ವಷಿಂಗ್ಟನ್: ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಜ್ವಾಲೆ ಧಗಧಗಿಸುತ್ತಿರುವ ಬೆನ್ನಲ್ಲೇ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತಮ್ಮ ದಶಕಗಳಷ್ಟು ಹಳೆಯ ನಿಲುವನ್ನು ಮತ್ತೆ ಮುನ್ನೆಲೆಗೆ ತಂದಿದ್ದಾರೆ. ಇರಾನ್ನ ತೈಲ ಸ್ಥಾವರಗಳನ್ನು ಅಮೆರಿಕ ತನ್ನ ನಿಯಂತ್ರಣಕ್ಕೆ ತೆಗೆದುಕೊಳ್ಳಬೇಕು ಎಂಬ ತಮ್ಮ 1987ರ ಹಳೆಯ ಸಂದರ್ಶನದ ಕ್ಲಿಪ್ ಅನ್ನು ಹಂಚಿಕೊಳ್ಳುವ ಮೂಲಕ, ಇರಾನ್ ವಿರುದ್ಧದ ಹೋರಾಟದಲ್ಲಿ ತಮ್ಮ ಮುಂದಿನ ನಡೆ ಏನು ಎಂಬುದನ್ನು ಅವರು ಸ್ಪಷ್ಟಪಡಿಸಿದ್ದಾರೆ.
1987ರಲ್ಲೇ ಇರಾನ್ ಕೈವಶಕ್ಕೆ ಆಗ್ರಹಿಸಿದ್ದ ಟ್ರಂಪ್
1987ರಲ್ಲಿ ಎಬಿಸಿಯ ’20/20′ ಕಾರ್ಯಕ್ರಮದಲ್ಲಿ ಖ್ಯಾತ ಪತ್ರಕರ್ತೆ ಬಾರ್ಬರಾ ವಾಲ್ಮರ್ಸ್ ಅವರೊಂದಿಗೆ ಟ್ರಂಪ್ ನಡೆಸಿದ್ದ ಸಂದರ್ಶನ ಈಗ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಆ ಸಂದರ್ಭದಲ್ಲಿ ಕೇವಲ 41 ವರ್ಷದ ಯುವ ಉದ್ಯಮಿಯಾಗಿದ್ದ ಟ್ರಂಪ್, ಇರಾನ್-ಇರಾಕ್ ಯುದ್ಧದ ವೇಳೆ ಅಮೆರಿಕ ಅನುಸರಿಸುತ್ತಿದ್ದ ಮೃದು ಧೋರಣೆಯನ್ನು ಟೀಕಿಸಿದ್ದರು. ನಾವು ಇರಾನ್ ಒಳಗೆ ನುಗ್ಗಿ ಅವರ ತೈಲ ನಿಕ್ಷೇಪಗಳನ್ನು ಏಕೆ ವಶಪಡಿಸಿಕೊಳ್ಳಬಾರದು ? ಎಂದು ಅಂದೇ ಪ್ರಶ್ನಿಸಿದ್ದರು. ನೀವು ದೌರ್ಬಲ್ಯ ತೋರಿಸಿದರೆ ತೊಂದರೆಗೆ ಸಿಲುಕುತ್ತೀರಿ, ಶತ್ರು ರಾಷ್ಟ್ರದ ತೈಲವನ್ನು ವಶಕ್ಕೆ ಪಡೆದು ನಿಮ್ಮ ನಷ್ಟವನ್ನು ಭರ್ತಿ ಮಾಡಿಕೊಳ್ಳಿ ಎಂಬ ಅವರ ಅಂದಿನ ಮಾತುಗಳು ಈಗಿನ ಯುದ್ಧದ ಸಂದರ್ಭದಲ್ಲಿ ಹೊಸ ಅರ್ಥ ಪಡೆದುಕೊಂಡಿವೆ.
— Rapid Response 47 (@RapidResponse47) March 30, 2026
ಇರಾನ್ ತೈಲದ ಮೇಲೆ ಟ್ರಂಪ್ ಕಣ್ಣು
ಫೈನಾನ್ಸಿಯಲ್ ಟೈಮ್ಸ್ಗೆ ನೀಡಿರುವ ಇತ್ತೀಚಿನ ಸಂದರ್ಶನದಲ್ಲಿ ಟ್ರಂಪ್ ಅವರು, ಇರಾನ್ನ ಪ್ರಮುಖ ತೈಲ ರಫ್ತು ಕೇಂದ್ರವಾದ ಖಾರ್ಗ್ ದ್ವೀಪವನ್ನು (Kharg Island) ವಶಪಡಿಸಿಕೊಳ್ಳುವುದು ತಮ್ಮ ಆದ್ಯತೆ ಎಂದು ಹೇಳಿದ್ದಾರೆ. ಈ ವರ್ಷದ ಆರಂಭದಲ್ಲಿ ವೆನೆಜುವೆಲಾದ ಅಧ್ಯಕ್ಷ ನಿಕೋಲಸ್ ಮಡುರೊ ಅವರ ಬಂಧನದ ನಂತರ ಅಲ್ಲಿನ ತೈಲ ಕ್ಷೇತ್ರದ ಮೇಲೆ ಅಮೆರಿಕ ನಿಯಂತ್ರಣ ಸಾಧಿಸಿದ ಉದಾಹರಣೆಯನ್ನು ನೀಡಿದ ಟ್ರಂಪ್, ಇರಾನ್ ವಿಷಯದಲ್ಲೂ ಅದೇ ಮಾದರಿಯನ್ನು ಅನುಸರಿಸುವ ಸುಳಿವು ನೀಡಿದ್ದಾರೆ. ಇರಾನ್ನಿಂದ ಅಮೆರಿಕ ಬಹಳಷ್ಟು ಕಳೆದುಕೊಂಡಿದೆ, ಈಗ ಅದನ್ನು ವಾಪಸ್ ಪಡೆಯುವ ಸಮಯ ಬಂದಿದೆ ಎಂಬುದು ಟ್ರಂಪ್ ಅಭಿಪ್ರಾಯವಾಗಿದೆ.
ಇರಾನ್ ವಿರುದ್ಧ ಅಮೆರಿಕ ಮತ್ತು ಇಸ್ರೇಲ್ ನಡೆಸುತ್ತಿರುವ ಯುದ್ಧದ ಪರಿಣಾಮ ಜಾಗತಿಕ ಆರ್ಥಿಕತೆಯ ಮೇಲೆ ಬೀರುತ್ತಿದೆ. ಟ್ರಂಪ್ ಅವರ ಈ ಪ್ರಚೋದನಾಕಾರಿ ಹೇಳಿಕೆಗಳ ಬೆನ್ನಲ್ಲೇ, ಏಷ್ಯಾ ಮಾರುಕಟ್ಟೆಯಲ್ಲಿ ಬ್ರೆಂಟ್ ಕಚ್ಚಾ ತೈಲದ ಬೆಲೆ ಬ್ಯಾರೆಲ್ಗೆ $116 ದಾಟಿದೆ. ಇದು ಇತ್ತೀಚಿನ ವರ್ಷಗಳಲ್ಲೇ ಗರಿಷ್ಠ ಮಟ್ಟವಾಗಿದ್ದು, ತೈಲ ಆಮದು ಮಾಡಿಕೊಳ್ಳುವ ದೇಶಗಳಲ್ಲಿ ಬೆಲೆ ಏರಿಕೆಯ ಭೀತಿ ಶುರುವಾಗಿದೆ.
ಟ್ರಂಪ್ ಅವರ ಮಾತುಗಳಿಗೆ ಪೂರಕವಾಗಿ ಅಮೆರಿಕದ ರಕ್ಷಣಾ ಇಲಾಖೆ ಪೆಂಟಗನ್ ಕೂಡ ಸನ್ನದ್ಧವಾಗುತ್ತಿದೆ. ಭೂಪ್ರದೇಶವನ್ನು ವಶಪಡಿಸಿಕೊಳ್ಳುವ ಮತ್ತು ಹಿಡಿದಿಟ್ಟುಕೊಳ್ಳುವ ಕಾರ್ಯಾಚರಣೆಗಾಗಿ ವಿಶೇಷ ತರಬೇತಿ ಪಡೆದ ಸುಮಾರು 10,000 ಸೇನಾ ಸಿಬ್ಬಂದಿಯನ್ನು ನಿಯೋಜಿಸಲು ಆದೇಶಿಸಲಾಗಿದೆ. ಈಗಾಗಲೇ 3,500 ಸೈನಿಕರು ಯುದ್ಧಭೂಮಿಗೆ ಆಗಮಿಸಿದ್ದು, ಇದರಲ್ಲಿ 2,200 ಮಂದಿ ನೌಕಾಪಡೆಯ ಕಮಾಂಡೋಗಳಾಗಿದ್ದಾರೆ. 82ನೇ ವಾಯುಗಾಮಿ ವಿಭಾಗದ ಸಾವಿರಾರು ಯೋಧರು ಕೂಡ ಶೀಘ್ರದಲ್ಲೇ ಕಾರ್ಯಪ್ರವೃತ್ತರಾಗಲಿದ್ದಾರೆ.
ಒಟ್ಟಾರೆಯಾಗಿ, ಡೊನಾಲ್ಡ್ ಟ್ರಂಪ್ ಅವರ ಈ ತೈಲ ರಾಜಕೀಯವು ಮಧ್ಯಪ್ರಾಚ್ಯದ ಬಿಕ್ಕಟ್ಟನ್ನು ಇನ್ನಷ್ಟು ಸಂಕೀರ್ಣಗೊಳಿಸಿದೆ. ಇದು ಇರಾನ್ ಜೊತೆಗಿನ ಪೂರ್ಣ ಪ್ರಮಾಣದ ಯುದ್ಧಕ್ಕೆ ನಾಂದಿ ಹಾಡುತ್ತದೆಯೇ ಅಥವಾ ಅಮೆರಿಕ ತೈಲ ನಿಯಂತ್ರಣ ಸಾಧಿಸುವಲ್ಲಿ ಯಶಸ್ವಿಯಾಗುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
