ಬೆಂಗಳೂರು: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (KIA) ಭದ್ರತಾ ವ್ಯವಸ್ಥೆಯ ಬಗ್ಗೆ ಗಂಭೀರ ಪ್ರಶ್ನೆ ಎಬ್ಬಿಸುವ ಘಟನೆ ನಡೆದಿದೆ. ವಿಮಾನಗಳ ಹಾರಾಟ ನಿರಂತರವಾಗಿ ನಡೆಯುತ್ತಿದ್ದ ಸಂದರ್ಭದಲ್ಲಿ, ಎರಡು ಬೀದಿ ನಾಯಿಗಳು ರನ್‌ವೇ ಸಮೀಪ ಹಾಗೂ ಟರ್ಮಿನಲ್–2 (T2) ಒಳಭಾಗಕ್ಕೆ ನುಗ್ಗಿದ್ದು, ಪ್ರಯಾಣಿಕರು ಹಾಗೂ ಸಿಬ್ಬಂದಿಯಲ್ಲಿ ಆತಂಕ ಮೂಡಿಸಿದೆ.
ನಡೆದಿದ್ದೇನು?
ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕರ ಓಡಾಟ, ಚೆಕ್-ಇನ್ ಪ್ರಕ್ರಿಯೆ ಮತ್ತು ವಿಮಾನಗಳ ಟೇಕ್-ಆಫ್ ಹಾಗೂ ಲ್ಯಾಂಡಿಂಗ್ ಚಟುವಟಿಕೆಗಳು ಸಕ್ರೀಯವಾಗಿದ್ದ ಸಮಯದಲ್ಲೇ ಈ ಘಟನೆ ಸಂಭವಿಸಿದೆ. ಅತ್ಯಂತ ಹೈಟೆಕ್ ಸೌಲಭ್ಯಗಳು, ಗಟ್ಟಿಯಾದ ಭದ್ರತಾ ವ್ಯವಸ್ಥೆ ಹೊಂದಿರುವ ಟರ್ಮಿನಲ್–2ರ ಒಳಗೆ ಇದ್ದಕ್ಕಿದ್ದಂತೆ ಎರಡು ಬೀದಿ ನಾಯಿಗಳು ಕಾಣಿಸಿಕೊಂಡವು.
ಅಲರ್ಟ್ ಆದ ಸಿಬ್ಬಂದಿ
ನಾಯಿಗಳನ್ನು ಗಮನಿಸಿದ ತಕ್ಷಣವೇ ವಿಮಾನ ನಿಲ್ದಾಣದ ಭದ್ರತಾ ಸಿಬ್ಬಂದಿ ಮತ್ತು ಕಾರ್ಯಾಚರಣೆ ತಂಡವು ತಕ್ಷಣವೇ ಅಲರ್ಟ್ ಆಗಿದ್ದು, ಯಾವುದೇ ಅನಾಹುತ ಸಂಭವಿಸದಂತೆ ತಕ್ಷಣ ಕಾರ್ಯಪ್ರವೃತ್ತರಾದ ಸಿಬ್ಬಂದಿಗಳು, ಪ್ರಯಾಣಿಕರನ್ನು ಸುರಕ್ಷಿತವಾಗಿ ದೂರವಿಟ್ಟು, ನಾಯಿಗಳನ್ನು ಹಿಡಿಯುವ ಕಾರ್ಯಾಚರಣೆ ಆರಂಭಿಸಿದರು. ಕೆಲ ಸಮಯದ ಶ್ರಮದ ನಂತರ, ಆ ಎರಡು ಬೀದಿ ನಾಯಿಗಳನ್ನು ಸೆರೆಹಿಡಿದು ವಿಮಾನ ನಿಲ್ದಾಣದ ಆವರಣದ ಹೊರಗೆ ಕಳುಹಿಸುವಲ್ಲಿ ಸಿಬ್ಬಂದಿ ಯಶಸ್ವಿಯಾದರು.
ಈ ಮಧ್ಯೆ, ಕೆಲ ಹೊತ್ತು ವಿಮಾನ ಹಾರಾಟದ ಪ್ರಕ್ರಿಯೆಯಲ್ಲಿ ಎಚ್ಚರಿಕೆಯ ಕ್ರಮವಾಗಿ ವ್ಯತ್ಯಯ ಉಂಟಾದರೂ, ಯಾವುದೇ ಅಪಘಾತ ಅಥವಾ ಹಾನಿ ಸಂಭವಿಸಿಲ್ಲ.
ಕಾರಣವೇನು?
ಕೆಂಪೇಗೌಡ ವಿಮಾನ ನಿಲ್ದಾಣವು ಹಳ್ಳಿಗಳು ಹಾಗೂ ಕಾಡು ಪ್ರದೇಶಗಳಿಗೆ ಸಮೀಪದಲ್ಲಿರುವುದು ಇಂತಹ ಘಟನೆಗಳಿಗೆ ಪ್ರಮುಖ ಕಾರಣ ಎನ್ನಲಾಗುತ್ತಿದೆ. ವಿಮಾನ ನಿಲ್ದಾಣದ ಸುತ್ತಮುತ್ತಲಿನ ಬೇಲಿಗಳಲ್ಲಿರುವ ಸಣ್ಣ ರಂಧ್ರಗಳು, ನಿರ್ವಹಣಾ ಗೇಟ್‌ಗಳು ಅಥವಾ ತೆರೆಯಲ್ಪಟ್ಟ ಮಾರ್ಗಗಳ ಮೂಲಕ ಈ ಬೀದಿ ನಾಯಿಗಳು ಒಳನುಗ್ಗಿರಬಹುದೆಂದು ಶಂಕಿಸಲಾಗಿದೆ.
ಈ ಹಿಂದೆಯೂ ಹಲವು ಬಾರಿ ರನ್‌ವೇ ಮೇಲೆ ನಾಯಿಗಳು ಕಾಣಿಸಿಕೊಂಡಿರುವ ಪ್ರಕರಣಗಳು ವರದಿಯಾಗಿದ್ದು, ಕೆಲವು ಸಂದರ್ಭಗಳಲ್ಲಿ ವಿಮಾನಗಳ ಲ್ಯಾಂಡಿಂಗ್ ಮತ್ತು ಟೇಕ್-ಆಫ್ ವಿಳಂಬವಾಗಿದ್ದ ಉದಾಹರಣೆಗಳಿವೆ.
ಬಿಐಎಎಲ್‌ನ ಪ್ರತಿಕ್ರಿಯೆ
ಈ ಘಟನೆ ಬೆಳಕಿಗೆ ಬಂದ ಬಳಿಕ, ಬೆಂಗಳೂರು ಇಂಟರ್ನ್ಯಾಷನಲ್ ಏರ್‌ಪೋರ್ಟ್ ಲಿಮಿಟೆಡ್ (BIAL) ಅಧಿಕಾರಿಗಳು ತಕ್ಷಣವೇ ಭದ್ರತಾ ವ್ಯವಸ್ಥೆಯನ್ನು ಮತ್ತಷ್ಟು ಬಿಗಿಗೊಳಿಸುವ ಕ್ರಮಗಳನ್ನು ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ. ವಿಮಾನ ನಿಲ್ದಾಣದ ಸುತ್ತಲಿನ ಬೇಲಿಗಳ ಪರಿಶೀಲನೆ, ತೆರೆದಿದ್ದ ಮಾರ್ಗಗಳನ್ನು ಮುಚ್ಚುವುದು ಹಾಗೂ ಪ್ರಾಣಿಗಳ ಪ್ರವೇಶ ತಡೆಯಲು ಹೆಚ್ಚುವರಿ ಕ್ರಮಗಳನ್ನು ಜಾರಿಗೆ ತರಲಾಗುವುದು ಎಂದು ಮಾಹಿತಿ ನೀಡಿದ್ದಾರೆ.
