಆಸ್ತಿಯನ್ನು ದುರುಪಯೋಗಪಡಿಸಿಕೊಂಡಿರುವುದು ನಿಯಮ ಉಲ್ಲಂಘನೆಯಾಗಿದೆ ಎಂದು ಸೆಬಿ ತನ್ನ ಆದೇಶದಲ್ಲಿ ತಿಳಿಸಿದೆ.
ಯಾರಿಗೆ ಎಷ್ಟು ದಂಡ?
ಸೆಬಿ ಆದೇಶದಂತೆ:
- ZEELಗೆ 30 ಲಕ್ಷ ರೂಪಾಯಿ ದಂಡ ಹಾಗೂ 2 ತಿಂಗಳ ಕಾಲ ಸೆಕ್ಯುರಿಟೀಸ್ ಮಾರುಕಟ್ಟೆಯಿಂದ ನಿಷೇಧ.
- ಸಂಸ್ಥಾಪಕ ಹಾಗೂ ಚೇರ್ಮನ್ ಎಮೆರಿಟಸ್ ಸುಭಾಷ್ ಚಂದ್ರ ಅವರಿಗೆ 60 ಲಕ್ಷ ರೂಪಾಯಿ ದಂಡ ಮತ್ತು 1 ವರ್ಷದ ಮಾರುಕಟ್ಟೆ ನಿಷೇಧ.
- ವ್ಯವಸ್ಥಾಪಕ ನಿರ್ದೇಶಕ ಹಾಗೂ ಸಿಇಒ ಪುನೀತ್ ಗೋಯೆಂಕಾ ಅವರಿಗೆ 58 ಲಕ್ಷ ರೂಪಾಯಿ ದಂಡ ಮತ್ತು 1 ವರ್ಷದ ನಿಷೇಧ ವಿಧಿಸಲಾಗಿದೆ.
ಷೇರುಗಳ ಮೇಲೆ ಪರಿಣಾಮ
ಸೆಬಿಯ ಕ್ರಮದ ಬಳಿಕ ಜೀ ಎಂಟರ್ಟೈನ್ಮೆಂಟ್ ಷೇರುಗಳ ಮೇಲೆ ಒತ್ತಡ ಹೆಚ್ಚಾಗುವ ಸಾಧ್ಯತೆ ಇದೆ. ಪ್ರಸ್ತುತ ಕಂಪನಿಯ ಷೇರು ಬೆಲೆ 114.80 ರೂಪಾಯಿ ಇದ್ದು, ಮಾರುಕಟ್ಟೆ ಆರಂಭವಾದ ನಂತರ ಮತ್ತಷ್ಟು ಕುಸಿತ ಕಂಡುಬರುವ ಸಾಧ್ಯತೆ ಇದೆ ಎಂದು ಮಾರುಕಟ್ಟೆ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಇದೇ ವೇಳೆ, ಜೀ ಮೀಡಿಯಾ ಕಾರ್ಪೊರೇಷನ್ ಷೇರು ಬೆಲೆ 7.54 ರೂಪಾಯಿ ಇದ್ದು, ಕಳೆದ ಕೆಲವು ವರ್ಷಗಳಿಂದ ಕಳಪೆ ಪ್ರದರ್ಶನ ಮುಂದುವರಿಸಿದೆ.
