ಪಶ್ಚಿಮ ಏಷ್ಯಾದಲ್ಲಿ ಇರಾನ್-ಅಮೆರಿಕ-ಇಸ್ರೇಲ್ ಸಂಘರ್ಷ ತೀವ್ರಗೊಂಡಿದ್ದು, ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮುಂದೆ ಇರುವುದು ಮೂರು ಪ್ರಮುಖ ಆಯ್ಕೆಗಳು. ಇರಾನ್ನ ಕ್ಷಿಪಣಿ ಮತ್ತು ಡ್ರೋನ್ ದಾಳಿಗಳು ಇಸ್ರೇಲ್, ಅಮೆರಿಕ ನೌಕಾ ನೆಲೆಗಳು ಮತ್ತು ಗಲ್ಫ್ ದೇಶಗಳ ಮೇಲೆ ಮುಂದುವರಿದಿದ್ದು, ಹಾರ್ಮುಜ್ ಜಲಸಂಧಿಯಲ್ಲಿ ತೈಲ ಸಾಗಣೆಗೆ ಭಾರೀ ಅಡಚಣೆ ಉಂಟಾಗಿದೆ. ಇದರಿಂದ ಜಾಗತಿಕ ತೈಲ ಬೆಲೆಗಳು ಗಗನಕ್ಕೇರಿವೆ. ಈ ಸಂಕಷ್ಟದಲ್ಲಿ ಟ್ರಂಪ್ ಅವರ ಮುಂದಿರುವ ಮೂರು ಆಯ್ಕೆಗಳು ಇವು:
ಆಯ್ಕೆ 1: ಯುದ್ಧದಿಂದ ಯೂಟರ್ನ್, ಇರಾನ್ನಿಂದ ಹಿಂದೆ ಸರಿಯುವುದು?
ಇರಾನ್ನ ಅಗ್ಗದ ಕ್ಷಿಪಣಿ ಮತ್ತು ಡ್ರೋನ್ ದಾಳಿಗಳಿಗೆ ಅಮೆರಿಕದ ಇಂಟರ್ಸೆಪ್ಟರ್ ಮಿಸೈಲ್ಗಳು ಸಾಕಷ್ಟು ಉತ್ತರ ನೀಡಲು ಸಾಧ್ಯವಾಗಿಲ್ಲ. ನೌಕಾ ಮತ್ತು ವಾಯು ನೆಲೆಗಳು ಧ್ವಂಸಗೊಂಡಿವೆ. ಇಸ್ರೇಲ್ ವಿರುದ್ಧವೂ ಇರಾನ್ ಭೀಕರ ದಾಳಿ ನಡೆಸುತ್ತಿದೆ. ಈ ಹಿನ್ನೆಲೆಯಲ್ಲಿ ಯುದ್ಧ ನಿಲ್ಲಿಸಿ ಇರಾನ್ನಿಂದ ವಾಪಸ್ ಆಗುವುದು ಒಂದು ಆಯ್ಕೆಯಾಗಿದೆ. ಆದರೆ ಇದರಿಂದ ಪಶ್ಚಿಮ ಏಷ್ಯಾದ ನಿಯಂತ್ರಣ ಅಮೆರಿಕ ಕಳೆದುಕೊಳ್ಳಬಹುದು. ಇರಾನ್, ಹೆಜ್ಬೊಲ್ಲಾ, ಹೌತಿ ಮತ್ತು ಹಮಾಸ್ ವಿರುದ್ಧ ಇಸ್ರೇಲ್ ಏಕಾಂಗಿ ಸಮರ ಮಾಡಬೇಕಾಗುತ್ತದೆ. ರಷ್ಯಾ ಮತ್ತು ಚೀನಾ ಎದುರು ಅಮೆರಿಕ ದುರ್ಬಲವಾಗಿ ಕಾಣುವ ಭಯವಿದೆ. ಅಮೆರಿಕದ ಪೆಟ್ರೋ-ಡಾಲರ್ ಆರ್ಥಿಕತೆಗೆ ದೊಡ್ಡ ಹೊಡೆತ ಬೀಳಬಹುದು.
ಆಯ್ಕೆ 2: ಇರಾನ್ ನೆಲದಲ್ಲಿ ಅಮೆರಿಕ ಯೋಧರು?
ಅಮೆರಿಕ ಭೂ ಸೇನಾ ಯೋಧರಿಂದ ಇರಾನ್ ಮೇಲೆ ನೇರ ಆಕ್ರಮಣ ಮಾಡುವುದು ಎರಡನೇ ಆಯ್ಕೆ. ಆದರೆ 9 ಕೋಟಿ ಜನಸಂಖ್ಯೆಯ ದೇಶದಲ್ಲಿ ಭೂ ಯುದ್ಧ ಸಾಧ್ಯವೇ? ಗುಡ್ಡಗಾಡು ಮತ್ತು ನಗರ ಪ್ರದೇಶಗಳಲ್ಲಿ ಅಮೆರಿಕ ಸೇನೆ ಕಾದಾಡುವುದು ಅತ್ಯಂತ ಕಷ್ಟಕರ. ಅಯಾತೊಲ್ಲಾ ಹತ್ಯೆಯ ನಂತರ IRGC ಮತ್ತು ದೇಶಭಕ್ತ ಜನತೆ ಆತ್ಮಾಹುತಿಗೆ ಸಿದ್ಧರಾಗಿದ್ದಾರೆ. ಅಫ್ಘಾನಿಸ್ತಾನದಲ್ಲಿ 20 ವರ್ಷ ಕಾದಾಡಿ 2.3 ಟ್ರಿಲಿಯನ್ ಡಾಲರ್ ವೆಚ್ಚ ಮಾಡಿ ಸಾವಿರಾರು ಸೈನಿಕರನ್ನು ಕಳೆದುಕೊಂಡ ಅಮೆರಿಕಕ್ಕೆ ಇದು ಮತ್ತೊಂದು ಕರಾಳ ಅನುಭವವಾಗಬಹುದು.
ಆಯ್ಕೆ 3: ಇರಾನ್ ಮೇಲೆ ಅಣ್ವಸ್ತ್ರ ದಾಳಿ?
ಇರಾನ್ ಮೇಲೆ ಅಣ್ವಸ್ತ್ರ ದಾಳಿ ಮಾಡುವುದು ಮೂರನೇ ಆಯ್ಕೆಯಾಗಿದ್ದರೂ ಸಾಧ್ಯತೆ ಅತಿ ಕಡಿಮೆ. ಟ್ರಂಪ್ರ ಹುಚ್ಚಾಟದ ನಿರ್ಧಾರಗಳ ಬಗ್ಗೆ ಅನೇಕರು ಅಣ್ವಸ್ತ್ರ ಯುದ್ಧದ ಭಯ ವ್ಯಕ್ತಪಡಿಸಿದ್ದಾರೆ. ಅಣು ಬಾಂಬ್ ಬಿದ್ದರೆ ಜಾಗತಿಕ ಮಟ್ಟದಲ್ಲಿ ಅಲ್ಲೋಲ-ಕಲ್ಲೋಲ ಉಂಟಾಗುತ್ತದೆ. ರಷ್ಯಾ ಮತ್ತು ಚೀನಾ ಸುಮ್ಮನೆ ಕೂರುವುದಿಲ್ಲ ರಾತ್ರೋರಾತ್ರಿ ಅಮೆರಿಕ ವಿರುದ್ಧ ನಿಲ್ಲುತ್ತವೆ. ಇಡೀ ವಿಶ್ವ ಅಮೆರಿಕ ವಿರುದ್ಧ ಒಗ್ಗೂಡಬಹುದು. ಮನುಕುಲಕ್ಕೇ ಸರ್ವನಾಶದ ಭೀತಿ ಉಂಟಾಗುತ್ತದೆ.
ಈ ಮೂರು ಆಯ್ಕೆಗಳಲ್ಲಿ ಯಾವುದು ಟ್ರಂಪ್ ಆಯ್ಕೆಮಾಡುತ್ತಾರೆ ಎಂಬುದು ಜಾಗತಿಕ ಆರ್ಥಿಕತೆ ಮತ್ತು ಭದ್ರತೆಗೆ ನಿರ್ಣಾಯಕವಾಗಿದೆ. ಯುದ್ಧ ದೀರ್ಘಕಾಲ ನಡೆದರೆ ತೈಲ ಬೆಲೆಗಳು ಇನ್ನಷ್ಟು ಏರುತ್ತವೆ ಮತ್ತು ಪ್ರಾದೇಶಿಕ ಅಸ್ಥಿರತೆ ಹೆಚ್ಚಾಗುತ್ತದೆ. ರಾಜತಾಂತ್ರಿಕ ಪರಿಹಾರಕ್ಕೆ ಇನ್ನೂ ಅವಕಾಶ ಇದೆಯೇ ಎಂಬುದು ಪ್ರಶ್ನೆಯಾಗಿದೆ.
