Bigg Boss Kannada 12 ದಿನೇದಿನೇ ರೋಚಕ ತಿರುವುಗಳನ್ನು ಪಡೆಯುತ್ತಿದ್ದು, ಸ್ಪರ್ಧಿಗಳ ನಡುವಿನ ಮಾತಿನ ಚಕಮಕಿ ಹಾಗೂ ಹೊರಗಿನ ಪ್ರತಿಕ್ರಿಯೆಗಳು ಸಾಕಷ್ಟು ಚರ್ಚೆಗೆ ಕಾರಣವಾಗುತ್ತಿವೆ. ಈ ಸೀಸನ್ನಲ್ಲಿ ವೀಕ್ಷಕರ ಗಮನ ಸೆಳೆದ ಸ್ಪರ್ಧಿಗಳಲ್ಲಿ ಗಿಲ್ಲಿ ನಟ ಪ್ರಮುಖ ಸ್ಥಾನ ಪಡೆದಿದ್ದಾರೆ. ಅವರ ಆಟ, ಮಾತಿನ ಶೈಲಿ ಹಾಗೂ ಕಾಮಿಡಿ ಟೈಮಿಂಗ್ ಅವರಿಗೆ ದೊಡ್ಡ ಫ್ಯಾನ್ಬೇಸ್ ಅನ್ನು ಕಟ್ಟಿಕೊಟ್ಟಿದೆ. ಇತ್ತೀಚೆಗೆ ಸೋಷಿಯಲ್ ಮೀಡಿಯಾ ತೆರೆದರೆ ಸಾಕು, ಗಿಲ್ಲಿ ನಟನ ರೀಲ್ಸ್, ವಿಡಿಯೋಗಳು, ಫ್ಯಾನ್ ಎಡಿಟ್ಗಳು ಎಲ್ಲೆಡೆ ವೈರಲ್ ಆಗುತ್ತಿವೆ.
ಗಿಲ್ಲಿ ಕ್ರೇಜ್ ಇಷ್ಟರ ಮಟ್ಟಿಗೆ ಹೆಚ್ಚಾಗಿದೆ ಎಂದರೆ, ಮನೆಯಿಂದ ಎಲಿಮಿನೇಟ್ ಆದ ಸ್ಪರ್ಧಿಗಳೂ ಕೂಡ ಸಂದರ್ಶನಗಳಲ್ಲಿ ಗಿಲ್ಲಿ ಬಗ್ಗೆ ಮಾತನಾಡದೇ ಇರಲಾರರು. ವಿಶೇಷವಾಗಿ ಸೂರಜ್ ಎಲಿಮಿನೇಟ್ ಆದ ಬಳಿಕ ನೀಡಿದ ಹಲವು ಸಂದರ್ಶನಗಳಲ್ಲಿ ಗಿಲ್ಲಿ ಆಟವನ್ನು ಹಾಡಿ ಹೊಗಳಿರುವುದು ಅಭಿಮಾನಿಗಳ ಗಮನ ಸೆಳೆದಿತ್ತು. ಇಂತಹ ಸಂದರ್ಭದಲ್ಲೇ ಮಾಳು ನೀಡಿದ ಹೇಳಿಕೆಗಳು ಗಿಲ್ಲಿ ಫ್ಯಾನ್ಸ್ಗಳ ಕೋಪಕ್ಕೆ ಕಾರಣವಾಗಿವೆ.
ಮನೆದಿಂದ ಹೊರಬಂದ ನಂತರ ಮಾಳು ಅವರು ಗಿಲ್ಲಿ ಕುರಿತು ಮಾತನಾಡುತ್ತಾ, “ಕಾಮಿಡಿ ಮಾಡೋದಕ್ಕೂ ಒಂದು ಮಿತಿ ಇರಬೇಕು. ಒಬ್ಬ ವ್ಯಕ್ತಿ ಒಂದೆರಡು ಬಾರಿ ಹೇಳಿಸಿಕೊಂಡರೆ ಸರಿ, ಆದರೆ ಹತ್ತು ಸಲ ಹೇಳಿಸಿಕೊಂಡರೆ ಅವನು ಮನುಷ್ಯನೇ ಅಲ್ಲ” ಎಂದು ಹೇಳಿದ್ದಾರೆ. ಇದಲ್ಲದೆ, “ಒಬ್ಬರ ಮನಸ್ಸಿಗೆ ನೋವಾಗುವಂತೆ ಕಾಮಿಡಿ ಮಾಡಬಾರದು. ಇನ್ನೊಬ್ಬರನ್ನು ಕೀಳಾಗಿ ತೋರಿಸಿ ನಗು ತರಿಸುವುದು ಕಾಮಿಡಿ ಅಲ್ಲ” ಎಂಬ ಅಭಿಪ್ರಾಯವನ್ನೂ ವ್ಯಕ್ತಪಡಿಸಿದ್ದರು.
ಮಾಳು ಹೇಳಿಕೆಯ ಮತ್ತೊಂದು ಹೇಳಿಕೆ ವಿವಾದ ಹುಟ್ಟುಹಾಕಿತ್ತು. “ರಘು ಸರ್ ಬಗ್ಗೆ ಕೀಳಾಗಿ ಮಾತನಾಡಿದ್ದು ನನಗೆ ತುಂಬಾ ನೋವು ಕೊಟ್ಟಿತ್ತು. ಪ್ರತಿಯೊಬ್ಬರಿಗೂ ಅವರದ್ದೇ ಆದ ಮೌಲ್ಯ ಇರುತ್ತದೆ. ಸ್ವಂತಿಕೆ ಇರಬೇಕು, ಇನ್ನೊಬ್ಬರ ಕಾಲೆಳೆದು.. ಮೇಲೆ ಬರೋದು ಸರಿಯಲ್ಲ” ಎಂದು ಅವರು ಹೇಳಿದ್ದಾರೆ. ಈ ಮಾತುಗಳನ್ನು ಗಿಲ್ಲಿ ಅಭಿಮಾನಿಗಳು ತಮ್ಮ ಫೇವರಿಟ್ ಸ್ಪರ್ಧಿಯ ಮೇಲಿನ ಟೀಕೆ ಎಂದು ಭಾವಿಸಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ಭಾರೀ ಆಕ್ರೋಶ ವ್ಯಕ್ತಪಡಿಸಿದರು.
ಇದಷ್ಟೇ ಅಲ್ಲ, ಮಾಳು ಅವರು “ಈ ಬಾರಿ ಕಪ್ ನನಗೆ ಸಿಗಬೇಕಿತ್ತು, ಉಳಿದವರು ಅರ್ಹರಲ್ಲ” ಹಾಗೂ “ನನ್ನ ಎಲಿಮಿನೇಷನ್ನಿಂದ ಉತ್ತರ ಕರ್ನಾಟಕ ಅಳುತ್ತಿದೆ” ಎಂದು ಹೇಳಿದ ಮಾತುಗಳೂ ವೈರಲ್ ಆಗಿದ್ದವು. ಈ ಹೇಳಿಕೆಗಳು ಅವರಿಗೆ ವಿರುದ್ಧವಾದ ಅಭಿಪ್ರಾಯಗಳನ್ನು ಇನ್ನಷ್ಟು ಹೆಚ್ಚಿಸಿದ್ದವು.
ಇತ್ತೀಚೆಗೆ ಮಾಳು ಅವರು ಒಂದು ಸಾರ್ವಜನಿಕ ಕಾರ್ಯಕ್ರಮಕ್ಕೆ ಹಾಜರಾದಾಗ ಈ ಎಲ್ಲ ವಿಚಾರಗಳ ಪರಿಣಾಮ ವೇದಿಕೆಯ ಮೇಲೆಯೇ ಕಾಣಿಸಿಕೊಂಡಿತ್ತು. ಮಾಳು ವೇದಿಕೆ ಏರುತ್ತಿದ್ದಂತೆ ಅಲ್ಲಿದ್ದ ಜನರು ಜೋರಾಗಿ ‘ಗಿಲ್ಲಿ, ಗಿಲ್ಲಿ’ ಎಂದು ಕೂಗಿದ್ದಾರೆ. ಈ ಅಚಾನಕ್ ಪ್ರತಿಕ್ರಿಯೆಯಿಂದ ಮಾಳು ಭಾರೀ ಮುಜುಗರ ಅನುಭವಿಸಿದ ವಿಡಿಯೋ ಈಗ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ವಿಡಿಯೋಗೆ ಪ್ರತಿಕ್ರಿಯಿಸುತ್ತಿರುವ ನೆಟ್ಟಿಗರು, “ಅವನು ಕರ್ನಾಟಕದಲ್ಲಾಗಲಿ ಅಥವಾ ನೆರೆಯ ರಾಜ್ಯಗಳಲ್ಲಾಗಲಿ ಎಲ್ಲಿಗೆ ಹೋದರೂ ಗಿಲ್ಲಿ ಹೆಸರು ಅವನ ಕಿವಿಯಲ್ಲಿ ಪ್ರತಿಧ್ವನಿಸುತ್ತೇ ಇರುತ್ತದೆ” ಎಂದು ಕಾಮೆಂಟ್ ಮಾಡುತ್ತಿದ್ದಾರೆ. ಕೆಲವರು ಇದನ್ನು ಅಭಿಮಾನಿಗಳ ಅತಿರೇಕ ಎಂದರೆ, ಇನ್ನೂ ಕೆಲವರು ಮಾಳು ಹೇಳಿಕೆಗಳೇ ಈ ಪರಿಸ್ಥಿತಿಗೆ ಕಾರಣ ಎಂದು ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರೆ.
