ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್
ಚೈತ್ರಾ ಆಚಾರ–ರಿತ್ವಿಕ್ ಕಾಂಬೋನ ಮಾರ್ನಮಿ ಸಿನಿಮಾ ಸದ್ಯ ಎಲ್ಲೆಡೆ ಹೌಸ್ಫುಲ್ ಪ್ರದರ್ಶನ ಕಾಣ್ತಿದೆ. ಚಿತ್ರಪ್ರೇಮಿಗಳಷ್ಟೇ ಅಲ್ಲ, ಚಿತ್ರರಂಗದ ತಾರೆಯರು ಕೂಡ ಸೆಲೆಬ್ರಿಟಿ ಶೋನಲ್ಲಿ ಸಿನಿಮಾ ನೋಡಿ ಶಹಬ್ಬಾಸ್ ಅಂದಿದ್ದಾರೆ.
ಸ್ಯಾಂಡಲ್ವುಡ್ನಲ್ಲಿ ಕರಾವಳಿ ಸೊಗಡಿನ ಚಿತ್ರಗಳು ಸಂಖ್ಯೆ ಜೋರಾಗಿ ಹರಿದು ಬರುತ್ತಿರುವ ಹೊತ್ತಿನಲ್ಲಿ, ಹೊಸ ಅಲೆ ಹುಟ್ಟುಹಾಕಿದ ಸಿನಿಮಾ ಎಂದರೆ ‘ಮಾರ್ನಮಿ’. ರಿತ್ವಿಕ್ ಮಠದ್ ಮತ್ತು ಚೈತ್ರಾ ಆಚಾರ್ ಜೋಡಿಯಾಗಿ ಅಭಿನಯಿಸಿರುವ ಈ ಸಿನಿಮಾ ಫೆಬ್ರವರಿ 20ರಂದು ರಾಜ್ಯಾದ್ಯಂತ ಬಿಡುಗಡೆಯಾಗಿ ಮೊದಲ ದಿನದಿಂದಲೇ ಸಿನಿಪ್ರಿಯರ ಗಮನ ಸೆಳೆಯುತ್ತಿದೆ. ಕರಾವಳಿಯ ಮಣ್ಣು, ಮಾತು, ಮೌಲ್ಯಗಳನ್ನು ಬೆರೆಸಿಕೊಂಡ ಕಥಾಹಂದರದಿಂದ ‘ಮಾರ್ನಮಿ’ ವಿಭಿನ್ನ ಅನುಭವ ನೀಡುತ್ತದೆ ಎಂಬ ಮಾತುಗಳು ಸಿನಿ ವಲಯದಲ್ಲಿ ಕೇಳಿಬರುತ್ತಿವೆ.
ಮಾರ್ನಮಿ ಸೆಲೆಬ್ರಿಟಿ ಶೋ.. ಸ್ಟಾರ್ಸ್ ಕಡೆಯಿಂದ ಮೆಚ್ಚುಗೆ
ಚೈತ್ರಾ-ರಿತ್ವಿಕ್ ಪ್ರೇಮಕಥೆ ವಿತ್ ಕರಾವಳಿ ದಸರಾ ರೋಚಕತೆ
ಕಿಶೋರ್, ಅಂಕಿತಾ ಅಮರ್, ಜಡೇಶ್ ಕೆ ಹಂಪಿ ಏನಂದ್ರು..?
ಇತ್ತೀಚೆಗೆ ಬೆಂಗಳೂರಿನ ಒರಿಯನ್ ಮಾಲ್ ನಲ್ಲಿ ಮಾರ್ನಮಿ ಚಿತ್ರದ ಸೆಲೆಬ್ರಿಟಿ ಶೋ ಆಯೋಜಿಸಲಾಗಿತು. ಕಿರುತೆರೆ ಹಾಗೂ ಹಿರಿತೆರೆ ತಾರೆಯರ ಸಂಭ್ರಮದಿಂದ ಥಿಯೇಟರ್ ಕಂಗೊಳಿಸಿತು. ಜಡೇಶ್ ಹಂಪಿ, ಕಿಶೋರ್, ಡ್ರ್ಯಾಗನ್ ಮಂಜು, ಧರ್ಮಣ್ಣ, ಕಾರ್ತಿಕ್ ಮಹೇಶ್, ಚಂದನ, ನಿರಂಜನ್ ದೇಶಪಾಂಡೆ, ಅಂಕಿತಾ ಅಮರ್, ರೆಮೋಲಾ, ಅರ್ಚನಾ ಕೊಟ್ಟಿಗೆ, ಮೌನ ಗುಡ್ಡೆಮನೆ ಮತ್ತು ಸಂಭಾಷಣೆಕಾರ ಕ್ರಾಂತಿ ಸೇರಿದಂತೆ ಹಲವು ಸ್ಟಾರ್ಸ್ ಭಾಗಿಯಾಗಿ ಸಿನಿಮಾ ವೀಕ್ಷಿಸಿ ತಮ್ಮ ಅಭಿಪ್ರಾಯ ಹಂಚಿಕೊಂಡರು.
ಚೊಚ್ಚಲ ನಿರ್ದೇಶನದಲ್ಲೇ ರಿಶಿತ್ ಶೆಟ್ಟಿ ಮೇಕಿಂಗ್ ಹಾಗೂ ಕಂಟೆಂಟ್ ಎರಡರಲ್ಲೂ ತಮ್ಮದೇ ಛಾಪು ಮೂಡಿಸಿದ್ದಾರೆ. ಕರಾವಳಿ ಭಾಗದ ಆಚರಣೆ, ಹುಲಿವೇಷ, ಮಾರ್ನಮಿ ಹಬ್ಬದ ವೈಭವ, ಅಲ್ಲಿನ ರಾಜಕೀಯ ಅಡಚಣೆಗಳು, ಗಲಾಟೆ, ಅದರ ನಡುವೆಯೇ ಪ್ರೀತಿ–ಆಸೆ–ಕನಸುಗಳ ಹಾದಿ… ಇವೆಲ್ಲವನ್ನು ಸೂಕ್ಷ್ಮವಾಗಿ ಜೋಡಿಸಿರುವ ಕಥೆ ಪ್ರೇಕ್ಷಕರನ್ನು ಸೆಳೆಯುತ್ತದೆ. ಸೆಲೆಬ್ರಿಟಿ ಶೋನಲ್ಲಿ ಸಿಕ್ಕ ಪ್ರತಿಕ್ರಿಯೆ ನೋಡಿದರೆ, ಮುಂದಿನ ದಿನಗಳಲ್ಲಿ ಬಾಕ್ಸ್ ಆಫೀಸ್ನಲ್ಲಿ ‘ಮಾರ್ನಮಿ’ ಗರ್ಜಿಸುವ ಸುಳಿವು ಸಿಕ್ಕಿದೆ.
